E Mafai e Tagata Uma Ona Faia ni Soo Fou
1 O le mauaina o se soo fou, e lē o le iʻuga na o ni taumafaiga a se tagata se toʻatasi. E faaaogā e Ieova lana “ʻau faigaluega” e fesoasoani i tagata aʻoga o le Tusi Paia ina ia tutupu aʻe faaleagaga. (1 Kori. 3:6-9) E tatou te fesoasoani uma i ē fou e lē gata i a tatou tali mai le loto i sauniga faa-Kerisiano, ae o amioga lelei foʻi, lea e avea ma faamaoniga iloga o le galue o le agaga o le Atua i o tatou olaga. (Ioa. 13:35; Kala. 5:22, 23; Efe. 4:22, 23) O ā nisi mea e faia e fesoasoani ai i ē fou?
2 Avea o se Faapotopotoga: E tatou te faaalia uma le fiafia i ē ua amata ona auai i sauniga, i le tausolomua e faafeiloaʻi i latou ma le māfana ma talanoa i ai a o leʻi amata ma pe a uma foʻi le sauniga. Pe a tomānatu i le uluaʻi taimi na ia feiloaʻi ai ma le faapotopotoga, na taʻua e se alii: “Na ou feiloaʻi i tagata e sili ona alolofa faamaoni e matuā ou lē masani ai i le aso e tasi, na i lo se isi lava taimi i le lotu sa ou ola aʻe ai. E manino mai ua ou maua le mea moni.” Na papatiso o ia i le fitu masina mulimuli ane ina ua mavae lana uluaʻi sauniga.
3 Ia faamālō i le tagata aʻoga o le Tusi Paia a o ia agaʻigaʻi i luma faaleagaga. Pe na ia fesagaʻia ni teteega? Po o ia auai e lē aunoa i sauniga? Pe na ia loto tele e fai se tali? Po ua tusia lona igoa i le Aʻoga o le Faiva Faatiokarate po ua amata foʻi ona auai i le talaʻiga? Ia faamālō iā te ia mo le agaʻigaʻi i luma. O le a faafouina ma faalaeiauina ai o ia.—Faata. 25:11.
4 Avea o Sē Faia Suʻesuʻega Faale-Tusi Paia: Ua fesoasoani nisi tagata talaʻi i a latou tagata aʻoga o le Tusi Paia e faamasani i sui taʻitasi o le faapotopotoga. Ua latou talosaga atu i isi tagata talaʻi e ō faatasi ma i latou i le faia o se suʻesuʻega. Ia vave valaaulia le tagata aʻoga i sauniga a le faapotopotoga. Ia faailoa atu o ia i isi pe a amata ona auai i sauniga. Po o ia tauivi e foʻia se masaniga leaga e pei o le ulaula? Po o iai se tasi o lona aiga o tetee i lana suʻesuʻega? E ono aogā iā te ia pe a talanoa i se tagata talaʻi na fesagaʻia ma foʻia se luʻi faapena.—1 Pete. 5:9.
5 E manaʻomia e ē fou se lagolagosua faaleagaga mai le faapotopotoga. E mafai e tagata uma ona fesoasoani iā i latou e faia ni agaʻigaʻi i luma, e ala i le naunau moni iā i latou.