E amata atu iā Setema, o le a aofia i le Polokalame mo le Sauniga o le Faiva ma le Olaga Faa-Kerisiano, se taulimaga faataʻitaʻi fou e faamatuaina “Aʻoaʻo Atu le Upu Moni.” O lo tatou sini, ia faamatilatila atu i tagata se upu moni faavae o le Tusi Paia, e faaaogā ai se fesili ma se mau.

Pe a faaalia e se tagata le fiafia, ia atiaʻe lona naunau mo se isi a tatou asiasiga, e ala i le tuu i ai o se lomiga, pe faaali atu foʻi se vitiō mai i le jw.org. E tatau ona tatou taumafai e toe asia le tagata i nai aso, ina ia toe sosoo le talanoaga. O le a faavae mai taulimaga faataʻitaʻi fou ma lauga a tagata aʻoga, i mataupu autalu o loo i le tusi, O ā Aʻoaʻoga Mai i le Tusi Paia? O le a tatou maua ai i inā ni fesili faaopoopo ma mau, e fesoasoani iā i tatou pe a faia toe asiga po o se suʻesuʻega e na o le Tusi Paia e faaaogā ai.

E na o le tasi lava le ala e tau atu i le ola. (Mat 7:13, 14) Talu ai e tatou te talanoa atu i tagata e eseese tapuaʻiga ma talaaga, e tatau la ona tatou faamatilatila atu upu moni o le Tusi Paia o le a latou fiafia patino i ai. (1Ti 2:4) A o faasolo ina tatou masani i mataupu eseese o le Tusi Paia, ma faaleleia o tatou tomai e “taulimaina [ai] ma le saʻo le upu moni,” o le a faatuputeleina ai lo tatou fiafia ma taulau manuia i le aʻoaʻo atu o upu moni i isi.—2Ti 2:15.

E manaʻomia e tagata i le lalolagi aoao se faamāfanafanaga. (Fai 4:1) A o faagasolo le masina o Setema, o le a tatou taumafai faapitoa ai e ofo Le Olomatamata Nu. 5, lea e faamatilatila ai le mataupu o faamāfanafanaga. Ia tufa atu lenei mekasini i le tele e mafai ai. Peitaʻi, talu ai e tatou te faanaunau ia talanoa saʻo atu i le tagata ma avatu i ai se faamāfanafanaga, o lea, ia aua neʻi tuuina a tatou mekasini i fale e lē o iai ni tagata.

LE TALA E FAI ATU

“O i tatou uma lava e iai taimi e manaʻomia ai se faamāfanafanaga. Ae o fea e tatou te maua ai? [Faitau le 2 Korinito 1:3, 4.] O loo talanoaina i lenei Olomatamata le auala e saunia mai ai e le Atua na faamāfanafanaga.”

Afai e faaalia e le tagata le naunau ma talia le mekasini, . . .

FAAALI LE VITIŌ AISEĀ E SUʻESUʻE AI LE TUSI PAIA?

Ona ofo atu lea o se suʻesuʻega faale-Tusi Paia.

IA FAATAATIA SE FAAVAE LELEI MO SE TOE ASIGA

Faatū se fesili o le a e taliina pe a toe foʻi atu, e pei o le “Aiseā ua lē taofia ai e le Atua puapuaga?”