Ia Faalaeiau ma Mautinoa

O LE feʻau ua poloaʻiina i tatou e talaʻia, o se tala lelei. Na fetalai Iesu: “Ia muai talaʻiina foi le tala lelei i nuu uma lava e ao ai.” (Mare. 13:10) Sa faataatia e Iesu lava ia se faaaʻoaʻoga i le folafolaina o “le tala lelei o le malo o le Atua.” (Luka 4:43) Ua faamatalaina foʻi le mea sa talaʻia e le ʻauaposetolo, o “le tala lelei a le Atua” ma o “le tala lelei ia Keriso.” (1 Tesa. 2:2; 2 Kori. 2:12) O lenā feʻau e mafai ona faalaeiauina ai ma e mautinoa.

I le ōgatasi ma le faalauiloaga o le “tala lelei e faavavau” e le “agelu ua lele i le taulotoaiga o le lagi,” ua tatou uunaʻia ai tagata: “Ia outou matatau i le Atua, ma avatu ia te ia le viiga.” (Faaa. 14:6, 7) E tatou te taʻutaʻu atu i vaipanoa uma e uiga i le Atua moni, o lona suafa, o ona uiga matagofie, o ana galuega ofoofogia, o lana fuafuaga alofa, lo tatou nofoaitalafu iā te ia, atoa ma mea o loo ia finagalo ai mo i tatou. Ua aofia i le tala lelei le mea moni e faapea, o le a faaumatia e Ieova le Atua tagata amioleaga, o ē e lē ava iā te ia ma faaleagaina le olaga mo isi tagata. Peitaʻi e lē o so tatou tiute le faamasino o tagata o ē tatou te talaʻi atu i ai. O lo tatou faanaunauga moni, ia toʻatele nisi e mafai ona talileleia le feʻau a le Tusi Paia ina ia avea moni ai o se tala lelei mo i latou.—Faata. 2:20-22; Ioa. 5:22.

Faatapulaa Mataupu Faavaivai Loto. O le mea moni, e iai vala faavaivai loto o le olaga. E tatou te lē faagaloina na mea. Ina ia amata se talanoaga, atonu e te faatū atu se faafitauli o loo i manatu o i latou o i lau oganuu ma talanoa puupuu i ai. Ae e masani lava ona itiiti se aogā o le talanoa umi i ai. Ua lē ʻasa ona faalogologo tagata i tala faamomoiloto, o le talanoa la i mea e lē logolelei, atonu o le a māfua ai ona latou lē toe faalogo mai. I le amataga o lau talanoaga, ia taumafai e faauaʻi atu i upu moni faafouina o le Afioga a le Atua. (Faaa. 22:17) Mulimuli ane, afai e lē manaʻo le tagata e faaauau le talanoaga, a ua mafai ona e tuua ai iā te ia se faalaeiauga e mafaufau i ai. Atonu o le a atili ai i lenā ona ia lotomalie e faalogologo i se isi taimi.

I se auala faapena, afai e valaaulia oe e faia se lauga, aua e te faatumuina le aofia i faamatalaga faavaivai loto ona e faapea o loo anoanoaʻi faamatalaga o loo maua. Afai e talanoa umi se failauga i le lē taulau o pule faaletagata, i lipoti o solitulafono ma faiga sauā, ma le faateʻia i le faatuputeleina o amioga lē mamā, o le iʻuga e mafai ona faamomoi loto. E faatoʻā faailoa atu lava ni vaega faavaivai loto o se mataupu, pe a iai se fuafuaga aogā. O le itiiti o na manatu, atonu e faamamafa ai le talafeagai o lau lauga ma le vaitaimi o loo iai. Atonu foʻi o le a mātaulia ai ni vala tetele e saosaolaumea i se tulaga, ma faapea ona faaaogā e faailoa atu ai le pogai e aogā ai le vaifofō o loo iai i le Tusi Paia. Afai e mafai, ia faapatino ae aua le talanoa umi i faafitauli.

O le tulaga masani, e lē faigofie pe manaia foʻi le aveese uma o faamatalaga faavaivai loto mai se lauga. O le luʻi, o le taulimaina lea o faamatalaga mautinoa ma faamatalaga faavaivai loto i se auala o le a iʻu ai i se aafiaga atoa o le mautinoa. Ina ia ausia lenei mea, e ao ona e filifili po o ā manatu e faaaofia ai, o ā manatu e aveese, ma o fea manatu e faamamafa. I le Lauga i Luga o le Mauga, na tomatau ai e Iesu lana ʻaufaalogologo ina ia ʻaloese i ala manatu faapito o le ʻautusiupu ma le ʻau Faresaio, ma na ia avatu ni nai faaaʻoaʻoga e faataʻitaʻia ai le manatu. (Mata. 6:1, 2, 5, 16) Ae peitaʻi, na i lo le fetalai umi i faaaʻoaʻoga faavaivai loto a na taʻitaʻi lotu, sa faamamafa e Iesu le malamalama i ala moni o le Atua ma ola ai. (Mata. 6:3, 4, 6-15, 17-34) O le iʻuga sa matuā sili atu ona aogā.

Ia Mautinoa le Auala e Faaleo Atu Ai. Afai sa tofia oe e faia se lauga i la outou faapotopotoga e uiga i nisi o vala o galuega faa-Kerisiano, ia taumafai e faalaeiau ae lē o le faitio. Ia mautinoa o loo e faia le mea ua e faalaeiauina ai isi e fai. (Roma 2:21, 22; Epe. 13:7) Ia faagaeeina au tala e le alofa, ae lē o le faatigā. (2 Kori. 2:4) Afai o loo e mautinoa e mananaʻo ou uso talitonu e faafiafia Ieova, o le a faaalia la lenā mautinoa i au tala, ma i lea o le a maua ai se iʻuga aogā. Seʻi mātau le auala sa faaleo atu ai e le aposetolo o Paulo lenā mautinoa, e pei ona faamau ai i le 1 Tesalonia 4:1-12; 2 Tesalonia 3:4, 5; ma le Filemoni 4, 8-14, 21.

E iai taimi e tatau ai i toeaina ona lapataʻi atu i amioga lē talafeagai. Peitaʻi, o le a fesoasoani le lotomaulalo iā i latou ina ia feagai ai ma o latou uso i le loto o le agamalu. (Kala. 6:1) O le auala e tautala ai, e ao ona faaalia ai o loo tausia ma le faaaloalo i latou o loo i le faapotopotoga. (1 Pete. 5:2, 3) O loo maʻoti ona fautuaina e le Tusi Paia tauleleʻa ina ia nofouta i lenā tulaga. (1 Timo. 4:12; 5:1, 2; 1 Pete. 5:5) Pe afai e tatau ona aʻoaʻi, pe faatonu, pe faasaʻo, e ao ona faia ina ia ōgatusa ma mea ua taʻua i le Tusi Paia. (2 Timo. 3:16) E lē tatau ona faamalosia pe mimilo le faatatauina o le Tusi Paia, ina ia lagolago ai ni manatu atonu o loo taofiofi mamau i ai le failauga. E tusa lava pe manaʻomia se fautuaga faasaʻo, e mafai ona mautinoa le auala e faaleo atu ai le lauga pe afai e faamamafa muamua le auala e ʻaloese ai mai le faia o mea sesē, le auala e foʻia ai faafitauli, le auala e foʻia ai tulaga faigatā, le auala e faasaʻo ai se ala sesē, ma le auala e puipuia ai i tatou i mea manaʻomia a Ieova.—Sala. 119:1, 9-16.

Pe a sauniuni lau lauga, ia manatunatu faapitoa i le auala o le a e faaiʻu ai manatu tāua taʻitasi ma le lauga atoa. O au upu mulimuli e masani ona manatua mo se taimi umi. Po o le a avea ea o ni upu mautinoa?

Pe a Talanoa ma Uso Talitonu. O auauna a Ieova, e pele iā i latou avanoa e mafuta ai i sauniga faa-Kerisiano. O taimi na e faafouina ai faaleagaga. Ua uunaʻia i tatou e le Tusi Paia ia manatua ona “fefaamafanafanai” pe a tatou faapotopoto i a tatou nofoaga mo le tapuaʻiga. (Epe. 10:25) E faia lenā mea, e lē gata i a tatou lauga ma tali i taimi o sauniga, ae atoa foʻi ma talanoaga a o leʻi amata ma pe māeʻa sauniga.

E ui e masani ona faaautū talanoaga i lo tatou olaga i aso taʻitasi, ae o faalaeiauga silisili e mafai ona maua mai le talatalanoa i mea faaleagaga. E aofia ai mea tutupu sa olioli ai i le auaunaga paia. O le faaalia o le naunau tatau o le tasi i le isi e faalaeiauina ai foʻi.

Ona o aafiaga a le lalolagi o loo siʻomia ai i tatou, e manaʻomia ai ona tatou faaeteete. Ina ua tusi atu i Kerisiano i Efeso, na taʻua e Paulo e faapea: “O lenei, ia outou tuu ese le pepelo, ia tautalatala faamaoni taitasi ma lē la te tuaoi.” (Efe. 4:25) O le tautala faamaoni na i lo le talapepelo, e aofia ai le ʻaloese mai le viiviia o mea ma tagata o loo tapuaʻia e le lalolagi. I se tulaga faapena, sa lapataʻi mai ai Iesu faasaga i “le malosi taufaaʻoleʻole o ʻoa.” (Mata. 13:22, NW) O lea, pe a fetalanoaaʻi, e manaʻomia ona tatou faaeteete ina ia aua neʻi faaauilumaina lenā taufaaʻoleʻole e ala i le faatāua o le mauaina o mea faaletino.—1 Timo. 6:9, 10.

I lana fautuaga e uiga i le manaʻoga ina ia faalaeiau, na uunaʻia ai i tatou e le aposetolo o Paulo, ia aua le faamasino pe taʻu faatauvaaina se uso o lē atonu ua lē auai i nisi o mea ona o le “vaivai i le faatuatua,” o lona uiga, na te leʻi maua le malamalamaga atoa o le saʻolotoga faa-Kerisiano. Ioe, ina ia faalaeiau ai isi i a tatou talanoaga, e tatau ona tatou manatunatu i lo latou talaaga ma le tele o lo latou tuputupu aʻe faaleagaga. Pagā le faanoanoa pe afai “e tuu ane e se tasi se mea e tausuai ai, po o se mea e tautevateva ai lona uso [po o lona tuafafine]”!—Roma 14:1-4, 13, 19.

O i latou o loo tauivi ma faafitauli totino matuiā—mo se faaaʻoaʻoga, o maʻi faaumiumi—latou te talisapaia talanoaga faalaeiau. Atonu e tele ni taumafaiga o loo faia e lenā tagata ina ia auai i sauniga. O i latou e malamalama i lona tulaga, atonu e fesili: “O faapefea mai oe?” O le a lē taumatea lona talisapaia o lo latou manatu atu. Ae peitaʻi, o lona soifua mālōlōina atonu e lē o se mataupu lenā e sili ona faalaeiau o loo ia fia talanoa i ai. O upu e faaalia ai le talisapaia ma le faamālō, atonu e sili atu ona faamāfanafana ai lona loto. Po o e vaaia se faamaoniga o le faaauau o lona alofa mo Ieova ma lona tutumau i le feagai ma se tulaga faigatā? Pe e te lagona le faalaeiauina pe a ia talanoa mai? Pe e lē sili atu ea ona faalaeiau i le uaʻi atu i ona uiga lelei ma lona sao i le faapotopotoga na i lo o ona vaivaiga?—1 Tesa. 5:11.

Ina ia faalaeiau a tatou talanoaga, e tāua faapitoa le manatua o le silafaga a Ieova i mea o loo talanoaina. I Isaraelu anamua, o i latou sa tautatala faasagatau i sui o Ieova ma faitio e uiga i le manai, sa oo iai le toʻasa mamafa o le Atua. (Nu. 12:1-16; 21:5, 6) E mafai ona tatou faamaonia atu ua tatou maua aogā mai na faaaʻoaʻoga, pe afai tatou te faaalia le faaaloalo i toeaina ma talisapaia taumafa faaleagaga ua saunia mai e le vasega o le auauna faamaoni ma le mafaufau.—1 Timo. 5:17.

O le mauaina o mea aogā e talatalanoa faatasi iai ma o tatou uso Kerisiano e lē o se faafitauli. Ae peitaʻi, afai e soona faitio naʻuā faamatalaga a se tasi, ia tausolomua e tataʻi le talanoaga i se itu e faalaeiauina ai.

Pe tatou te molimau atu i isi, tautala mai luga o le pulelaa, po o le talatalanoa ma uso talitonu, seʻi o tatou faaaogā le faautauta e avatu ai mai mea lelei o i o tatou loto “upu lelei e ati ae ai i mea e aoga, e tupu ai le lelei i e faalogologo i ai.”—Efe. 4:29.