Ia Avea Aʻoaʻoga Mamā ma ou Ala o le Olaga

“O le tuutoina faaleatua e aoga lea i mea uma lava.”—1 TIMOTEO 4:8, NW.

1, 2. I le ā le tele ua matuā manatu mamafa ai tagata mo lo latou soifua maloloina, faatasi ai ma le ā le iuga?

O LE toatele o tagata o le a matuā ioe mai e faapea o le soifua maloloina lelei, o se tasi lea o oa e sili ona tautele i le olaga. Ua latou tuutoina atu se taimi tele ma tupe e tele ina ia tausia ai pea lo latou maloloina faaletino ma faamautinoa ai ua latou maua puipuiga tatau faafomai pe a latou manaomia. Mo se faaaoaoga, i le Iunaite Setete, o le aofaiga faaletausaga o tupe na faaalu mo le tausia o le soifua maloloina i se tausaga e leʻi leva tele atu, na silia i le $900 piliona. O lena aofaiga e tusa ma le silia i le $3,000 i le tausaga e tasi e faaalu mo se tane e toatasi, o se fafine, ma se tamaitiiti i lena atunuu, ma ua faapena foi le toetoe lava tutusa, le aofaiga o le tupe e faaalu mo se tagata e toatasi i isi atunuu tamaoaiga.

² O le ā ua maua mai ai i le faaaluina o le taimi, le malosi ma tupe? E mautinoa e leai se isi o le a faafitia lena mea, i le tulaga aoao, ua sili atu ona lelei falemai ma sauniuniga faafomai ua tatou maua i aso nei na i lo o se isi lava taimi i le talafaasolopito. Peitai, e lē faapea ua faafuasei ai loa ona aumaia e lenei tulaga se soifuaga maloloina. O le mea moni, i se tautalaga na otooto atu ai se polokalama ua faaofi atu mo le tausiga o le soifua maloloina mo le Iunaite Setete, na taʻua ai e le peresitene e faapea, e lē gata i le “matautia ua oo i ai faiga sauā i lenei atunuu,” ae ua iai i tagata o loo nonofo i le Iunaite Setete ni “fuainumera tetele o ē ua aafia i le AIDS, le ulaula ma le inu tele i le ʻava malosi, le maʻitō i talavou, o pepe e fananau mai e matuā paeee” o na mea ua sili atu ai na i lo o se isi lava atunuu tamaoaiga. O ā ana upu faaiu? “Ua tatau ona suia o tatou olaga pe a tatou mananao moni e fia avea o ni tagata e maloloina lelei.”—Kalatia 6:7, 8.

Se Ala Mamā o le Olaga

3. I le tagai atu i le aganuu a Eleni anamua, o le ā le fautuaga na tuuina atu e Pauro?

³ I le uluai senituri, sa lauiloa ai tagata Eleni ona o lo latou tuutoina atu i faiga o faamalositino, e faatutuʻa ai le tino, ma tauvaga afeleti. I le tetee i na ituaiga o tuutoina atu, na faagaeeina ai le aposetolo o Pauro e tusi atu i le taulealea o Timoteo e faapea: “E itiiti le aoga o le faamasani i la le tino; a o le amio Atua [“tuutoina faaleatua,” NW] e aoga lea i mea uma lava, o loo i ai le mea ua folafolaina mai i la le olaga nei atoa ma lē atali.” (1 Timoteo 4:8) O lea, na faasino atu ai e Pauro le mea ua iloa e tagata i aso nei, e faapea, o sauniuniga faafomai po o le faamalosia o le tino, e lē faamautinoa mai ai se olaga maloloina moni o le olaga. E ui i lea, ua faamautinoa mai e Pauro ia i tatou e faapea, o le mea e lē tatau ona faagaloina o le atiina aʻe lea o le lelei faaleagaga ma le tuutoina faaleatua.

4. O ā aogā o le tuutoina faaleatua?

⁴ O lena laasaga e aogā mo “le olaga nei” auā ua saunia ai se puipuiga mai mea leaga uma na ua faapogaia e tagata faalematatau, po o i latou o ē ua na ona “peiseai [po o, na ona faafoliga mai] ua amio Atua,” ona faaleagaina ai i latou lava. (2 Timoteo 3:5; Faataoto 23:29, 30; Luka 15:11-16; 1 Korinito 6:18; 1 Timoteo 6:9, 10) O i latou o ē faatagaina le tuutoina faaleatua e taaʻina ai o latou olaga, ua ia i latou se faaaloalo mamā mo tulafono a le Atua ma ona tulaga manaomia, ma o le mea lena ua uunaia ai i latou ina ia avea aʻoaʻoga mamā a le Atua ma o latou ala o le olaga. O lena laasaga ua latou maua ai se olaga maloloina faaleagaga ma le faaletino, le faamalieina, ma le fiafia. Ma ua latou “teua [ai] oloa mo i latou lava, o le faavae lelei mo aso atali, ina ia latou fetagofi atu i le ola e faavavau.”—1 Timoteo 6:19.

5. O ā faatonuga na saunia e Pauro i le mataupu lona lua o lana tusi ia Tito?

⁵ Talu ai o se olaga e taitaia e aʻoaʻoga mamā a le Atua, e aumaia ai na faamanuiaga i le taimi nei ma i le lumanai, tatou te manaomia ai ona iloa, ni tulaga e mafai ona faatinoina, pe mafai faapefea ona tatou avea aʻoaʻoga mamā a le Atua ma o tatou ala o le olaga. Na saunia e le aposetolo o Pauro le tali i lana tusi atu ia Tito. O le a faapitoa ona tatou matauina le mataupu lona lua o lena tusi, lea na ia faatonuina ai Tito ina ia “tautala atu i mea e tusa ma le mataupu e ola ai [“aʻoaʻoga mamā,” NW].” E mautinoa lava, o i tatou uma, o talavou ma ē matutua, o tane ma fafine, e mafai ona tatou maua aogā mai na “aʻoaʻoga mamā” i aso nei.—Tito 1:4, 5; 2:1.

Fautuaga mo Toeaina

6. O le ā le fautuaga na avatu e Pauro mo “toeaina,” ma aisea o se agalelei ai lona faia faapea?

⁶ Muamua lava, na iai ni fautuaga a Pauro mo toeaina o le faapotopotoga. Faamolemole, ia faitau le Tito 2:2. O “toeaina,” i le avea o se vaega, ua faaaloalogia ma vaavaai atu i ai o i latou o ni faaaoaoga o le faatuatua ma le faamaoni. (Levitiko 19:32; Faataoto 16:31) Ona o lenei mea, atonu e faatautu ai nisi i le ofoina atu o ni fautuaga po o ni manatu e faaali atu i toeaina e faatatau i ni mataupu e lē matuia tele. (Iopu 32:6, 7; 1 Timoteo 5:1) O le mea lea, o se agalelei ai ia Pauro lona lauga muamua atu i toeaina, ma e tatau ai ia i latou ona teuloto upu a Pauro ma ia mautinoa, ua pei i latou o Pauro, i le avea o ni ē ua onomea ona faataitai atu i ai.—1 Korinito 11:1; Filipi 3:17.

7, 8. (a) O le ā e aofia ai i le “mataala”? (e) Aisea e ao ai i le “faatoeaina” ona ia paleni ma le “faautauta”?

⁷ E tatau i toeaina Kerisiano, ona muamua lava, ia “mataala [“fuafua tatau,” NW].” E ui e mafai ona faasino atu le uluai upu i le masani o le inu (“e lē soona inu,” Kingdom Interlinear), ae ua iai foi lona uiga o le mataala, ia manino le mafaufau, po o le mataalia pea. (2 Timoteo 4:5; 1 Peteru 1:13) O lea, po o le inu po o nisi lava mea, e tatau i toeaina ona fuafua tatau, ina ia lē oo atu i ni tulaga e faaloloto po o le matuā soonafai.

⁸ Ona tatau foi lea ona latou “faatoeaina” ma faautauta.” O le faatoeaina, po o le faamalualii, ma onomea i ai le faaaloalo, e masani lava ona ō mai faatasi ma le matua i tausaga. E ui i lea, o nisi atonu ua mafuli e soona faatoeaina naua, ma oo ai ina lē mafai ona onosaia uiga tafitifiti o talavou. (Faataoto 20:29) O le mafuaaga lena e paleni lelei ai le “faatoeaina” ma le “faautauta.” E manaomia e toeaina ona tausisia le uiga faatoeaina lea e ō mai faatasi ma tausaga o le soifuaga, ae i le taimi lava e tasi, ia paleni ma ia pulea atoatoa o latou faalogona e mapuna aʻe.

9. Aisea e ao ai i toeaina ona ia faamaoni i le faatuatua ma le alofa ae maise lava i le onosai?

⁹ Ma le manatu mulimuli, e ao i toeaina ona “faamaoni i le faatuatua, ma le alofa, ma le onosai.” E tele taimi i tusitusiga a Pauro, sa ia taʻua ai le faatuatua le alofa faatasi ma le faamoemoe. (1 Korinito 13:13; 1 Tesalonia 1:3; 5:8) I inei ua ia suia ai le “faamoemoe” i le “onosai.” Atonu ona o le lagona o le fia faamavae e faigofie lava ona oo ifo a o faasolo ina matua le soifuaga. (Failauga 12:1) Peitai ane, e pei ona faasino mai e Iesu, “o lē tumau seia oo i le gataaga, e faaolaina lea.” (Mataio 24:13) E faaopoopo atu i ai, ua onomea ona avea toeaina ma faaaoaoga i isi tagata uma, talu ai, e lē faapea ona o o latou soifuaga matutua po o lo latou potomasani, ae o o latou uiga faaleagaga foi—le faatuatua, le alofa, ma le onosai.

Mo Loomatutua

10. O le ā le fautuaga na tuuina atu e Pauro mo “loomatutua” i totonu o le faapotopotoga?

¹⁰ Ona sosoo lea ma le liliu atu o manatu o Pauro i loomatutua o le faapotopotoga. Faamolemole, ia faitau le Tito 2:3. O “loomatutua,” o fafine matutua ia i totonu o le faapotopotoga, e aofia ai avā a “toeaina” o tinā ma augā tinā o isi tagata. O i latou ia, e ono iai ni a latou faaaafiaga tele, mo le lelei pe mo le leaga. O le mafuaaga lena na faatomua atu ai e Pauro ana upu i le fai atu “ia faapena foi,” o lona uiga ua iai foi i “loomatutua” a latou avega tauave patino ia tausia ina ia faataunuuina ai la latou matafaioi i le faapotopotoga.

11. O le ā le uiga o le ia amio faaaloalo?

¹¹ Muamua lava na faapea atu Pauro, “ia amio i latou i le amio faaaloalo.” (LF) O le “amio” o le faailoaga mai lea i fafo o le uiga i totonu ma le uiga totino o se tasi, e pei ona faaatagia mai i amio ma le foliga mai fafo. (Mataio 12:34, 35) O le ā la e ao ona avea ma amio po o le uiga totino o se loomatua Kerisiano? E tasi lava le upu, ia “faaaloalo.” Ua faaliliuina mai lenei upu, i le upu Eleni e uiga “faapea e aogā i tagata, i gaoioiga po o mea e paia i le Atua.” Ua talafeagai tonu lenei fautuaga pe a manatu atu i aafiaga e mafai ona latou faia i isi, ae maise lava i fafine talavou i le faapotopotoga.—1 Timoteo 2:9, 10.

12. O le ā le faaaogāina sese o le laulaufaiva e ao i tagata uma ona alofia?

¹² Ona sosoo mai lea ma uiga lē lelei e lua: “aua neʻi faatuaupua, aua neʻi faapologaina i latou i le uaina.” E mālie, ona o loo faavasega faatasi mai nei uiga e lua. Ua taʻua e le polofesa o E. F. Scott e faapea: “I taimi anamua, a o na o le uaina le ʻava malosi sa maua ai, sa avea ai a latou inuga uaina i patī laiti, ma taimi e fai ai e loomatutua tala e matuā taufaaleaga ai i o latou tuaoi.” E masani lava, ona sili atu le naunau o fafine i tagata na i lo o tamaloloa, ma o se itu e avatu ai le faamālō. Peitai, o le naunau atu e mafai ona oo ina leaga e avea ma faitala, ma oo foi ina taufaaleaga, ae maise lava pe afai ua māmā le auvae ona ua inu i le ʻava. (Faataoto 23:33) E mautinoa lava, ua lelei i ē uma o loo tuliloaina se ala mamā o le olaga, o tane ma fafine, ona mataala i lenei vaivaiga.

13. I ā auala e mafai ai e loomatutua ona avea ma ē aʻoaʻo atu?

¹³ Ina ia faaaogā lelei taimi avanoa, ua fautuaina ai loomatutua ina ia “fai ma aʻoaʻo i mea lelei.” I isi mau na avatu ai e Pauro faatonuga manino e faapea e lē tatau ona avea fafine ma aʻoaʻo i totonu o le faapotopotoga. (1 Korinito 14:34; 1 Timoteo 2:12) Peitai ane, o lenei mea, ua lē taofia ai i latou mai le tufaina atu o le poto tautele o le Atua i o latou auaiga, ma i tagata lautele. (2 Timoteo 1:5; 3:14, 15) E mafai foi ona latou faataunuuina ni mea lelei se tele i le avea o ni faaaoaoga faa-Kerisiano i fafine talavou i le faapotopotoga, e pei ona faaalia mai i fuaiupu o mulimuli mai.

Mo Fafine Talavou

14. E mafai faapefea e fafine talavou Kerisiano ona faaalia le paleni i le tausia o o latou tiute tauave?

¹⁴ I le faalaeiau atu i loomatutua ina ia avea ma “aʻoaʻo i mea lelei,” na taʻua patino ai e Pauro fafine talavou. Faamolemole, ia faitau le Tito 2:4, 5. E ui o loo faaautu le tele o faatonuga i mataupu tau i le aiga, ae e lē tatau ai i fafine talavou Kerisiano ona soonafai, i le faatagaina o le manatu mamafa i mea faitino e pulea ai o latou olaga. Na i lo o lea, e ao ona “faautauta i latou, ia le gaoiā, . . . ia agalelei,” ma i mea uma lava, ia nofo sauni e lagolago atu i le faatulagaga o le tulagaulu faa-Kerisiano, “ina neʻi upuleagaina le afioga a le Atua.”

15. Aisea ua tatau ai ona avatu le faamālō i le toatele o fafine talavou i faapotopotoga?

¹⁵ I aso nei, ua suia ai le tulaga o le aiga mai le tulaga sa iai i aso o Pauro. Ua tele aiga ua fevaevaeai ona o le faatuatua, a o isi ua na o le taitoatasi se matua. E oo lava i aiga ua taʻua o aiga faaleaganuu lea e nonofo faatasi ai le tamā, le tinā ma le fanau ma avea ai le tamā ma ulu o le aiga, ua o se mea fou ai le faatupulaia o le avea o le avā po o le tinā ma lē e puleaina le auaiga. O nei mea uma ua matuā tele ai omiga ma avega tauave i tinā talavou Kerisiano, ae ua lē avea lena ma faamolemolega e lē faia ai o latou tiute tauave faale-Tusi Paia. O le mea lea, o se fiafiaga sili, le vaaia o le toatele o fafine talavou o loo faamaoni ma galulue mamafa i le faapaleniina o o latou tiute e tele, ae o loo mafai foi ona faamuamuaina pea manaoga o le Malo, o nisi ua iai i le auaunaga faataimi atoa e avea o ni paeonia lagolago po o sauatoa. (Mataio 6:33) Ua tatau moni lava ia i latou le faamālō!

Mo Taulelea

16. O le ā le fautuaga na avatu e Pauro mo taulelea, ma aisea ua fetaui lelei ai ma lenei taimi?

¹⁶ Ona oo mai lea o upu a Pauro i taulelea, e aofia ai Tito. Faamolemole, ia faitau le Tito 2:6-8. I le vaai atu i ala malaia ma le lē aogā o le toatele o talavou i aso nei—le ulaula, le faaaogā sese o vailaau oona ma le ʻava malosi, o feusuaiga lē mamā, ma isi mea faalelalolagi o loo latou sailia, e pei o taaloga matautia ma musika ma faafiafiaga lē mamā—ua matuā talafeagai ai lava la i nei taimi le fautuaga mo talavou Kerisiano o ē o loo fia mulimuli i se ala mamā ma le faamalieina o le olaga.

17. E mafai faapefea e se taulealea ona “faautauta” ma ia “avea . . . ma faaaʻoaʻo o galuega lelei”?

¹⁷ I le eseesega ma talavou o le lalolagi, e ao ai i se taulealea Kerisiano ona “ia faautauta” ma ia “avea . . . ma faaaʻoaʻo o galuega lelei.” Na faamatala mai e Pauro e faapea, o se mafaufau e faautauta ma taumatuaina, e lē maua e i latou o ē ua na ona suesue, ae o i latou o ē “ua masani ona lagona ina ua aʻoaʻosooina e iloa ai le lelei ma le leaga.” (Eperu 5:14) Maeu le matagofie o le vaai atu i le au talavou a o latou tauofo atu o latou taimi ma lo latou malosi ina ia faia se sao atoatoa i le tele o tiute tauave i le faapotopotoga Kerisiano, na i lo o le faamaumau o lo latou malosi talavou i le tulitataoina o ni sailiga manatu faapito! O le faia faapea, ua pei ai i latou o Tito, e mafai ona avea ma faaaoaoga o “galuega lelei” i le faapotopotoga Kerisiano.—1 Timoteo 4:12.

18. O le ā le uiga o le faamaoni i lau aʻoaʻo atu, ia faatoeaina i gaoioiga, ma ia mamā i le gagana?

¹⁸ Ua faamanatu atu i taulelea ina ia tatau ona latou “aʻoaʻo i [a latou] mataupu ma le faamaoni, ma le faatoeaina, ma le upu e ola ai, [“ia mamā,” NW] e le mataʻuleagaina.” O aʻoaʻoga e ‘faamaoni’ e ao ona faavae maumaututu mai i le Afioga a le Atua; e ao ai la i taulelea ona avea o ni tagata aooga maelega o le Tusi Paia. I le pei o toeaina, e ao ai foi i taulelea ona faatoeaina. E manaomia ona latou iloa lelei, o le avea ma faifeau o le Afioga a le Atua o se avega tauave uigā, ma e ao ai ona “tusa la [latou] amio ma le tala lelei.” (Filipi 1:27) E faapena foi i a latou gagana, e tatau ona [“mamā”] ma o se gagana e “le mataʻuleagaina” ina ia lē avea ai i latou ma pogai o ni faitioga a ē tetee mai.—2 Korinito 6:3; 1 Peteru 2:12, 15.

Mo Pologa ma Auauna

19, 20. E mafai faapefea e i latou o loo galulue mo isi tagata ona gaoioi ina ia “viia ai i mea uma lava talu o i latou le mataupu a le Atua lo tatou Faaola”?

¹⁹ Mulimuli lava, na liliu atu ai Pauro ia i latou o ē o loo faigaluega mo isi tagata. Faamolemole, ia faitau le Tito 2:9, 10. E lē toatele i tatou i aso nei o avea o ni pologa po o ni auauna, ae o le toatele o ni tagata faigaluega ma o ni ē o loo faia ni auaunaga mo isi. O lea, o mataupu silisili ua auauai mai e Pauro ua faatatauina lelei lava i aso nei.

²⁰ Ina ia “usiusitai i latou i o latou lava matai . . . i mea uma lava,” o lona uiga e ao i Kerisiano faigaluega ona latou faaaloalo moni atu i o latou pule ma ē o loo vaaia i latou i galuega. (Kolose 3:22) E tatau foi ona iai so latou talaaga o ni tagata faigaluega faamaoni, e galulue maeaea i le aso atoa. Ma e tatau foi ona tausisia lo latou tulaga maualuga i amioga faa-Kerisiano i o latou fale faigaluega, e ui lava i amioga a isi o loo iai i inā. O nei mea uma ua latou faia “ina ia viia ai i mea uma lava talu o i latou le mataupu a le Atua lo tatou Faaola.” Pe ua faafia ona tatou faalogo i iuga lelei ina ua talia lelei le upu moni e i latou o ē sa matuā matamata mai, talu ai amio lelei a Molimau latou te faigaluega faatasi po o ē e faigaluega mo i latou! O le taui lenei ua sasaa ifo e Ieova ia i latou o ē usitaia ana aʻoaʻoga mamā e oo lava i nofoaga o loo latou faigaluega ai.—Efeso 6:7, 8.

Tagata ua Faamamāina

21. Aisea ua saunia ai e Ieova aʻoaʻoga mamā, ma e ao faapefea ona tatou tali atu i ai?

²¹ O aʻoaʻoga mamā ua faamalamalama mai e Pauro, ua lē na o ni mataupu silisili po o ni manatu e faatatau i amioga e mafai ona tatou tapa atu i ai pe a tatou moomia. Na faamatala atili mai e Pauro le fuafuaga o lea mea. Faamolemole, ia faitau le Tito 2:11, 12. Ona o lona agalelei ma lona alofafua mo i tatou, ua saunia ai e Ieova le Atua aʻoaʻoga mamā ina ia mafai ai ona tatou iloa ona ola i se olaga e iai sona fuafuaga ma e faamalieina ai, i nei taimi faigata ma le matautia. Po o e lotomalie ea e talia ma avea aʻoaʻoga mamā ma ou ala o le olaga? O le faia faapea o le a e maua ai le faaolataga.

22, 23. O ā faamanuiaga tatou te seleseleina e ala i le avea o aʻoaʻoga mamā ma o tatou ala o le olaga?

²² E sili atu i lena, o le avea o aʻoaʻoga mamā ma o tatou ala o le olaga, tatou te mauaina ai se faaeaga tutasi i le taimi nei, ma se faamoemoe fiafia i le lumanai. Faamolemole, ia faitau le Tito 2:13, 14. Ioe, o le avea o aʻoaʻoga mamā ma o tatou ala o le olaga, ua vavaeesea ai i tatou mai le lalolagi lē faamaoni lea ua faasolo ina mou atu, ae avea ai i tatou o ni tagata ua faamamāina. Ua fesootai lelei upu a Pauro ma upu na faamanatu atu e Mose i le fanauga a Isaraelu i Sinai e faapea: “Ua matuā fetalai mai foi Ieova . . . ina ia faasilisiliina foi o oe e ia i nuu uma lava na ia faia, i le viiga, ma le taʻua, ma le matagofie; ina ia avea foi oe ma nuu paia ia Ieova lou Atua, e pei ona ia fetalaia mai ai.”—Teuteronome 26:18, 19.

²³ Tau ina ia tatou faapelepeleina e faavavau le faaeaga o le avea ma ni tagata ua faamamāina a Ieova, e ala i le avea o aʻoaʻoga mamā ma o tatou ala o le olaga! Ia mataala pea e teena so o se ituaiga o tuinanauga leaga ma le faalelalolagi, ona tatou tumau ai lea i le mamā ma le talafeagai, ina ia faaaogā e Ieova i le galuega sili ua ia faia i aso nei.—Kolose 1:10.

Pe E te Manatua?

◻ Aisea e aogā ai i mea uma, le tuutoina faaleatua?

◻ E mafai faapefea e toeaina ma loomatutua Kerisiano ona matuā sailia aʻoaʻoga mamā e avea ma ala o le olaga?

◻ O le ā le aʻoaʻoga mamā na avatu e Pauro mo taulelea ma fafine talavou i le faapotopotoga?

◻ O le ā le faaeaga ma le faamanuiaga e mafai ona tatou maua pe a tatou avea aʻoaʻoga mamā ma o tatou ala o le olaga?

[Ata i le itulau 18]

E toatele tagata i aso nei o loo latou faatatauina le fautuaga i le Tito 2:2-4