Pe Mafai Ona E Ulu Atu i le Faitotoʻa Lautele o Galuega Aogā?
1. O le ā “le faitotoʻa lautele” mo galuega aogā ua tatala mai iā i tatou?
1 Ina ua tatala mai i le aposetolo o Paulo “le faitotoʻa lautele” o galuega aogā, sa ia naunautaʻi e faaaogā lelei lenā avanoa e faaauau ai ona ia talaʻia le tala lelei o le Malo e ui sa toʻatele na faatuʻiese pe tetee ane. (1 Kori. 16:9) I aso nei, pe ā ma le 642,000 le ʻautalaʻi i le lalolagi aoao ua ulu atu foʻi i le faitotoʻa lautele o galuega aogā, e ala i le avea ma paeonia sauatoa.
2. Aiseā e lelei ai ona fai ma toe siaki o tatou tulaga mai lea taimi i lea taimi?
2 E Suia Tulaga o Mea: Atonu i le taimi nei e lē o tele sa tatou auaunaga o fai ona o o tatou tulaga, ae e ono suia na tulaga i se taimi. E lelei la le fai ma toe siaki o tatou lava tulaga mai lea taimi i lea taimi, ae lē na o le faatalitali faapea seʻi maua se taimi talafeagai. (Fai. 11:4) Po o oe o se talavou ua toeitiiti iʻu au aʻoga? Po o oe o se matua ua toeitiiti ō uma lau fanau i le aʻoga? Po ua toeitiiti e mālōlō litaea mai lau galuega totogi? O suiga na e ono tele ai se avanoa e mafai ona e ulu atu ai i le auaunaga faapaeonia sauatoa. O se tuafafine sa feagai ma maʻi i le taimi ua teʻa, na filifili e paeonia ae ua 89 lenā o ona tausaga. Aiseā? Talu ai ua atoa le tausaga e leʻi toe maʻi, sa manatu ai o lona uiga ua mafai nei e lona malosi ona paeonia.
3. Na faapefea ona fai e nisi ni fetuunaʻiga ina ia mafai ona avea ma paeonia sauatoa?
3 O se faaaʻoaʻoga o Paulo. O lana fuafuaga sa iai muamua, ina ia asiasi atu i ona uso i Korinito. Peitaʻi sa toe fetuunaʻi ana fuafuaga ona o le tala lelei. E toʻatele i latou o loo paeonia sauatoa nei, sa tele ni fetuunaʻiga na latou fai ina ia mafai ona paeonia. Na matuā faafaigofie e nisi o latou olaga, ua oo lava ina saʻili na o se galuega totogi faavaitaimi, e maua ai sina seleni mo le tausiga faaletino, lea foʻi ua matuā faataugofie lava. Ua latou matuā fiafia nei i lo latou faaeaga. (1 Timo. 6:6-8) O nisi ulugalii ua latou fai ni suiga ina ia faigaluega na o le tane, ae maua ai le avanoa mo le avā e paeonia.
4. O le ā se mea tatou te faia pe a lē mautinoa pe mafai ona ausia itula manaʻomia?
4 Aua neʻi vave sisii ou lima mai le paeonia, i lou popole neʻi lē mafai ona e ausia itula manaʻomia. E na o le lua lava itula pe sili laʻitiiti atu e te manaʻomia i aso taʻitasi. Afai e te lē mautinoa pe mafai ona e faia, faataʻitaʻi ona e paeonia lagolago mo se masina se tasi pe lua, ae tuli ai lou sini e 70 itula i le masina. O le faia faapea o le a e tofo ai i le olioli i le auaunaga paeonia. (Sala. 34:8) Talanoa ma i latou o loo paeonia i le taimi nei. Atonu o luʻi foʻi na sa latou tauivi ai. (Faata. 15:22) Ōle iā Ieova e faamanuia mai i au taumafaiga ina ia faalautele lau faiva.—1 Ioa. 5:14.
5. Aiseā ua avea ai le paeonia sauatoa o se sini aogā?
5 Se Sini Aogā: E tele faamanuiaga pe a auauna o se paeonia sauatoa. E atili ai ona e fiafia auā ua tele lau foaʻi atu. (Galu. 20:35) O le a atili faaleleia ai foʻi lou tomai e vaevae pe talaʻi tonu le Afioga a le Atua. (2 Timo. 2:15) O le a tele ai foʻi ina e molimautino lava i le lagolago atu o Ieova iā te oe. (Galu. 11:21; Fili. 4:11-13) O le avea foʻi o oe ma paeonia, o le a e tinoū ai e ati aʻe isi uiga faaleagaga, e pei o le onosai, ma atili ai ona e māfana iā Ieova. (Iako. 4:8) Faamata e mafai ona e ulu atu i lenei faitotoʻa lautele o galuega aogā ma avea oe ma paeonia sauatoa?