“Tautala i le Upu ma le Lē Mataʻu”

¹ Pe e iai se taimi e te faatalatū ai e tautala atu e uiga i lou faatuatua, pe a maua se avanoa e faia ai faapea i le aʻoga po o le galuega? Po o se luʻi iā te oe le molimau lē fuafuaina i tauaiga ma tuaoi, pe atonu foʻi i tagata e te lē masani ai? O le ā se mea e fesoasoani iā i tatou uma e faaaogā ai avanoa lelei e “tautala [atu ai] i le upu ma le lē mataʻu”?—Fili. 1:14.

² Aua le Faatalatū: Pe e te faatalatū mai le puipuia o se uō māfana po o se tauaiga ua tuuaʻia sesē? Ua tele senituri o matuā tuuaʻia sesē Ieova la tatou Uō māfana sili. Ua iā i tatou le faaeaga tutasi o le avatu o se molimau mo lo tatou Atua sili! (Isa. 43:10-12) E fesoasoani iā i tatou le alofa loloto mo Ieova e fesagaʻia ai lagona matamuli po o le fefe, ma uunaʻia ai e tautala atu e aunoa ma le faatalatū e molimau ma le loto tele i le upu moni.—Galu. 4:26, 29, 31.

³ Ia manatua, o la tatou feʻau o le tala lelei. O le a aumaia ai aogā tumau i ē e utagiaina. O le taulaʻi atu i le tāua o la tatou galuega talaʻi na i lo le taulaʻi iā i tatou lava po o ē tetee mai, o le a fesoasoani e tatou te talaʻi atu ai ma le loto tele.

⁴ Faaaʻoaʻoga a Isi: E tatou te maua le malosi mai faaaʻoaʻoga faamaoni a isi, o ē na tautatala atu ma le lē mataʻu i afioga a le Atua. O se faaaʻoaʻoga, na faalauiloa ma le loto tele e Enoka le faasalaga a Ieova i tagata agasala faalēmataʻu. (Iuta 14, 15) Na talaʻi atu ma le faamaoni Noa i tagata na lē ano ane iā te ia. (Mata. 24:37-39) E ui i teteega ogaoga ae na talaʻi pea Kerisiano o le uluaʻi senituri, o ē “e leʻi aʻoaʻoina . . . ma le valelea.” (Galu. 4:13, 18-20) E masani ona iai i Le Olomatamata ma le Ala Mai! talaaga o soifuaga i aso nei, o ē na foʻiaina le fefefe i tagata ona o le faatuatua iā Ieova, ma avea o ni faievagelia maelega.

⁵ E mafai ona tatou maua le loto tele e ala i le iloilo o soifuaga o auauna faamaoni anamua o ē na fesagaʻia tulaga faigatā. (1 Tu. 19:2, 3; Mare. 14:66-71) Na latou “loto tele ona o lo tatou Atua” ma tautatala atu ma le lē matataʻu. E mafai foʻi ona tatou faia faapea!—1 Tesa. 2:2.