Lomiga mo le Polokalame mo le Sauniga o le Faiva ma le Olaga Faa-Kerisiano
IANUARI 7-13
ʻOA TAUTELE MAI I LE AFIOGA A LE ATUA | GALUEGA 21-22
“Ia Faia le Finagalo o Ieova”
(Galuega 21:8-12) I le aso e sosoo ai, ua matou malaga ma taunuu atu i Kaisareia. Ona matou ō atu lea i le fale o Filipo, o le faievagelia, o se tasi o tane e toʻafitu na uluaʻi filifilia, ma nonofo ai ma ia. 9 O lenei tamāloa, e toʻafā ona afafine, o ni taupou, ma latou te faia valoaga. 10 A o matou nonofo ai i inā mo ni aso, ona malaga mai ai lea o se perofeta e igoa iā Akapo mai i Iutaia, 11 ma sau iā i matou ma tago i le fusi o Paulo, ua fusifusi ai ona lava vae ma ona lima ma faapea mai: “Ua faapea mai le agaga paia, ʻO le tagata e ana lenei fusi, o le a faapena ona fusifusia o ia e tagata Iutaia i Ierusalema, ma tuuina atu o ia i lima o tagata o nuu ese.’” 12 Ina ua matou faalogo i lenei mea, ona matuā ʻaiʻoi atu lea o i matou atoa ai ma i latou i lea nuu, ia aua lava neʻi alu aʻe o ia i Ierusalema.
“Ia Faia le Finagalo o Ieova”
15 A o nofo Paulo i le fale o Filipo, ae taunuu ane loa se isi tagata asiasi taualoa, o Akapo. Na iloa e i latou na faapotopoto i le fale o Filipo, o Akapo o se perofeta; ma na ia valoia se oge tele i le taimi o le pulega a Kalaotio. (Galu. 11:27, 28) Atonu na latou taumānatu: ʻAiseā ua sau ai Akapo? O le ā le feʻau o loo ia aumaia?’ A o latou vaavaai atu ma le naunau, na tago atu o ia i le fusi o le ofu o Paulo, o se ʻie lautele e pei o se fusipaʻu e iai le ato e mafai ona tuu ai tupe ma isi mea, ma e fusi i le sulugātiti. Ona fusi ai lea e Akapo o ona vae ma ona lima. Ona ia talanoa atu lea. Sa faateʻia i le feʻau: “Ua faapea mai le agaga paia, ʻO le tagata e ana lenei fusi, o le a faapena ona fusifusia o ia e tagata Iutaia i Ierusalema, ma tuuina atu o ia i lima o tagata o nuu ese.’”—Galu. 21:11.
16 Na faamautinoa atu e le valoaga o le a alu atu Paulo i Ierusalema. Ua faaalia mai ai foʻi e faapea, o le a tuuina atu o ia e tagata Iutaia “i lima o tagata o nuu ese.” Na iai ni aafiaga o lenei valoaga iā i latou na iai. Ua tusi Luka: “Ina ua matou faalogo i lenei mea, ona matuā ʻaiʻoi atu lea o i matou atoa ai ma i latou i lea nuu, ia aua lava neʻi alu aʻe o ia i Ierusalema. Ua tali mai Paulo: “Aiseā ua outou fetagisi ai ma faavaivai mai i loʻu loto? Ia outou matuā mautinoa, ua ou nofosauni e lē gata e saisaia aʻu, ae ia ou oti foʻi i Ierusalema ona o le suafa o le Alii o Iesu.’”—Galu. 21:12, 13.
(Galuega 21:13) Ua tali mai Paulo: “Aiseā ua outou fetagisi ai ma faavaivai mai i loʻu loto? Ia outou matuā mautinoa, ua ou nofosauni e lē gata e saisaia aʻu, ae ia ou oti foʻi i Ierusalema ona o le suafa o le Alii o Iesu.”
“Ia Faia le Finagalo o Ieova”
17 Seʻi mafaufau i le vaaiga lenei. O uso e aofia ai ma Luka, na ʻaiʻoi atu iā Paulo ia aua neʻi alu aʻe. Ua fetagisi nisi. I le ootia ona o le manatu alofa na latou faaalia iā te ia, na tautala lemū atu ai Paulo e faapea, ua latou “faavaivai mai i [lona] loto,” o loo faaliliuina i nisi tusitusiga le upu Eleni, ua outou “tuia [loʻu] loto.” Ae na tumau pea lana faaiʻuga ma o le tulaga lenā na oo i ai, ina ua feiloaʻi o ia ma le ʻauuso i Turo, e leʻi avea lo latou faatauanau atu ma loimata e faavaivaia ai o ia. Nai lo o lea, na ia faamatala atu iā i latou le pogai e tatau ai ona alu. Maʻeu le lototele ma le maumauaʻi na ia faaalia! I le pei o Iesu, na maumauaʻi pea Paulo e alu aʻe i Ierusalema. (Epe. 12:2) E leʻi manaʻo Paulo e faamaturo o ia, ae afai e tupu lenā mea, e manatu o ia o se faaeaga le oti ona o le avea ma soo o Keriso Iesu.
(Galuega 21:14) Ina ua lē mafai ona taofia o ia, ona matou lotomalilie lea ma faapea atu: “Ia faia le finagalo o Ieova.”
“Ia Faia le Finagalo o Ieova”
18 Na faapefea ona gaoioi le ʻauuso? O le tali puupuu lava, na latou faaalia le faaaloalo. E tatou te faitau ai e faapea: “Ina ua lē mafai ona taofia o ia, ona matou lotomalilie lea ma faapea atu: “Ia faia le finagalo o Ieova.’” (Galu. 21:14) E leʻi taulau taumafaiga a tagata na taumafai e taofia Paulo mai le alu aʻe i Ierusalema. Na latou faalogo ma lolo atu iā Paulo, ua latou iloa ma taliaina o le finagalo lea o Ieova, e ui lava sa faigatā iā i latou. Na uia e Paulo se ala e iʻu ai i lona oti. Ua atili ai ona faigatā iā Paulo ona na taumafai tagata alolofa e taofia o ia.
Saʻiliʻiliga Loloto mo ʻOa Faaleagaga
(Galuega 21:23, 24) O lea la, ia e faia le mea lenei matou te fai atu ai: E toʻafā tamāloloa ua iā i matou ua faia ni a latou tautoga. 24 Ia ave nei tamāloloa ma faamamāina oe faatasi ma i latou, ma totogi a latou tupe faaalu, ina ia mafai ai ona sele mamā o latou lauulu. Ona iloa ai lea e tagata uma, e sesē talafeaveaʻi ua latou faalogo i ai e uiga iā te oe, peitaʻi ua saʻo lava lau amio ma ua e tausia foʻi le Tulafono.
“Faafofoga Mai i Laʻu Tali”
10 E ui i lea, na malamalama lelei Paulo iā i latou na manatu e tatau ona tausia pea nisi tū faa-Iutaia, e pei o le aua le faia ni galuega i le Sapati, pe aua le ʻaina nisi ituaiga o meaʻai. (Roma 14:1-6) E na te leʻi faataatia foʻi ni tulafono e faatatau i le peritome. E moni sa tatau iā Paulo ona peritomeina Timoteo ina ia lē masalosalo ai tagata Iutaia iā Timoteo, ona o lona tamā o le Eleni. (Galu. 16:3) O le peritome, o se filifiliga a le tagata lava ia. Na taʻu atu e Paulo i tagata Kalatia: “E lē aogā le peritome po o le lē peritome e tusa ai ma mataupu a Keriso Iesu, ae o le faatuatua e ala i le alofa.” (Kala. 5:6) Peitaʻi, afai e peritome ona o le Tulafono pe ina ia maua ai le faamaoniga a Ieova, ua faaalia ai la le leai o se faatuatua.
11 O lea, e ui i le sesē o talafeaveaʻi, ae sa atuatuvale pea nisi tagata Iutaia ua talitonu. O le māfuaaga lenā na avatu ai e tane matutua iā Paulo le faatonuga lenei: “E toʻafā tamāloloa ua iā i matou ua faia ni a latou tautoga. Ia ave nei tamāloloa ma faamamāina oe faatasi ma i latou, ma totogi a latou tupe faaalu, ina ia mafai ai ona sele mamā o latou lauulu. Ona iloa ai lea e tagata uma, e sesē talafeaveaʻi ua latou faalogo i ai e uiga iā te oe, peitaʻi ua saʻo lava lau amio ma ua e tausia foʻi le Tulafono.”—Galu. 21:23, 24.
12 Sa ono mafai ona finau mai Paulo, o le faafitauli e lē ona o talafeaveaʻi e uiga iā te ia, ae o le maelega o na Iutaia ua talitonu i le Tulafono a Mose. Na lotomalie o ia e fetuutuunaʻi, ae aua lava neʻi faagutugutulua i mataupu silisili a le Atua. I le taimi muamua atu na ia tusi ai: “Sa ou faapei o sē e nofo i le tulafono i ē e nonofo i le tulafono, e ui ou te lē o nofo i le tulafono, ina ia ou maua ai ē e nonofo i le tulafono.” (1 Kori. 9:20) I lenei mea na tupu, sa felagolagomaʻi ai Paulo ma toeaina i Ierusalema ma foliga mai e pei o sē “o nofo i le tulafono.” O le faia faapea, na ia faataatia ai se faaaʻoaʻoga lelei mo i tatou i aso nei ina ia felagolagomaʻi ma toeaina, ae aua le tausisi e fai mea i la tatou lava auala.—Epe. 13:17.
(Galuega 22:16) O lenei, aiseā e te faatuai ai? Inā tū ia i luga, ma ia papatisoina oe, ma ia faamamā ese au agasala i lou valaau i lona suafa.’
nwtsty faamatalaga mo suʻesuʻega o le Ga 22:16
ia faamamā ese au agasala i lou valaau i lona suafa: Po o le “ia faamamā ese au agasala ma valaau i lona suafa.” O le a faamamā ese agasala a se tasi e lē gata i le papatiso i le vai, ae e ala i le valaau i le suafa o Iesu. O le faia faapea e aofia ai le faatuatua iā Iesu ma faaalia lenā faatuatua e ala i galuega faa-Kerisiano.—Ga 10:43; Ia 2:14, 18.
Faitau Tusi Paia
(Galuega 21:1-19) Ua matou faamavae atu iā i latou ma loimata, ona matou tuuvaa lea ma folau saʻo atu i Ko, ae i le aso e sosoo ai, ua matou ō atu ai i Roto, ona ō atu ai lea i Patara. 2 Ina ua matou maua le vaa e malaga atu i Foinie, ona matou ō lea i ai, ma folau atu loa. 3 Ua matou vaaia le motu o Kuperu i le itu tauagavale, a ua matou folau loa ma agaʻi atu i Suria, ona matou taula lea i Turo, auā o i inā e laʻu ese ai le uta a le vaa. 4 Ua matou saʻili, ona maua ai lea o soo ma matou nonofo ai i inā mo aso e fitu. Ae peitaʻi, e ala i le agaga, ua latou fai atu ai pea iā Paulo, e aua neʻi alu atu i Ierusalema. 5 Ina ua uma ia aso, ona matou ō lea ma faaauau la matou malaga; ae ua momoli i matou e i latou uma faatasi ma fafine ma tamaiti i tua atu o le aai. Ona matou tootutuli lea i le matafaga ma tatalo, 6 ma faatofā le tasi i le isi, ona matou ō lea i luga o le vaa, a ua toe foʻi i latou i o latou aiga. 7 Ona faaiʻu lea o la matou folauga mai i Turo, ma taunuu atu i Tolumai, ua matou feiloaʻi ma le ʻauuso ma nonofo ai ma i latou i le aso e tasi. 8 I le aso e sosoo ai, ua matou malaga ma taunuu atu i Kaisareia. Ona matou ō atu lea i le fale o Filipo, o le faievagelia, o se tasi o tane e toʻafitu na uluaʻi filifilia, ma nonofo ai ma ia. 9 O lenei tamāloa, e toʻafā ona afafine, o ni taupou, ma latou te faia valoaga. 10 A o matou nonofo ai i inā mo ni aso, ona malaga mai ai lea o se perofeta e igoa iā Akapo mai i Iutaia, 11 ma sau iā i matou ma tago i le fusi o Paulo, ua fusifusi ai ona lava vae ma ona lima ma faapea mai: “Ua faapea mai le agaga paia, ʻO le tagata e ana lenei fusi, o le a faapena ona fusifusia o ia e tagata Iutaia i Ierusalema, ma tuuina atu o ia i lima o tagata o nuu ese.’” 12 Ina ua matou faalogo i lenei mea, ona matuā ʻaiʻoi atu lea o i matou atoa ai ma i latou i lea nuu, ia aua lava neʻi alu aʻe o ia i Ierusalema. 13 Ua tali mai Paulo: “Aiseā ua outou fetagisi ai ma faavaivai mai i loʻu loto? Ia outou matuā mautinoa, ua ou nofosauni e lē gata e saisaia aʻu, ae ia ou oti foʻi i Ierusalema ona o le suafa o le Alii o Iesu.” 14 Ina ua lē mafai ona taofia o ia, ona matou lotomalilie lea ma faapea atu: “Ia faia le finagalo o Ieova.” 15 Ua mavae ia aso, ona matou sauni lea mo le malaga ma ō aʻe ai i Ierusalema. 16 Ua matou ō foʻi ma nisi soo mai i Kaisareia, ina ia momoli i matou i le tagata lea e talimālō iā i matou, o Nasona mai i Kuperu, o se tasi o uluaʻi soo. 17 Ina ua matou taunuu i Ierusalema, ona talia fiafia lea o i matou e le ʻauuso. 18 Ae i le aso na sosoo ai, ona matou asiasi lea ma Paulo iā Iakopo; ma o loo iai i inā toeaina uma. 19 Ona ia faafeiloaʻi lea o i latou, ma faamatala auʻiliʻili atu mea ua faia e le Atua i nuu ese e ala i lana talaʻiga.
IANUARI 14-20
ʻOA TAUTELE MAI I LE AFIOGA A LE ATUA | GALUEGA 23-24
“Tuuaʻia o se Tagata Faasoesa ma Faatupu Fouvalega”
(Galuega 23:12) Ua oo i le aso e sosoo ai, ona taupulepule lea o tagata Iutaia ma fai la latou tautoga, e lē toe aai ma feinu seʻia o latou fasiotia Paulo.
(Galuega 23:16) Ae ina ua iloa e le tama a le tuafafine o Paulo o loo latou faatalitali e puʻe o ia, ona alu atu lea i le nofoaga o fitafita, ma faamatala atu lenei tala iā Paulo.
“Ia e Lototele!”
5 Na talafeagai lelei le taimi na maua ai e Paulo na faalaeiauga. I le aso na sosoo ai, e silia ma le 40 tamāloloa Iutaia na latou ʻtaupulepule ma fai la latou tautoga, e lē toe aai ma feinu seʻia o latou fasiotia Paulo.’ O lenei “taupulepule faatasi,” e faaalia ai le matuā maumauaʻi o nei tagata Iutaia e fasiotia le aposetolo. Pe a lē taunuu la latou taupulepulega, ua latou talitonu o le a oo se mea leaga iā i latou. (Galu. 23:12-15) O la latou taupulepulega lea na ioeina e le ʻaufaitaulaga sili ma toeaina, e toe faafoʻi atu Paulo i le ʻau Saniterini ina ia toe suʻesuʻeina, e peiseaʻī o loo latou fia iloa atili se mataupu e uiga iā te ia. Peitaʻi, a o agaʻi atu i le ʻau Saniterini, sa faatalitali mai tagata tetee ina ia osofaʻia Paulo ma fasiotia.
6 Na faalogo le tama a le tuafafine o Paulo i lenei taupulepulega, ma ia taʻu atu loa iā Paulo. O lea, na auina atu ai e Paulo lenei tauleʻaleʻa e taʻu atu i le alii taʻitaʻiʻau o Roma, o Kalaotio Lusia. (Galu. 23:16-22) E mautinoa le fiafia o Ieova i talavou o ē ua pei o lenei tauleʻaleʻa, i le lototele e faamuamua le lelei o tagata o le Atua nai i lo o i latou lava, ma faia mea e latou te mafai ina ia faaauiluma ai le feʻau o le Malo.
(Galuega 24:2) Ina ua valaauina Titulo, ona ia tuuaʻia lea o ia e faapea: “O le mea lea ua matou olioli ai i le filemu tele ona o oe, ma o lau tofā mamao ua faaleleia ai lo matou nuu,
(Galuega 24:5, 6) Ua matou maua lenei tagata o faasoesa solo, ma faatupu fouvalega i tagata Iutaia i le lalolagi atoa, ma ua taulamua foʻi o ia i le lotu a le ʻau Nasareta, 6 o lē na taumafai foʻi e solivale le malumalu, ma ua matou puʻea ai o ia.
“Ia e Lototele!”
10 I Kaisareia, na ʻleoleoina ai Paulo i le maota o Herota’ e faatalitali ai le taunuu atu o tagata tetee mai i Ierusalema. (Galu. 23:35) Ina ua mavae aso e lima, ona ō mai ai lea o le Ositaulaga Sili o Anania, se lōia e igoa iā Titulo, ma se vaega o toeaina. Na muamua lava viviia e Titulo Filiki ona o le mea na ia faia mo tagata Iutaia, ae e mautinoa o le taufaaʻoleʻole ina ia taʻuleleia ai o ia. O lea la, ina ia manino le moliaga a o leʻi faia le faamasinoga, na taʻua ai e Titulo ia Paulo o sē ua “faasoesa solo, ma faatupu fouvalega i tagata Iutaia i le lalolagi atoa, ma ua taulamua o ia i le lotu a le ʻau Nasareta, o lē na taumafai foʻi e solivale le malumalu, ma ua matou puʻea ai o ia.” Na ʻaufaatasi atu foʻi isi tagata Iutaia i nei moliaga, ma faapea atu e moni lava nei mea uma.’ (Galu. 24:5, 6, 9) O le faatupuina o fouvalega, taulamua i le lotu mavae mataʻutia, ma solivale le malumalu—o ni moliaga matuiā e ono iʻu ai i le oti.
(Galuega 24:10-21) Ina ua geno atu le kovana iā Paulo e tautala, ona ia tali mai lea: “Ua ou iloa lelei e tele tausaga ua e faamasino ai i lenei nuu, ma ua ou fiafia lava e tali atu i nei mea e uiga iā te aʻu, 11 auā ua mafai ona e silafia ai, ua na o le sefulu lua aso talu ona ou alu aʻe i Ierusalema e tapuaʻi ai; 12 ma latou te leʻi maua mai aʻu o finau ma se tagata i le malumalu, pe faatupu vevesi i le motu o tagata i sunako po o i le aai. 13 E leʻi mafai foʻi ona latou faamaonia atu iā te oe, mea ua latou molia ai aʻu i le taimi nei. 14 Ae ou te taʻutino atu iā te oe e tusa ai ma le ala lea ua latou taʻua o se ʻlotu ese,’ o aʻu, ou te avatu le auaunaga paia i le Atua o o matou augātamā, auā ua ou talitonu i mea uma ua tusia i le Tulafono ma le ʻau Perofeta. 15 Ou te faamoemoe foʻi i le Atua, ma o le faamoemoe lava lenā o nei tagata, e toetutū mai tagata amiotonu ma tagata amiolētonu. 16 O le mea lea ou te taumafai ai pea ina ia maua se lotofuatiaifo lelei, i loʻu lē faia o se mea leaga i luma o le Atua atoa ma tagata. 17 O lea, ina ua mavae le tele o tausaga, ua ou sau ai e aumai meaalofa i loʻu nuu ma ofo atu taulaga i le Atua. 18 A o oʻu faia nei mea, ua latou maua mai aʻu ua uma ona faamamāina i le malumalu, ae e leai se motu o tagata po o se pisapisaō. Peitaʻi ua iai ni tagata Iutaia mai i le itumalo o Asia, 19 o ē ua tatau ona ō mai i ou luma, ma molia aʻu pe afai e iai se mea latou te taʻusalaina ai aʻu. 20 Pe tuu atu foʻi i tagata o loo i inei, e fai mai i latou pe e iai se mea sesē ua latou maua iā te aʻu, a o oʻu tū i luma o le Faamasinoga Sili, 21 seʻi vaganā ai laʻu faamatalaga na fai a o oʻu tū i o latou luma e faapea, ʻUa faamasinoina aʻu i le asō i o outou luma, ona o le toetutū o ē ua oti!’”
“Ia e Lototele!”
13 Ua faataatia e Paulo se faaaʻoaʻoga mo i tatou e mulimuli ai pe afai e molia i luma o pule o malo ona o la tatou tapuaʻiga, tuuaʻia sesē i tatou o ni tagata faatupu faalavelave, fouvale i malo, ma o ni sui o se “lotu mavae mataʻutia” e faatupu vevesi. E leʻi taumafai Paulo e fai se mea e faaʻauʻau mai ai le kovana iā te ia, pe taumafai foʻi e fai ni faamatalaga e pei ona sa faia e Titulo. Sa toʻafilemu pea ma faaaloalo Paulo. Ma le faautauta, sa ia avatu ni faamaoniga manino ma malamalama. Sa taʻua e Paulo e faapea, e lē o iai i inei “tagata Iutaia mai i le itumalo o Asia” lea na molia o ia i le solivaleina o le malumalu, o lea la, e tusa ai ma le tulafono, e tatau ona iai i latou i inei ma aumai ni moliaga i mea ua latou taʻusalaina ai o ia.—Galu. 24:18, 19.
14 E ui i nei tuuaʻiga, ae e leʻi faavaivai ai Paulo i le avatuina o faamaoniga o lona talitonuga. Sa toe taʻua ma le lototele e Paulo lona talitonuga e uiga i le toetū, o se mataupu na matuā vevesi ai a o tū o ia i luma o le ʻau Saniterini. (Galu. 23:6-10) I lona tetee atu, sa faamamafa ai e Paulo le faamoemoe o le toetū. Aiseā? Talu ai o loo avatu e Paulo le molimau iā Iesu ma Lona toetū mai i le oti—o se mea e lē taliaina e i latou o loo tetee. (Galu. 26:6-8, 22, 23) Ioe, na māfua le vevesi ona o le mataupu e uiga i le toetū—ma le mea moni e faatatau i le toetū o Iesu.
Saʻiliʻiliga Loloto mo ʻOa Faaleagaga
(Galuega 23:6) Ua mātauina e Paulo, o le tasi vaega, o le ʻau Satukaio, a o isi, o le ʻau Faresaio, ona alaga atu lea o ia i alii o le Faamasinoga Sili e faapea: “Alii e, ma uso e, o aʻu o le Faresaio, o le atalii o le ʻau Faresaio. Ua faamasinoina aʻu i le faamoemoe o le toetū o ē ua oti.”
nwtsty faamatalaga mo suʻesuʻega o le Ga 23:6
O aʻu o le Faresaio: O nisi na iai i le aofia na latou iloaina Paulo. (Ga 22:5) Ina ua faapea atu Paulo o ia o le atalii o le Faresaio, na malamalama le ʻau Faresaio o le Saniterini o loo faailoa atu e Paulo lona talaaga na iai o se Faresaio, ae o lea ua avea ma Kerisiano maelega. Na latou iloa e leʻi taufaasesē Paulo i ana faamatalaga. Ae i lenei mau, e uiga atu le tala a Paulo o ia o le Faresaio, i le talitonuga o le toetū lea e latou te talitonu faatasi i ai ma le ʻau Faresaio. Na te leʻi taʻua o ia o se Satukaio ona e latou te lē talitonu i le toetū. O lona faia faapea, na ia faavae ai se manatu e ioe faatasi i ai ma le ʻau Faresaio na iai i inā. Atonu na ia faamoemoe o lona taʻua o lea manatu o le a uunaʻia ai nisi o sui o le Saniterini e lagolagoina lona manatu, ma o le mea lenā na tupu. (Ga 23:7-9) E ōgatusa le faamatalaga a Paulo i le Ga 23:6, ma le auala na ia faamatala ai o ia i se taimi mulimuli ane ina ua ia puipuia o ia lava i luma o le Tupu o Akeripa. (Ga 26:5) Ina ua tusi atu foʻi Paulo mai i Roma i ona uso Kerisiano i Filipi, na ia toe taʻua ai foʻi lona talaaga sa iai o se Faresaio. (Fil 3:5) E tāua foʻi le iloa o le auala o loo faamatala ai nisi o Kerisiano na avea muamua ma Faresaio i le Ga 15:5.—Tagaʻi i le faamatalaga mo suʻesuʻega o le Ga 15:5.
nwtsty faamatalaga mo suʻesuʻega o le Ga 15:5
mai i le lotu a le ʻau Faresaio: E foliga mai o nei Kerisiano na mātaulia lava i latou i o latou talaaga na iai o ni Faresaio.—Faatusatusa i le faamatalaga mo suʻesuʻega o le Ga 23:6.
(Galuega 24:24) Ua mavae ni nai aso, ona taunuu ane lea o Filiki ma lana avā o Tusila, o se tamaʻitaʻi Iutaia, ma ua ia aami iā Paulo ma faalogo atu iā te ia i le talitonuga iā Keriso Iesu.
(Galuega 24:27) Peitaʻi ina ua mavae le lua tausaga, ona suia lea o Filiki e Pokio Feso; ae ona ua manaʻo Filiki ina ia fiafia mai tagata Iutaia iā te ia, ua ia tuu ai pea Paulo e saisaitia.
nwtsty faamatalaga mo suʻesuʻega o le Ga 24:24
Tusila: O ia o le afafine laʻitiiti ma e lona tolu i le fanau a Herota lea e taʻua i le Ga 12:1, lea e faasino atu iā Herota Akeripa I. Na fanau Tusila i le pe tusa o le 38 T.A., ma o lona tuagane o Akeripa II ma lona uso o Perenike. (Tagaʻi i le faamatalaga mo suʻesuʻega o le Ga 25:13.) O lona toʻalua lona lua o le Kovana o Filiki. Na faaipoipo muamua o ia i le Tupu Suria o Azizus o Emesa ae na teteʻa ma faaipoipo atu iā Filiki i le pe tusa o le 54 T.A., atonu ina ua 16 ona tausaga. E talafeagai ona faapea atu na iai o ia i le taimi na talanoa atu ai Paulo i luma o Filiki e faatatau “i le amiotonu ma le amio pulea, ma le faamasinoga i le lumanaʻi.” (Ga 24:25) Ina ua suia le tofi kovana o Filiki e Feso, na tuu ai pea e Filiki Paulo ia saisaitia ʻina ia fiafia mai ai tagata Iutaia iā te ia.’ Na manatu nisi na ia faia nei gaoioiga ina ia faafiafia ai lana avā talavou o se Iutaia.—Ga 24:27.
nwtsty faamatalaga mo suʻesuʻega o le Ga 25:13
Akeripa: E faasino atu iā Herota Akeripa II. O ia o le atalii o le atalii o le atalii o Herota le Sili, ma o le atalii o Herota Akeripa I ma lana avā o Cypros.—Ga 12:1.
Perenike: O le tuafafine o Herota Akeripa II ae na la faia ni faiga faamataifale. Na mulimuli ane avea ma avā faapouliuli a Tito, a o leʻi avea Tito ma emeperoa o Roma.
Faitau Tusi Paia
(Galuega 23:1-15) Ua pulatoʻa atu Paulo i alii o le Faamasinoga Sili ma faapea atu: “Alii e, le ʻauuso e, ua ou faia laʻu amio ma se lotofuatiaifo matuā lelei i luma o le Atua, ua oo mai lava i le aso nei.” 2 O le mea lea, ua faatonuina ai e le ositaulaga sili o Anania o ē o loo tutū latalata ane iā te ia, ina ia pō i lona gutu. 3 Ona fai atu lea o Paulo iā te ia: “O oe na le pā ua faapaʻepaʻeina, o le a pō atu le Atua iā te oe. Pe e te nofo ea e faamasino mai iā te aʻu e tusa ai ma le Tulafono, a o lenā e te solia le Tulafono i lou fai atu e pō mai aʻu?” 4 Ona faapea mai lea o i latou ua tutū ai: “Pe e te tautala lē migao ea i le ositaulaga sili a le Atua?” 5 A ua fai atu Paulo: “Le ʻauuso e, ou te leʻi iloa o ia o le ositaulaga sili. Auā ua tusia, ʻAua e te upuvale i se taʻitaʻi o lou nuu.’” 6 Ua mātauina e Paulo, o le tasi vaega, o le ʻau Satukaio, a o isi, o le ʻau Faresaio, ona alaga atu lea o ia i alii o le Faamasinoga Sili e faapea: “Alii e, ma uso e, o aʻu o le Faresaio, o le atalii o le ʻau Faresaio. Ua faamasinoina aʻu i le faamoemoe o le toetū o ē ua oti.” 7 O lona fai atu o lenei mea, ua mapuna aʻe ai se fefinauaʻiga i le va o le ʻau Faresaio ma le ʻau Satukaio, ma ua vaeluaina ai foʻi le motu o tagata. 8 Auā ua fai mai le ʻau Satukaio e leai se toetū, e leai foʻi ni agelu, po o agaga, a ua faalauiloa atu e le ʻau Faresaio na mea uma. 9 Ona feʻei lea o tagata, ma ua matuā finau atu nisi o le ʻautusiupu o le vaega a le ʻau Faresaio e faapea: “Matou te leʻi maua se mea sesē ua faia e lenei tagata; ae afai ua tautala mai se agaga, po o se agelu iā te ia,—.” 10 Ua oo ina faateteleina le fefinauaʻiga, ona fefe ai lea o le alii e pule i ʻau ina neʻi latou saeia Paulo, ona ia poloaʻi lea i fitafita ina ia ō ifo ma toso ese o ia mai i tagata, ma avatu o ia i nofoaga o fitafita. 11 I lenā pō, ua tū mai ai le Alii iā te ia ma fetalai mai: “Ia e lototele! Auā e pei ona e molimau māeʻaeʻa atu e uiga iā te aʻu i Ierusalema, e ao foʻi la ona e molimau atu i Roma.” 12 Ua oo i le aso e sosoo ai, ona taupulepule lea o tagata Iutaia ma fai la latou tautoga, e lē toe aai ma feinu seʻia o latou fasiotia Paulo. 13 E sili atu i le fā sefulu tamāloloa na taupulepule faatasi i le faia o lenei tautoga; 14 ua latou ō atu i le ʻaufaitaulaga sili ma toeaina ma faapea atu: “Ua matou matuā tautō e lē toe aai seʻiloga ua matou fasiotia Paulo. 15 O le mea lea, o outou ma alii o le Faamasinoga Sili, ia outou taʻu manino atu i le alii e pule i ʻau, le māfuaaga e aumai ai o ia iā te outou, e peiseaʻī ua outou fia iloa atili mea e faatatau iā te ia. Matou te nofosauni e fasioti iā te ia a o leʻi latalata mai o ia.”
IANUARI 21-27
ʻOA TAUTELE MAI I LE AFIOGA A LE ATUA | GALUEGA 25-26
“Talosaga Atu Paulo iā Kaisara ma Molimau Atu i le Tupu o Herota Akeripa”
(Galuega 25:11) Afai o aʻu moni o sē e fai mea sesē, ma ua ou faia se mea ua tatau i ai le oti, ou te lotomalie e oti. Ae afai e lē moni tuuaʻiga ua faia e nei tagata iā te aʻu, e lē mafai e se tasi ona tuuina atu aʻu ina ia faamalie ai i latou. Ou te tagi atu iā Kaisara!”
ʻOu te Talosaga Atu iā Kaisara!’
6 Ona o le naunau o Feso e faafiafia tagata Iutaia, sa ono tuuina atu ai Paulo i se tulaga e lamatia ai lona ola. O lea la, na faaaogā ai e Paulo lana aiā tatau o se sitiseni Roma. Na ia taʻu atu iā Feso: ʻO loo ou tū nei i luma o le nofoa faamasino o Kaisara, i le mea e tatau ona faamasinoina ai aʻu. E leai se mea leaga ua ou faia i tagata Iutaia, e pei foʻi ona e silafia lelei. Ou te talosaga atu iā Kaisara!’ I tulaga masani, e lē mafai ona toe suia se apili pe a talia. Na faamamafa atu e Feso lenei mea e ala i le faapea atu: “Ona ua e tagi atu iā Kaisara; e te alu lava iā Kaisara.” (Galu. 25:10-12) I le talosaga atu i se pule maualuga faaletulafono, ua faataatia ai foʻi e Paulo se tulaga mo Kerisiano moni i aso nei. Pe a taumafai tagata tetee e “fafauina faalavelave e ala i le poloaʻiga,” e faaaogā e Molimau a Ieova faatulagaga faaletulafono e puipuia ai le tala lelei.—Sala. 94:20.
(Galuega 26:1-3) Ona fai mai lea o Akeripa iā Paulo: “E tuu atu lava iā te oe e te tautala mai mo oe.” Ona faaloaloa atu lea o le lima o Paulo, ma tali atu: 2 “Le Tupu e Akeripa, ua ou matuā fiafia ona o loo ou tali atu i ou luma i lenei aso, e tusa ma mea ua molia ai aʻu e tagata Iutaia, 3 aemaise lava ua e silafia lelei tū ma aganuu a tagata Iutaia, ma mataupu e fefinauaʻi ai. O le mea lea, ou te ʻaiʻoi atu ai ina ia e faafofoga mai iā te aʻu, ma ia e lava papale mai.
ʻOu te Talosaga Atu iā Kaisara!’
10 Sa faafetai atu ma le faaaloalo Paulo i le tupu o Akeripa mo le avanoa e puipuia ai o ia, ma ia faailoa atu e faapea ua masani le tupu i aganuu uma, atoa ma vevesi e tutupu mai i tagata Iutaia. Ona faamatala atu lea e Paulo lona olaga: “Sa avea aʻu o se Faresaio, o le lotu e sili ona faigatā.” (Galu. 26:5) I le avea o se Faresaio, na faamoemoe Paulo i le afio mai o le Mesia. Peitaʻi, i le avea nei o se Kerisiano, ua ia faamaonia atoatoa ai, o Iesu Keriso o ia lea ua leva ona faatalitali i ai. O se talitonuga e masani ai o ia atoa ma ē na molia o ia—o lona uiga, o le faamoemoe i le faataunuuina o folafolaga a le Atua i o latou augātamā—o le māfuaaga lea o le faamasinoina o Paulo i lenei aso. O nei faamatalaga, ua atili ai ona naunau Akeripa e fia faalogo atu i mea o loo fai mai ai Paulo.
11 I le toe taʻua o le sauāina ma le faileagaina o Kerisiano, na faapea mai Paulo: ʻO aʻu foʻi, na ou manatu ifo e tatau ona ou faia le tele o mea e tetee atu ai i le igoa o Iesu le Nasareta; ae ona o loʻu ita tele i ē na mulimuli iā Keriso, na ou alu atu ai ma faasauā iā i latou e oo lava i isi aai.’ (Galu. 26:9-11) E leʻi faia e Paulo ni faamatalaga pepelo. E toʻatele tagata na iloa le sauā o Paulo i Kerisiano. (Kala. 1:13, 23) Atonu na taumānatu Akeripa ʻO le ā le mea na suia ai lenei tamāloa?’
12 Na maua le tali i le faamatalaga a Paulo e sosoo ai: “A o oʻu faia nei mea, na ou malaga atu ai i Tamaseko ma le pule ma le feʻau mai i le ʻaufaitaulaga sili, ae le tupu e, o le tutonu o le lā, na ou iloa ai i le auala le susulu mai o le malamalama mai i le lagi, ua sili atu i le pupula o le lā, ma faataaliʻoliʻo iā te aʻu ma i latou na matou malaga faatasi. Ina ua matou paʻuʻū i le eleele, ona ou faalogoina lea o se leo ua faapea mai iā te aʻu i le gagana Eperu, ʻSaulo, Saulo e, aiseā ua e faasauā mai ai iā te aʻu? O le mea e faigatā iā te oe ona e aa i tui.’ Ona ou fai atu lea, ʻLe Alii e, o ai ea oe?’ A ua fetalai mai le Alii, ʻO aʻu o Iesu, o lē ua e faasauā i ai.’”—Galu. 26:12-15.
13 A o leʻi tupu lenei vaaiga faavavega, sa “aa i tui ai” faafaatusa Paulo. E pei lava ona faamanuʻalia se manu pe a ia aaina se uʻamea maʻai, sa faapea foʻi ona faamanuʻalia faaleagaga Paulo e ala i lona teena o le finagalo o le Atua. I le faaali atu iā Paulo i le auala i Tamaseko, na taʻu atu ai e Iesu o lē ua toe faatūina, i lenei tamāloa ia suia lona mafaufau.—Ioa. 16:1, 2.
14 Ioe, na faia e Paulo le tele o suiga i lona olaga. Na ia faamatala atu iā Akeripa e faapea: “Na ou usiusitaʻi i le faaaliga mai i le lagi, ma na ou muaʻi talaʻi i tagata i Tamaseko, ma ē o i Ierusalema, ma le atunuu atoa o Iutaia, ma tagata o nuu ese, ma taʻu atu le feʻau e faapea, e tatau ona latou salamō ma liliu atu i le Atua, i le faia lea o galuega ua tatau mo le salamō.” (Galu. 26:19, 20) I le tele o tausaga, na faataunuu ai e Paulo le poloaʻiga a Iesu Keriso na avatu iā te ia i le faaaliga i le aoauli o lenā aso. O le ā le iʻuga? O ē na faalogo i le tala lelei na talaʻi atu e Paulo, na faaalia le salamō i a latou amioga lē mamā ma le lē faamaoni, ma liliu atu i le Atua. Na avea na ituaiga o tagata o ni tagatānuu lelei, i le tausia ma le faaaloalo i tulafono.
15 Ae peitaʻi, o na aogā na leai se uiga i tagata Iutaia na tetee iā Paulo. Na faapea mai Paulo: “Ona o nei mea, na puʻe ai aʻu e tagata Iutaia i le malumalu, ma taumafai e fasioti iā te aʻu. Ae ona ua ou maua le fesoasoani mai i le Atua, ua faaauau ai ona ou molimau atu i lenei aso i tagata lautele ma tagata aloaʻia.”—Galu. 26:21, 22.
16 I le avea ai ma Kerisiano moni, e tatau ona tatou ʻnofosauni e tali atu’ e tusa ma lo tatou faatuatua. (1 Pete. 3:15) Pe a talanoa atu i faamasino ma pule e uiga i o tatou talitonuga, e fesoasoani iā i tatou le faataʻitaʻi i le auala na faaaogā e Paulo, ina ua tautala atu iā Akeripa ma Feso. E ala i le faailoa atu ma le faaaloalo iā i latou le auala na faaleleia ai e le upu moni o le Tusi Paia o tatou olaga, atoa ma i latou e tali lelei mai i la tatou feʻau—atonu o le a suia ai loto o faamasino ma ē pule.
(Galuega 26:28) A ua faapea mai Akeripa iā Paulo: “Ua e manatu o se taimi puupuu e mafai ona e faaliliuina ai aʻu e avea ma Kerisiano.”
ʻOu te Talosaga Atu iā Kaisara!’
18 Peitaʻi, na tali atu Paulo i le kovana: “Ou te lē valea, ae ua ou tautala i le upu moni ma le mafaufau lelei. O le mea moni, ua silafia lelei nei mea e le tupu, o lē o loo oʻu saʻoloto e tautala atu i ai; . . . Le Tupu e, Akeripa, pe e te talitonu i le ʻau Perofeta? Ua ou iloa e te talitonu i ai.” Na tali mai Akeripa e faapea: “Ua e manatu o se taimi puupuu e mafai ona e faaliliuina ai aʻu e avea ma Kerisiano.” (Galu. 26:25-28) O nei upu e tusa pe moni pe leai, ae ua faaalia ai, o le molimau atu a Paulo na iai ni aafiaga i le tupu.
Saʻiliʻiliga Loloto mo ʻOa Faaleagaga
(Galuega 26:14) Ina ua matou paʻuʻū i le eleele, ona ou faalogoina lea o se leo ua faapea mai iā te aʻu i le gagana Eperu, ʻSaulo, Saulo e, aiseā ua e faasauā mai ai iā te aʻu? O le mea e faigatā iā te oe ona e aa i tui.’
nwtsty faamatalaga mo suʻesuʻega o le Ga 26:14
aa i tui: O se tui, o se laau e maʻai le mata na faaaogā e faatonutonu ai se manu. (Fam 3:31) O le faaupuga “aa i tui” o se muagagana na maua i tusitusiga Eleni. O lenā faaupuga e faavae mai i le gaoioiga e faia e se povi pulu e matuā faalogogatā, pe a faatonutonu e tetee atu e ala i le aa o le tui, ma e iʻu ai ina faamanuʻalia. I se tulaga talitutusa, na gaoioi faapena Saulo a o leʻi avea ma Kerisiano. O lona faasagatau atu i soo o Keriso lea na mauaina le lagolagosua a Ieova, na ono iʻu ai ina faatigā iā te ia lava. (Faatusatusa i le Ga 5:38, 39; 1Ti 1:13, 14.) I le Fai 12:11 o loo taʻua ai le “tui” i se tulaga faafaatusa e faasino atu i upu a se tagata atamai, lea e uunaʻia ai se tagata faalogologo e usitaʻi i na fautuaga.
nwt uiga o upu
Tui. O se laau umī e iai se uʻamea maʻai i le mata, e faaaogā e se faifaatoʻaga e faatonutonu ai se manu. Ua faatusaina le tui i upu a se tagata atamai, lea e uunaʻia ai se tagata faalogologo e usitaʻi i na fautuaga. O le “aa i tui” e sau mai i le gaoioiga a se povi pulu e matuā faalogogatā, pe a faatonutonu e tetee atu e ala i le aa o le tui, ma e iʻu ai ina faamanuʻalia.—Ga 26:14; Fam 3:31.
(Galuega 26:27) Le Tupu e, Akeripa, pe e te talitonu i le ʻau Perofeta? Ua ou iloa e te talitonu i ai.”
Fesoasoani i Isi Ina ia Talia le Feʻau o le Malo
14 Na silafia e Paulo e faapea o Akeripa ua na o se Iutaia i le taʻu. I lona iloaina o loo iai se malamalamaaga o Akeripa i le lotu faa-Iutaia, na faapea mai Paulo e tusa ma lana talaʻiga, ua ia “lē fai atu se tasi mea, na o ia mea ua taʻu mai e le ʻau perofeta ma Mose o le a taunuu,” e faatatau i le maliu ma le toetū o le Mesia. (Galuega 26:22, 23) I le talanoa tuusaʻo atu iā Akeripa, na fesili atu Paulo e faapea: “Le tupu e Akeripa, ua e talitonu ea i le ʻau perofeta?” Na faigatā ona tali atu Akeripa. Afai o le a ia fai atu na te teena le ʻau perofeta, o le a faaleagaina lona talaaga o se tagata talitonu Iutaia. Ae pe afai e lolo atu i le faamatalaga a Paulo, ona ioe atu lea iā Paulo i luma o le lautele, ona manatu ai lea o tagata e faapea o ia o se Kerisiano. Na toe tali ma le atamai Paulo i lana lava fesili, i le faapea atu: “Ua ou iloa lava ua e talitonu.” Na faapefea ona uunaʻia le loto o Akeripa e tali atu iā te ia? Na ia tali atu e faapea: “O se mea itiiti ona e faaliliuina [“faatalitonuina,” NW] lea o aʻu e fai ma Kerisiano.” (Galuega 26:27, 28, LT) E ui lava e leʻi avea Akeripa o se Kerisiano, ae manino mai sa iai lava se vaega o le feʻau na avatu e Paulo na pāʻia ai le loto o Akeripa.—Eperu 4:12.
Faitau Tusi Paia
(Galuega 25:1-12) Ua mavae aso e tolu talu ona taunuu o Feso i lona itumalo, ona alu aʻe lea o ia i Ierusalema mai i Kaisareia; 2 ua faailoa atu iā te ia e le ʻaufaitaulaga sili ma alii sili o Iutaia, faamatalaga e taʻusalaina ai Paulo. Ona latou ʻaiʻoi atu lea iā te ia, 3 ma faapele o ia ina ia auina atu lenei tagata e alu atu i Ierusalema, auā o loo lamalama i latou ina ia fasioti o ia i le auala. 4 A ua tali atu Feso e taofia pea Paulo i Kaisareia, ma ua toeitiiti ona ia alu atu lea i inā. 5 Ua ia faapea atu: “Ia ō ifo ni o outou tagata aloaʻia faatasi ma aʻu, ma molia o ia pe afai e iai se mea ua sala ai lenei tagata.” 6 Ua nofo o ia ma i latou pe na o le valu po o le sefulu aso, ona alu ifo lea i Kaisareia, ma ua nofo i le nofoa faamasino i le aso na sosoo ai, ma faatonu atu e aumai Paulo i ona luma. 7 Ina ua taunuu mai o ia, ona tutū faataamilo mai lea o tagata Iutaia na ō ifo mai i Ierusalema, ona latou tolaulau mai lea o le tele o moliaga matuiā ia e leʻi mafai ona latou faamaonia. 8 I lana tali atu, ua faapea atu ai Paulo: “Ou te leʻi agasala i le Tulafono a tagata Iutaia, po o le malumalu, po o Kaisara foʻi.” 9 A ua naunau Feso ina ia faafiafia tagata Iutaia, o lea ua ia tali mai ai iā Paulo: “Pe e te manaʻo e te alu aʻe i Ierusalema, e faamasinoina ai oe i oʻu luma, e faatatau i nei moliaga?” 10 A ua tali atu Paulo: “O loo ou tū nei i luma o le nofoa faamasino o Kaisara, i le mea e tatau ona faamasinoina ai aʻu. E leai se mea leaga ua ou faia i tagata Iutaia, e pei foʻi ona e silafia lelei. 11 Afai o aʻu moni o sē e fai mea sesē, ma ua ou faia se mea ua tatau i ai le oti, ou te lotomalie e oti. Ae afai e lē moni tuuaʻiga ua faia e nei tagata iā te aʻu, e lē mafai e se tasi ona tuuina atu aʻu ina ia faamalie ai i latou. Ou te tagi atu iā Kaisara!” 12 Ona talanoa atu lea o Feso i alii o le fono, ma ua faapea mai o ia: “Ona ua e tagi atu iā Kaisara; e te alu lava iā Kaisara.”
IANUARI 28–FEPUARI 3
ʻOA TAUTELE MAI I LE AFIOGA A LE ATUA | GALUEGA 27-28
“Ua Folau Atu Paulo i Roma”
(Galuega 27:23, 24) Auā o le pō nei na tū mai ai iā te aʻu se agelu a le Atua, o lē o loo oʻu tapuaʻi i ai, ma o lē ou te avatu i ai le auaunaga paia, 24 ma faapea mai, ʻPaulo e, aua e te fefe. E tatau ona e tulaʻi i luma o Kaisara, faauta, e laveaʻiina e le Atua ola o i latou uma o loo folau faatasi ma oe.’
“E lē Maʻimau se Ola o se Tasi o Outou”
15 E foliga mai na molimau atu Paulo i le toʻatele o tagata i le vaa, e uiga i le “faamoemoe i le folafolaga na faia e le Atua.” (Galu. 26:6; Kolo. 1:5) A o lenei o le a tuʻia le vaa, ma na ofo atu ai e Paulo se isi faavae malosi mo se faamoemoe mo lea taimi. Na ia faapea atu: “O le pō nei na tū mai ai iā te aʻu se agelu a le Atua . . . ma faapea mai, ʻPaulo e, aua e te fefe. E tatau ona e tulaʻi i luma o Kaisara, faauta, e laveaʻiina e le Atua ola o i latou uma o loo folau faatasi ma oe.’” Na faalaeiau i latou e Paulo: “Alii e, ia outou faamalolosi, auā ou te talitonu i le Atua, e taunuu lava mea ua faailoa mai iā te aʻu. Peitaʻi, e tatau ona lafoia i tatou i se motu.”—Galu. 27:23-26.
(Galuega 28:1, 2) Ina ua matou taunuu saogalemu, ona matou iloa ai lea o le igoa o le motu o Melita. 2 Na matuā agalelei mai iā i matou nei tagata e ese le gagana e tautatala ai, auā ua latou tafu se afi ma talileleia i matou, ona o timuga ma le mālūlū.
“E lē Maʻimau se Ola o se Tasi o Outou”
18 Ua taunuu tagata na faasaoina i le motu o Melita, i le itu i saute o Sisili. (Tagaʻi i le pusa “Melita—I Fea?” i le itulau e 209) E ese le gagana e tautatala ai tagata o le motu o ē na “matuā agalelei” atu iā i latou. (Galu. 28:2) Na latou tafu se afi mo nei tagata ese o ē na taunuu atu i lo latou motu, ua matuā galala ma tetete i latou i le maalilili. Na faamāfanafanaina i latou i le afi e ui i le mālūlū ma le timu. Na faia ai foʻi se vavega i inā.
“E lē Maʻimau se Ola o se Tasi o Outou”
21 Sa nofo ai i lenā vaipanoa le tagata mauoloa e igoa iā Popilio, o lē e ana le fanua. E mautinoa o ia o se tagata maualuga o Roma i Melita. Na faamatalaina o ia e Luka o se “alii sili i le motu,” o se tofiga patino o loo faamauina i tusitusiga i papa maa e lua faa-Melita. E tolu aso na talimālō ai o ia iā Paulo ma ana aumea. Peitaʻi, na maʻi le tamā o Popilio. O lea, na toe faamatala ai foʻi ma le saʻo e Luka lea tulaga. Na tusi o ia, na “faataotolia le tamā o Popilio, ona ua maʻi tigāina i le fiva ma le sanatoto,” ma taʻua ai le igoa saʻo faafomaʻi o le maʻi. Na tatalo Paulo ma faaee atu ona lima iā te ia ma na mālōlō ai. I le matuā fiafia i lenei vavega, na aumai ai e tagata o le nuu nisi tagata ina ia faamālōlōina, ma na latou aumaia foʻi meaalofa e tausia ai Paulo ma ana aumea.—Galu. 28:7-10.
(Galuega 28:16, 17) Ina ua matou taunuu i Roma, ona faataga lea o Paulo e nofo na o ia, e leoleoina e se fitafita. 17 Ae ina ua mavae aso e tolu, ona ia talosagaina lea o alii sili o Iutaia ina ia faapotopoto ane. Ina ua latou ō ane, ona ia fai atu lea iā i latou: “Alii e, ma uso e, e ui lava ou te leʻi faia se mea sesē i tagata pe solia aganuu a o tatou augātamā, ae na auina atu aʻu o se pagota mai i Ierusalema i lima o tagata Roma.
ʻAvatu se Molimau Māeʻaeʻa’
10 Ina ua taunuu se vaega o le ʻaumalaga i Roma, “ona faataga lea o Paulo e nofo na o ia, e leoleoina e se fitafita.” (Galu. 28:16) A o i latou e māmā faasalaga, e masani ona saisai faatasi ma o latou leoleo i se filifili ina neʻi sosola. E ui lava o Paulo o sē e folafola le Malo, ae e leʻi mafai e se filifili ona taofia ai lona molimau atu. O lea, ina ua uma ona tuuina atu iā te ia aso e tolu e mālōlō ai ina ia toe malosi mai i le malaga, ona ia faapotopoto lea o alii sili o Iutaia o loo i Roma, ina ia faailoa atu i ai o ia ma avatu se molimau.
Saʻiliʻiliga Loloto mo ʻOa Faaleagaga
(Galuega 27:9) Ua mavae le tele o aso, ma ua faigatā foʻi ona folau i luga o le vasa, auā ua mavae foʻi le anapogi i le aso o le togisala, ona fautua atu lea o Paulo,
nwtsty faamatalaga mo suʻesuʻega o le Ga 27:9
le anapogi i le aso o le togisala: Po o le “anapogi i le tau e afu ai mea.” Pe e faaliliuina i le upu i le upu, “le anapogi.” O le upu Eleni mo “le anapogi” e faasino atu na o le anapogi na faatonuina i le Tulafono a Mose. O le anapogi lenā e fesootaʻi atu i le Aso o le Togisala i tausaga taʻitasi, e taʻua foʻi o le Yom Kippur (faa-Eperu, yohm hak·kip·pu·rimʹ, “aso o le ufiufi [o agasala]”). (Le 16:29-31; 23:26-32; Nu 29:7.) O le faaupuga “faapuapuagatia o se tasi” lea e faaaogā e fesootaʻi atu i le Aso o le Togisala, e masani ona manatu i ai e faasino atu i ni faasāsāaga e faia e se tasi iā te ia lava, e aofia ai le anapogi. (Le 16:29, fpl.) O le faaaogāina o “le anapogi” i le Ga 27:9 e lagolago ai le manatu, o le anapogi o le faasāsāaga autū lea e faia e se tasi iā te ia lava i le Aso o le Togisala. E paʻū le Aso o le Togisala a lē o le faaiʻuga o Setema po o le amataga o Oketopa.
(Galuega 28:11) Ua mavae atu masina e tolu, ona matou folau atu lea i se vaa mai i Alesania, lea sa taula i le motu i le tau mālūlū, o loo iai le faailoga o “Atalii o Seu.”
nwtsty faamatalaga mo suʻesuʻega o le Ga 28:11
Atalii o Seu: E tusa ai ma talatuu a Eleni ma Roma, o “Atalii o Seu” (faa-Eleni Di·oʹskou·roi) o Castor ma Pollux, o atalii masaga ia o le atua o Seu (Jupiter) ma le Masiofo o Spartan o Leda. Na manatu tagata e mafai ona la faia isi mea e aofia ai le puipuia ma faasao tagata folau mai i tulaga e lamatia ai i le vasa. O lenei faamatalaga e faatatau i le faailoga i luma o le vaa, o se tasi lea o faamaoniga e iloa ai o lenei tala na tusia e se tasi na vaaitino i ai.
Faitau Tusi Paia
(Galuega 27:1-12) Ina ua maua le tonu o le a matou folau atu i Italia, ona latou tuuina atu lea o Paulo, ma nisi o pagota i se taʻitaʻiʻau o le vaega a Aokuso e igoa iā Iulio. 2 Ua matou feosofi i se vaa mai i Atamutiu, lea o le a folau atu i nuu tū matafaga o le itumalo o Asia, ma ua matou folau atu ai faatasi ma Aritako, o se tagata Maketonia mai i Tesalonia. 3 I le isi aso, ua matou taunuu atu ai i Saitonu, ma ua agalelei tele Iulio iā Paulo, ua tuu atu o ia e alu i ana uō ma fiafia ai i la latou tausiga. 4 Ua matou tuuvaa ese atu ma folau atu i gatai ane o Kuperu, auā ua ese le itu ua agi mai ai le matagi; 5 ma ua matou folau atu i le vasa e lata i Kilikia ma Pafulia, ona matou taula ai lea i le taulaga i Mura i Lukia. 6 O i inā ua maua ai e le taʻitaʻiʻau se vaa mai i Alesania e folau atu i Italia, ona ia faaee lea o i matou i lea vaa. 7 E tele aso ua mavae ona o le telegese o la matou folauga, na faigatā ai ona matou taunuu i Nitoi. Ae ona o le matagi, ua matou folau ai i gatai ane o Kereta i Salamone, 8 ma e ui ina faigatā, ae ua matou folau atu i gatai ane o le talafatai, ma matou taunuu ai i le taulaga e taʻua o le Ava Matagofie, lea e lata ane i le aai o Lasea. 9 Ua mavae le tele o aso, ma ua faigatā foʻi ona folau i luga o le vasa, auā ua mavae foʻi le anapogi i le aso o le togisala, ona fautua atu lea o Paulo, 10 ua faapea atu iā i latou: “Alii e, ua ou manatu e tele ni mea e faaleagaina ma e tele foʻi mea e maʻimau i lenei folauga, e lē gata i le uta ma le vaa, ae faapea foʻi ma o tatou ola.” 11 Ae ua faalogo le taʻitaʻiʻau i le kapeteni ma lē e ona le vaa, ae e leʻi faalogo i mea na fai atu ai Paulo. 12 Talu ai ua lē lelei lenei taulaga e taula ai le vaa i le tau mālūlū, ona manatu ai lea o le toʻatele e folau ese atu, ma taumafai e oo atu i Foinike ma nonofo ai i le tau mālūlū, o se taulaga i Kereta e feagai ma le itu i mātū i sasaʻe, e feagai foʻi ma le itu i saute i sasaʻe.