O le ā le Auala E te Tali Atu Ai?
1. Aiseā e ao ai ona tatou manatu i le faaaʻoaʻoga a Iesu pe a fesiligia oe e se isi?
1 E oo mai lava i aso nei, o loo maofa pea tagata i le uigā o le auala na tali atu ai Iesu i fesili a tagata sa fesiligia ai o ia. Pe a fesiligia la i tatou i ni fesili eseese a o tatou auai i la tatou faiva, o se mea lelei lo tatou faaaʻoaʻo i le auala na tali atu ai Iesu.—1 Pete. 2:21.
2. O le ā e ono fesoasoani iā i tatou e saunia se tali talafeagai i se fesili?
2 Ia Faalogo Muamua: E manatunatu muamua Iesu i le māfuaaga ua fesili ai se tagata. I nisi taimi e manaʻomia ai ona toe fesili atu, ina ia mautinoa le mea tonu o mafaufau i ai le tagata. E ono fesili mai se tasi, “Pe e te talitonu iā Iesu?” atonu o loo fia iloa le māfuaaga e te lē faamanatuina ai le Kirisimasi. Afai e te fuafuaina le mea tonu o manatu i ai le tagata o fesili mai, o le a sili ona talafeagai manatu e te lua felafolafoaʻi ai.—Luka 10:25-37.
3. O ā ni mea o iā i tatou e fesoasoani mai ina ia maua ni tali e faamalieina ai mai le Tusi Paia?
3 Faaaogā le Afioga a le Atua i Au Tali: O le tulaga masani lava, e sili atu ona lelei le faaaogā o le Tusi Paia e tali ai fesili. (2 Timo. 3:16, 17; Epe. 4:12) O le tusi, Reasoning ma le “Mataupu o le Tusi Paia mo Talanoaga” i le, O le Tusi Paia o le Lalolagi Fou o Tusitusiga Eleni ua faamaonia le aogā i le tuuina atu o le tali saʻo. E tusa foʻi pe lē talia e le tagata o loo fesili mai, ia le Tusi Paia e lagolago ai se tali, e te ono mafai lava ona taʻu atu ma le faautauta mea o aʻoaʻoina e le Tusi Paia. Ia faalaeiau le tagata ia uaʻi totoʻa i faamaoniga o le saʻo o le poto o loo maua i le Tusi Paia. Pe a e faaaʻoaʻo iā Iesu, o le a pei ai au tali o ‘moli auro i ato ario ua faamamanuina.’—Faata. 25:11.
4. O fea le taimi e sili ai ona lelei le aua le taumafai e tali fesili uma e fai mai?
4 Pe Ao Ona Tatou Taliina Fesili Uma? Afai e te lē iloa le tali i se fesili, aua e te mā e fai atu: “Ou te lē iloa, ae o le a ou alu e saʻili mai le tali o lau fesili, ona ou toe foʻi mai lea e taʻu atu.” O le faaalia o le lotomaulalo ma le naunau totino, e ono uunaʻia ai le tagata o le aiga e valaaulia oe e toe foʻi atu. Afai e te manatu o le tagata o fesili mai o se tasi o tagata tetee, ma o loo taumafai e amata se finauga, ia faataʻitaʻi iā Iesu e ala i le faapuupuu o lau tali atu. (Luka 20:1-8) O le mea lava e tasi, pe afai e iai se tagata e lē o naunau moni i le upu moni ae ua taumafai e faapogaia se lua finauga, ia taofia ma le faaaloalo le talanoaga ae faaaogā lou taimi e saʻili ai i latou e fiafia moni.—Mata. 7:6.
5. O le ā le faaaʻoaʻoga na faataatia e Iesu i le taliina o fesili?
5 Sa silafia e Iesu le tāua o le faalagolago iā Ieova i le faataunuuina o lona tofiga, “e molimau i le upu moni” lea e aofia ai le taliina o fesili a tagata o loo mananaʻo moni lava i tali o ā latou fesili. (Ioa. 18:37) Ua iā i tatou se faaeaga o le faaaʻoaʻo iā Iesu, i le avatuina o se tali i a i latou “o ē ua saunia o latou loto mo le ola e faavavau”!—Galu. 13:48.