Ia Mamā i le Mafaufau ma le Tino

“Ia outou tuuina atu o outou tino i le Atua, o le taulaga ola, ma le paia, ma le mālie.”—ROMA 12:1.

1. Ai se ā e manaomia ai le mamā i le tino ma le mafaufau, e tusa ai ma le faamatalaga a le aposetolo o Paulo?

O SE tagata o lē faanaunau ia auauna i le Atua paia o Ieova e tatau ona mamā faaleagaga ma tau amio. O le mea moni, e faatatau foi lenei i le mamā i le mafaufau ma le tino. O lenei faiga o mea e pei ona i ai, o tagata ua ōese mai ai ina ia mafai ona auauna ia Ieova e tatau ona faia ni suiga e lē gata i uiga o o latou mafaufau a e masani lava i o latou uiga totino foi. Na tusi le aposetolo o Paulo i Kerisiano i Roma: “O lenei, le au uso e, ou te aioi atu ia te outou, ona o le alofa mutimuti vale o le Atua, ia outou tuuina atu o outou tino i le Atua, o le taulaga ola, ma le paia, ma le mālie, o le mea lea e tatau ai ona outou faia. Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.” (Roma 12:1, 2) O le ā ua aofia ai i le mamā o le mafaufau ma le tino?

Mamā i le Mafaufau

2. E mafai faapefea e o tatou mata ma loto ona faapogaia ai i tatou e auai i le faia o amioga faamatāitu, ma o le ā e manaomia ina ia alofia ai lenei mea?

² E oo lava i le taimi a o leʻi tuuina atu le Tulafono, na faaalia ai e Iopu faatuatua faapea o o tatou mata ma o tatou loto e mafai ona faapogaia ai i tatou e faia le faamataitu pe afai tatou te lē pulea i latou. Na ia taʻua: “Ua ou osia le feagaiga ma oʻu mata, se a foi le mea ou te manatu ai i se taupou? Afai ua olegia loʻu loto i se fafine, . . . o le agasala tele lea, o le pagota foi lea e faasalaina e faamasino.” (Iopu 31:1, 9-11) Afai e tilotilo solo ma le manaonao o tatou mata i faiga faaleituaiga ma o tatou loto taufaasee, e manaomia la ona aʻoaʻiina o tatou mafaufau, “le aʻoaʻiga e aumaia ai le malamalama.”—Faataoto 1:3, NW.

3, 4. (a) O le ā ua faaalia i le faaaʻoaʻoga a Tavita ma Patesepa, ma o le ā e manaomia ina ia suia ai masani leaga i mafaufauga? (e) Ai se ā e ao faapitoa ai i toeaina Kerisiano ona faaeteete?

³ O mata o le tupu o Tavita na taʻitaʻiina atu ai o ia i le faia o le mulilua ma Patesepa. (2 Samuelu 11:2, 4) Ua faaalia i lenei faaaʻoaʻoga faapea e oo lava i tane o ē ua faaaogāina i se tulaga lauiloa e Ieova e mafai ona paʻū atu i le agasala pe afai latou te lē aʻoaʻiina o latou mafaufau. Atonu e alu ai se taumafaiga tiga e suia uiga masani o o tatou mafaufau. O lena taumafaiga e tatau ona ō faatasi ma le tatalo faatauanau mo le fesoasoani a Ieova. Ina ua uma ona salamō mai lana agasala ma Patesepa, na tatalo Tavita: “Le Atua e, ia e faia se loto mamā mo aʻu; ma ia e faafouina se loto mau i totonu ia te au.”—Salamo 51:10.

⁴ E ao faapitoa lava i toeaina Kerisiano ona faaeteete ina ia aua neʻi teu faaliloliloina ni faanaunauga sese na e mafai ona taʻitaʻiina atu ai i latou i se agasala matuiā. (Iakopo 1:14, 15) Na tusi atu Paulo i le toeaina Kerisiano o Timoteo: “O le mafuaaga o lenei tulafono o le alofa ai i le loto mamā ma le lotofuatiaifo lelei ma le faatuatua lē faatagāfai.” (1 Timoteo 1:5, NW) O le a o se mea matuā faatagāfai mo se toeaina le faia o ona tiute fai faaleagaga a o faatagaina ona mata e tilotilo solo ma le manaonao i faiga faaleituaiga ia faatupu ai i lona loto manatu o le faia o amioga lē mamā.

5. O le ā e tatau ona alofia ina ia tausisia ai le mamā o le mafaufau?

⁵ O i tatou uma lava i le avea o ni Kerisiano e tatau ona tatou faia le mea aupito sili ina ia mamā o tatou mafaufau. O le uiga o lenei mea ia aloese mai so o se tifaga, polokalama o TV, po o le faitau o tusi e mafai ona aumaia ai ni taaʻiga iʻuvale i o tatou mafaufauga. O le soifua maloloina faalemafaufau e aofia ai le taumafaiga malamalama ina ia mafaufau lelei i mea “ua moni, . . . ua tonu, . . . ua mamā.” Ua faaopoopo mai le aposetolo o Paulo: “Afai foi o se isi amio lelei, po o se tasi mea e viia, ia outou manatunatu i ia lava mea.”—Filipi 4:8.

Tulaga Mamā o le Tino

6. (a) Aumai ni faaaʻoaʻoga mai le tusi o Levitiko e faaalia ai faapea sa manaomia le soifua maloloina lelei i tagata taitoatasi po o le avea foi o se nuu ia Isaraelu. (e) O le ā le fuafuaga o na tulafono?

⁶ Ua faapea mai o le “mamā e pito atu i le amioatua.” E moni, o se tagata e amio mamā ma mamā faaletino atonu e lē faaleatua. Peitai o se tagata faaleatua e tatau ona amio mamā ma ia mamā i le faaletino, e tatau ai. Na avatu e le Tulafono faa-Mose faatonuga maʻoti i le faamamāina o fale ua pisia i ni mea palapalā ma le faataeleina totino o tagata i auala eseese o tulaga lē mamā. (Tagai i le Levitiko, mataupu e 14 ma le 15.) Sa manaomia mai tagata Isaraelu uma ona faamaonia i latou e paia. (Levitiko 19:2) Ua taʻua e le lomiga Insight on the Scriptures e faapea: “O tulafono tau i mea taumafa, i faamaʻi pipisi ma tau amio na avatu e le Atua i [tagata Isaraelu,] sa o ni faamanatuga maumauaʻi ia ia i latou e faatatau i lo latou vavaeese ma le faapaiaina i le Atua.”—Tusi 1, itulau 1128.

7. O le ā ua moni mo Molimau a Ieova i le avea o se nuu, a e o le ā ua lipotia mai e nisi ovasia faimalaga?

⁷ A o avea Molimau a Ieova o se nuu e mamā mai so o se mea e faaleagaina ai a lotu sese a Papelonia ma e lē talia amioga lē mamā i lo latou lotolotoi, a ua faaalia i lipoti a ni ovasia faimalaga faapea o nisi tagata taitoatasi ua latou faagalogalo i lo latou soifua maloloina totino ma le tumamā. E mafai faapefea ona tatou mautinoa ua tatou mamā foi i lenei itu? O se faaaʻoaʻo lelei mo aiga Kerisiano uma o Peteli, lea o le uiga o lona igoa o le “Fale o le Atua.”

8, 9. (a) O le ā le fautuaga ua tuuina atu i tagata fou uma o le aiga Peteli? (e) O ā mataupu silisili o mulimuli ai i Aiga Peteli e tatau ona pulea ai auaiga Kerisiano uma?

⁸ Pe a avea se tasi o se tagata o le aiga Peteli i le ofisa autū o le Sosaiete o le Olo Matamata po o so o se tasi o ona lala i le lalolagi atoa, e tuuina atu ia te ia se polosiua ua sauniunia e le Vaega Pule. O lenei lomiga ua faamatala atu ai mea ua faatalitalia mai ia te ia e tusa ai o uiga i lana masani i galuega ma lana masani totino. I lalo o le ulutala “Tausia o Potu ma le Tulaga Mamā,” o loo taʻua ai: “O le olaga faa-Peteli e manaomia ai le tausisia o ausiaga maualuluga faaletino, tau amio ma faaleagaga. O tagata uma i Peteli e tatau ona manatu mamafa i le tausia o ia lava ma lona potu ia mamā. E saosaolaumea lenei mea i le soifua maloloina lelei. E leai se pogai mo so o se tasi e tueleelea ai. O se faiga lelei le taele i aso taitasi. . . . O le fafano a o leʻi faia taumafataga e matuā manaomia ma e faatalitalia mo tagata uma lava. I le magafagafa i lē o loo lua potu faatasi ma le tagata teufale, e tatau ai ona fufulu mamā le tapu fulu mata po o le tapu taele pe a uma faaaogāina taitasi.”

⁹ I Aiga Peteli, o faleese e matuā tausia le tulaga mamā, ma ua faia sauniuniga ina ia mafai ai e i latou o faaaogāina ia fale ona fafano loa o latou lima. O tagata uma i le aiga o loo faatalitalia ina ia tuua le faleese i se tulaga mamā pe a uma ona faaaogā, o lona uiga ia siaki ina ia iloa ua faaalu lelei le faleese. E faaalia i lenei mea le magafagafa mo le tasi tagata o lē o le a sosoo atu e faaaogā po o le tagata teufale. Pe e lē tatau ea i na mataupu silisili lelei ma alofa ona pulea ai aiga Kerisiano taitasi uma?

10. (a) Ai se ā e lē seiloga ai se faletaele matagofie, ona tausia ai lea o le mamā o se tasi ma lana fanau? (e) O ā tulafono i Isaraelu sa taʻitaʻiina atu ai i le soifua maloloina lelei, ma o le ā le lesona e mafai e tagata o Ieova i aso nei ona aʻoaʻo mai ai i lenei mea?

¹⁰ O le mea moni, e eseese tulaga mai lea atunuu i lea atunuu. I nisi nofoaga, e leai ni tapu taele e oo lava i se fale taele, mo le aiga. E ui i lea, i le tulaga lautele e masani ai, o tane ma fafine Kerisiano e mafai ona latou iloa o loo lava fasimoli ma le vai ina ia tausia ai le mamā o latou tino ma faamautinoa ai ua mamā a latou fanau.a E tele lava aiga i le lalolagi atoa e lē o i ai se fesootaiga ma le faiga lea e faaaluese ai le otaota o faleese. Peitai o otaota e mafai ona lafoai i se tulaga malu puipui i le tanuina, e pei ona manaomia ai i tagata Isaraelu e oo lava i togalauapi o vaegaau. (Teuteronome 23:12, 13) E ese ai mai lenei mea, o tulafono a Ieova e pulea ai olaga i togalaupai e manomia ai ona tatā e lē aunoa lavalava ma ia taeele, ia vave ona suesueina ma togafitia faama’i, le taulimaina ma le saʻo o tino oti, ma le tausia o le mamā o vai ma meaʻai. O nei tulafono uma sa saosaolaumea i le soifua maloloina o le nuu. Pe e tatau la i tagata o Ieova i aso nei ona manatu māmā i le tumamā i a latou lava masani totino?—Roma 15:4.

Fale ma Taavale Teuina Lelei

11. (a) O le ā e tatau ona moni e oo lava i se fale faatauvaa o se aiga Kerisiano? (e) O le ā le felagolagomai e manaomia mai tagata uma o le aiga Peteli?

¹¹ O o tatou fale, e ui lava ina faatauvaa, a e mafai ona maopoopo ma mamā, peitai e manaomia ai i lenei mea le faamaopoopoina lelei i le tulaga o le aiga. O le a manao se tinā Kerisiano e faaalu le tele o lona taimi e mafai ai i mea faaleagaga, e aofia ai le galuega talaʻi, o lea o le a lē tatau ai ona faaalu ona taimi i aso taitasi i le faamamāina o mea pe a ōese atu tagata o le aiga a e taatitia solo lavalava, tusi, pepa, mekasini, ma isi mea faapena. I Peteli, e ui lava e i ai tagata teufale o ē faia le faamamāina, a e ua faatalitalia tagata taitoatasi o le aiga e teu lona moega ma tuu ai lona potu i se tulaga mamā i le taeao. E talisapaia e i tatou uma le matagofie ma le mamā o o tatou Maota o le Malo ma Maota Fono. Tau ina ia avea foi la o tatou fale o ni molimau faapea o i tatou o se vaega o tagata mamā ma le paia o Ieova!

12, 13. (a) O le ā le fautuaga ua aumaia e faatatau i taavale e faaaogā i le auaunaga ia Ieova, ma ai se ā e lē manaomia ona tele naʻuā se taimi e faaaluina ai i lenei mea? (e) O le ā le mafuaaga faaleagaga o i ai i inā mo le tausia pea o le mamā faaletino ma le i ai o fale ma taavale ua faamamāina lelei?

¹² O le toatele o auauna a Ieova i aso nei ua faaaogā taavale mo le femalagaai i sauniga ma le auaunaga i le fanua. I nisi atunuu ua avea ai le taavale o se mea faigaluega uigā ma le aogā mo le auaunaga ia Ieova. A o faia faapea, e tatau ona tausia le matagofie ma le mamā, e pei lava o o tatou fale. E moni, e lē mafai e Kerisiano ona faaalu se taimi tele e soona teuteu papanu ai a latou taavale e pei ona faia e nisi tagata o le lalolagi. Peitai e aunoa ma le oo atu i lena soona papanu, e tatau i auauna a Ieova ona taumafai e tausia ia mamā ma ia i ai i se tulaga o sologa lelei a latou taavale. I nisi atunuu, o le fufulu o se taavale i mea e i ai pamu penisini e lē taugata tele pe tele foi se taimi e alu ai. A o totonu o le taavale, e na o le sefulu lava minute e faamamā ai ma teuteu faalelei a e o le a sili ona matagofie. A e maise lava e tatau i toeaina ma auauna o le faiva ona taumafai e fai ma faaaʻoaʻo i lenei itu, talu ai e masani lava ona latou faaaogāina a latou taavale e felauai ai vaega o le au talaʻi i le auaunaga i le fanua. Pe afai e alu atu se tagata talaʻi e aumai se tagata loto naunau i le sauniga, o le mea moni lava e lē o se molimau lelei pe afai o loo eleelea ma lē mamā le taavale.

¹³ O lea, e ala ia tatou taumafaiga ina ia mamā faaletino ma ia mamā ma teuina lelei o tatou fale ma taavale, ua tatou āva ai ia Ieova e avea o ni tagata o lana faalapotopotoga mamā.

Tulaga Mamā pe a Ofoina atu Taulaga Faaleagaga

14. O ā tulafono na pulea ai le mamā o faamanatuga i Isaraelu, ma o le ā ua faaalia ai i nei tulafono?

¹⁴ I lalo o le faasalaga oti, sa manaomia ai le mamā i faamanatuga a Isaraelu i le fesootai atu lea ma le tapuaiga. Na fetalai atu Ieova ia Mose ma Arona: “Ia faapea ona oulua faateʻaeseina le fanauga a Isaraelu i mea e leaga ai i latou; ina neʻi oti i latou i o latou leaga, pe a leaga ia te i latou loʻu malumalu ua ia te i latou.” (Levitiko 15:31) I le Aso o le Togiola, sa tatau ona taele faalua le tino o le ositaulaga sili i le vai. (Levitiko 16:4, 23, 24) O le tanoa apamemea i le fale fetafai, ma mulimuli ane o le tanoa apamemea tele i le malumalu, na saunia ai vai mo ositaulaga e fafano ai a o leʻi ofoina atu taulaga ia Ieova. (Esoto 30:17-21; 2 Nofoaiga a Tupu 4:6) A e faapefea Isaraelu lautele? Afai latou te ōmai ma le lē mamā i le faamanatuga ona o so o se mafuaaga, sa taofia i latou mai le faia o se vaega i le tapuaiga seia latou faataunuuina mea manaomia mo le faamamāina. (Numera 19:11-22) O nei mea uma na faamamafaina ai faapea o le mamā faaletino e manaomia mai ia i latou o ē tapuai atu i le Atua paia o Ieova.

15. Ai se ā ua lē toe manaomia ai taulaga e faia i manu, a e o ā fesili ua lagā?

¹⁵ E moni, e lē o manaomia mai tagata o Ieova i aso nei ona ofoina atu taulaga i manu i se malumalu faalelalolagi. O taulaga e i lalo o le Tulafono ua suia i “le taulaga i le tino o Iesu Keriso na fai faatasi.” (Eperu 10:8-10) Ua tatou “tapuai i le Tamā i le agaga ma le [upu moni, NW].” (Ioane 4:23, 24) Peitai pe o le uiga o lenei mea faapea ua leai ni a tatou taulaga e toe ofoina atu i lo tatou Atua paia o Ieova? Ma pe ua faaitiitia ea mo i tatou le manaomia o le tulaga mamā na i lo o le mea sa i ai ia Isaraelu?

16. Ua faapefea ona faataunuuina le valoaga a le Malaki 3:3, 4 i Kerisiano faauuina talu mai le 1918, ma o ā taulaga e malie ua mafai ona latou ofoina atu ia Ieova?

¹⁶ Ua faaalia i le valoaga a Malaki faapea o Kerisiano faauuina i luga o le lalolagi i le taimi o le iʻuga o le a faamamāina, po o le lē faafilogia, mo le auaunaga i le malumalu. Ua faaalia i tala faasolopito faapea na amata lenei faamamāina i le 1918. Talu mai le 1919, na avea ai le vaega totoe faauuina “ia Ieova o tagata e avatu taulaga e fai i le amiotonu,” ona “malie ai lea ia Ieova” o a latou taulaga o loo ofoina atu. (Malaki 3:3, 4, NW) I lea, ua mafai ai ona latou “avatu taulaga faaleagaga e mālie i le Atua ona o Iesu Keriso.” (1 Peteru 2:5) Na tusi le aposetolo o Paulo: “O ia tatou te avatu soo ai le taulaga o le viiga i le Atua, o le fua lea o tatou laugutu, [i le taʻutaʻu atu i le lautele, NW] lona suafa.”—Eperu 13:15.

17. E ui lava o le “motu o tagata e toatele” e lē o se vaega o le tofi faaositaulaga mamalu, a e ai se ā e tatau ai ona latou mamā i le faaletino, faalemafaufau, tau amio ma le faaleagaga?

¹⁷ A o lē valaauina le “motu o tagata e toatele” i le auaunaga faaositaulaga i le malumalu e pei o le vaega totoe faauuina, a e o loo latou “avatu ia [Ieova] le auaunaga paia i le ao ma le po” i le lotoa faalelalolagi o lona malumalu faaleagaga. (Faaaliga 7:9, 10, 15, NW) O le a manatua pea, o tagata Isaraelu e lē o ni ositaulaga sa tatau ona mamā i faamanatuga e auai atu ai i le tapuaiga i le fale fetafai po o i le malumalu mulimuli ane ai. E faapena foi i le motu o tagata e toatele o isi mamoe, le tatau ona mamā faaletino, i le mafaufau, tau amio, ma le faaleagaga pe afai latou te mananao e auauna i le malumalu ma auai ma le vaega totoe i le ʻofoina atu o le taulaga o viiga i le Atua’ e ala i le “[taʻutaʻu atu i le lautele, NW] lona suafa.”

Ia Mamā ma Teuteu Lelei mo le Auaunaga i le Fanua ma Sauniga

18. A o auai i le galuega lautele o le molimau atu ma le auai i sauniga, o le ā e ao ona tatou manatu mamafa i ai faatatau i le mamā totino, o lavalava, ma seevae?

¹⁸ O le ā le uiga o lenei mea i ni tulaga aogā? O lona uiga o se mea e matuā lē fetaui ma lē faaaloalo ia Ieova le fai ma ona sui i le faiva i le fale i le fale, i ala tetele, pe i se aiga o se tasi pe afai tatou te lē mamā faaletino ma lē talafeagai o tatou laei. O lea la, e lē tatau ai ona tatou faatalalē i na mea. E tatau ona tatou uai atu i ai ma le faaeteete, ina ia tatou gaoioi i se uiga e fetaui mo faifeau o loo tauaveina le suafa o Ieova. E lē manaomia ona taugata o tatou laei, a e tatau ona mamā, matagofie i le vaai, ma ia onomea. E tatau foi ona faafou lelei o tatou seevae ma ia foliga lelei atu. E faapena foi i sauniga uma lava, e aofia ai ma le Suesuega Tau Tusi a le Faapotopotoga, e tatau ona mamā o tatou tino, ma e tatau ona tatou teuteu lelei ma ia laei talafeagai.

19. O ā aogā faaleagaga e iʻu i ai ona o o tatou foliga mamā ma le teuteu faalelei i le avea o ni faifeau Kerisiano?

¹⁹ O lo tatou foliga atu e mamā ma teuteu lelei a o auai i le galuega o le molimau atu ma i a tatou sauniga, o le tasi lea o auala e “viia ai . . . le mataupu a le Atua lo tatou Faaola.” (Tito 2:10) O lenei mea o se molimau ia te ia lava. E toatele tagata e maofa i lo tatou mamā ma le teuteu lelei, ma ua uunaia ai i latou e lenei mea e faalogologo i la tatou feau e faatatau i fuafuaga ofoofogia a Ieova mo se lagi fou amiotonu ma se lalolagi fou ua faamamāina.—2 Peteru 3:13.

20. O ā fua lelei atili e maua mai i lo tatou mamā i le mafaufau ma le tino?

²⁰ A o tau lata mai le faiga fou mamā a Ieova, e manaomia e i tatou uma ona iloiloina i tatou lava ia iloa ai po o manaomia ona tatou faia ni fetuutuunaiga i o tatou mafaufauga, po o i a tatou masani totino. Na tusi Paulo: “O upu a tagata ou te fai atu ai nei, ona o le vaivai o outou tino; auā faapei ona outou tuuina atu o outou tino e fai ma auauna a le amio leaga ma le ulavale, e ulavale ai; ia faapea foi ona tuuina atu nei o outou tino e fai ma auauna a le amiotonu, e iu i le faapaiaina.” (Roma 6:19) O le mamā faaleagaga ma le faaletino e aumaia ai fua lelei e oo lava i le taimi nei, o “fua e oo ai i le faapaiaina o lona uiga foi o le ola e faavavau.” (Roma 6:22) O le mea lea, seʻi o tatou mamā ai ia i le mafaufau ma le tino a o tatou ‘avatu o tatou tino o le taulaga ola, e paia, ma e mālie i le Atua.’—Roma 12:1.

[Faaopoopoga i lalo]

Manatu ia Manatua

◻ E mafai faapefea e o tatou mata ma loto ona faapogaia i tatou ia auai i amioga faamatāitu?

◻ O ā aogā na maua e tagata Isaraelu ina ua latou usitai i tulafono a Ieova faatatau i le tulaga mamā o se nuu po o tagata taitoatasi?

◻ O ā mataupu silisili ua mulimuli ai Aiga Peteli e tatau ona pulea ai auaiga Kerisiano uma?

◻ O afea e faapitoa ai ona tatau ona tatou faaeteete e uiga i o tatou foliga atu?

◻ O ā pogai faaleagaga ua i auauna a Ieova e tausia ai o latou fale ma taavale ia mamā ma teuina lelei?

[Ata i le itulau 25]

“O le olaga faa-Peteli e manaomia ai le tausia o ausiaga maualuluga faaletino, tau amio ma faaleagaga”

[Ata i le itulau 26]

Pe e tatau i se tinā ona faaalu ni taimi faasili i aso taitasi e fai ai se faamamāina, pe a ō ese atu tagata lē manatunatu mamafa o le aiga?

[Ata i le itulau 27]

O le faamamāina o totonu o se taavale e na o le sefulu minute e faaaluina ai ma o le a faia ai se galuega matagofie