Tane, ia Amanaʻia le Tulaga Ulu o Keriso

“O le ulu o tane taʻitoʻatasi uma o Keriso.”—1 KORINITO 11:3.

1, 2. (a) E faapefea ona fua le taulau manuia o se tane? (e) Aiseā e tāua ai le amanaʻia o le Atua na amataina le faaipoipoga?

E FAAPEFEA ona e fuaina se tane e taulau manuia? Pe fua i ona tomai faalemafaufau po o mea e agavaa ai? Pe fua i lona tomai i le saʻilia o tupe? Pe fua i le auala alofa ma le agalelei e feagai ai ma lana avā ma le fanau? Pe afai e fua i le auala e feutagaʻi ai ma a latou avā ma fanau, e anoanoaʻi tane e lē taulau i le faaalia o nei uiga, ona ua aafia i le agaga o le lalolagi ma manatu faaletagata. Aiseā ua faapea ai? Ua lē taulau ona latou amanaʻia ma faatatauina taʻiala mai Lē na amataina le faaipoipoga, o Lē na ‘toina le ivi iā Atamu ua na faia ai le fafine, ona ia aumaia lea o ia iā Atamu.’—Kenese 2:21-24.

² Sa toe faamautinoa mai e Iesu le faamatalaga lenei a le Tusi Paia e faapea o le Atua na amataina faaipoipoga, na fetalai atu i le ʻaufaitio i ona aso: “Tou te leʻi faitaulia ea, o lē na faia tagata i le amataga, na ia faia i laʻua o le tane ma le fafine, na ia fetalai ane foʻi, O le mea lea e tuua ai e le tane o lona tamā ma lona tinā, a e faatasi ma lana avā; ona avea lea o i laʻua o le tino e tasi? O lea e lē toe toʻalua ai, a o le tino e tasi i laʻua; o lenei, o ē ua faatasia e le Atua, aua neʻi faateʻaeseina e se tagata.” (Mataio 19:4-6) O le manatu tāua ia tāofi mai, o le auala e iloa ai se faaipoipoga e taulau manuia, o le amanaʻia lea o le faaipoipoga na amata e le Atua, ma e faalagolago le taulau manuia i le faatatauina o faatonuga o loo i le Afioga a le Atua, le Tusi Paia.

Le Auala e Taulau Manuia ai se Tane

3, 4. (a) Aiseā na tele ai le silafia o Iesu e uiga i faaipoipoga? (e) O ai le faletua faafaatusa o Iesu, ma e ao faapefea ona feutagaʻi tane ma a latou avā?

³ O se tasi o fesoasoani mo tane ina ia taulau manuia o le suʻesuʻeina o mea na taʻua e Iesu ma faataʻitaʻi i mea na Ia faia. E matuā tele lava se silafia o Iesu i le mataupu i faaipoipoga, auā sa iai ina ua faia le uluaʻi ulugalii ma le taimi na faaipoipo ai. Na fetalai Ieova le Atua iā Iesu: “Inā [ta] faia ia o le tagata i lo [ta] faatusa.” (Kenese 1:26) Ioe, na fetalai le Atua i Lē na Ia muaʻi foafoaina a o leʻi iai lava se isi mea, ma o lē na ‘iai ma ia, o le tufuga.’ (Faataoto 8:22-30) O Ia lenei “o le ulumatua o mea uma lava ua faia.” O Ia “o le amataga o mea na faia e le Atua,” na iai a o leʻi faia isi mea uma lava.—Kolose 1:15; Faaaliga 3:14.

⁴ E taʻua Iesu o “le Tamaʻi Mamoe a le Atua,” ma o loo faamatalaina faafaatusa foʻi Iesu o se tane. Na faapea mai se agelu: “Sau ia, ou te faaali atu iā te oe le faatoʻānofotane, o le faletua lea o le Tamaʻi Mamoe.” (Ioane 1:29; Faaaliga 21:9) O ai la lenā faatoʻānofotane, po o le faletua? O “le faletua o le Tamaʻi Mamoe” e faia aʻe i soo faamaoni o Keriso ua faauuina i le agaga, o ē o le a latou pule faatasi i lana pulega i le lagi. (Faaaliga 14:1, 3) O lona uiga la, o le auala sa feutagaʻi ai Iesu ma ona soo a o faatasi ma i latou i le lalolagi, ua saunia ai se faaaʻoaʻoga mo tane i le auala e feutagaʻi ai ma a latou avā.

5. O ai e tatau ona faaaʻoaʻo iā Iesu?

⁵ O loo taʻua i le Tusi Paia o Iesu o le faaaʻoaʻo mo ona soo uma lava, e pei ona tatou faitau ai: “Auā na tigāina Keriso lava mo outou, ua tuuina mai ai e ia le faaaʻoaʻo mo outou ina ia outou mulimuli atu i ona tulagāaao.” (1 Peteru 2:21) Peitaʻi, e faapitoa ona avea Iesu ma faaaʻoaʻo mo tamāloloa. O loo taʻua i le Tusi Paia: “O le ulu o tane [tamāloloa] taʻitoʻatasi o Keriso lea, o le ulu o le avā o le tane lea, a o le ulu o Keriso o le Atua lea.” (1 Korinito 11:3) Ona o loo taʻua Keriso o le ulu o le tamāloa, e ao la i tane ona mulimuli i lana faaaʻoaʻoga. O lona uiga, e ao ona faatatauina le mataupu silisili i le tulaga ulu ina ia taulau ma fiafia le aiga. Ina ia maua la lenei fiafia, e ao i tane ona feutagaʻi ma a latou avā i le auala alofa sa feutagaʻi ai Iesu ma lona faletua faafaatusa, po o ona soo faauuina.

Le Auala e Taulima ai Faafitauli i le Faaipoipoga

6. O le ā le auala e ao i tane ona mafuta pe nonofo ai ma a latou avā?

⁶ I lenei lalolagi ua tumu i faafitauli, ua manaʻomia faapitoa i tane ona faaaʻoaʻo iā Iesu i le onosai, alofa, ma le maumauaʻi e tausisia mataupu silisili amiotonu. (2 Timoteo 3:1-5) E tusa ai o le faaaʻoaʻoga na faataatia e Iesu, tatou te faitau ai i le Tusi Paia e faapea: “Ia faapea outou tane, ia nonofo faatasi ma [a outou avā] ma le poto.” (1 Peteru 3:7, LT) Lona uiga, e manaʻomia ona iai le poto i tane e taulima ai faafitauli i le faaipoipoga, e pei lava o le auala na tauaao ai e Iesu tulaga faigatā. E sili atu puapuaga na mafatia ai Iesu na i lo se isi lava tagata, ae sa ia silafia e māfua ona o Satani, ana temoni, ma lenei lalolagi leaga. (Ioane 14:30; Efeso 6:12) E leʻi faateʻia Iesu ina ua tutupu faafitauli, e ao foʻi la i paaga faaipoipo ona lē faateʻia pe a tulaʻi mai “puapuaga i le tino.” Ua lapataʻi mai le Tusi Paia o i latou e faaipoipo e faatalitalia le oo i ai o puapuaga.—1 Korinito 7:28.

7, 8. (a) O le ā e aofia ai i le nonofo faatasi ma avā ma le poto? (e) Aiseā e talafeagai ai ona āva i avā?

⁷ O le tala a le Tusi Paia i tane, ia nonofo faatasi ma a latou avā ma “le poto, ia āva i le avā, auā o le ipu ia ua sili ona vaivai iā te oe.” (1 Peteru 3:7, LT) Na i lo le pule sauā i lana avā e pei ona valoia mai e le Tusi Paia o le a faia e le toʻatele o tamāloloa, o le tane e manaʻo e faamalie le Atua e āva i lana avā. (Kenese 3:16) O le a manaʻo e tausia lana avā e pei o se mea sili ona tāua iā te ia, e na te lē faaaogāina lona tino malosi e faamanuʻa ai le avā. Na i lo lenā, na te amanaʻia ona faalogona, e feutagaʻi ma ia i taimi uma i se tulaga āva ma faaaloalo.

⁸ Aiseā e ao ai i tane ona āva i a latou avā? O le tali a le Tusi Paia: “Ona ua tofia faatasi [outou] i le ola e foaʻifuaina mai, ina neʻi faalavelaveina a outou tatalo.” (1 Peteru 3:7) E manaʻomia ona malamalama tane e lē finagalo Ieova faapea a tapuaʻi atu se tamāloa iā te ia ona maualuga ai lea i le fafine o loo ia faia foʻi faapea. O fafine e finagalo malie i ai le Atua e latou te maua faatasi ma tane le taui lava e tasi o le ola lea e faavavau—o le toʻatele o i latou e maua le ola i le lagi lea “e lē o i ai se tane po o se fafine.” (Kalatia 3:28) E ao lava la i tane ona manatua, o le faamaoni o le tagata e tāua ai o ia i le Atua. E lē faalagolago po o le tagata lea o se tamāloa po o se fafine, tane po o se avā, ia pe o se tamaitiiti foʻi.—1 Korinito 4:2.

9. (a) O le ā le māfuaaga e ao ai i tane ona āva i a latou avā, e tusa ai o le faamatalaga a Peteru? (e) Na faapefea ona faaalia e Iesu le faaaloalo i fafine?

⁹ O le tāua o le faaalia e le tane o le āva i lana avā o loo faamamafa mai i le faaiʻuga o upu a le aposetolo o Peteru, “ina neʻi faalavelaveina a outou tatalo.” E mataʻutia tele lenei faaupuga o le faalavelaveina! E ono avea foʻi le lē āva o le tane i lana avā ma pogai e punitia pe poloka ai tatalo a le tane, e pei ona tupu i nisi o auauna faatamala a le Atua i aso ua teʻa. (Auega 3:43, 44) O le auala atamai la mo tamāloloa Kerisiano—i latou ua faaipoipo ma i latou o loo mafaufau e faaipoipo—ia suʻesuʻe pe faamasani i le auala faaaloalo sa feutagaʻi ai Iesu ma fafine. Sa ia talia i latou ma auai faatasi ma ia i lana talaʻiga, ma sa alofa ma faaaloalo Iesu i fafine. I se tasi taimi, o fafine na muamua faamatala i ai e Iesu se tasi mea moni mataʻina, ma taʻu i ai e logo atu i tane!—Mataio 28:1, 8-10; Luka 8:1-3.

O se Faaaʻoaʻoga e Patino Lava mo Tane

10, 11. (a) Aiseā e manaʻomia faapitoa ai lava i tane ona iloilo le faaaʻoaʻoga a Iesu? (e) E faapefea ona faaalia e tane le alofa i a latou avā?

¹⁰ E pei ona muaʻi taʻua, o loo faatusa e le Tusi Paia le faiā a le tane ma lana avā i le faiā a Keriso ma lana “faatoʻānofotane,” po o lana faapotopotoga o ona soo faauuina. Ua faapea mai le Tusi Paia: “O le tane o le ulu ia o le avā, pei o Keriso foʻi o le ulu ia o le ekalesia.” (Efeso 5:23) E ao i upu nei ona faalaeiauina ai tane e iloilo le faatinoga o le tulaga ulu po o le taʻitaʻiga a Iesu i ona soo. Seʻi vaganā ua fai lenei iloiloga ona faatoʻā mafai lea e tane ona mulimuli tonu i le faaaʻoaʻoga a Iesu, ma saunia mo a latou avā se taʻitaʻiga, alofa, ma se tausiga, e pei ona faia e Iesu mo lana faapotopotoga.

¹¹ O le timaʻiga a le Tusi Paia mo Kerisiano: “O outou tane, ia outou alolofa atu i a outou lava avā, faapei o Keriso foʻi ona alofa mai i le ekalesia, ma foaʻiina mai o ia e ia e fai mona sui.” (Efeso 5:25) I le mataupu o loo muamua atu o le Efeso, o loo taʻua ai “le ekalesia” po o le faapotopotoga o “le tino o Keriso.” O lenei tino faafaatusa e tele ona vaega, o loo iai tane ma fafine lea o loo saosaolaumea i le lelei o le faagaoioia o le tino atoa. O Iesu Keriso la, “o ia o le ulu o le tino, o le ekalesia lea” po o le faapotopotoga.—Efeso 4:12; Kolose 1:18; 1 Korinito 12:12, 13, 27.

12. Na faapefea ona faaalia e Iesu le alofa i lona tino faafaatusa?

¹² Sa faaalia e Iesu le alofa i lona tino faafaatusa, “le ekalesia,” aemaise lava le tausiga faapelepele ma le manatu mamafa i le lelei o i latou na avea ma vaega o le faapotopotoga. Mo se faaaʻoaʻoga, ina ua vaivai ona soo, na ia fetalai atu: “Inā ō mai ia, . . . i se mea tuufua, seʻi tou mapu aʻe teisi.” (Mareko 6:31) I le faamatalaina o gaoioiga a Iesu a o toe o ni nai itula faasala o ia i le oti, na tusia e se tasi o ona aposetolo e faapea: “Ua na alofa i ona tagata [o lona tino faafaatusa] . . . , ua ia alofa iā i latou ua oo i le gataaga.” (Ioane 13:1) Maʻeu se faaaʻoaʻoga lelei na saunia e Iesu i le auala e feutagaʻi ai tane ma a latou avā!

13. O faapefea ona faalaeiauina tane e alolofa i a latou avā?

¹³ Sa faalaeiauina e Paulo tane ina ia faaauau ona faaaogā le faaaʻoaʻoga sa faatulaga e Iesu mo tane, i lona timaʻi atu: “O loo faapea ona tatau ona alolofa o tane i a latou lava avā, faapei o latou lava tino; o lē alofa i lana lava avā, o loo alofa o ia iā te ia lava; auā e leai lava se tasi e ita i lona lava tino; a e peitaʻi na te fafaga ma tausi atu i ai, faapei o Keriso foʻi ona tausi i le ekalesia.” Na toe faaopoopo mai Paulo: “Ia taʻitasi outou ma alofa i lana lava avā faapei o ia lava iā te ia.”—Efeso 5:28, 29, 33.

14. E faapefea ona tausia e se tane lona tino lē lelei atoatoa, ma o le ā ua faaalia i lenei mea i le auala e ao ona feutagaʻi ai ma lana avā?

¹⁴ Seʻi tau ina tomānatu i upu a Paulo i inei. Pe e taumafai ea se tane o loo sagatonu lona mafaufau e faamanuʻalia lona lava tino? Afai e tuʻia se tamatamaʻivae o se tamāloa, po o le a ia sasaina ea ona ua fai ma faalavelave iā te ia? E leai! Pe e taʻufaatauvaa ea e se tane ia lava i luma o ana uō pe faamatala atu i isi ona vaivaiga? E leai! Aiseā la, o le a ia osofaʻia ai lana avā i faamatalaga, ia po o le sili atu ona leaga o le fasi lea o le avā pe a ia faia se mea sesē? E ao i tane ona manatunatu e lē gata i mea mo lo latou lelei, ae faapena foʻi mea mo le lelei o avā.—1 Korinito 10:24; 13:5.

15. (a) O le ā na fai e Iesu ina ua faaalia e ona soo vaivaiga faaletagata? (e) O ā lesona e aʻoaʻoina mai i lana faaaʻoaʻoga?

¹⁵ Seʻi manatu i le auala na faaalia ai e Iesu lona manatu mamafa i ona soo i le pō a o lumanaʻi lona maliu, ina ua latou faaalia vaivaiga faaletagata. E ui sa ia talosaga atu pea lava pea iā i latou ina ia tatalo, e faatolu lava ona maua atu o momoe i le faatoʻaga o Ketesemane. Na faafuaseʻi ona siʻomia i latou e tagata tau, ona fesili atu lea i ai o Iesu: ‘O ai ea o tou saʻilia?’ Ina ua latou tali ane: “O Iesu le Nasareta,” ona ia faapea atu lea: “O aʻu lenei.” Talu ai ua silafia e Iesu “ua oo mai le itu pō” po o le itula o lona maliu, na ia toe fetalai atu: ‘Afai o tou saʻili mai iā te aʻu, tuu pea ia i latou nei, ia latou ō.’ Sa manatu mamafa Iesu i taimi uma mo le lelei o ona soo, o se vaega o lona faletua faafaatusa—sa ia saunia se auala e faasaoina ai i latou. O le malamalama lelei la i le auala sa tausia ai e Iesu ona soo, o le a maua ai e tane le tele o mataupu silisili lea e mafai ona latou faatatauina, i le auala e ao ona feutagaʻi ai ma a latou avā.—Ioane 18:1-9; Mareko 14:34-37, 41.

E Leʻi Faavaeina le Alofa o Iesu i Faalogona Ootia

16. O ā faalogona o Iesu iā Mareta, peitaʻi sa faapefea ona ia faasaʻoina o ia?

¹⁶ O loo taʻua i le Tusi Paia: “Ua alofa lava Iesu iā Mareta, ma lona uso, atoa ma Lasalo,” o ē sa masani ona talimālō iā te ia. (Ioane 11:5) Peitaʻi e leʻi taofia ai le avatu e Iesu o se aʻoaʻiga iā Mareta ina ua pupū tele i se taumafataga sa ia saunia, ae ua itiiti ai lona taimi e maua ai aʻoaʻoga faaleagaga mai iā te ia. Na fetalai atu Iesu: “Mareta, Mareta e, ua e popole, ma ua pupū lou loto i mea e tele; a o le mea lava e tasi e ao ina ia maua.” (Luka 10:41, 42) Talu ai sa matilatila lona alofa mo Mareta, sa faigofie ai foʻi iā Mareta ona talia lana fautuaga. E ao foʻi la i tane ona feutagaʻi faapena ma a latou avā i se uiga alofa, agalelei, ia faaaogā faaupuga e logo lelei. Peitaʻi, afai e manaʻomia ni faasaʻoga, e talafeagai ona avatu manino e pei ona faia e Iesu.

17, 18. (a) Aiseā na vavao ai e Peteru Iesu, ma aiseā na manaʻomia ai ona faasaʻo Peteru? (e) O le ā le tiute tauave o loo i le tane?

¹⁷ I se tasi mea na tupu, na faamatala ai e Iesu i ona aposetolo e ao ona malaga i Ierusalema, o le a sauāina ai o ia “e toeaina ma le ʻau ositaulaga sili, ma le ʻau tusiupu, e fasiotia foʻi o ia, e faatūina foʻi o ia i le aso tolu.” Ona taʻitaʻi ese lea e Peteru Iesu ma vavao iā te ia, ua faapea atu: “Le Alii e, ia mamao iā te oe lea mea; e lē oo lenā mea iā te oe.” E manino lava le aafia o manatu o Peteru i faalogona ootia. Sa tatau ona avatu se faasaʻoga. O le ala lea o le fetalai atu o Iesu: “Satani e, inā alu ia oe i oʻu tua, ua fai oe ma mea ou te tausuai ai; auā e lē o mea a le Atua ua e loto i ai, a o mea a tagata.”—Mataio 16:21-23.

¹⁸ O lea sa taʻu atu e Iesu le finagalo o le Atua mo ia—e ao ona puapuaga i mea e tele ma fasiotia o ia. (Salamo 16:10; Isaia 53:12) Sa sesē la Peteru ina ua ia taumafai e vavao iā Iesu. Ioe, sa manaʻomia e Peteru se faasaʻoga maumauaʻi, e pei ona tatou manaʻomia uma lava i nisi taimi. Ona o le tane o le ulu lea o le aiga, o loo iā te ia la le pule ma le tiute tauave e faasaʻo ai tagata o le aiga, e aofia ai ma lana avā. E ui lava e manaʻomia ona maumauaʻi, ae e ao lava ona avatu lenei faasaʻoga i se uiga alofa ma agalelei. E faapei lava la ona fesoasoani Iesu iā Peteru ina ia saʻo le vaaiga i le mataupu e pei ona tulaʻi mai, e ao foʻi i tane ona faia faapea mo a latou avā. Mo se faaaʻoaʻoga, e ono manaʻomia i le tane ona faaali atu i se uiga agalelei i le avā le māfuaaga e ao ai ona fai ni fetuunaʻiga i ona laʻei, po o isi mea e faaaogā i ana teuga pe afai ua see ese ma le mea o fautua mai i le Tusi Paia.—1 Peteru 3:3-5.

E Ao i Tane Ona Onosai

19, 20. (a) O le ā le faafitauli na aliaʻe i aposetolo o Iesu, ma na faapefea ona taulima e Iesu? (e) Pe sa taulau manuia ea taumafaiga a Iesu?

¹⁹ Afai e tulaʻi se faalētonu lea e ao ona uaʻi atu i ai, e lē tatau i tane ona manatu faapea a faia loa ni taumafaiga faamaoni e faasaʻo ai, ona faaleleia loa lea. E tele ni taumafaiga faifai pea sa fai e Iesu ina ia fetuunaʻi ai uiga o ona aposetolo. Mo se faaaʻoaʻoga, na toe tulaʻi foʻi se finauga i lo latou va a o tulata atu i le faaiʻuga o le faiva a Iesu. Sa latou finau po o ai o i latou e sili. (Mareko 9:33-37; 10:35-45) E leʻi leva talu ona tupu faalua le mea e pei ona taʻua, ae fuafua loa e Iesu ina ia latou faamanatuina faatasi ma ia le Paseka mulimuli. I lenā faatasiga, e leai se tasi o i latou na tulaʻi e fai le auaunaga masani lea e manatu i ai e faatauvaa, o le mulumuluina lea o vae o isi. Sa faataunuu e Iesu. Ona ia fetalai atu lea: “Ua ou avatu le faaaʻoaʻo iā te outou.”—Ioane 13:2-15.

²⁰ O tane e faaalia uiga loto maulalo e pei o Iesu, e ono faigofie ona latou maua le lagolago mai a latou avā. Ae e manaʻomia ai le onosai. Mulimuli ane i le pō lava lenā o le Paseka, na toe finau ai foʻi le ʻau aposetolo po o ai e sili o i latou. (Luka 22:24) E masani ona umi se taimi e fai ai suiga i uiga ma amio, ma e faasolosolo lava ona fai. Peitaʻi, maʻeu le tauia pe a mātauina suiga lelei e tulaʻi mai, e pei ona iai i le ʻau aposetolo!

21. I le faafetaiaʻia o luʻitau i aso nei, o le ā ua uunaʻia tane e manatua ma ia fai?

²¹ Ua fesagaʻi faaipoipoga ma luʻitau tetele i aso nei sa leʻi iai muamua. E toʻatele ua lē o toe manatu mamafa i a latou tautoga o le faaipoipoga. O le mea lea, tane e, ia manatunatu i le amataga mai o le faaipoipoga. Ia manatua o le faaipoipoga na amata e le Atua, na afuafua ma faatulaga e Ieova lo tatou Atua alofa. Na ia saunia mai lona Alo, o Iesu, e lē gata e fai ma o tatou Togiola—o lo tatou Faaola—ae o se faaaʻoaʻo foʻi mo tane e faataʻitaʻi i ai.—Mataio 20:28; Ioane 3:29; 1 Peteru 2:21.

O le ā Lau Tali?

• Aiseā e tāua ai lo tatou amanaʻia o le amataga mai o faaipoipoga?

• O ā auala o loo faalaeiauina ai tane e alolofa iā latou avā?

• O ā faaaʻoaʻoga o le auala na feutagaʻi ai Iesu ma ona soo, o loo faataʻitaʻia ai le auala e ao i tane ona faatino ai lona tulaga ulu pei o Keriso?

[Ata i le itulau 14]

Aiseā e ao ai i tane ona faamasani i le auala sa feutagaʻi ai Iesu ma fafine?

[Ata i le itulau 15]

Ina ua vaivai ona soo, sa amanaʻia e Iesu o latou faalogona

[Ata i le itulau 16]

E ao i tane ona faasaʻo a latou avā i faaupuga logo lelei