Faaaogāina o le Tusi Paia e Tali Atu Ai

PE A fesiligia e faatatau i o tatou talitonuga, le auala tatou te ola ai, o tatou manatu e faatatau i mea o loo tutupu i le taimi nei, lo tatou faamoemoe i le lumanaʻi, tatou te taumafai malosi e faaaogā le Tusi Paia e tali atu ai. Aiseā? Auā o le Afioga a le Atua. O le Tusi Paia e faavae mai ai o tatou talitonuga. E faavae i le Tusi Paia le auala tatou te ola ai. E faasaʻo ai o tatou manatu e tusa ai o mea o loo tutupu i le lalolagi. O lo tatou faamoemoe mo le lumanaʻi ua mautū le faavaeina i folafolaga faagaeeina a le Tusi Paia.—2 Timo. 3:16, 17.

Ua matuā manino lelei iā i tatou le tiute tauave lea e ō mai faatasi ma lo tatou igoa. O tatou o Molimau a Ieova. (Isa. 43:12) Tatou te taliina la fesili, e lē faavaeina i filosofia a tagata, ae e faavae i mea o loo fetalai mai ai Ieova i lana Afioga faagaeeina. E moni, e iai o tatou lava manatu i mataupu fai, peitaʻi tatou te faatagaina le Afioga a le Atua e faasaʻo ai o tatou manatu auā ua tatou talitonu maumauaʻi o le upu moni lea. E moni o loo tuu mai e le Tusi Paia iā i tatou le saʻolotoga e filifili totino ai i le tele o mea. Na i lo le faaaafia fua la o isi i a tatou lava filifiliga totino, tatou te faanaunau e aʻoaʻo atu mataupu silisili ua faatulaga mai i le Tusi Paia, ma faataga ai le ʻaufaalogologo e faaaogā lenā lava saʻolotoga e filifili ai, lea foʻi tatou te olioli ai. I le pei o le aposetolo o Paulo, tatou te mananaʻo “ia iu ina usiusitai i le faatuatua.”—Roma 16:26.

O loo faamatalaina Iesu Keriso i le Faaaliga 3:14 e faapea “o le molimau moni ma le faamaoni.” Sa faapefea la ona ia taliina fesili ma feagai ai ma tulaga sa fetuleni atu iā te ia? I nisi taimi e ala i le faaaogāina o tala faatusa na sa faapogaia ai tagata ina ia manatunatu. Ae o isi taimi e ala i le fesili atu i lē o fesili mai i sona ia lava malamalamaga e faatatau i se mau. E masani lava e ala i le sii atu o se mau, toe faaupu atu, po o le tau faaataata atu. (Mata. 4:3-10; 12:1-8; Luka 10:25-28; 17:32) I le uluaʻi senituri, sa masani lava ona teu i sunako tusi tāʻai o le Tusi Paia. E leai se faamaoniga faapea sa iai se kopi totino a Iesu lava ia mo na tusi tāʻai, peitaʻi sa ia silafia lelei le Tusi Paia ma sa masani ona faasino atu i ai pe a ia aʻoaʻoina isi. (Luka 24:27, 44-47) Sa moni lona faapea mai o mea sa ia aʻoaʻoina atu e lē mai iā te ia lava. Sa ia fetalai i mea na ia faalogo ai mai i lona Tamā.—Ioa. 8:26.

O lo tatou faanaunauga ia mulimuli i le faaaʻoaʻoga a Iesu. Tatou te leʻi faalogo moni atu lava i le Atua o fetalai mai, e pei ona sa faafofoga i ai Iesu. Peitaʻi o le Tusi Paia o le Afioga lea a le Atua. Pe a tatou faaaogāina e faavae ai a tatou tali, o le a tatou ʻalofia ai le faauaʻi mai o manatu iā i tatou. O le a tatou faaalia ai e faapea, na i lo le faaleo atu o manatu o se tagata lē lelei atoatoa, o loo tatou naunautaʻi ma le faamalosi ina ia tuu atu i le Atua e fetalai mai po o le ā le mea moni.—Ioa. 7:18; Roma 3:4.

E moni, o lo tatou faanaunauga e lē na o le tau ina faaaogā o le Tusi Paia peitaʻi ia faia i se auala o le a sili ona aogā i lē o faalogo mai iā i tatou. Tatou te mananaʻo i lenā tagata ina ia faalogo mai ma se manatu e fetālaʻi. Pe afai o le ā se uiga faaalia o le tagata, e mafai ona e faatomua ni manatu mai le Tusi Paia e ala i le faapea atu: “Pe e te lē ioe ea e sili ona tāua le mea o loo fetalai mai ai le Atua?” Ia pe e te fai atu foʻi: “E te silafia o loo talanoaina e le Tusi Paia le manatu tonu lava lenā?” Afai o e talanoa atu i se tagata e lē faaaloalo i le Tusi Paia, e ono manaʻomia la ona e faaaogā se faatomuaga e ese mai. E te ono faapea atu: “Seʻi oʻu faamatala atu iā te oe lenei valoaga mai anamua.” Ia pe e te faapea atu: “O le faamatalaga lenei a le tusi ua sili ona toʻatele tagata ua faitau i ai i le talafaasolopito . . . ”

I nisi taimi, e te ono filifili e tau lava ina toe faaupu atu se mau. Peitaʻi pe a mafai, e sili atu ona lelei le suʻe i le Tusi Paia lava ia ma faitau le mea o fai mai ai. Afai e talafeagai faasino i le tagata le mau i lana ia lava Tusi Paia. O le faaaogā o le Tusi Paia i lenei auala tuusaʻo e masani lava ona iai aafiaga malolosi i tagata.—Epe. 4:12.

O loo i toeaina Kerisiano se tiute tauave faapitoa ina ia faaaogā le Tusi Paia i le taliina o fesili. O se tasi o agavaa i le auauna ai o se toeaina e ao ona avea le uso o “lē taofi mau i le upu moni, faapei ona aʻoaʻoina o ia.” (Tito 1:9) E ono fai e se tasi o le faapotopotoga se filifiliga tāua i lona olaga pe a uma ona avatu iā te ia e se toeaina se fautuaga. Maʻeu le tāua o le faavae mautū o lenei fautuaga i le Tusi Paia! O le faaaʻoaʻoga a se toeaina i le faia o lenei mea e mafai ona aafia ai le toʻatele o isi i le auala latou te aʻoaʻo atu ai.