Ia Mafuta Atu i le Atua

“O le a Iloa ai Foʻi e Atunuu o Aʻu Lava o Ieova”

O Ā NI ou lagona pe a tuuaʻia oe i se solitulafono e te leʻi faia? Ae faapefea pe afai o lenā solitulafono e oo ai mafatiaga i isi, e aofia ai ma tagata e lē sala? E mautinoa e te manaʻo e faamamā lou igoa. Pe e te iloa o le tulaga foʻi lenā o loo feagai ma Ieova? I aso nei, e toʻatele tagata o loo tuuaʻia le Atua i mafatiaga ma faiga lē tonu. Po o tāua iā Ieova le faamamāina o lona suafa? Ioe! Seʻi tatou iloiloina le mea o loo taʻua i le tusi o Esekielu.—Faitau le Esekielu 39:7.

Ua fetalai mai Ieova: “Ou te lē toe tuua foʻi loʻu igoa paia ia faaleagaina.” Pe a tuuaʻia e tagata Ieova i faiga lē tonu, e tusa ua latou upuleagaina lona suafa. E faapefea? I le Tusi Paia, e masani ona uiga atu le upu “igoa,” i se talaaga o se tagata. Ua taʻua i se tasi o lomifefiloi, o le suafa o Ieova e faasino atu “i mea tatou te iloa e uiga iā te ia—o lona mamalu ma le viiga.” E aofia i le suafa o Ieova lona talaaga lelei. O le ā e tatou te iloa e uiga iā Ieova e tusa ai ma faiga lē tonu? E ʻinoʻino i ai o ia! E tigā alofa foʻi o ia iā i latou o loo mafatia ona o faiga lē tonu.a (Esoto 22:22-24) Pe a tuuaʻia e tagata Ieova i faiga lē tonu, e mautinoa ua latou faaleagaina ma lē faaaloalo i lona suafa.—Salamo 74:10.

Mātau, e faalua ona faaaogā e Ieova le faaupuga “loʻu igoa paia.” (Fuaiupu e 7) I le Tusi Paia, e masani ona taʻua faatasi le suafa o Ieova ma le upu “paia” po o le “faapaiaina.” O le upu “paia” e uiga atu i le vavaeese, mamā, ma le lē ponā. E paia le suafa o Ieova ona o ia o le Atua paia, ma e matuā vavaeese mai i mea inosia ma mea lē mamā uma. Po ua e iloa la le māfuaaga e faapea atu ai, o le tuuaʻia o Ieova i mea leaga uma, o le auala sili lea ona matagā ua faalumaina ai e nisi tagata le suafa paia o Ieova?

O le fuafuaga a Ieova ina ia faamamāina lona suafa e ala i lona Malo, o se manatu tāua lea o loo i le Tusi Paia. Ua faamamafa mai lenā fuafuaga i le tusi o Esekielu, lea e tele ina taʻua ai e faapea, “o le a iloa ai e nuu o aʻu lava o Ieova.” (Esekielu 36:23; 37:28; 38:23; 39:7) Mātau, sa leʻi iai i le nuu se filifiliga pe e mananaʻo e iloa Ieova pe e leai foʻi, auā o le a latou iloa lava o ia. I se isi faaupuga, e gaoioi Ieova ina ia iloa e atunuu uma o le lalolagi o ia o le Alii Pule Silisili Ese, ma ua faaata mai e lona suafa mea uma ua paia, mamā, ma lē ponā.

O le folafolaga e faapea “e iloa ai e nuu o aʻu lava o Ieova,” o se tala lelei lea mo i latou ua leva ona mananaʻo e mou atu mafatiaga ma faiga lē tonu. E lē o toe umi ona gaoioi lea o Ieova e faataunuu lenā folafolaga, ma faamamā lona suafa mai i le faalumaina. O le a ia tafiesea le amioleaga ma i latou o loo faapogaia, ae faasaoina ē o loo faaaloalogia ma lagolagoina lona suafa. (Faataoto 18:10) Pe e lē uunaʻia ai ea oe ina ia mafuta atili atu iā Ieova le Atua paia, “o lē e fiafia i le amiotonu”?—Salamo 37:9-11, 28.

Faitauga Tusi Paia mo Setema:

◼ Esekielu 39-48–Tanielu 1-3

[Faaopoopoga i lalo]