O le Tusi Mai le Vaega Pule

I Aumea Molimau a Ieova Uma:

O se fiafiaga le tusi atu iā te outou uso pele e, ua iā i matou le lagona e pei ona iai i le aposetolo o Ioane lea na faapea mai, ua ia “alofa faamaoni” i ana aumea i le upu moni, ma olioli ona o lo latou ‘savavali i le upu moni.’ (2 Ioa. 1, 4) O se faamanuiaga moni lava le upu moni iā i tatou uma! Ua tatou saʻoloto ai mai iā Papelonia Tele ma ana aʻoaʻoga ma ana upu tuu e lē o faamamaluina ai le Atua. O lo tatou anaana i le upu moni ua fesoasoani e avea ai i tatou ma ē alolofa, agalelei ma alofa mutimutivale. Ua tatala mai ai foʻi ma le avanoa e maua ai se tulaga mamā i le silafaga a le Atua atoa ai ma le ola e faavavau.

Ua matou matuā fiafia lava foʻi ona o le agaga o Ieova lea e taʻitaʻi ma faamalosia i tatou i aso uma! Matou te mautinoa sa outou olioli e iloilo vala eseese o loo taʻitaʻia ai ma le agalelei ma faamalosia i tatou e Ieova lea sa maua i la tatou Tauaofiaga Itumalo talu ai nei “Ia Taʻitaʻia e le Agaga o le Atua.” A o faasolo ina leaga lenei lalolagi, e tāua ona faalagolago i le agaga mamana o Ieova e taʻitaʻia i tatou i taimi sili ona faigatā i le lumanaʻi.

Matou te mautinoa sa pāʻia o outou loto ina ua outou faitau i faamatalaga e ofo ai i le Yearbook ma isi lomiga e faatatau i o tatou uso o ē na tumau i le anoanoaʻi o puapuaga ona o lo latou faatuatua. O le mea e sili ona mataʻina, o le toʻatele o i latou, e na o sina taimi puupuu lava na papatiso ai ae tulaʻi mai loa faigatā, ia pe e leʻi papatiso foʻi. Maʻeu lo tatou alolofa iā i latou ona o lo latou faamaoni ma tausisi i le faia o le amiotonu! E mautinoa lava o la latou faaaʻoaʻoga mataʻina ua faamalosia ai lo tatou maumauaʻi e faaauau ona faamaoni i le Malo e ui i tulaga faigatā e tulaʻi mai.—1 Tesa. 1:6-8.

Uso ma tuafafine pele e, matou te malamalama i le tele o faafitauli tau tupe ma isi vala o le olaga lea e manaʻomia ona outou faafetaiaʻia ina ia faaauau ai pea ona fusia lou aiga i le alofa. O nisi o outou, e lē faigofie ona lagolagoina i taimi uma ma le faamaoni le talaʻiga ma isi gaoioiga manaʻomia i le faapotopotoga. O le māfuaaga lenā ina ua uma se taimi umi sa matou tatalo ai ma soālaupule le mataupu, na matou faia ai loa ni suiga i sauniga a le faapotopotoga e amata iā Ianuari 1, 2009. Matou te faamoemoe o le a outou faaaogā lelei lenei suiga ina ia tele ai le taimi mo a outou suʻesuʻega totino ma suʻesuʻega e fai a aiga.

I le tele o fonotaga ma tauaofiaga i lenei tausaga, o se fiafiaga tele le mātauina o le toʻatele o i latou ua agavaa mo le papatisoga. Sa aofia ai nisi o talavou laiti. E faamālō atu iā te outou mātua mo le tausia aʻe o a outou fanau ina ia latou talisapaia le upu moni ma le faalaeiauina o i latou ina ia tuuina atu e auauna iā Ieova a o talavou. E ui i le anoanoaʻi o luʻitau o loo fesagaʻia i aʻoga e nei talavou e pele iā i tatou, ae ua mafai lava ona agavaa e papatiso. Ma o faamaoniga na o le toleniga lelei o loo latou maua i aiga.—Sala. 128:1-6.

Matou te fia faamalo foʻi i le faatelega i le galuega o le faia o suʻesuʻega faale-Tusi Paia, ma e telē se sao o a tatou misionare ma paeonia faapito galulue mamafa i lenei faatelega. O i matou o loo i le Vaega Pule e matou te matuā talisapaia lava le vaega tāua a o tatou uso ma tuafāfine i le lalolagi aoao i le faapea atu “Inā sau ia!” i tagata loto faamaoni, ma valaaulia so o se tasi e fia inu “ia ave fua le vai o le ola.” (Faaa. 22:17) E faafeiloaʻi ma le māfana i le 289,678 o i latou sa faailogaina lo latou tuuina atu e ala i le papatisoga i le tausaga na teʻa nei!

E tāua tele ona manatua pea upu a le aposetolo o Ioane, o lē na tusi mai: “E mavae atu foʻi le lalolagi faapea ma ona tuʻinanauga, a o lē e faia le finagalo o le Atua e tumau e faavavau.” (1 Ioa. 2:17) Ua tatou ola nei i le vaitaimi ua lalata le ‘mavae atu’ o lenei lalolagi. E matuā atamai lava ona taulaʻi atu i lo tatou faia o le finagalo o le Atua ma ia ‘faaauau ona mataala.’ (Mata. 24:42) E tatou te lē salamō i le faia faapea, ma o le a tatou selesele i aogā o le alofa ma le agalelei o Ieova.—Isa. 63:7.

Matou te fia faamautinoa atu e faapea, e lē aunoa ona matou manatua ma tatalo mo outou, ma matou te alolofa tele mo outou. Tau ina ia liligi tele mai e Ieova ana faamanuiaga iā te outou.

O outou uso,

Vaega Pule o Molimau a Ieova