Lomiga mo le Polokalame mo le Sauniga o le Faiva ma le Olaga Faa-Kerisiano
MATI 5-11
ʻOA TAUTELE MAI I LE AFIOGA A LE ATUA | MATAIO 20-21
“O Sē e Fia Sili e Tatau Ona Avea ma a Outou Auauna”
(Mataio 20:3) Ina ua toe alu atu i le itula e tolu, na ia vaaia ai ni tagata e lē o faia ni galuega o loo tutū i le maketi;
nwtsty ata
Le Maketi
O nisi maketi, e pei ona faaalia i le ata o loo i le Polokalame mo le Sauniga, sa tutū i autafa o auala. Sa masani ona tele oloa i luga o le auala ma poloka ai le auala. Sa faatau ai i inā oloa masani, ipu omea, ipu mataʻetaʻe taugatā, faapea foʻi fua o faatoʻaga. Talu ai sa leai ni pusa ʻaisa i na aso, na manaʻomia ai ona ō tagata i le maketi i aso uma mo faatauga. O le maketi e faalogo ai se tagata faatau i tala o mea tutupu e faamatala e tagata faatauʻoa po o tagata asiasi, e taaalo ai tamaiti, ma e faatalitali ai tagata lē faigaluega mo ni avanoa faigaluega. O le maketi foʻi na faamālōlō ai e Iesu tagata mamaʻi ma na talaʻi ai Paulo i inā. (Ga 17:17) Ae i se faaeseesega, na fiafia le ʻautusiupu ma le ʻau Faresaio faamaualuluga e faafeiloaʻia i latou i na nofoaga faitele.
(Mataio 20:20, 21) Ona faalatalata mai lea o le tinā o atalii o Sepetaio faatasi ma lana fanau tama, ua ifo ma talosaga mai mo se mea mai iā te ia. 21 Ua ia fetalai atu iā te ia: “O le ā se mea e te manaʻo i ai?” Ua fai mai o ia: “Ia e fetalai ane ina ia nonofo laʻu fanau e toʻalua, o le tasi i lou itu taumatau a o le isi i lou itu tauagavale i lou malo.”
nwtsty faamatalaga mo suʻesuʻega o le Mat 20:20, 21
tinā o atalii o Sepetaio: O le tinā lea o aposetolo o Iakopo ma Ioane. E tusa ai ma faamatalaga a Mareko, o Iakopo ma Ioane na talosaga iā Iesu. E manino mai, o i laʻua e ana le talosaga, ae na faaauala atu le la talosaga i lo la tinā o Salome, lea e foliga mai o le uso o le tinā o Iesu.—Mat 27:55, 56; Mar 15:40, 41; Ioa 19:25.
o le tasi i lou itu taumatau a o le isi i lou itu tauagavale: I inei, e faailoa mai ai o nei nofoaga uma e faaalia mai ai le tulaga mamalu ma le pule, peitaʻi e sili atu le mamalu o lē e nofo i le itu taumatau.—Sl 110:1; Ga 7:55, 56; Ro 8:34.
(Mataio 20:25-28) A ua valaau atu Iesu iā i latou e ō mai iā te ia ma faapea atu: “Tou te iloa o taʻitaʻi o malo e pulepuletutū i tagata, o ē ua sili foʻi ua pule iā i latou. 26 Ae e lē faapena outou; o sē e fia sili iā te outou e tatau ona avea o ia ma a outou auauna, 27 ma o sē e fia muamua iā te outou, e tatau ona avea o ia ma a outou pologa. 28 Auā e leʻi sau le Atalii o le tagata ina ia auauna mai tagata iā te ia, ae ia auauna atu, ma foaʻi atu lona ola e fai ma togiola e sui aʻi tagata e toʻatele.”
nwtsty faamatalaga mo suʻesuʻega o le Mat 20:26, 28
auauna: Po o “sē e tautua.” E masani ona faaaogā i le Tusi Paia le upu Eleni di·aʹko·nos e faasino atu i se tagata e lotomaulalo e faia se auaunaga mo isi. O lenei upu na faamatala ai Keriso (Ro 15:8), auauna a Keriso (1Ko 3:5-7; Ko 1:23), auauna o le faiva (Fil 1:1; 1Ti 3:8), o le ʻautautua a se aiga (Ioa 2:5, 9), ma pule o malo (Ro 13:4).
e leʻi sau . . . ina ia auauna mai tagata iā te ia, ae ia auauna atu: Pe “e leʻi sau . . . ina ia tautua mai tagata iā te ia, ae ia tautua atu.”
Saʻiliʻiliga Loloto mo ʻOa Faaleagaga
(Mataio 21:9) A ua alalaga atu pea le motu o tagata o ē ua muamua atu iā te ia, ma ē o loo mulimuli mai e faapea: “Matou te tatalo ia faaolaina le Alo o Tavita! E manuia lē e maliu mai i le suafa o Ieova! Matou te tatalo i lē e afio i mea maualuluga, ina ia faaola iā te ia!”
nwtsty faamatalaga mo suʻesuʻega o le Mat 21:9
Matou te tatalo ia faaolaina: Pe e faaliliuina saʻo, “Osana.” O lenei faaupuga Eleni e maua mai le faaupuga Eperu o lona uiga, “matou te tatalo ia faaolaina” po o le “faamolemole ia faaolaina.” I inei, o loo faaaogā ai o se talosaga i le Atua mo le faaolataga po o le manumalo. E mafai ona faaupu faapea, “faamolemole foaʻi mai le faaolataga.” Mulimuli ane, na faaaogā lenei faaupuga i tatalo ma viiga. O loo faaaogāina lenei faaupuga Eperu i le Sl 118:25, o se vaega o le Salamo a Aleli e masani ona usuina i le vaitaimi o le Paseka. O lea, o lenei faaupuga e masani ona manatua i le vaitaimi o lenei sauniga. O se tasi o auala na tali mai ai le Atua i le tatalo ina ia faaolaina le Alo o Tavita, o le toe faatūina lea o Iesu mai i le oti. I le Mat 21:42, na sii mai ai e Iesu le Sl 118:22, 23 ma faasino atu i le Mesia.
Alo o Tavita: O se faaupuga e faailoa mai ai le gafa na tupuga mai ai Iesu ma lana matafaioi o le Mesia folafolaina.
(Mataio 21:18, 19) A o toe foʻi atu i le aai i le taeaopō, ona ia fia taumafa ai lea. 19 Ua silafia e ia le laau o le mati i tafatafa o le auala, ua ia maliu atu i ai ae e leai ni fua, ua na o lau. Ona ia faapea atu lea i le mati: “Aua neʻi toe iai ni ou fua e oo i le faavavau.” Ona mamae faafuaseʻi ai lea o le mati.
Se Lesona i le Faatuatua Mai i le Laau o le Mati
Ae aiseā na fetuu ai e Iesu lenei laau ina ia mamae? Ua ia faailoa atu le māfuaaga: “E moni ou te fai atu iā te outou, Afai tou te faatuatua ae lē masalosalo, e lē gata tou te faia e pei ona ou faia i le mati, ae tou te fai atu foʻi i lenei mauga, ʻIa siitia ia ma lafo i le sami,’ ona faia lava lea. O mea uma tou te talosaga atu ai i le tatalo ma le faatuatua, tou te maua lava.” (Mataio 21:21, 22) O lea ua toe taʻua e Iesu le manatu sa ia faamatalaina i le taimi ua teʻa, e faatatau i le mafai e sina faatuatua itiiti ona siitia ai se mauga.—Mataio 17:20.
O le fetuuina la e Iesu o le laau o le mati ina ia mamae, ua ia aʻoaʻoina atu ai se lesona, e tatau ona faatuatua ona soo i le Atua. Ua fetalai atu o ia: “O mea uma lava tou te talosaga atu ai i le tatalo, ia outou faatuatua e pei lava ua outou mauaina, ma o le a outou mauaina lava.” (Mareko 11:24) Maʻeu se lesona tāua mo soo uma o Iesu! E tāua tele lenei lesona mo le ʻauaposetolo, auā e lē o toe umi ona latou fesagaʻia lea o tofotofoga faigatā. Ae e iai foʻi se isi lesona e faatatau i le faatuatua, e aʻoaʻoina mai i le laau o le mati ua mamae.
E pei le nuu o Isaraelu o le laau o le mati, ua faaalia mai ai se vaaiga taufaasesē. Ua iai lenei nuu i se feagaiga ma le Atua, ma atonu o loo faafoliga atu o loo latou tausia lana Tulafono. Peitaʻi, e toetoe o le nuu atoa e lē o faaalia le faatuatua, ma e latou te lē o fuaina mai foʻi ni fua lelei. Ua latou teena foʻi e oo lava i le Alo o le Atua. O lea, o le fetuuina e Iesu o le laau o le mati e lē fua mai ina ia mamae, ua ia faataʻitaʻia mai ai le iʻuga o le a oo i lenei nuu e lē faatuatua, ma e lē o fuaina mai ni fua lelei.
Faitau Tusi Paia
(Mataio 20:1-19) “Ua faatusaina le malo o le lagi i se matai o le aiga, o lē na usu atu i le taeaopō e saʻili ni tagata e faafaigaluega i lona togāvine. 2 Na ia aauina atu i latou i le togāvine, ina ua malilie faatasi ma le ʻaufaigaluega, e galulue mo le tenari i le aso. 3 Ina ua toe alu atu i le itula e tolu, na ia vaaia ai ni tagata e lē o faia ni galuega o loo tutū i le maketi; 4 ona ia fai atu lea iā i latou, ʻIa outou ō atu foʻi i loʻu togāvine, ma ou te avatu iā te outou le totogi e tatau ai.’ 5 Ona latou ō ai lea. Na ia toe alu atu i le itula e ono ma le itula e iva ma faia foʻi faapea. 6 Ona ia alu atu ai lea pe tusa o le itula e sefulu tasi, ma maua atu ai foʻi isi o loo tutū mai, ona ia fai atu lea iā i latou, ʻO le ā le mea ua outou tutū ai i le aso atoa ae leai ni a outou galuega e fai?’ 7 Ona latou fai mai lea iā te ia, ʻAuā e leai se isi e faafaigaluegaina i matou.’ Ona ia fai atu lea, ʻIa outou ō atu foʻi i le togāvine.’ 8 “Ina ua oo i le afiafi, ona fai atu ai lea o lē e ana le togāvine i lē e pule i lana ʻaufaigaluega, ʻIa valaau atu i le ʻaufaigaluega ma avatu o latou totogi, e amata i ē na mulimuli e oo i ē na muamua.’ 9 Ina ua ō mai tamāloloa na amata i le itula lona sefulu tasi, na tofu i latou ma le tenari. 10 Ae ina ua ō mai i latou na muamua, na latou manatu e sili atu se mea latou te maua, ae na latou maua foʻi le totogi o le tenari e tasi. 11 Ina ua maua le tenari, ona latou muimui ai lea i lē e ana le togāvine 12 ma faapea mai, ʻE na o le tasi le itula na galulue ai i latou na mulimuli mai, ae ua tutusa o matou totogi e ui ua alu le aso atoa o matou tigāina i le vevela o le lā!’ 13 Ae na tali atu o ia i le tasi o i latou, ʻSole, e leai se mea sesē ua ou faia iā te oe, pe ta te leʻi malilie faatasi ea i le tenari e tasi? 14 Ia tago loa i lou totogi ma e alu. Ou te manaʻo e avatu i lenei tagata mulimuli le totogi na ou avatu foʻi iā te oe. 15 Pe e faasā ona ou pule i le mea e fai i aʻu lava mea? Po ua e lotoleaga ea ina ua ou agalelei?’ 16 O lenei, o ē e mulimuli e avea ma ē e muamua, ma o ē e muamua e avea ma ē e mulimuli.” 17 A o agaʻi aʻe i Ierusalema, ona ave ai lea e Iesu o ona soo e toʻasefulu lua ua na o i latou, ua faapea atu o ia iā i latou i le ala: 18 “Faauta! O le a tatou ō aʻe i Ierusalema, ma e tuuina atu ai le Atalii o le tagata i le ʻaufaitaulaga sili ma le ʻautusiupu, ma latou te faasalaina o ia i le oti, 19 e latou te tuuina atu foʻi o ia i tagata o nuu ese, latou te tauemu, ma sasa tigāina, ma tutuʻi o ia i luga o le laau, ae e toe faatūina o ia i le aso lona tolu.”
MATI 12-18
ʻOA TAUTELE MAI I LE AFIOGA A LE ATUA | MATAIO 22-23
“Usitaʻi i Poloaʻiga Silisili e Lua”
(Mataio 22:36-38) “Le Aʻoaʻo e, o le ā le poloaʻiga e sili i le Tulafono?” 37 Ua ia fetalai atu: “ʻIa e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.’ 38 O le poloaʻiga silisili ma le muamua lenā.
nwtsty faamatalaga mo suʻesuʻega o le Mat 22:37
loto: Pe a faaaogā i se auala faafaatusa e masani ona faasino atu lenei upu i le tagata i totonu. Ae pe a taʻua faatasi ma le upu “ola” ma le “mafaufau,” ona faasino patino atu lea i faalogona ma faanaunauga o se tagata. E fesootaʻi le uiga o nei upu e tolu (loto, ola, ma le mafaufau) o loo faaaogāina i inei, ma ua faamatilatila mai ai i se auala silisili le tāua ona faaalia o le alofa atoatoa i le Atua.
ola: Po o le “tagata atoa.”
mafaufau: E faasino atu i tomai faalemafaufau uma. E tatau ona faaaogā e se tagata lona tomai faalemafaufau ina ia iloa ai le Atua ma faatuputeleina le alofa mo Ia. (Ioa 17:3, fpl.; Ro 12:1) O lenei mau na sii mai i le Te 6:5, ma na faaaogā i uluaʻi Tusitusiga Eperu upu e tolu, ʻloto, ola ma le malosi.’ Peitaʻi, i le tusi o Mataio lea na tusia i le gagana Eleni, o loo faaaogā ai le upu mo le “mafaufau” nai lo o le “malosi.” Atonu e iai ni māfuaaga ua eseese ai upu na faaaogā. Muamua, e leʻi iai se upu patino i le faa-Eperu anamua mo le “mafaufau,” ae e ui i lea, na maua lava lenā manatu i le upu Eperu na faaaogā mo le “loto.” Pe a faaaogā la i se auala faafaatusa lenā upu Eperu, e mafai ona faasino atu i le tagata lilo i totonu lea e aofia ai manatu, uunaʻiga, uiga ma faalogona o se tagata. (Te 29:4; Sl 26:2; 64:6; tagaʻi i le faamatalaga mo suʻesuʻega mo le loto i lenei fuaiupu.) O le māfuaaga lea, i vaega o loo faaaogā ai le upu Eperu mo le loto, e masani ona faaaogā i le Septuagint le upu Eleni mo le “mafaufau.” (Ke 8:21; 17:17; Fat 2:10; Isa 14:13) O se isi māfuaaga atonu na faaaogā ai e Mataio le upu Eleni mo le “mafaufau” nai lo o le “malosi” ina ua ia sii mai le Te 6:5, ona o le upu Eperu ua faaliliuina mo le “malosi” e mafai ona faasino atu foʻi i le malosi faaletino ma le tomai faalemafaufau. Po o le ā lava le tulaga, ae e fesootaʻi le uiga o le upu Eperu ma le upu Eleni na faaaogāina, ma ua fesoasoani e tatou te iloa ai le māfuaaga ua ese ai le upu na faaaogā e tusitala o le Evagelia ina ua sii mai faaupuga o le Teuteronome.
(Mataio 22:39) E faapena foʻi le poloaʻiga lona lua, ʻIa e alofa atu i lou tuaoi e pei o oe lava iā te oe.’
nwtsty faamatalaga mo suʻesuʻega o le Mat 22:39
Lona lua: I le Mataio 22:37, o loo faamauina ai le tali tuusaʻo a Iesu i le ʻau Faresaio, peitaʻi na faalautele e Iesu lana tali ma sii mai le poloaʻiga lona lua (Le 19:18), na ia aʻoaʻoina mai ai e fesootaʻi poloaʻiga nei e lua, ma ua taaofaʻi ai le Tulafono atoa ma le ʻau Perofeta.—Mat 22:40.
tuaoi: O le upu Eleni mo le “tuaoi” (pe a faaliliu saʻo, “sē o loo latalata i ai”) e lē na o ē o loo nonofo latalata ane e faasino i ai. E mafai foʻi ona faasino atu i so o se tagata e feutagaʻi ma se tasi.—Lu 10:29-37; Ro 13:8-10.
(Mataio 22:40) O nei poloaʻiga e lua, ua faavae ai le Tulafono atoa ma le ʻau Perofeta.
nwtsty faamatalaga mo suʻesuʻega o le Mat 22:40
le Tulafono . . . le ʻau Perofeta: O “le Tulafono” e faasino atu i tusi o le Tusi Paia mai le Kenese e oo i le Teuteronome. O le “ʻau Perofeta” e faasino atu i tusi faavaloaga o loo i Tusitusiga Eperu. Peitaʻi, pe a faaaogā faatasi nei faaupuga, ona faasino atu lea i Tusitusiga Paia Eperu uma.—Mat 7:12; 22:40; Lu 16:16.
faavae: O le veape Eleni o lona uiga moni “o le tautau” i se mea. O lea na faailoa mai ai e Iesu, e lē na o le Tulafono lea e iai Poloaʻiga e Sefulu e faavae i le alofa, ae e aofia ai foʻi ma Tusitusiga Eperu uma.—Ro 13:9.
Saʻiliʻiliga Loloto mo ʻOa Faaleagaga
(Mataio 22:21) Ua latou tali mai: “O Kaisara.” Ona ia fetalai atu lea: “Ia totogi atu mea a Kaisara iā Kaisara, a o mea a le Atua ia avatu i le Atua.”
nwtsty faamatalaga mo suʻesuʻega o le Mat 22:21
mea a Kaisara iā Kaisara: O le tali a Iesu i inei, lea o loo faamauina foʻi i le Mar 12:17 ma le Lu 20:25, e pau lea o le taimi na ia taʻua ai le Emeperoa o Roma. O “mea a Kaisara” e aofia ai le totogi o auaunaga e faia e faigāmalo, faapea le faaalia o le faaaloalo ma le gauaʻi talafeagai iā i latou.—Ro 13:1-7.
o mea a le Atua ia avatu i le Atua: E aofia ai le tapuaʻiga ma le lotoatoa a se tasi, o lona alofa ma le lotoatoa, ma le usiusitaʻi atoatoa.—Mat 4:10; 22:37, 38; Ga 5:29; Ro 14:8.
(Mataio 23:24) O outou o taʻitaʻi tauaso, ua outou vai mamā ese le namu ae folo atoa le kamela!
nwtsty faamatalaga mo suʻesuʻega o le Mat 23:24
ua outou vai mamā ese le namu ae folo atoa le kamela: O le namu ma le kamela sa aofia i meaola lē mamā e sili ona lāiti ma lapopoʻa sa iloa e tagata Isaraelu. (Le 11:4, 21-24) Sa faaaogā e Iesu se faatusatusaga uigā e faataʻitaʻi mai ai le faamamāina e taʻitaʻi lotu o a latou uaina ina ia ʻalofia ai le foloina o se namu ma lē mamā ai faaletapuaʻiga, peitaʻi sa latou manatu māmā i vala e sili ona tāua o le Tulafono, o se gaoioiga ua faatusa atu i le foloina o le kamela.
Faitau Tusi Paia
(Mataio 22:1-22) Ua toe fetalai atu Iesu iā i latou i talafaatusa e faapea: 2 “Ua faatusaina le malo o le lagi i se tupu na ia saunia se ʻaiga o le faaipoipoga mo lona atalii. 3 Ona ia aauina atu lea o ana pologa e valaau iā i latou na valaaulia i le ʻaiga o le faaipoipoga, ae latou te leʻi fia ō mai. 4 Ona ia toe aauina atu lea o isi pologa ma fai atu i ai, ʻIa fai atu i le ʻauvalaaulia: “Faauta, o lea ua uma ona ou saunia le ʻaiga, ua fafasi aʻu povi ma manu pepeti, ma o lea ua uma ona saunia mea uma. Ō mai loa i le ʻaiga o le faaipoipoga.”’ 5 Ae latou te leʻi ano ane, na alu le tasi e vaai lona fanua a o le isi na alu e vaai lana pisinisi; 6 a o isi, na pupuʻe i ana pologa ma agaleaga iā i latou ma fasiotia. 7 “Ona toʻatamaʻi ai lea o le tupu ma aauina atu lana ʻautau, ua faaumatia ai na tagata fasioti tagata ma susunu lo latou aai. 8 Ona ia fai atu lea i ana pologa, ʻO lea ua uma ona saunia le ʻaiga o le faaipoipoga, ae ua lē tatau ma le ʻauvalaaulia. 9 O lea, ia outou ō atu i ala tetele i fafo o le aai, ma valaaulia so o se tasi tou te tau atu i ai, i le ʻaiga o le faaipoipoga.’ 10 Ona ō atu lea o na pologa i ala tetele ma faapotopoto mai i latou uma na latou tau i ai, o ē e leaga ma ē e lelei, ma na tumu ai le potu o le ʻaiga o le faaipoipoga ona o ē na taooto e aai. 11 “Ina ua taunuu le tupu e asiasi mālō, na ia iloa ai se tamāloa e lē o ofu i le ofu mo le faaipoipoga. 12 O lea, na ia fai atu ai iā te ia, ʻSole, e faapefea ona e sau i inei ae leai sou ofu mo le faaipoipoga?’ Ae e leʻi tali mai o ia. 13 Ona fai atu lea o le tupu i ana auauna, ʻIa saisai ona lima ma ona vae, ma lafo i fafo i le mea pogisa. O i inā e tagiauē ai ma lilivau ona nifo.’ 14 “Auā e toʻatele le ʻauvalaaulia ae e toʻaitiiti ē ua filifilia.” 15 Ona ō ai lea o le ʻau Faresaio ma taupulepule ina ia maua se mea e maileia ai o ia i ana upu. 16 Ona latou aauina mai lea o o latou soo, ma ē ua ʻau ma Herota, ua latou faapea mai iā te ia: “Le Aʻoaʻo e, matou te iloa o oe o se tagata faamaoni ma ua e aʻoaʻo atu le ala o le Atua e tusa ai ma le upu moni, e te lē faailogaina tagata, e te lē silasila foʻi i foliga i fafo o tagata. 17 O le mea lea, seʻi e faailoa mai iā i matou, Po o le ā sou manatu? Pe e taga i le tulafono ona totogi e tagata uma lafoga iā Kaisara pe leai?” 18 A ua silafia e Iesu o latou mafaufauga leaga, ona ia faapea atu lea: “O outou o tagata faafiaamiotonu, aiseā ua outou tofotofo mai ai iā te aʻu? 19 Ia faaali mai iā te aʻu se tupe o le lafoga.” Ua latou aumai iā te ia se tenari. 20 Ua ia fetalai atu iā i latou: “O ai e ona le ata ma le igoa lea?” 21 Ua latou tali mai: “O Kaisara.” Ona ia fetalai atu lea: “Ia totogi atu mea a Kaisara iā Kaisara, a o mea a le Atua ia avatu i le Atua.” 22 Ua latou faalogo i lenā mea, ona taufaiofo ai lea o i latou ma ō ese atu, ae tuua na o ia.
MATI 19-25
ʻOA TAUTELE MAI I LE AFIOGA A LE ATUA | MATAIO 24
“Tumau Ona Mataala Faaleagaga a o Faagasolo Aso o le Iʻuga”
(Mataio 24:12) ma o le a maalili le alofa o le toʻatele ona ua faatuputeleina le amioleaga.
it-2 279 ¶6
Alofa
O le a maalili le alofa: Ina ua faailoa e Iesu Keriso i ona soo mea o le a tutupu i le lumanaʻi, na ia faailoa mai o le a malili le alofa (a·gaʹpe) o le toʻatele o ē fai mai e talitonu i le Atua. (Mat 24:3, 12) Na faapea mai Paulo, o se tasi o vala e iloa ai taimi faigatā, o le iai lea o tagata “e mananaʻo tele i tupe.” (2Ti 3:1, 2) O lea, e mafai ona mou atu le vaaiga saʻo sa iai i se tasi e tusa ai o mataupu silisili ma e mafai ona mou atu foʻi le alofa sa iā te ia. O lenei vala e faaalia mai ai le tāua o le faaalia ma le atiaʻe pea o le alofa, e ala i le manatunatu i le Afioga a le Atua ma faatonutonuina o tatou olaga i Ana mataupu silisili.—Efe 4:15, 22-24.
(Mataio 24:39) ma latou te leʻi ano i ai seʻia oo mai le lolo ma tafiesea ai i latou uma, o le a faapena foʻi le faatasi mai o le Atalii o le tagata.
Po o E Faataunuu ea Mea Uma e Tatau Ona E Faia mo le Atua?
5 Na fetalai Iesu Keriso e faatatau i o tatou aso faigatā e faapea: “E pei o ona po o Noa, e faapea foi pe a sau le Atalii o le tagata. Auā e pei ona faia i ona po a o lei oo le lolo, ua latou aai ma inu, ua latou fai avā foi ma faaavaga, ua oo lava i le aso na ulu atu ai Noa i le vaa, na le iloa foi e i latou ina seia oo le lolo, ma aveesea i latou uma; e faapea foi pe a sau le Atalii o le tagata.” (Mataio 24:37-39) E lē sesē le ʻai ma inu pe a faia i se tulaga fuafua tatau, ma o le faaipoipoga foʻi o se faatulagaga na amataina mai e le Atua lava ia. (Kenese 2:20-24) Peitaʻi, pe afai ua tatou iloa ua avea le sailia o mea masani o le olaga ma o tatou faanaunauga sili, aiseā la e lē avea ai ma mataupu o a tatou tatalo? E mafai ona fesoasoani mai Ieova ina ia tatou faamuamua manaʻoga o le Malo, ia faia le mea ua tonu, ma faia mea e tatau mo ia.—Mataio 6:33; Roma 12:12; 2 Korinito 13:7.
(Mataio 24:44) O le mea lea, ia outou nofosauni ai, auā o le itula tou te lē manatunatu ai, e sau ai le Atalii o le tagata.
Ua Fesili Atu Aposetolo e Toʻafā mo se Faailoga
Ua fetalai atu Iesu e tatau i ona soo ona nofouta, mataala ma ia nofosauni. Ua faamamafa e Iesu lenei lapataʻiga e ala i se talafaatusa: “Ia outou iloa lenei mea, pe ana iloa e le tagata o le aiga le taimi o le pō e sau ai le gaoi, semanū e faaauau ona ia mataala, ma na te lē tuua lona fale ia elia. O le mea lea, ia outou nofosauni ai, auā o le itula tou te lē manatunatu ai, e sau ai le Atalii o le tagata.”—Mataio 24:43, 44.
Saʻiliʻiliga Loloto mo ʻOa Faaleagaga
(Mataio 24:8) O le amataga ia o le tigā o puapuaga.
nwtsty faamatalaga mo suʻesuʻega o le Mat 24:8
tigā o puapuaga: O le upu Eleni e faasino atu i le luluti o tigā i le taimi e fanau ai se pepe. I inei, o loo lautele lona faaaogāina lea e faasino atu i puapuaga, tigā, ma mafatiaga. Ae atonu e pei o le tigā o le a fanau, o le a faapena le faateleina o le aofaʻi, le matuiā, ma le umi ona iai o puapuaga ma mafatiaga na valoia mai, a o leʻi oo mai le puapuaga tele lea o loo taʻua i le Mataio 24:21.
(Mataio 24:20) Ia faaauau ona outou tatalo ina neʻi outou sosola i le tau mālūlū po o le aso sapati;
nwtsty faamatalaga mo suʻesuʻega o le Mat 24:20
i le tau mālūlū: I lea vaitaimi, e iai timuga mamafa, lologa, ma e mālūlū, lea e faigatā ai ona faimalaga se tagata pe maua foʻi meaʻai ma mea e nofo ai.—Esr 10:9, 13.
o le aso sapati: I vaipanoa e pei o Iuta, o poloaʻiga e fesootaʻi atu i le tulafono o le Sapati na faigatā ai i tagata ona malaga mamao ma ave ni avega; e lē gata i lea sa tapunia pā o aai i le aso Sapati.—Tagaʻi i le Ga 1:12 ma le App. B12.
Faitau Tusi Paia
(Mataio 24:1-22) Ua maliu ese atu Iesu mai i le malumalu, ona ō mai lea o ona soo ua faaali iā te ia fale o le malumalu. 2 Ona ia tali atu lea iā i latou: “Pe e tou te lē iloa ea uiga o nei mea uma? E moni ou te fai atu iā te outou, E lē toe tiʻetiʻe le isi maa i luga o le isi maa, ae e soloia i lalo.” 3 A o nofo o ia i le Mauga o Olive, ua ō mai ona soo iā te ia ua na o i latou, ua faapea mai: “Ia e fetalai mai iā i matou, Pe e oo afea ia mea, ma o le ā foʻi le faailoga o lou faatasi mai, ma le taufaaiʻuiʻuga o le faiga o mea a le lalolagi?” 4 Ona tali atu lea o Iesu iā i latou: “Ia faaeteete neʻi faasesēina outou e se tasi; 5 auā e toʻatele o le a ō mai i loʻu igoa ma faapea ane, ʻO aʻu o le Keriso,’ ma faasesēina ai le toʻatele. 6 O le a tou faalogo i taua ma tala o taua; o lea aua neʻi outou atuatuvale ai. Auā e ao ona taunuu o nei mea uma a o leʻi oo mai le iʻuga. 7 “Auā o le a siitaua atu isi atunuu i isi atunuu, ma isi malo i isi malo, o le a iai foʻi oge ma mafuiʻe i lea mea ma lea mea. 8 O le amataga ia o le tigā o puapuaga. 9 “Ona tuuina atu lea o outou e tagata i puapuaga ma latou fasiotia outou, o le a inosia foʻi outou e nuu uma ona o loʻu igoa. 10 O le a tausuai foʻi tagata e toʻatele, o le a faalata e le tasi i le tasi, o le a feitagaʻi foʻi. 11 O le a tulaʻi mai foʻi le toʻatele o perofeta pepelo ma faasesēina le toʻatele o tagata; 12 ma o le a maalili le alofa o le toʻatele ona ua faatuputeleina le amioleaga. 13 A o lē e tumau seʻia oo i le iʻuga, o le a faaolaina o ia. 14 O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga. 15 “Pe a outou vaaia le mea e inosia e faatafuna aʻi, e pei ona faamatalaina e le perofeta o Tanielu, ua tū i le mea paia, (o lē faitau, ia iā te ia le faautaga loloto) 16 o ē o i Iutaia, inā sosola atu ia i mauga. 17 O lē o loo i luga o le fale, ia aua neʻi alu ifo e aveese ni mea mai i lona fale; 18 o lē o loo i le fanua, aua neʻi toe foʻi atu i le fale e ave lona ofu tele. 19 Oi talofa i fafine totō ma ē failele i na aso! 20 Ia faaauau ona outou tatalo ina neʻi outou sosola i le tau mālūlū po o le aso sapati; 21 auā o le a tupu le puapuaga tele, e leai sona tusa talu le amataga o le lalolagi, e oo mai lava i aso nei, ma o le a lē toe tupu foʻi se mea faapea. 22 O le mea moni, a lē faapuupuuina ia aso, e leai se tagata e faaolaina. Ae o le a faapuupuuina ia aso ona o ē ua filifilia.
MATI 26–APERILA 1
ʻOA TAUTELE MAI I LE AFIOGA A LE ATUA | MATAIO 25
“Ia Faaauau Ona Mataala”
(Mataio 25:1-6) “E avea le malo o le lagi e pei o taupou e toʻasefulu, na ave a latou molī ma ō atu e faafeiloaʻi le alii faaipoipo. 2 E vālea le toʻalima, ae e faautauta le isi toʻalima. 3 Na ave e ē vālea a latou molī ae e leʻi aveina ni a latou suāuu, 4 a o ē e faautauta na ave a latou fagu suāuu faatasi ma a latou molī. 5 Ina ua tuai mai le alii faaipoipo, ona tau tulemomoe ai lea o i latou uma ma ua momoe loa. 6 Ina ua oo i le vaeluapō, ona sau ai lea o le alaga, ʻUa sau le alii faaipoipo! Ia outou ō atu e faafeiloaʻi iā te ia.’
(Mataio 25:7-10) Ona tulaʻi ai lea o na taupou uma ma sauniuni a latou molī. 8 Na fai atu o ē e vālea i ē e faautauta, ʻIa aumai sina suāuu ma i matou, auā o le a pepē a matou molī.’ 9 Na tali mai o ē e faautauta, ʻNeʻi lē lava mo i matou ma outou. O lea, ia outou ō atu i ē e faatau ma faatau mai ai ni a outou suāuu.’ 10 A o latou ō atu e faatau, ae taunuu mai loa le alii faaipoipo, ona ō atu ai lea o taupou ua uma ona sauni, faatasi ma ia i le ʻaiga o le faaipoipoga; ona tapuni ai lea o le faitotoʻa.
(Mataio 25:11, 12) Mulimuli ane, ona ō mai ai lea o isi taupou ma faapea mai, ʻLau susuga e, lau susuga e, seʻi tatala mai le faitotoʻa iā i matou!’ 12 A ua tali atu o ia, ʻOu te taʻu atu iā te outou le mea moni, ou te lē iloa outou.’
Saʻiliʻiliga Loloto mo ʻOa Faaleagaga
(Mataio 25:31-33) “Pe a taunuu le Atalii o le tagata i lona mamalu, ma agelu uma faatasi ma ia, ona tiʻetiʻe ai lea o ia i lona nofoālii mamalu. 32 E faapotopotoina foʻi atunuu uma i ona luma, ona tuueseeseina lea e ia o tagata, e pei ona tuueseeseina e se leoleo mamoe o mamoe ma ʻoti. 33 Ona ia tuuina lea o mamoe i lona itu taumatau, a o ʻoti i lona itu tauagavale.
Lagolagoina Faamaoni Uso o Keriso
7 I aso nei, ua tatou maua se malamalamaga manino i le talafaatusa i mamoe ma ʻoti. O ai e faasino atu i ai le “Atalii o le tagata” po o le tupu? E faasino atu iā Iesu. O “oʻu uso” e faasino atu i tane ma fafine ua faauuina i le agaga, lea o le a pule ma Keriso i le lagi. (Roma 8:16, 17) O “mamoe” ma “ʻoti” e faaāta ai tagata taʻitoʻatasi mai i atunuu uma, ma e lē faauuina i latou i le agaga paia. Ae o le ā le taimi e faia ai le faamasinoga? O le a faia lenei faamasinoga a o lata ina māeʻa le puapuaga tele lea ua lata mai. O le ā le māfuaaga e faamasino ai tagata o ni mamoe ma ʻoti? E fua i le auala e latou te feutagaʻi ai ma uso faauuina o Keriso o loo totoe i le lalolagi. A o lata mai le iʻuga o lenei faiga o mea, maʻeu lo tatou fiafia i le auala ua faasolosolo ona faasusulu mai ai e Ieova le malamalama i lenei talafaatusa, ma isi talafaatusa o loo faamauina i le Mataio mataupu e 24 ma le 25.
(Mataio 25:40) Ona tali atu lea o le tupu iā i latou, ʻE moni ou te fai atu iā te outou, Auā na outou faia i se tasi o oʻu uso e sili ona faatauvaa, o aʻu lava lea ua outou faia i ai.’
“O Aʻu Uō Outou”
16 Afai o lou faamoemoe o le ola i le lalolagi i le pulega a le Malo o le Atua, e faapefea ona iloa o loo e faauō atu i uso o Keriso? E na o le tolu ni auala o le a iloiloina. Muamua, o le auai lea ma le lotoatoa i le galuega talaʻi. Na faatonu e Keriso ona uso ia talaʻi le tala lelei i le lalolagi aoao. (Mata. 24:14) Peitaʻi, e faigatā i ē o totoe o uso o Keriso i le lalolagi i aso nei ona faataunuuina lenei tiute tauave, e aunoa ma le fesoasoani a a latou aumea o isi mamoe. O le mea moni, o taimi uma lava e auai ai isi mamoe i le galuega talaʻi, ua latou fesoasoani i uso o Keriso e faataunuu lo latou tofiga paia. E matuā talisapaia e Iesu ma le vasega o le pologa faamaoni lenei gaoioiga o le faauōga.
17 O le auala lona lua e fesoasoani ai isi mamoe i uso o Keriso, o le lagolagoina lea o le galuega talaʻi i foaʻi tautupe. Na faalaeiau e Iesu ona soo ina ia faia ni uō mo i latou e ala i ʻʻoa o le amiolētonu.’ (Luka 16:9) E lē faatauina i tupe se faauōga ma Iesu ma Ieova. Ae o le faaaogāina o a tatou meafaitino e faaauiluma ai manaʻoga o le Malo, ua faamaonia ai e faavae la tatou faauōga ma lo tatou alofa i “gaoioiga ma le upu moni,” ae e lē na o upu. (1 Ioa. 3:16-18) Ua tatou avatu le lagolagosua tautupe pe a tatou auai i le galuega talaʻi, pe a faameaalofa atu tupe mo faugāfale ma le faaleleia o maota mo sauniga, ma pe a tatou foaʻi atu meaalofa mo le galuega talaʻi i le lalolagi aoao. Pe itiiti pe tele la tatou foaʻi, ae e matuā talisapaia e Ieova ma Iesu pe a foaʻi ma le lotofiafia.—2 Kori. 9:7.
18 O le auala lona tolu e faamaonia ai o i tatou o uō a Keriso, o le usiusitai lea i le taʻitaʻiga ua aumaia e toeaina o le faapotopotoga. Ua tofia na tane e le agaga paia i le taʻitaʻiga a Keriso. (Efe. 5:23) Na faapea mai le aposetolo o Paulo: “Ia usiusitai i ē o taʻitaʻia outou ma ia gauaʻi iā i latou.” (Epe. 13:17) I nisi taimi, atonu e faigatā ona tatou usiusitai i le taʻitaʻiga e faavae i le Tusi Paia ua aumaia e toeaina. Atonu ua tatou iloa ni o latou vaivaiga, ma e ono sesē ai la tatou vaai i a latou fautuaga. Peitaʻi, ua fiafia Keriso, o le Ulu o le faapotopotoga, e faaaogā nei tane lē lelei atoatoa. O lea la, o le auala e tatou te tali atu ai iā i latou, e aafia ai la tatou faauōga ma Keriso. Pe a tatou lē vāai i masei o toeaina ae mulimuli ma le fiafia i la latou taʻitaʻiga, ua faaalia ai lo tatou alofa iā Keriso.
Faitau Tusi Paia
(Mataio 25:1-23) “E avea le malo o le lagi e pei o taupou e toʻasefulu, na ave a latou molī ma ō atu e faafeiloaʻi le alii faaipoipo. 2 E vālea le toʻalima, ae e faautauta le isi toʻalima. 3 Na ave e ē vālea a latou molī ae e leʻi aveina ni a latou suāuu, 4 a o ē e faautauta na ave a latou fagu suāuu faatasi ma a latou molī. 5 Ina ua tuai mai le alii faaipoipo, ona tau tulemomoe ai lea o i latou uma ma ua momoe loa. 6 Ina ua oo i le vaeluapō, ona sau ai lea o le alaga, ʻUa sau le alii faaipoipo! Ia outou ō atu e faafeiloaʻi iā te ia.’ 7 Ona tulaʻi ai lea o na taupou uma ma sauniuni a latou molī. 8 Na fai atu o ē e vālea i ē e faautauta, ʻIa aumai sina suāuu ma i matou, auā o le a pepē a matou molī.’ 9 Na tali mai o ē e faautauta, ʻNeʻi lē lava mo i matou ma outou. O lea, ia outou ō atu i ē e faatau ma faatau mai ai ni a outou suāuu.’ 10 A o latou ō atu e faatau, ae taunuu mai loa le alii faaipoipo, ona ō atu ai lea o taupou ua uma ona sauni, faatasi ma ia i le ʻaiga o le faaipoipoga; ona tapuni ai lea o le faitotoʻa. 11 Mulimuli ane, ona ō mai ai lea o isi taupou ma faapea mai, ʻLau susuga e, lau susuga e, seʻi tatala mai le faitotoʻa iā i matou!’ 12 A ua tali atu o ia, ʻOu te taʻu atu iā te outou le mea moni, ou te lē iloa outou.’ 13 “O le mea lea, ia faaauau ai ona outou mataala, auā tou te lē iloa le aso po o le itula. 14 “E pei lava o le tagata na faimalaga i nuu mamao, na ia aami ana pologa ma tuuina atu iā i latou ana mea. 15 Na ia avatu taleni e lima i le tasi, ae lua i le tasi, ma le tasi i le isi, ua faatatau i le mea e mafaia e le tagata, ona ia malaga lea i nuu mamao. 16 Ona alu loa lea o lē na avatu i ai taleni e lima ma faaaogā i se pisinisi, ma maua mai ai isi taleni e lima. 17 E faapena foʻi lē na avatu i ai taleni e lua, na maua mai ai le isi lua. 18 A o lē na avatu i ai le taleni e tasi, na alu o ia ma eli le palapala ma nanā ai le tupe siliva a lona matai. 19 “Ina ua mavae se taimi umi, ona sau ai lea o le matai o na pologa ina ia toe totogi atu ana tupe na iā i latou. 20 Ona sau lea o lē na avatu i ai taleni e lima ma tuuina mai isi taleni e lima ma faapea mai, ʻLau susuga e, na e tuuina mai iā te aʻu taleni e lima, ae o lenei ua ou maua ai isi taleni e lima.’ 21 Na faapea atu lona matai iā te ia, ʻMalo lava le pologa lelei ma le faamaoni! Na e faamaoni i mea iti, ou te tofia oe e vaaia mea e tele. Inā olioli ia faatasi ma lou matai.’ 22 Ona sau ai lea o le auauna na avatu i ai taleni e lua, ma faapea mai, ʻLau susuga e, na e tuuina mai iā te aʻu taleni e lua, a o lenei ua ou maua ai isi taleni e lua.’ 23 Na faapea atu lona matai iā te ia, ʻMalo lava le pologa lelei ma le faamaoni! Na e faamaoni i mea iti. Ou te tofia oe e vaaia mea e tele. Inā olioli ia faatasi ma lou matai.’