Le Auala e Amata ai Suʻesuʻega i le Tusi Aʻoaʻoga a le Tusi Paia

O le toʻatele lava o i tatou e fiafia e fai se suʻesuʻega faale-Tusi Paia ae e lē faigofie ona amata se suʻesuʻega. E mafai ona fesoasoani le tusi fou O ā Aʻoaʻoga Moni a le Tusi Paia? iā i tatou. O le faatomuaga o loo i le itulau 3-7 ua faatulaga ina ia faaaafia ai le tagata o le aiga i se talanoaga faale-Tusi Paia e faaaogā ai le lomiga. E oo lava iā i latou e itiiti le poto masani i le faiva, o le a faigofie ona latou faaaogāina lenei vaega o le tusi e amata ai ni suʻesuʻega.

◼ E te ono faataʻitaʻia le metotia lenei i le faaaogāina o le itulau e 3:

Pe a uma ona taʻua se mea o loo tupu po o se faafitauli o loo popole ai tagata i la outou oganuu, ona faauaʻi lea o manatu o le tagata o le aiga i fesili o loo tusia olaola tetele i le itulau e 3, ma fai i ai e fai mai sona manatu. Ona suʻe lea i le itulau e 4-5.

◼ Pe atonu foʻi e te manaʻo e amata i le faamatilatilaina o le itulau e 4-5:

E te ono faapea atu, “Pe e lē o se mea matagofie ea pe ana tutupu moni suiga o loo i le ata lenei?” Po o lou faapea atu foʻi, “O lē fea o nei folafolaga e te manaʻo e vaai ua faataunuuina?” Faafofoga lelei atu i le tali mai.

Pe afai e iai se mau o loo fiafia faapitoa i ai le tagata o le aiga, ona faaali lea i ai o le mea o loo aʻoaʻoina e le Tusi Paia e faatatau i lea mataupu, i le iloiloina o palakalafa i le tusi lea e talanoaina ai lenā mau. (Tagaʻi i le pusa i le itulau lenei o le faaopoopoga.) Ia iloiloina le mataupu e pei lava ona faia i se suʻesuʻega faale-Tusi Paia. E mafai lava ona fai i le lima i le sefulu minute i lau uluaʻi asiasiga a o talanoa atu i le tagata i le faitotoʻa.

◼ O le isi auala, o le fai i le tagata e faamatala mai ona manatu i le faaaogāina o le itulau e 6:

Ia tataʻi atu manatu o le tagata i fesili i le pito i lalo o le itulau, ma fesili atu, “Pē na e taumānatu ea i nisi o nei fesili?” Afai e na te faaalia le fiafia i se tasi o nei fesili, ona suʻe lea i palakalafa o le tusi lea e tali ai le fesili. (Tagaʻi i le pusa i le itulau lenei o le faaopoopoga.) A o oulua talanoaina faatasi faamatalaga, e tusa o lenā o loo e faia se suʻesuʻega faale-Tusi Paia.

◼ E ono mafai ona faaaogā le itulau e 7 e tataʻi atu ai i le faataʻitaʻia o se suʻesuʻega faale-Tusi Paia:

Faitau uluaʻi fuaiupu e tolu i le itulau, ona suʻe lea i le mataupu e 3, ma faataʻitaʻi se suʻesuʻega i le faaaogāina o le palakalafa 1-3. Ia fai se fuafuaga e toe foʻi e talanoaina tali o fesili o loo i le palakalafa e 3.

◼ Le auala e fuafua e toe foʻi ai:

Pe a faaiʻu le uluaʻi suʻesuʻega, ona fai lea o se fuafuaga mo le toe faaauauina o le talanoaga. E te ono faapea atu: “E na o ni nai minute lava ae ua ta aʻoaʻoina ai aʻoaʻoga a le Tusi Paia i se mataupu tāua tele. I le isi taimi ou te toe sau ai, e ta te talanoaina ai [tuu se fesili o le a oulua talanoaina]. Pe e mafai ona ou toe afe mai i le taimi lava lenei i le vaiaso a sau?”

A o tatou lalata atu i le taimi atofaina a Ieova, o loo ia faaauau pea ona aʻotauina i tatou i galuega e ao ona tatou fai. (Mata. 28:19, 20; 2 Timo. 3:17) Seʻi o tatou faaaogā lelei lenei meafaigaluega fou e amata ai suʻesuʻega faale-Tusi Paia.

Le Auala e Ofo ai le Tusi Aʻoaʻoga a le Tusi Paia

O loo iai i le faaopoopoga lenei fautuaga eseese mo le ofoina o le tusi Aʻoaʻoga a le Tusi Paia. Ina ia sili ona uigā, e lelei ona faamatala i au lava upu, ia fetuunaʻi lau taulimaga i tagata o lau oganuu, ma ia faamasani i ni manatu patino i le tusi e faaaogā, e fai ma faavae o talanoaga faale-Tusi Paia. O nisi taulimaga e aogā i lau oganuu e mafai foʻi ona faaaogā.—Tagaʻi i La Tatou Faiva o le Malo o Ianuari 2005, itu. 8.

Aiga

◼ “O i tatou uma lava e naunau e maua se olaga fiafia i aiga. Pe e te lē ioe ea i lea manatu? [Faatali mo se tali.] O loo tautala le Tusi Paia i se mea e mafai ona fai e tagata uma o le aiga e saosaolaumea ai i le fiafia i le aiga—faataʻitaʻi i le Atua i le faaalia o le alofa.” Faitau le Efeso 5:1, 2 ma le palakalafa e 4 i le itulau e 135.

Amaketo

◼ “Pe a faalogo tagata i le upu ‘Amaketo,’ o le toʻatele lava e mafaufau i se faaumatiaga e mataʻutia tele. Pe e faateʻia ai oe i le iloa faapea o Amaketo o se mea e ao ona tatou faanaunau i ai? [Faatali mo se tali. Ona faitau lea o le Faaaliga 16:14, 16.] Mātau le faamatalaga lenei i le ituaiga olaga o le a iai pe a mavae Amaketo.” Suʻe i le itulau 82, ma faitau le palakalafa e 21.

Ieova le Atua

◼ “O le toʻatele o tagata e talitonu i le Atua e mananaʻo e faalatalata atu iā te ia. Pe e te silafia ua valaaulia i tatou e le Tusi Paia e faalatalata atu iā te ia? [Faatali mo se tali. Ona faitau lea o le Iakopo 4:8a ma le palakalafa e 20 i le itulau e 16.] Ua saunia lenei lomiga e fesoasoani ai i tagata e aʻoaʻoina atili e faatatau i le Atua i le faaaogāina o ā latou lava Tusi Paia.” Faaali fesili o loo i luga i le amataga lava o le itulau e 8.

◼ “E toʻatele tagata o loo tatalo ina ia faapaiaina le suafa o le Atua. Pe na e taumānatu ea po o ai lenā suafa? [Faatali mo se tali. Ona faitau lea o le Salamo 83:18 ma le palakalafa 2-3 i le itulau e 195.] O loo faamatalaina i le tusi lenei aʻoaʻoga moni a le Tusi Paia e faatatau iā Ieova le Atua ma lana fuafuaga mo tagata.”

Iesu Keriso

◼ “Ua faalogo tagata i le lalolagi e faatatau iā Iesu Keriso. Ua faapea mai nisi o ia ua na o se tagata iloga. O isi ua tapuaʻi atu iā te ia faapea o le Atua Malosi. Pe e te manatu ea e tāua mea e tatou te talitonu ai e faatatau iā Iesu Keriso?” Faatali mo se tali. Ona faitau lea o le Ioane 17:3 ma le palakalafa e 3 i le itulau e 37. Ia taulaʻi atu manatu i fesili o loo i le amataga i lalo ifo o le ulutala o le mataupu.

Ola e Faavavau

◼ “O loo faanaunau le toʻatele o tagata mo le soifua mālōlōina lelei ma se olaga faafualoa. Ae afai e mafai, pe e te manaʻo e ola e faavavau? [Faatali mo se tali. Ona faitau lea o le Faaaliga e 21:3, 4 ma le palakalafa e 17 i le itulau e 54.] O loo talanoaina i le tusi lenei le auala e tatou te maua ai le ola e faavavau, ma le ituaiga o olaga o le a iai pe a oo ina faataunuuina lenā folafolaga.”

Oti/Toe Tū

◼ “E toʻatele tagata e taumānatu po o le ā e tupu pe a oti. Pe e te manatu e mafai ona tatou iloa? [Faatali mo se tali. Ona faitau lea o le Failauga 9:5 ma le palakalafa 5-6 i le itulau e 58.] O loo faamatalaina foʻi i le tusi lenei, le uiga o le folafolaga a le Tusi Paia i se toe tū iā i latou ua maliliu.” Faaali le ata i le itulau e 75.

◼ “Pe a maliu se tasi e pele iā i tatou, o se lagona masani le manaʻo e toe vaai i lenā tagata. Pe e te lē ioe ea i lenā manatu? [Faatali mo se tali.] E toʻatele ua latou maua se faamāfanafanaga i le folafolaga a le Tusi Paia mo le toe tū. [Faitau le Ioane 5:28, 29 ma le palakalafa 16-17 i le itulau e 71-72.] O loo taliina foʻi i lenei mataupu fesili nei.” Faaali i ai fesili o loo i luga i le amataga lava o le itulau e 66.

Fale e Nonofo Ai

◼ “I le tele lava o nofoaga, ua faigatā ona maua ni fale lelei e nonofo ai e gafatia ona totogi. Pe e te manatu ea o le a iai se aso e maua ai e tagata uma ni fale talafeagai lelei e nonofo ai? [Faatali mo se tali. Ona faitau lea o le Isaia 65:21, 22 ma le palakalafa e 20 i le itulau e 34.] O loo faamatalaina i le lomiga lenei le auala o le a faataunuuina ai e le Atua lenei folafolaga.”

Lotu

◼ “Ua amata ona manatu tagata i lotu a le lalolagi faapea o le pogai lea o faafitauli, na i lo le avea o se vaifofō. Pe e te manatu ea o loo taʻitaʻia e lotu tagata i le auala saʻo? [Faatali mo se tali. Ona faitau lea o le Mataio 7:13, 14 ma le palakalafa e 5 i le itulau e 145.] O loo iloiloina i lenei mataupu vala e ono, e iloa ai le tapuaʻiga e faamaonia e le Atua.” Faaali i ai le lisi o loo i le itulau e 147.

Mala/Puapuaga

◼ “Pe a tutupu ni mala, ona fesiligia lea e le tele o tagata po o manatu moni mai le Atua i tagata ma iloa o latou puapuaga. Pe na e taumānatu ea e uiga i lenā mea? [Faatali mo se tali. Ona faitau lea o le 1 Peteru 5:7 ma le palakalafa e 11 i le itulau e 11.] O loo faamatalaina i le lomiga lenei le auala o le a aveesea atoatoa ai e le Atua puapuaga o tagata.” Faaali i ai fesili i le amataga o le mataupu i le itulau e 106.

Taua/Filemu

◼ “Ua moomoo tagata i so o se mea mo le filemu. Pe e te manatu o le faamoemoe i le filemu i le lalolagi ua na o se miti? [Faatali mo se tali. Ona faitau lea o le Salamo e 46:8, 9.] O loo talanoaina i lenei lomiga le auala o le a faataunuuina ai e le Atua lana fuafuaga ma aumaia le filemu i le lalolagi.” Faaali le ata i le itulau e 35, ma iloilo le palakalafa e 17-21 i le itulau e 34.

Tatalo

◼ “Pe na e taumānatu ea i le auala e tali mai ai le Atua i tatalo? [Faatali mo se tali. Ona faitau lea o le 1 Ioane 5:14, 15 ma le palakalafa 16-18 i le itulau e 170-172.] O loo faamatalaina foʻi i le mataupu lenei le māfuaaga tatou te tatalo atu ai i le Atua ma mea e ao ona tatou fai ina ia faafofoga mai ai iā i tatou.”

Tusi Paia

◼ “E masani lava ona manatu tagata i le Tusi Paia o le Afioga a le Atua. Pe na e taumānatu pe faapefea i se tusi na tusia e tagata ona taʻua o le Afioga a le Atua? [Faatali mo se tali. Ona faitau lea o le 2 Peteru 1:21 ma le palakalafa e 5 i le itulau e 19.] O loo aumaia i le lomiga lenei tali a le Tusi Paia i nei fesili.” Faaali fesili i le itulau e 6.

◼ “I aso nei, ua faigofie ona maua e tagata le tele o faamatalaga na i lo le mea sa iai muamua. Ae o fea e te manatu e mafai ona tatou maua ai fautuaga lelei ia e fesoasoani iā i tatou ia maua ai ni olaga fiafia ma taulau manuia? [Faatali mo se tali. Ona faitau lea o le 2 Timoteo 3:16, 17 ma le palakalafa 12 i le itulau e 22.] O loo faamatala i le lomiga lenei le auala e tatou te ola ai i se auala e fiafia i ai le Atua faapea ma aogā iā i tatou.” Faaali le siata ma le ata i le itulau e 122-123.

[Pusa i le itulau 5]

O Auala e Taʻua ai le Fuafuaga mo le Foaʻi

“Afai e te manaʻo e fai sina foaʻi itiiti i le asō i la matou galuega i le lalolagi aoao, ou te fiafia tele e taliaina.”

“E ui lava e ofo a matou lomiga e aunoa ma se tau, ae e matou te taliaina sina foaʻi itiiti mo la matou galuega i le lalolagi aoao.”

“Atonu e tou te taumānatu pe faapefea ona matou mafai ona faia lenei galuega. Ua mafai ona fai la matou galuega i le lalolagi aoao ona o loo lagolagoina e foaʻi tauofo. Afai e te finagalo e fai sina foaʻi itiiti i le asō, ou te fiafia lava e taliaina.”

(1) Fesili, (2) Mau, ma le (3) Mataupu

O le auala faigofie e taulimaina ai le tusi O ā Aʻoaʻoga Moni a le Tusi Paia? o le (1) faatū se fesili e faaali mai ai manatu o le tagata, (2) faitau se mau talafeagai, ma le (3) Taʻua se mataupu i le tusi o loo talanoaina ai lea mataupu e ala i le faitauina o fesili o loo i le amataga lea e i lalo ifo o le ulutala. Afai e faaalia le fiafia o le tagata o le aiga, atonu la e te mafai ona faataʻitaʻia se suʻesuʻega faale-Tusi Paia i le faaaogāina o palakalafa amata o lenā mataupu. O lenei auala e mafai ona faaaogā e amata ai se suʻesuʻega i lau uluaʻi asiasiga po o le faia foʻi o se toe asiga.

◼ “Pe e te manatu e mafai e tagata faatauvaa ona iloa Lē silisili ese na faia i tatou, e pei ona taʻua i inei i le Tusi Paia?” Faitau le Galuega 17:26, 27, ma faatali mo se tali. Ona faamatilatila lea o le mataupu 1.

◼ “I faafitauli o loo tatou fesagaʻia i aso nei, pe e te manatu ea e mafai ona maua le faamāfanafanaga ma le faamoemoe e pei ona faamatalaina i inei?” Faitau le Roma 15:4, ma faatali mo se tali. Ona faamatilatila lea o le mataupu e 2.

◼ “Afai e iai sou mana e fai ai, po o le a e faia ea nei suiga?” Faitau le Faaaliga e 21:4, ma faatali mo se tali. Ona faamatilatila lea o le mataupu e 3.

◼ “Pe e te manatu ea o le a iai se taimi e mafai ai e a tatou fanau ona olioli i tulaga e pei ona faamatalaina i lenei pese mai anamuā?” Faitau le Salamo 37:10, 11, ma faatali mo se tali. Ona faamatilatila lea o le mataupu e 3.

◼ “Pe e te manatu ea o le a iai se aso o le a mafai ona faataunuuina ai upu nei?” Faitau le Isaia e 33:24, ma faatali mo se tali. Ona faamatilatila lea o le mataupu e 3.

◼ “Pe na e taumānatu ea po o iloa mai e tagata ua maliliu mea o loo faia e tagata o loo ola?” Faatali mo se tali. Ona faitau lea o le Failauga 9:5, ma faamatilatila le mataupu e 6.

◼ “Pe e te manatu ea e iai se taimi o le a mafai ai ona tatou toe vāai i ē pele ua maliliu, e pei ona taʻua e Iesu i le mau lenei?” Faitau le Ioane 5:28, 29, ma faatali mo se tali. Ona faamatilatila lea o le mataupu e 7.

◼ “O le ā sou manatu, o le ā o le a fai e le Atua ina ia faataunuu ai lona finagalo i le lalolagi e pei ona faia i le lagi, e pei ona taʻua i le tatalo taʻutaʻua lenei?” Faitau le Mataio 6:9, 10, ona faatali lea mo se tali. Ona faamatilatila lea o le mataupu e 8.

◼ “Pe e te manatu ua tatou ola nei i le vaitaimi lea o loo faamatalaina i le valoaga lenei?” Faitau le 2 Timoteo 3:1-4, ona faatali lea mo se tali. Ona faamatilatila lea o le mataupu e 9.

◼ “Ua taumānatu le toʻatele o tagata pe aiseā ua foliga mai ai o loo faateteleina faafitauli o tagata. Pe na e tomānatu ea i le faamatalaga o loo taʻua i le mau lenei atonu o lea le māfuaaga?” Faitau le Faaaliga 12:9, ona faatali lea mo se tali. Ona faamatilatila lea o le mataupu e 10.

◼ “Pe na e momoo ea ia iloa le tali i fesili e pei o lenei?” Faitau le Iopu 21:7, ma faatali mo se tali. Ona faamatilatila lea o le mataupu e 11.

◼ “Pe e te manatu ea e fesoasoani le faatatauina o le fautuaga lenei i tagata ina ia olioli ai i se olaga fiafia i le aiga?” Faitau le Efeso 5:33, ma faatali mo se tali. Ona faamatilatila lea o le mataupu e 14.

E mafai ona lipoti le suʻesuʻega faale-Tusi Paia pe a uma ona faataʻitaʻi le auala e fai ai le suʻesuʻega ma ua faalua ona faia ma, pe afai ua iai ni māfuaaga e talitonu ai o le a faaauau ona faia lea suʻesuʻega.