“Ua Faamagaloina Au Agasala”

Ua faalogo le toʻatele o tagata e faatatau iā Iesu, ma ua latou malaga atu i nuu maotua ina ia faalogologo ai i lana aʻoaʻo atu, ma vāai i ana galuega ofoofogia. Ua mavae atu ni nai aso, ma ua toe foʻi o ia i Kapanaumi lea e tele ina faamautū i ai lana faiva. Ua vave ona salalau atu lenei tala i Kapanaumi, lea o loo i tafatafa o le sami o Kalilaia. Ua lolofi mai nei le toʻatele o tagata i le fale o loo iai Iesu. O nisi o i latou o le ʻau Faresaio ma aʻoaʻo o le Tulafono mai i itu uma o Kalilaia ma Iutaia, lea e aofia ai ma Ierusalema.

ʻUa lolofi mai le toʻatele o tagata, ma ua lē ofi ai le potu, ua leai se avanoa e oo lava i le faitotoʻa, ona ia aʻoaʻo atu lea o le upu.’ (Mareko 2:2) E iai se mea mataʻina o le a tupu. O lenei mea o le a fesoasoani iā i tatou e talitonu ai, e iai iā Iesu le mana e aveesea ai le pogai o mafatiaga o tagata, ma toe faafoʻisia le soifua mālōlōina iā i latou uma ua ia finagalo i ai.

A o aʻoaʻo atu Iesu, ua sii mai e ni tagata se toʻafā se tamāloa ua pē le tino o loo taoto i se moega. E latou te mananaʻo e faamālōlō e Iesu la latou uō. Ae ona o le tumutumu o tagata, ua lē mafai ai ona latou “oo mai iā Iesu.” (Mareko 2:4) Pagā lo latou faanoanoa! O lea, ua latou ō aʻe ai ma aveese le taualuga o le fale, ona faapū lea o le faʻalo, ma tuutuu ifo i lalo le moega o loo taoto ai le tamāloa e pē le tino.

Po ua toʻatamaʻi ai Iesu ona o le faalavelave atu o nei tagata? E leai. Ua matuā maofa Iesu i lo latou faatuatua, ma fetalai atu i le tagata maʻi: “Ua faamagaloina au agasala.” (Mataio 9:2) Ae pe e mafai moni e Iesu ona faamagaloina agasala? Ua manatunatu ifo le ʻautusiupu ma le ʻau Faresaio i o latou loto e faapea: “Aiseā ua tautala ai faapea lenei tagata? Ua fai upuleaga o ia. O ai ea e mafai ona faamagaloina agasala, ua na o le toʻatasi, o le Atua lea?”—Mareko 2:7.

Ua silafia e Iesu o latou manatunatuga ma ua fetalai atu: “Aiseā ua outou manatunatu ai i nei mea i o outou loto? Auā o lē fea e sili ona faigofie, o le fai atu i le tagata maʻi, ʻUa faamagaloina au agasala,’ po o le fai atu, ʻIa tū i luga ma ave lou moega ma savali’?” (Mareko 2:8, 9) O le mea moni, ua mafai ona faamagaloina e Iesu agasala a lenei tamāloa, ona o le taulaga lea ua toeitiiti ona ia ofoina atu lea.

Ua faailoa atu nei e Iesu i le motu o tagata e aofia ai ma i latou o loo faitioina o ia, ua iai iā te ia le pule e faamagaloina ai agasala. Ua ia liliu atu i le tagata maʻi ma fetalai atu iā te ia: “Ou te fai atu iā te oe, Inā tū ia i luga ma ave lou moega, ma e alu i lou aiga.” Ua faia faapea e le tamāloa, ua ia ave lona moega ma savali atu i fafo a o vaavaai ane tagata. Ua taufaiofo i latou uma, ma ua latou faamamaluina le Atua e faapea: “Tatou te leʻi vaaia lava se mea faapenei.”—Mareko 2:11, 12.

E tāua ona iloa, o loo taʻua e Iesu le fesootaʻiga o le agasala ma maʻi, ae e fesootaʻi atu le faamagaloina o agasala i le soifua mālōlōina faaletino. Ua faapea mai le Tusi Paia, na agasala lo tatou uluaʻi tamā o Atamu, ma ua tuufaasolo mai iā i tatou āuga o le agasala: o le maʻi ma le oti. Peitaʻi, i le taimi o le pulega a le Malo o le Atua, o le a faamagaloina ai e Iesu agasala a i latou uma e alolofa ma auauna i le Atua, ona aveesea ai lea o maʻi uma e faavavau.—Roma 5:12, 18, 19.