Pe e Moni e Mai i le Atua le Tala Lelei?

1. O ai le Tusitala o le Tusi Paia?

I le Tusi Paia, o loo tusia ai le tala lelei e faapea, o le a ola e faavavau tagata i le lalolagi. (Salamo 37:29) E 66 tamaʻi tusi o loo faia aʻe ai le Tusi Paia. Na faaaogā e le Atua ni tane faamaoni se toʻa 40 e tusia le Tusi Paia. O uluaʻi tusi e lima, na tusia e Mose pe tusa o le 3,500 tausaga ua mavae. Na tusia le tusi mulimuli e le aposetolo o Ioane, i le silia i le 1,900 tausaga ua mavae. O manatu o ai na tusia e nei tane? Na fesootaʻi le Atua ma tane na tusia le Tusi Paia e ala i lona agaga paia. (2 Samuelu 23:2) Na latou tusia manatu o le Atua, ae e lē o o latou lava manatu. O lea, o Ieova o le Tusitala o le Tusi Paia.​—Faitau le 2 Timoteo 3:16; 2 Peteru 1:20, 21.

Maimoa i le vitiō O Ai le Tusitala o le Tusi Paia?

2. E faapefea ona tatou mautinoa e saʻo aʻiaʻi le Tusi Paia?

Ua tatou iloa o le Tusi Paia e mai i le Atua, auā ua valoia auʻiliʻili ai ma le saʻo mea o le a tutupu i le lumanaʻi. E lē mafai e se tagata ona fai lenā mea. (Iosua 23:14) E na o le Atua o Lē e ona le malosi uma lava, e mafai ona valoia mai ma le saʻo aʻiaʻi le lumanaʻi o tagata.​—Faitau le Isaia 42:9; 46:10.

E tutasi le Tusi Paia mai i isi tusi uma, ona o se tusi e mai i le Atua. E faitau piliona kopi o le Tusi Paia ua iai, ma ua faaliliuina i le faitau selau o gagana. E ui o le Tusi Paia e mai anamua, ae e saʻo manatu o loo iai e uiga i nisi o mataupu faasaienisi ua faamaonia e moni. E lē feteenaʻi foʻi faamatalaga a tane e toʻa 40 na tusia le Tusi Paia. E lē gata i lea, o faamatalaga o loo i le Tusi Paia e uiga i le alofa, ua na o le Atua moni ua aumaia ai, auā o le Atua o le alofa lava ia. O loo iai foʻi i le Tusi Paia le mana e suia ma faaleleia ai olaga o tagata. O nei mea moni ua talitonu ai le faitau miliona o tagata, o le Tusi Paia, o le Afioga lea a le Atua.​—Faitau le 1 Tesalonia 2:13.

Maimoa i le vitiō E faapefea Ona Tatou Mautinoa e Saʻo Aʻiaʻi le Tusi Paia?

3. O le ā e faatatau i ai le Tusi Paia?

O loo taulaʻi atu le Tusi Paia i le tala lelei e faatatau i le fuafuaga alofa a le Atua mo tagata. O loo faamatala i le Tusi Paia le auala na leiloa ai le faaeaga o le ola i le lalolagi parataiso talu mai le amataga, ma le auala o le a toe faafoʻisia ai lenā parataiso.​—Faitau le Faaaliga 21:4, 5.

O loo iai foʻi i le Afioga a le Atua ni tulafono, mataupu silisili, ma fautuaga. E lē gata i lea, o loo faamauina i le Tusi Paia ni faaaʻoaʻoga i le auala na feutagaʻi ai le Atua ma tagata. O nei faaaʻoaʻoga ua tatou iloa ai le ituaiga o Atua e iai o ia. O lea, e mafai ona fesoasoani le Tusi Paia iā te oe ina ia iloa le Atua, ma avea ai oe ma ana uō.​—Faitau le Salamo 19:7, 11; Iakopo 2:23; 4:8.

4. E faapefea ona e malamalama i le Tusi Paia?

O le a fesoasoani lenei polosiua iā te oe ina ia malamalama ai i le Tusi Paia, e ala i le faaaogāina o le auala na faaaogā foʻi e Iesu. Sa taʻu atu e Iesu le tele o mau o le Tusi Paia ma ʻmatuā faamatala atu le uiga o Tusitusiga Paia.’​—Faitau le Luka 24:27, 45.

E leai se mea e sili ona tāua nai lo o le aʻoaʻoina o le tala lelei mai i le Atua. Peitaʻi, e lē manatu faapena nisi tagata ma e ʻinoʻino i ai. Aua e te lotovaivai ai. E faalagolago lou mauaina o le ola e faavavau, i lou iloa lelei o le Atua.​—Faitau le Ioane 17:3.