Ia E Uaʻi Atu i le Faitau

E LĒ mafai e manu ona fai le mea lenā e te faia i le taimi lava lenei. E toʻatasi mai i le toʻaono o tagata e lē mafai ona faitau—e masani lava ona o le lē lava o le avanoa e ō ai i le aʻoga—ae o i latou o loo maua le avanoa e faitau ai, e toʻatele latou te lē o faia soo. Peitaʻi, o lou tomai e faitauina ai faamatalaga tusitusia e mafai ona e malaga atu ai i isi atunuu, e te feiloaʻi ai i tagata o ē e mafai e o latou olaga ona maua ai ni aafiaga lelei mo lo oe foʻi olaga, ma maua ai le poto i le faatinoina o mea ia o le a fesoasoani iā te oe i le faafetaiaʻia o popolega o le soifuaga.

O le tomai e faitau ai e taaʻina ai le tele o mea e aʻoaʻoina e le tamaitiiti i lana aʻoga. Pe a oo ina saʻilia sana galuega, e ono mafai e lona tomai e faitau ai, ona faalagolago i ai le ituaiga galuega e mafai ona ia maua, atoa ma itula e ao ona ia galue ai mo le tausia o ia. O fafine nofofale o ē e lelei a latou faitau e sili atu ona mafai ona latou tausia o latou aiga i le tulaga o taumafa talafeagai, o le tumamā, ma le teena o faamaʻi. O tinā e lelei a latou faitau e ono mafai foʻi ona iai ni taaʻina lelei tele i le atiina aʻe o le atamai o a latou fanau.

O le aogā sili lava e maua mai i le faitau, o le mafai lea ona e “maua ai le poto i le Atua.” (Faata. 2:5) O le tele o auala lea tatou te auauna ai i le Atua e aofia ai le tomai e faitau. E faitauina le Tusi Paia ma lomiga e faavae ai i sauniga a le faapotopotoga. O lou uigā i le faiva i le fanua e matuā aafia lava i le auala e te faitau ai. E aafia foʻi le faitau i sauniuniga mo nei gaoioiga. Ona o lenā māfuaaga, e telē lava se faiā o lau masaniga e faitau, ma lou tuputupu aʻe faaleagaga.

Ia Faaaogā Lelei le Avanoa

O nisi o ē ua aʻoaʻoina ala o le Atua, e tapulaa le tele na oo i ai a latou aʻoaʻoga. Atonu e manaʻomia ona aʻoaʻoina i latou i le faitau ina ia mafai ai ona faaleleia lo latou agaʻigaʻi i luma faaleagaga. Ia pe latou te manaʻomia foʻi se fesoasoani totino i le faaleleia o o latou tomai e faitau ai. Afai e iai se manaʻoga i lo outou vaipanoa, e taumafai malosi faapotopotoga e faatulaga ni vasega e aʻoaʻo ai le faitau, e faaaogā ai le tusi Apply Yourself to Reading and Writing. E faitau afe ua matuā aogā i ai lenei sauniuniga. Ona o le tāua tele o le iloa lelei faitau, ua faatulaga ai e nisi faapotopotoga vasega e faaleleia ai le faitau, ina ia fai i le taimi lava e fai ai le Aʻoga o le Faiva Faatiokarate. E oo lava i vaipanoa e lē o faia ai nei vasega, e mafai e se tagata ona agaʻigaʻi lelei i luma e ala i le faaalu o sina taimi i aso taʻitasi e faitau leotele ai, ma e ala i le auai e lē aunoa ma faia se sao i le aʻoga.

O le mea e faanoanoa ai, ua avea tusi komi ma le televise, atoa ai ma isi mea, ma faapogai o le faatuatuanaʻi o le toʻatele o tagata i le faitau. O le matamata i le televise ma le lē lava o le faitau e ono faafaigatā ai le atiina aʻe o le tomai o se tagata e faitau ai, atoa ma le avanoa e mafai ai ona ia manatunatu ma feutagaʻi manino, ma ia lelei lona faailoaina atu o ia.

O lomiga ia e fesoasoani iā i tatou ina ia malamalama i le Tusi Paia e saunia mai e “le auauna faamaoni ma le mafaufau.” O le auala lea ua maua ai le ʻoa o faamatalaga e faatatau i mea aogā faaleagaga. (Mata. 24:45; 1 Kori. 2:12, 13) Latou te taʻu maia foʻi iā i tatou mea tāua o loo tutupu i le lalolagi ma o latou uiga, e fesoasoani iā i tatou ia masani i le natura o mea, ma aʻoaʻo i tatou i auala e faafetaiaʻia ai mataupu tatou te manatu mamafa i ai. Ae sili atu i lenā, latou te faasino atu i le auala e auauna ai ma talia e le Atua ma maua lona finagalo malie. O le ituaiga faitau lelei lenā e fesoasoani iā te oe e ati aʻe ai i le avea o se tagata faaleagaga.

O le mea moni, o le tomai ia lelei le faitau e lē lava. E manaʻomia ona faaaogā le tomai i se auala talafeagai. E pei lava o le tausami, e ao ona filifili lelei mea e faitau. Aiseā e tausami ai i taumafa e leai se aogā i le tino, po o ni taumafa foʻi e faaonāina ai oe? I se uiga faapena, aiseā e te faitau ai i faamatalaga, e tusa lava pe e te lē o matuā uaʻi atu i ai, ae o ni faamatalaga e mafai ona faaleagaina ai lou loto ma le mafaufau? E ao ona saunia mai e mataupu silisili o le Tusi Paia le tulaga lea tatou te faavasegaina ai so o se mea lava tatou te filifili e faitau. A o leʻi filifilia se mea e te faitauina, manatunatu i mau e pei o le Failauga 12:12, 13; Efeso 4:22-24; 5:3, 4; Filipi 4:8; Kolose 2:8; 1 Ioane 2:15-17; ma le 2 Ioane 10.

Ia Saʻo le Uunaʻiga e Faitau Ai

O le tāua o le uunaʻiga saʻo i le faitau e manino lelei pe a iloiloina faamatalaga a Evagelia. Mo se faaaʻoaʻoga, i le Evagelia a Mataio, tatou te mātauina ai Iesu o fesili atu i taʻitaʻi lotu o ē sa lelei lo latou aʻoaʻoina, i fesili e pei o nei “E lei faitaulia ea e outou?” ma le “Tou te lei faitaulia lava ea?” a o ia leʻi tuuina atu iā i latou tali faale-Tusi Paia i a latou fesili faaʻoleʻole. (Mata. 12:3, 5; 19:4; 21:16, 42; 22:31) O se lesona tatou te aʻoaʻoina mai i inei, afai e lē saʻo la tatou māfuaaga po o le uunaʻiga e faitau ai, e mafai ona tatou mauaina mai ai faaiʻuga sesē po o le misi atoa o le manatu. Sa faitau e le ʻau Faresaio le Tusi Paia auā sa latou manatu o le faia faapea, latou te maua ai le ola e faavavau. O lenā taui, e pei ona faailoa mai e Iesu, e lē tuuina atu iā i latou o ē lē alolofa i le Atua ma talia Lana auala mo le faaolataga. (Ioa. 5:39-43) O faanaunauga o le ʻau Faresaio sa manatu faapito; o le mea lea, o le tele o a latou faaiʻuga sa sesē.

O le alofa mo Ieova o le uunaʻiga pito i sili lea ona lelei e mafai ona iā i tatou mo le faitauina o lana Afioga. O le ituaiga alofa lenā na te faagaoioia i tatou e aʻoaʻoina le finagalo o le Atua, auā o le alofa e “fiafia i le faamaoni [upu moni].” (1 Kori. 13:6) E tusa lava pe tatou te leʻi fiafia e faitau i le taimi ua teʻa, ae o le alofa iā Ieova ma o tatou “manatu atoa” o le a uunaʻia ai i tatou e faaaogāina ma le naunautaʻi o tatou mafaufau i le aveina i fale o le poto e uiga i le Atua. (Mata. 22:37) O le alofa e faapogaia ai le fiafia, ae o le fiafia i ai e faagaee ai le fia aʻoaʻoina.

Ia Manatunatu i le Vave o le Faitau

E vaavaalua lava le faitau ma le iloaina. E tusa lava foʻi po o lenā e te faitau i le taimi lenei, o loo e iloaina upu ma manatua o latou uiga. E mafai ona e faateleina le vave o lau faitau pe a e faalautele atu mea e te iloaina. Na i lo le taofi e vaai i upu taʻitasi, taumafai e vaai atu i ni nai upu i le taimi e tasi. A o e ati aʻe lenei tomai, o le a e mātauina ai o le a sili ona e malamalama i mea o loo e faitauina.

Peitaʻi pe a e faitauina mataupu loloto, e ono faateleina mea e te maua mai i au taumafaiga e ala i le faaaogā o se isi metotia ese. I le fautuaina o Iosua e faatatau i lona faitauina o le Tusi Paia, na fetalai atu Ieova: “E le teʻa i lou gutu le tusi o lenei tulafono, a ia mafaufau [faitau lemū] i ai.” (Iosua 1:8) O le tautala i se leo lemū e masani lava ona fai pe a manatunatu se tasi i se mea. O lea la, o le faaupuga Eperu e ave i le “faitau lemū” e faaliliuina foʻi i le “manatunatu loloto.” (Sala. 63:6; 77:12; 143:5) Pe a manatunatu loloto, o lona uiga e loloto mafaufauga o se tagata; e lē o faatopelauina. O le faitau i se uiga manatunatu loloto e mafai ai ona iai se aafiaga tele o le Afioga a le Atua i le mafaufau ma le loto. O loo i le Tusi Paia valoaga, o fautuaga, o faataoto, o solo, o faasilasilaga o faamasinoga tauatua, o faamatalaga e faatatau i fuafuaga a Ieova, ma le anoanoaʻi o faaaʻoaʻoga i mea moni—e aogā uma lava iā i latou e mananaʻo e savavali i ala o Ieova. Maʻeu le aogā o le faitauina o le Tusi Paia i se uiga o le a mafai ai ona loloto le tāmauina i lou mafaufau ma le loto!

Ia Faamasani e Uaʻi Atu

A o e faitau, tuu oe i vaaiga uma o loo faamatala mai. Taumafai ia e vaai atu faalemafaufau i tagata o loo taʻua, ma tomanatu i faalogona sa iai i mea na tutupu i o latou olaga. E faigofie ona fai o le mea lenei pe a faitau i tala e pei o le tala e uiga iā Tavita ma Koliata, o loo faamauina i le 1 Samuelu mataupu e 17. Ae e oo foʻi i mea o loo faamatalaina i le Esoto ma le Levitiko e faatatau i le faatūina o le fale fetafaʻi po le faatūina o le faiva faaositaulaga, e mafai ona avea ma mea moni pe a faaata i lou mafaufau le fua o le fale ma mea sa fau ai, po o le manatunatu i le manogi o mea manogi, o saito sa tunuina, atoa ma manu na osi ai taulaga mū. Manatunatu i se tulaga e fefe ma mataʻu atonu sa iai a o faatinoina auaunaga faaositaulaga! (Luka 1:8-10) O le faaaafia ai o ou uiga ma faalogona i lenei auala e fesoasoani lea iā te oe ia e malamalama i le uiga moni o mea o loo e faitauina ma o le a avea o se fesoasoani e faigofie ai lou manatuaina o mea.

Peitaʻi, afai e te lē faaeteete, e ono tafaofao solo lou mafaufau a o e taumafai e faitau. E ono autilo ou mata i le itulau, ae atonu o loo i se isi mea lou mafaufau. Pe o ta se musika? Pe o ola le televise? Pe o talanoa tagata o le aiga? Pe afai e mafai, e sili ona lelei le faitau i se nofoaga e lē o pisa. Peitaʻi, e ono māfua lava iā te oe mea o loo faalavelave mai. Atonu pe sa pisi tele lou aso. Pagā le faigofie ona toe tau lou mafaufau i gaoioiga sa fai i le aso! E lē o se mea leaga le toe manatunatu i mea sa fai i le aso—peitaʻi aua le faia i le taimi o loo e faitau ai. Atonu e te amata a o taulaʻi atu lou mafaufau, pe e amata foʻi lau faitau i se tatalo. Peitaʻi a o alu lau faitau, ua amata ona see ese lou mafaufau. Toe taumafai atili. Ia e puleaina lou mafaufau ina ia taulaʻi atu lou manatu i le mataupu o loo e faitauina. E faasolosolo lava ona e mātauina ua iai ni faaleleiga.

O le ā lau mea e fai pe a e tau i se upu e te lē malamalama ai? O nisi upu e lē masani ai e ono faamatala pe talanoaina i le mau. Ia pe e mafai foʻi ona e iloaina le uiga, mai i manatu o loo siʻomia ai. Afai e leai, faaalu se taimi e suʻe ai le upu i se lomifefiloi pe afai o iai, pe faailoga foʻi le upu ina ia e fesili atu i se isi mulimuli ane e faatatau i le uiga. O le faia faapea o le a faateleina ai upu e te iloa ma saosaolaumea ai i le malamalama o lau faitau.

Faitau Atu i Luma o le Lautele

Ina ua fai atu le aposetolo o Paulo iā Timoteo e faaauau ona uaʻi atu i le faitau, sa ia faatatau faapitoa atu lava i le faitau mo le lelei o isi. (1 Timo. 4:13, NW) O le faitau lelei i luma o le lautele e sili atu mea e aofia ai na i lo le tau ina faitau leotele o upu mai i se tusi. E manaʻomia i le tagata faitau ona malamalama i le uiga o upu ma maua le manatu o loo talanoaina. Seʻi vaganā ua ia faia faapea ona mafai lea ona ia faaoo atu ma le saʻo manatu ma toe taʻua ma le tonu faalogona. O lenei faiga, e matuā manaʻomia ai lava le sauniuni māeʻaeʻa ma ia faataʻitaʻi. O le pogai lenā na timaʻi mai ai Paulo: “Ia faaauau ona e uaʻi atu i le faitau i luma o le lautele.” O le a e mauaina se toleniga aogā i lenei tomai i le Aʻoga o le Faiva Faatiokarate.

Faaavanoa se Taimi e Faitau Ai

“O mafaufauga o e filigā i galuega, na o le mau mea [“aogā,” NW] e iu i ai; a o mafaufauga o e faataalise uma lava, e iu ai na o le mativa.” (Faata. 21:5) Maʻeu le moni o lenā mea pe a faatatau mai i lo tatou manaʻoga e faitau! Ina ia maua “mea aogā,” e manaʻomia ona tatou fuafua ma le naunautaʻi ina ia aua neʻi faalavelaveina e isi gaoioiga a tatou faitau.

O fea le taimi e te faitau ai? Pe e aogā ia te oe le faitau i le taeaopō? Pe e sili atu ona e mataala i se taimi mulimuli ane o le aso? Afai e mafai ona e faatulaga ese e tusa lava pe 15 pe 20 minute i aso taʻitasi e fai ai sina faitau, o le a e maofa i le tele o mea e mafai ona e faia. O le mea tāua o le fai pea lava pea.

Aiseā ua filifili ai Ieova e tusia ana fuafuaga matagofie i se tusi? Ina ia mafai ai e tagata ona saʻili atu i lana Afioga tusia. O le a mafai ai ona latou suʻesuʻeina galuega ofoofogia a Ieova, taʻu atu nei mea i a latou fanau, ma teu ai i o latou mafaufau galuega a le Atua. (Sala. 78:5-7) O lo tatou talisapaia o le aao mafola o Ieova i lenei tulaga o le a sili ai ona lelei lo tatou faailoaina atu e ala i lo tatou uaʻi atu i le faitauina o lana Afioga o loo maua mai ai le ola.