8. O ā gaoioiga na fetalai Iesu e ao ona faia e Kerisiano i Efeso?

⁸ E ao i na Kerisiano Efeso ona toe faaolaola lo latou uluaʻi alofa pe afai e lē mananaʻo e lafoaʻia i latou. Ona fetalai atu lea o Iesu iā i latou: “O lenei, ia e manatua le mea na e paʻū mai ai, ma ia e salamō, ma e faia au uluaʻi galuega; afai e leai, ona ou vave alu atu lea iā te oe, ou te aveesea lau tuugālamepa i le mea e tuu ai, pe afai e te lē salamō.” (Faaaliga 2:5, “LT”) Sa faapeʻī le tali mai a Kerisiano i le faapotopotoga i Efeso i na fetalaiga? Tatou te lē iloa. Talosia sa latou salamō ma faamanuiaina ai i le toe fafaguina o lo latou alofa mo Ieova. Afai latou te leʻi salamō, lona uiga o le a tapē a latou lamepa ma aveesea a latou tuugālamepa. Lona uiga o le a lē toe iai so latou faaeaga e faasusuluina atu le upu moni.

9. (a) O le ā le fetalaiga faalaeiau a Iesu i Kerisiano i Efeso? (e) Na faapefea i faapotopotoga ina ua mavae aso o Ioane, ona lē taulau e utagia le fautuaga a Iesu i Kerisiano i Efeso?

⁹ E ui lava i lea, o fetalaiga faalaeiau nei a Iesu mo Kerisiano i Efeso: “A ua iā te oe lenei mea, ina ua e ʻinoʻino i galuega a le ʻau Nikalaitai, o aʻu foʻi ou te ʻinoʻino i ai.” (Faaaliga 2:6) O le mea e sili ai, sa latou ʻinoʻino i fevaevaeaʻiga i vaega faalotu, e pei lava ona sa ʻinoʻino i ai le Alii o Iesu Keriso. Peitaʻi, a o faagasolo tausaga, e tele faapotopotoga sa lē taulau ona utagia na fetalaiga a Iesu. Sa leai so latou alofa iā Ieova, i le upu moni, ma isi o latou uso Kerisiano. O le iʻuga, na latou tafetafea ese atu ai i le pogisa faaleagaga. Sa faataapeapeina i latou ma maua ai le tele o vaega faalotu fefinauaʻi. O “Kerisiano pepelo” o ē sa leai so latou alofa mo Ieova, na latou aveesea le suafa o le Atua mai tusitusiga Eleni o le Tusi Paia. O le leai o se alofa na latou faaaogā ai foʻi le igoa o le Faa-Kerisiano e talia ai aʻoaʻoga faa-Papelonia ma faa-Eleni, e pei o le afi i seoli, pulekatolio ma le Tasitolu po o le Tolutasi. Na muta ai foʻi ma le toe talaʻia o le Malo o le Atua e le toʻatele o ē na faapea mai o Kerisiano, ona ua leai so latou alofa mo le Atua ma le upu moni. Na pulea i latou e se vasega o taʻitaʻi lotu manatu faapito lea ua faia lona lava malo i inei i le lalolagi.​—Faatusatusa i le 1 Korinito 4:8.

10. O le ā le tulaga sa iai i lotu na vavae ese mai le upu moni i le 1918?

¹⁰ Ina ua amata le faamasinoga i le ʻauaiga o le Atua i le 1918, sa matilatila le lagolagoina o le Taua Muamua a le Lalolagi, e faifeʻau o lotu na vavae ese mai le Faa-Kerisiano moni, ma uunaʻia ai Katoliko ma Porotesano o itu taua e lua, ina ia fefasiotiaʻi. (1 Peteru 4:17) Sa leʻi pei lotu ua vavae ese mai le upu moni, o le faapotopotoga i Efeso lea na ʻinoʻino i le mea na faia e le lotu a le ʻau Nikalaitai. Na i lo lea, ua leva ona faasesēina nei lotu i aʻoaʻoga fenuminumiaʻi e lē mai le Atua, ma ua auaufaatasi a latou taʻitaʻi lotu ma le lalolagi, lea na fetalai Iesu e lē tatau ona faia ai se vaega a ona soo. (Ioane 15:17-19) Talu ai latou te leʻi amanaʻia le matua o le Tusi Paia, o le Malo lea o le Atua, na lē avea ai a latou faapotopotoga o ni tuugāmolī e faasusuluina atu le upu moni o le Tusi Paia. E leʻi avea foʻi o latou tagata ma vaega o le malumalu faaleagaga o Ieova. E leʻi avea a latou tane (ma fafine) taʻimua o ni fetu ae sa faaalia le avea ma sui “o le tagata o le amio leaga.”​—2 Tesalonia 2:3; Malaki 3:1-3.

11. (a) O ai le vaega o Kerisiano i le lalolagi i le 1918, lea na latou faatinoina fetalaiga a Iesu i Kerisiano i Efeso? (e) O le ā sa faia e le vasega e pei o Ioane mai le 1919 seʻia oo mai i le taimi nei?

¹¹ Peitaʻi, a o vevesi le Taua Muamua a le Lalolagi, ae aliaʻe se vasega e pei o Ioane, o ē na avea lo latou alofa mo Ieova ma le upu moni, na uunaʻia ai i latou e auauna iā te ia ma le maelega aasa. Sa latou teena tagata na taumafai e faaofi mai faiga faavaega e ala i le toetoe lava ifo i le uluaʻi peresitene o le Sosaiete o le Olo Matamata o Charles T. Russell, ina ua mavae lona maliu i le 1916. O sauāga ma mala na avea o se aʻoaʻiga i lenei vasega o Kerisiano. Sa matuā “lelei” ai le iʻuga o lo latou faamasinoga mai lo latou Matai, ma valaaulia ai loa e ulufale atu i lona fiafia. (Mataio 25:21, 23) O le faagasologa o mea tutupu i le lalolagi, ma mea na oo iā i latou, ua latou mātaulia ai le faataunuuga o le faailoga lea na fetalai Iesu e iloa ai lona faatasi mai lē vaaia i le mana o le Malo. I le 1919 ma faasolo mai ai, sa latou agaʻi e auai i le faataunuuga atili o le valoaga sili a Iesu: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 6:​9, 10; 24:3-14) Afai sa tau mou atu lo latou alofa mo Ieova, na matuā toe faamalosia lava i lenā taimi seʻia oo mai i le taimi nei.

12. (a) O le ā le valaau na alagaina i se tauaofiaga mataʻina i le 1922? (e) O le ā le igoa na taliaina e Kerisiano moni i le 1931, ma o ā mea na latou salamō ai?

¹² I se tauaofiaga mataʻina na auai ai le 18,000 o nei Kerisiano, i Cedar Point, Ohio, U.S.A., iā Setema 5-13, 1922, na alagaina ai lenei valaau: “Foʻi atu i le fanua, outou atalii e, o le Atua silisili ese! . . . E ao ona iloa e le lalolagi o Ieova o le Atua ma o Iesu Keriso o le Tupu o tupu ma le Alii o alii. . . . O le mea lea ia faalauiloa, faalauiloa, faalauiloa, le Tupu ma lona malo.” Sa matuā faasilisilia ai le suafa tāua o Ieova. I le 1931, a o tauaofia nei Kerisiano i le tauaofiaga i Columbus, Ohio, U.S.A., na latou olioli ai e taliaina ma tauave le igoa na faasino mai e le Atua i le valoaga a Isaia​—o Molimau a Ieova. (Isaia 43:10, 12) Sa suia le igoa o le mekasini autū a le faalapotopotoga i Le Olomatamata Faasilasilaina le Malo o Ieova, i lana lomiga o Mati 1, 1939, ua matuā faasilisilia ai le mamalu o Lē na Foafoaina i tatou ma lona Malo. O lea, na toe faafouina e Molimau a Ieova lo latou alofa mo Ieova, ma salamō foʻi i so o se mea na lē taulau ai ona latou faamamaluina ma faapaia lona suafa silisili ma lona Malo.​—Salamo 106:6, 47, 48.   

“O Lē Manumalo”

13. (a) O le ā le faamanuiaga sa iai mo Kerisiano Efeso pe afai latou te “manumalo”? (e) O le a faapefea ona “manumalo” Kerisiano Efeso?

¹³ I le faaiʻuga, e pei ona sa ia faia foʻi i isi feʻau, na faatepa e Iesu manatu i le agaga o le Atua, a o faalauiloaina taui mo le faatuatua e auala iā te ia. Ua fetalai o ia i Kerisiano i Efeso: “O lē ua i ai taliga, inā faalogo mai ia o ia i le mea ua fetalai mai ai le Agaga i ekalesia. O lē manumalo, ou te avatua iā te ia e ʻai i le laau o le ola o i totonu o le parataiso [a] le Atua.” (Faaaliga 2:7) O le a naunau i latou o ē fia faalogo e utagia lenā feʻau tāua, i le iloaina e lē o se loto o Iesu lava ia na amata mai ai, ae mai le Alii Pule Silisili Ese o Ieova e ala i Lona agaga paia, po o le malosi galue. O le a faapefea ona latou “manumalo”? I le mulimulituʻi i tulagāaao o Iesu, o lē na faamaoni seʻia oo i lona maliu, ma mafai ai ona faapea mai: “Ia outou loto tetele, ua ou manumalo i le lalolagi.”​—Ioane 8:28; 16:33; tagaʻi foʻi i le 1 Ioane 5:4.

14. I le ā e ao ona faasino i ai “le parataiso a le Atua” lea na taʻua e Iesu?

¹⁴ Talu ai e lē faamoemoe i latou e ola i le parataiso i le lalolagi, e faapefea la ona tauia Kerisiano faauuina e pei o Kerisiano Efeso, i le taumafaina o “le laau o le ola o i totonu o le parataiso a le Atua”? E lē o faasino atu lenei taui i le Parataiso o le a toe iai i le lalolagi. Aiseā? Auā o Kerisiano faauuina e 144,000 lea e aofia ai i latou mai le faapotopotoga i Efeso, e faatauina mai tagata o i le lalolagi. Ona aveina aʻe lea e pule faatasi ma le Tamaʻi Mamoe, o Keriso Iesu, i le Mauga o Siona faalelagi o ni atalii agaga. (Efeso 1:5-12; Faaaliga 14:1, 4) Lona uiga la, o le faamatalaga i inei e faatatau atu i le siʻomaga faalelagi e pei se faatoʻaga, o le a fai ma tofi o i latou nei ua manumalo. O inā i “le parataiso a le Atua,” i le mea o afio ai Ieova, o le a soifua ai pea e faavavau i latou nei ua manumalo, o ē ua tuuina atu i ai le ola e lē mafai ona toe oti, e pei ona faaata mai i lo latou taumafaina o le laau o le ola.

15. Aiseā e naunau ai le motu o tagata e toʻatele i aso nei, i le faalaeiauga a Iesu ina ia manumalo?

¹⁵ Ae faapefea tagata i le lalolagi, o ē o loo lagolagosua faamaoni i le 144,000 o ē faauuina? O loo manumalo foʻi se motu o tagata e toʻatele o nei Molimau. Peitaʻi latou te faamoemoe e ulu atu i se parataiso i le lalolagi, lea o le a latou feinu ai mai “le vaitafe manino o le vai o le ola,” ma maua le faamālōlōga mai ʻlau o laau’ ua totōina i tafatafa o lenā vaitafe. (Faaaliga 7:4, 9, 17; 22:1, 2) Pe afai o oe o se tasi o lea vaega, tau ina ia e faaalia foʻi lou alofa māfana mo Ieova ma manumalo ai i le taua o le faatuatua. Ona e maua ai lea o le fiafiaga o le ola e faavavau i le lalolagi Parataiso.​—Faatusatusa i le 1 Ioane 2:13, 14.

1. (a) O ai le faapotopotoga lea ua sosoo nei le mauaina o se feʻau mai iā Iesu lē ua faamamaluina? (e) O le ā na faamanatu atu e Iesu i Kerisiano o lenā faapotopotoga, i le taʻuaina o ia lava o “lē muamua ma lē mulimuli”?

I ASO nei, ua faatafunaina Efeso anamua. Ae o le nofoaga sa avatu i ai le feʻau lona lua a Iesu o loo avea pea ma nofoaga o se aai e matuā vevesi i taimi uma. Pe ā ma le 35 maila (55 kilomita) i mātū o faatafunaga o Efeso, o loo iai le aai o Take o Izmir, lea e iai ni faapotopotoga maelega se fā o Molimau a Ieova i aso nei. I le uluaʻi senituri, o inā na iai Semurana. Seʻi mātau fetalaiga a Iesu o loo sosoo mai: “Ia e tusi foʻi i le agelu a le ekalesia o i Semurana: O mea nei ua fai mai ai lē muamua ma lē mulimuli, o lē na oti, a ua ola mai.” (Faaaliga 2:8) Ua faamanatu atu e Iesu e ala i le taʻua o lenei mea i na Kerisiano i Semurana e faapea, o ia lē na uluaʻi tausia le faamaoni na toe faatūina e Ieova lava ia i le olaga agaga e lē mafai ona toe oti, ma e na o ia lava sa faatūina faapea. Ona faatutūina ai lea e Iesu isi Kerisiano uma faauuina. Ua matuā agavaa la Iesu e avatu fautuaga i ona uso, o ē faamoemoe ia latou tofusia faatasi ma ia i le olaga faalelagi e lē mafai ona toe oti.

2. Aiseā ua faamāfanafanaina ai Kerisiano uma i fetalaiga a Ia “o lē na oti, a ua ola mai”?

² Sa taʻimua Iesu i le tutumau i sauāga ona o le amiotonu, ma ua ia maua le taui e tatau ai. O lona faamaoni seʻia oo i lona maliu atoa ma lona toetū, o le faavae lea o le faamoemoe mo Kerisiano uma. (Galuega 17:31) Talu ai o Iesu “o lē na oti, a ua ola mai,” e faamaonia ai po o ā lava mea e ao ona tutumau ai ona o le upu moni, e lē vale ia. O le toe faatūina o Iesu o se puna o faalaeiauga loloto mo Kerisiano uma, aemaise pe a mafatia ona o lo latou faatuatua. Po o lou tulaga ea lenā? E mafai foʻi la ona e maua le lototele mai fetalaiga a Iesu o sosoo mai ai i le faapotopotoga i Semurana:

3. (a) O le ā le faalaeiauga na avatu e Iesu i Kerisiano i Semurana? (e) Aiseā na fetalai ai Iesu sa “tamaoaiga” Kerisiano i Semurana e ui sa latou matitiva?

³ “Ua ou iloa au galuega, ma lou puapuaga, ma lou mativa​—a ua e tamaoaiga​—ma le upu faifai a ē ua fai mai o Iutaia i latou, a e leai lava, a o le sunako o Satani i latou.” (Faaaliga 2:9) E leai se faitioga a Iesu mo ona uso i Semurana, na o le faamālō māfana. Ua mafatia i latou i puapuaga e tele ona o lo latou faatuatua. Ua matitiva i latou i le itu faaletino, atonu ona o lo latou faatuatua. (Eperu 10:34) Peitaʻi, o lo latou popolega autū, o mea faaleagaga, ma ua latou faaputuina ʻoa i le lagi, e pei ona fautuaina ai e Iesu. (Mataio 6:19, 20) O le mea lea, ua vaai ai le Leoleo Mamoe Sili iā i latou o nisi ē “tamaoaiga.”​—Faatusatusa i le Iakopo 2:5.

4. O ai na mafatia tele ai Kerisiano i Semurana i teteega e tele, ma o le ā le tagaʻi a Iesu i na tagata tetee?

⁴ Ua mātauina faapitoa lava e Iesu le fesagaʻi ai o Kerisiano i Semurana ma teteega mai le nuu o Iutaia. Muamua atu, sa tetee maumauaʻi ai le toʻatele o lenei lotu i le salalau atu o le Faa-Kerisiano. (Galuega 13:44, 45; 14:19) Nei la, ua silia i le lua sefulu o tausaga talu ona mavae le paʻū o Ierusalema, ae o loo faaalia pea e na Iutaia i Semurana le agaga faasatani lava e tasi. E lētioa ona manatu Iesu iā i latou o “le sunako o Satani”!a

5. O ā tofotofoga ua taatia mai i luma mo Kerisiano i Semurana?

⁵ Sa faamāfanafanaina e Iesu Kerisiano i Semurana o ē na fetaiaʻi ma lenā ʻinoʻino i le fetalai atu: “Aua lava e te fefe i mea o le a e tigā ai. Faauta, o le a tuuina atu ni o outou e le tiapolo i le fale puipui, ina ia tofotofoina ai outou; e pō agafulu foʻi e puapuagatia ai outou. Ia e faamaoni seʻia oo i le oti, ona ou avatu ai lea iā te oe o le pale o le ola.” (Faaaliga 2:10) Ua faaaogāina faatolu i inei e Iesu le upu Eleni numera tele o le “outou,” e faaalia ai o ana fetalaiga e aofia ai le faapotopotoga atoa. E lē mafai ona folafola mai e Iesu faapea o le a lē pine ona muta lea o tofotofoga o Kerisiano i Semurana. O le a faaauau ona sauāina nisi o i latou ma lafoina i le falepuipui. O le a puapuaga i latou mo “pō agafulu.” O le agafulu po o le sefulu, o se numera ua faaataina ai le aʻiaʻi po o le atoaga faalelalolagi. E oo lava i ē tamaoaiga faaleagaga o loo tausi i le faamaoni, o le a tofotofoina atoatoa i latou a o iai i le tino.

6. (a) Aiseā sa lē tatau ai ona fefefe Kerisiano i Semurana? (e) Sa faaiʻu faapefea e Iesu lana feʻau i le faapotopotoga i Semurana?

⁶ Ae ui i lea, e lē tatau ona fefefe pe faagutugutulua Kerisiano i Semurana. Pe afai latou te tutumau i le faamaoni seʻia oo i le iʻuga, ua saunia mai mo i latou se taui o “le pale o le ola,” ma e tusa ai ma lo latou tulaga, o le ola lea e lē mafai ona toe oti i le lagi. (1 Korinito 9:25; 2 Timoteo 4:6-8) Sa manatu le aposetolo o Paulo i lenei taui tāua o se mea e talafeagai ona faataulaga ai isi mea uma, e oo lava i lona ola i le lalolagi. (Filipi 3:8) E foliga mai o le manatu foʻi lea o tagata faamaoni sa iai i Semurana. Ona faaiʻu lea e Iesu lana feʻau i le fetalai atu: “O lē ua i ai taliga, inā faalogo mai ia o ia i le mea ua fetalai mai ai le Agaga i ekalesia. O lē manumalo, e lē afaina lava o ia i le oti faalua.” (Faaaliga 2:11) Ua faamautinoa atu i le ʻaumanumalo lo latou mauaina o le soifuaga faalelagi e lē mafai ona toe oti.​—1 Korinito 15:53, 54.