Faalaeiau ma Faamalosiau i le Aofia

E UI i faafitauli o loo latou fesagaʻi, e ao i auauna a le Atua ona mafai ona maua faalaeiauga i le faapotopotoga Kerisiano. Ina ia ausia lenei mea, e tatau lava i toeaina ona faamautinoa o a latou lauga ma fautuaga e faalaeiauina ai. E ao i toeaina ona avea e “pei o se lafitaga i le matagi, ma se mea e malu ai i le afā; e pei o vaitafe i le nuu naumati, e pei o le paolo foi o le papa tele i le nuu ua le o i ai se vai.”—Isa. 32:2.

Afai o oe o se toeaina, po o saunia e au lauga le faafouina ma faamāfanafanaga? Po o faagaee ai i latou o ē o loo taumafai e auauna faamaoni iā Ieova? Po o faaoo atu ai le malosi e finafinau ai i le faia o le finagalo o le Atua e ui i faaseā ma teteega mai i tagata lautele? Ae ā pe afai o nisi o lau aofia ua faanoanoa, ua mafatia ona o le mamafa o omiga matuiā tau tamaoaiga, po o loo tauivi ma se maʻi tugā lea e lē o mailoa se vaifofō? E mafai ona e ‘faamalosia ou uso i upu a lou gutu.’—Iopu 16:5.

Ia faaaogā le avanoa ua iā te oe o se failauga e fesoasoani ai i ou uso ina ia maua le faamoemoe ma le malosi mai iā Ieova atoa ma sauniuniga ua ia faia.—Roma 15:13; Efe. 6:10.

Ia Faamanatu Mea ua Faia e Ieova. O se auala tāua e faagaee ai le lototele o le faaalia lea o le auala na fesoasoani ai Ieova i ona tagata i tulaga faigatā i aso ua mavae.—Roma 15:4.

Na fetalai Ieova iā Mose ia ‘faalaeiau’ ma “faamalosi” iā Iosua a o leʻi ulu atu Isaraelu i le Nuu Folafolaina, lea sa nonofo ai nuu na fai ma fili i na ona pō. Na faapefea ona faia e Mose lenā mea? A o iai Iosua, sa faamanatu atu e Mose i le nuu atoa mea na faia e Ieova mo i latou ina ua latou tuua Aikupito. (Teu. 3:28; 7:18) Sa toe taʻua foʻi e Mose ia manumalo na tuuina atu e Ieova iā i latou faasaga i tagata sā Amorī. Na uunaʻia Iosua e Mose e faapea: “Ia e faamalosi, ma ia e loto tele.” (Teu. 31:1-8) Pe a e saʻili e faalaeiau ou uso, pe e te fesoasoani iā i latou ina ia maua le malosi e ala i le manatua o mea ua uma ona faia e Ieova mo i latou?

I nisi taimi ona ua lofia naʻuā tagata i o latou faafitauli, ua latou taumanatu ai po o le a iai ea se taimi o le a latou tofo ai i faamanuiaga o le Malo. Ia faamanatu iā i latou le maufaatuatuaina o folafolaga a Ieova.—Iosua 23:14.

I nisi atunuu ua fesagaʻi ai o tatou uso ma poloaʻiga faalemalo ina ia faasā le talaʻiga o le tala lelei. I na tulaga, e mafai e toeaina alolofa ona fesoasoani i uso talitonu ina ia latou maua le malosi mai mea na tutupu i le ʻauaposetolo o Iesu Keriso. (Galu. 4:1–5:42) Ma o le faamatilatila o le auala na suia ai e Ieova mea na tutupu e pei ona faamauina i le tusi o Eseta, o le a matuā faamautinoa ai le faagaee o uso ina ia maua le lototele.

E iai taimi e auai ai tagata i sauniga a le faapotopotoga ae lē o agaʻigaʻi atili i luma. Atonu latou le lagona faapea e lē taitai faamagaloina i latou e le Atua ona sa leaga tele o latou olaga muamua. Atonu e te faamatala i ai le auala na feagai ai Ieova ma le tupu o Manase. (2 Nofo. 33:1-16) Pe e te ono taʻu atu foʻi i ai e uiga i tagata Korinito anamua o ē na suia o latou olaga, avea ma Kerisiano, ma sa taʻuamiotonuina e le Atua.—1 Kori. 6:9-11.

Po o lagona ea e nisi faapea o faafitauli ua latou tofo i ai e faaalia ai lo latou lē mauaina o le finagalo malie o le Atua? E mafai ona e faamanatu iā i latou mea na tofo i ai Iopu ma le auala sa matuā faamanuiaina ai o ia ona sa ia taofimau i lona faamaoni iā Ieova. (Iopu 1:1-22; 10:1; 42:12, 13; Sala. 34:19) Na sesē le manatu o le ʻaufaamāfanafana pepelo a Iopu faapea sa faia e Iopu ni agasala. (Iopu 4:7, 8; 8:5, 6) I se tulaga tuufaafeagai, ina ua faamalosiau i le ʻausoo ma ‘faalaeiau i latou e tumau i le faatuatua,’ na faapea atu Paulo ma Panapa: “O puapuaga e tele e tatau ona tatou sao atu ai i le malo o le Atua.” (Galu. 14:21, 22) E faapena foʻi i aso nei, e mafai ona e faamalosiau iā i latou o loo i lalo o tofotofoga e ala i le faasino atu i ai e faapea, o le tumau i lalo o puapuaga e manaʻomia mo Kerisiano uma ma o se mea e tautele i fofoga o le Atua.—Faata. 27:11; Mata. 24:13; Roma 5:3, 4; 2 Timo. 3:12.

Ia faalaeiau lau ʻaufaalogologo e mafaufau i auala ua faataunuu ai e Ieova ana folafolaga i o latou lava olaga. O le faamanatu atu i ai, atonu o le a latou iloa ai le auala ua uma ona gaoioi ai Ieova mo i latou lava, e pei ona sa ia folafola mai. I le Salamo 32:8, tatou te faitau ai e faapea: “Ou te aʻoaʻo ia te oe, ma faasino ia te oe i lea lava ala e te savali ai; ou te faatonu ia te oe, ma ou vaai ia te oe.” E ala i le fesoasoani i lau ʻaufaalogologo ia manatua le auala sa taʻitaʻia pe faamalosia ai i latou e Ieova, o le a e faapogaia ai i latou e tagaʻi ifo i se auala loloto totino faapea o loo tausi mai Ieova iā i latou ma o le a ia fesoasoani moni lava iā i latou e foʻia so o se tofotofoga o loo latou fesagaʻi i le taimi nei.—Isa. 41:10, 13; 1 Pete. 5:7.

Ia Faaalia le Fiafia i Mea o Loo Faia e le Atua i le Taimi Nei. Pe a saʻili e faamalosiau ou uso, ia tataʻi atu manatu i mea o loo faia e Ieova i le taimi nei. O le taʻua o nei mea i se auala e faaalia ai o loo faafiafiaina ai oe, o le a e faatupu ai foʻi ni lagona faapena i loto o lau ʻaufaalogologo.

Iloilo le auala ua fesoasoani ai Ieova iā i tatou e faafetaiaʻia ma le manuia omiga o le olaga. Ua ia faailoa mai iā i tatou le auala e sili ona lelei e ola ai. (Isa. 30:21) Ua ia faamatala mai māfuaaga o soligatulafono, faiga lē tonu, oge, faamaʻi, ma le oti ma taʻu mai iā i tatou o le a ia faamutaina nei mea uma. Ua ia siʻomia i tatou i se ʻauuso e lotoalolofa. Ua ia foaʻi mai iā i tatou le faaeaga tautele o le tatalo. Ua ia tuu mai iā i tatou le faaeaga o le avea ma ana Molimau. Ua ia faapupula o tatou mata ina ia malamalama, o lea ua māeʻa ona faanofotupuina Keriso i le lagi ma ua lalata tele mai le iʻuga o aso e gata ai o lenei faiga o mea.—Faaa. 12:1-12.

E faaopoopo atu i na faamanuiaga, o a tatou sauniga a le faapotopotoga, fonotaga, ma tauaofiaga. Pe a e tautala i nei sauniuniga i se auala e faaalia atu ai le talisapaia moni, o le a e faamalosia ai le filifiliga a isi ina ia aua le tuulafoaʻiina le faapotopoto faatasi ma o latou uso.—Epe. 10:23-25.

O lipoti o loo faamaonia ai le faamanuia a Ieova i a tatou taumafaiga i le faiva i le fanua ua faapena foʻi ona avea o se puna o le malosi. I le uluaʻi senituri ina ua ui atu Paulo ma Panapa i Ierusalema, sa la faatupuina le “olioli tele i le au uso uma lava” e ala i le faamatala atu o le faaliliuina o tagata o nuu ese. (Galu. 15:3) E mafai foʻi ona e avatu le olioli i uso e ala i le fefaasoaaʻi o mea tutupu e atiina aʻe ai.

O le a maua foʻi faalaeiauga faaopoopo pe a fesoasoani i tagata taʻitoʻatasi ina ia iloa le tāua o mea o loo latou faia. Ia faamālō atu iā i latou mo le sao o loo latou faia i le faiva faa-Kerisiano. Ia faamālō atu iā i latou o ē ua matuā faatapulaaina a latou gaoioiga talu ai le tausaga matua ma gasegase ae o loo tumau faamaoni pea. Ia faamanatu iā i latou e lē o faagaloina e Ieova le alofa ua latou faaalia mo lona suafa. (Epe. 6:10) O le faatuatua ua faamaonia i lalo o tofotofoga o se mea totino tautele. (1 Pete. 1:6, 7) E manaʻomia ona faamanatu i o tatou uso lenei mea.

Tautala ma Faalogona e Uiga i le Faamoemoe i le Lumanaʻi. O folafolaga faagaeeina o mea e oo mai, o se puna tāua tele lea o faalaeiauga mo ē uma e alolofa i le Atua. Masalo o le toʻatele o ē o i lau aofia ua masani ona faalogo i nei faaupuga. Peitaʻi e ala i le talisapaia ua e faaalia i taimi e te tautala ai e uiga i nei folafolaga, o le a mafai ai ona e faagaeeina i latou, totōina le mautinoa i lo latou faataunuuga, ma faatumuina ai loto i le faafetai. O le faatatauina o mea ua e aʻoaʻoina i le Aʻoga o le Faiva Faatiokarate o le a fesoasoani lenā iā te oe ia faia ai faapea.

O Ieova lava ia o le Faalaeiau Sili ma o Lē Foaʻi mai le malosi i ona tagata. Ae peitaʻi, e mafai ona e felagolagomaʻi ma ia i le faaoo atu o na faamanuiaga. Pe a e tautala atu i le faapotopotoga, ia faaaogā lelei le avanoa e faia ai faapena.