Polokalame Fou o le Fonotaga Matagaluega

E ono ma tatau ona avatu iā Ieova le viiga. E faapefea ona tatou viia Ieova? O ā ni luʻi ua fesagaʻia ma nisi ona o le viiaina o Ieova? O ā ni faamanuiaga ua maua e i latou o loo viiaina le Atua i le taimi nei? O le polokalame mo le fonotaga matagaluega mo le tausaga faaleauaunaga 2008, o le a saunia ai ni tali faamalieloto mo na fesili. O le matua mo le fonotaga matagaluega, “Ia Outou Faia Mea Uma Lava ia Viia ai le Atua.” (1 Kori. 10:31) Manatu i le anoanoaʻi o taʻiala faaleagaga o le a tatou maua a o faagasolo na aso e lua o le fonotaga.

O le a tauaaoina e le ovasia itumalo lauga nei, “Aiseā e Ao ai Ona Viia le Atua?” ma le “Ia Avea ma Faaaʻoaʻoga i le Faia o Mea e Faafinagaloina e le Atua.” O le a ia tauaaoina foʻi le lauga lautele e faamatuaina faapea, “O Ai Moni Lava o Loo Latou Viia le Atua?” ma le lauga faaiʻu o le fonotaga, “Ia Autasi i le Faamamaluina o le Atua i le Lalolagi Aoao.” O le a ia taulimaina foʻi le Aʻoga o le Faiva Faatiokarate. O matua nei o lauga o le a tauaaoina e le ovasia matagaluega, “Ia Fiafia e Faaatagia Atu le Mamalu o le Atua,” “Uaʻi Atu i Manaʻoga o le Matagaluega,” ma “Ia ‘Faatumauina i le Upu Moni,’” lea e faavae mai le 2 Peteru 1:12. E lē gata i lea, o le a tatou aʻoaʻoina foʻi pe faapefea ona “E Viia le Atua i le Auaunaga Paeonia.” E lua lauga faasolo faagaeeloto o le fonotaga, o le matua o le lauga muamua “Ia Viia le Atua i Vala Uma o o Tatou Olaga,” o le a tatou iloiloina ai le loloto o uiga o upu faagaeeina o loo maua i le 1 Korinito 10:31. O le matua o le isi lauga faasolo, “Faia o le Auaunaga Paia e Viia ai Ieova,” o le a iloiloina ai vala uma o la tatou tapuaʻiga iā Ieova. O le a tatou olioli foʻi i le otootoga o Le Olomatamata ma le talanoaina o le mau o le aso i le Aso Sa. O le a iai foʻi le avanoa mo le papatisoga.

O le toʻatele o tagata i aso nei, ua latou mumusu e faalauiloa le Atua. E toʻatele ua tosina atu i a latou fuafuaga masani ma ua lē manatunatu ai i le mamalu o Ieova. (Ioa. 5:44) Ae ua tatou iloa le tāua o le faaalu o le taimi e manatunatu ai pe faapefea ona tatou fai e pei ona fautua mai “Ia Outou Faia Mea Uma Lava ia Viia ai le Atua.” Ia fuafua nei ina ia e auai ma maua ni aogā mai aso uma o le fonotaga.