Fesoasoani i lsi Ina ia Vivii iā Ieova

¹ E iai se feʻau tāua ua talaʻiina atu nei i tagata i le lalolagi aoao: “Ia outou matataʻu i le Atua, ma avatu ia te ia le viiga, auā ua oo mai le itu aso o lana faamasinoga; ma ia outou ifo i le na faia le lagi, ma le fanua, ma le sami, atoa ma puna o vai.” (Faaa. 14:6, 7) O se faaeaga mo i tatou le faia o se sao i lenā talaʻiga. O le ā e tatau ona iloa e tagata e uiga iā Ieova ina ia matataʻu ai ma tapuaʻi atu iā te ia?

² Lona Suafa: E tatau ona iloa e tagata le suafa o le Atua moni e toʻatasi ina ia faaesea ai o ia mai i le tele o atua pepelo o loo tapuaʻia i aso nei. (Teu. 4:35; 1 Kori. 8:5, 6) O le mea moni, e sili atu i le 7,000 taimi ua faaaogā ai e tusitala o le Tusi Paia le suafa silisili o Ieova. I lo tatou faautauta lelei i le filifilia o le taimi tatau e faailoa atu ai le suafa o le Atua, e lē tatau ona tatou natia pe e lē faaaogāina lea suafa. O le finagalo o le Atua, ia iloa e tagata uma lava lona suafa.—Sala. 83:18.

³ Ona Uiga: Ina ia vivii iā Ieova, e tatau ona iloa e tagata pe faapeʻī le Atua. E tatau ona tatou faamasani i latou i ona uiga o le alofa silisili, le atamai sili ona maoaʻe, lona faamasinotonu, ma le ofoofogia o lona mana, faapea lona alofa mutimutivale, alofa agalelei ma isi uiga mataʻina. (Eso. 34:6, 7) I le iloaina e faalagolago o latou lava ola i le mauaina o le finagalo malie o Ieova, e tatau ai la ona latou matuā matataʻu i le Atua, ma ia ava ma migao iā te ia.—Sala. 89:7.

⁴ Ia Faalatalata Atu i le Atua: Ina ia faasaoina i le faamasinoga o loo fotuaʻi mai a le Atua, e tatau i tagata ona valaau atu ma le faatuatua iā Ieova. (Roma 10:13, 14; 2 Tesa. 1:8) E tele atu mea e aofia ai na i lo o le tau ina iloa le suafa ma uiga o le Atua. E tatau ona tatou fesoasoani atu i tagata ina ia faatuatua iā Ieova ma o latou loto atoa, ma atiina aʻe sa latou faiā totino ma ia. (Faata. 3:5, 6) A o latou faatatauina mea ua aʻoaʻoina, tatalo faatauanau atu i le Atua, ma iloaina lana fesoasoani i o latou olaga, o le a tupu ai lo latou faatuatua, ma mafai ai ona faalatalata atu iā Ieova.—Sala. 34:8.

⁵ Seʻi o tatou talaʻi atu ma le maelega le suafa o le Atua ma fesoasoani i isi ina ia faatuatua atoatoa ma matataʻu iā te ia. Atonu o le a mafai ai ona tatou fesoasoani i le toʻatele o nisi tagata ia iloa Ieova ma vivii atu iā te ia o lo latou ‘Atua o le olataga.’—Sala. 25:5.

Ia Faatāuaina Alāmanuia Mai le Atua

¹ Ina ua fuafuaina e toe faafou le malumalu, na viiviia e le tupu o Iosia i latou na tofia e faia le galuega, i le faapea atu: “Ua le faamasinoina i latou i tupe na tuuina atu ia te i latou, aua ua latou faia ma le faamaoni lava.” (2 Tu. 22:3-7) Sa mātauina lelei le faatāuaina e na tagata o mea paia i le auala na latou faaaogā ai alāmanuia na tuuina atu latou te tausia. I aso nei, a o tatou auai i le galuega paia o le tala lelei a le Atua, e tatau ona tatou faaalia lea lava faamaoni i le tausia lelei o alāmanuia ua tuuina mai iā i tatou.

² Le Auaunaga i le Fanua: E tatou te matuā faatāuaina a tatou lomiga ona ua tatou malamalama lelei i le feʻau o loo iai, faapea tupe na faaaluina e saunia ai. E lē tatau ona soona tufaina atu a tatou lomiga iā i latou e lē o faaalia se naunau moni i le feʻau o le Tusi Paia. Afai e faalēfiafia se tagata i le tala lelei, e lelei pe a ofo i ai se sāvali.

³ Ia tufa atu lomiga i se auala e faaalia ai lo tatou faatāuaina. Aua le tuuina i nofoaga faitele ia e faigofie ona salalau solo ai. Ina ia lē maʻimau, ia vaai po o le ā le tele o au lomiga na e i le fale a o leʻi aumaia nisi lomiga. Afai o tele ni au mekasini o totoe, mafaufau e toe faaitiitia lau ota.

⁴ Lomiga e Faaaogā e le Tagata Lava Ia: E tatau ona ota na o lomiga e tatou te manaʻomia. E tatau foʻi ona tatou magafagafa pe a otaina ia Tusi Paia faa-Peretania sausauauro, Reference Bibles, ma isi lava lomiga lapopoʻa e pei o le Concordance, Index, tusi o le Insight, ma tusi Proclaimers, o na tusi uma e tele ni tupe na faaaluina e faia ai.

⁵ Po o e manatua e tatau ona tusia lou igoa ma le tuatusi i au lava kopi? E fesoasoani lenā e faaitiitia ai le toe aumaia o nisi lomiga e sui ai lomiga ua leiloloa. Afai e leiloa lau tusi pese, Tusi Paia, po o lomiga mo suʻesuʻega, atonu o le a e toe maua na lomiga i le itu e iai mea e leiloloa i le Maota o le Malo po o le nofoaga o le tauaofiaga.—Luka 15:8, 9.

⁶ Seʻi o tatou taumafai e faaaogā tatau a tatou lomiga. O le auala lenei e faaalia ai lo tatou faamaoni i le faaaogāina o alāmanuia o le Malo ua tuuina mai e Ieova iā i tatou.—Luka 16:10.