Olioli i Le Ola i Le Lalolagi e Faavavau!

Ua lolomia lenei mekesini faapitoa ina ia fesoasoani i a te oe ina ia iloa po o ai na faia le lalolagi ma mea uma o i ai. O le a e aʻoaʻoina o le Atua na faia le lalolagi, e i ai sona suafa. O le a matou faamatalaina foi i totonu le pogai na faia ai e le Atua le tagata ma pe faapefea ona e olioli i le ola i le lalolagi e faavavau.

Matou te faamoemoe o le tele o ata o le a fesoasoani i a te oe ina ia vaaia nei mea i ona tulaga lelei. Ina ia mauaina ona aoga silisili, e tatau ona e faitauina mau o le Tusi Paia ua faasinoina mai i tafatafa o le tele o ata. I lena ala, o le a e faitauina ai e oe lava ia ni isi o folafolaga lelei a le Atua o loo i le Tusi Paia ma le mea o fetalai i ai le Atua e tatau ona e faia ina ia mauaina ai le faataunuuina o nei folafolaga.

Atonu e te faanaunau foi e faaaoga nei mekesini faapitoa ina ia fesoasoani i isi tagata. Afai e i ai sau fanau, e mafai la ona e faaaogaina e fesoasoani ai ina ia latou aʻoaʻo e uiga i le Atua. Afai o loo e soifua i se atunuu e toatele ni tagata matutua e lē iloa faitau, e mafai ona e faaaogaina ata e fesoasoani ai i a i latou ina ia malamalama i le fuafuaga a le Atua, ina ia mafai foi e i latou ona fesoasoani i o latou tuaoi.

Matou te faamoemoe ma le faamaoni o le suesueina o lenei faamatalaga o le a faaavaina ai le ala mo oe mo le tele o faamanuiaga, e oo foi i le faaali atu i isi pe faapefea ona ola e faavavau i inei i le lalolagi.

O Ai na Foafoaina Oe?

1 Sa faia e le Atua le lagi ma le lalolagi.—Kenese 1:1

2 E i ai se suafa o le Atua. O lona suafa o Ieova.—Salamo 83:18

E afio Ieova i le lagi. O ia o se agaga. E le mafai ona e vaai i a te ia.—Isaia 66:1; Ioane 1:18; 4:24

3 Na faia e Ieova le Atua le tele o agelu i le lagi. O i latou foi o agaga. Sa lelei uma i latou. I taimi ua mavae, latou te faia ai ni tino tagata i ni isi taimi ina ia mafai ai e tagata ona vaaia i latou.—Eperu 1:7