Pe E te Faautauta?

I LE tofiaina o faamasino ia Isaraelu, na taumafai ai Mose e saʻilia ni “tagata atamamai ma faautauta ma lava le potomasani.” (Teuteronome 1:13, NW) O le lava o le potomasani, lea e maua pe a matua i tausaga, sa lē o le uiga autū lena. Sa tāua foʻi le atamai ma le faautauta.

O se tagata faautauta na te faaalia le faamasino lelei i lana tautala ma le amio. E tusa ai ma le faamatalaga i le Webster’s Ninth New Collegiate Dictionary, o le tagata faautauta “e tomai foʻi i le faalologo talafeagai.” Ioe, e iai “ona po e tautala ai,” e iai foʻi “ona po e faalologo ai,” ma o le tagata faautauta e na te iloa lelei le eseesega. (Failauga 3:7) E masani lava, e iai se māfuaaga lelei e faalologo ai, auā ua taʻua i le Tusi Paia: “O le tele o upu e le oge solitulafono ai; a o le ua taofi ona laugutu, o le tagata poto [“faautauta,” NW] lea.”—Faataoto 10:19.

E faaeteete Kerisiano ina ia faautauta i a latou feutagaʻiga ma isi. O le tagata e tautala soo pe soona tautala, e sili ona lē tāua o ia i taimi uma ma e sili ona lē manaʻomia. Ia manatua, o Mose sa “malosi i ana upu,” ae sa lē mafai ona ia taʻitaʻia ma le uigā le nuu o Isaraelu seʻia oo ina mafai ona ia atiina aʻe le onosai, lotomaulalo, ma le pulea totino. (Galuega 7:22) O lea la, o i latou ua tuuina atu i ai le pule e pule ai i isi e tatau ona taumafai faapitoa lava ina ia agamalu ma ia faaalia le agaga o le magafagafa.—Faataoto 11:2.

O i latou na tuuina atu i ai e Iesu Keriso le tausiga “o ana mea uma” o loo faamatalaina i le Afioga a le Atua o le “auauna faamaoni ma le mafaufau [“faautauta,” NW].” (Mataio 24:45-47) E latou te lē fia muamua atu ma le faamaualuluga i luma o Ieova i se uiga faamalosi; e latou te lē fia mulimuli foʻi i tua pe afai ua manino mai le taʻitaʻiga a le Atua i se mataupu. E latou te iloa lava le taimi e tautala ai ma le taimi e faalologo ai pe afai o le taimi lea e faatali lē leoa ai mo nisi faamaninoga atili. E sili ona lelei mo Kerisiano uma ona lē gata ina faaaʻoaʻo i lo latou faatuatua ae ia faamaonia ai foʻi o i latou o ni ē faautauta e pei ona faia e le vasega o le auauna.—Eperu 13:7.

Pe E te Talia se Asiasiga?

E oo lava i lenei lalolagi ua tumu i faalavelave, e mafai lava ona e maua ai le fiafia mai le poto saʻo o le Tusi Paia e uiga i le Atua, lona Malo, ma lana fuafuaga matagofie mo tagata. Afai e te fia iloa nisi faamatalaga atili pe manaʻo foʻi e asiasi atu se tasi e faia se suʻesuʻega faale-Tusi Paia ma oe i lou aiga e aunoa ma se totogi, faamolemole tusi atu i le I.B.S.A., Box 673, Apia, Samoa, po o se tuatusi talafeagai o loo lisiina mai i le itulau e 2.