Lomiga mo le Polokalame mo le Sauniga o le Faiva ma le Olaga Faa-Kerisiano
NOVEMA 4-10
ʻOA TAUTELE MAI I LE AFIOGA A LE ATUA | 1 IOANE 1-5
“Aua le Manaʻo i le Lalolagi po o Mea o Iai i le Lalolagi”
(1 Ioane 2:15, 16) Aua le manaʻo i le lalolagi po o mea o iai i le lalolagi. Afai e manaʻo se tasi i le lalolagi, e lē o i totonu iā te ia le alofa o le Tamā; 16 auā o mea uma o i le lalolagi, o tuʻinanauga o le tino, ma tuʻinanauga o mata, ma le faalialiavale o meafaitino a se tasi, e lē mai i le Tamā ae e mai i le lalolagi.
Ia Pipii Atu i le Faaaʻoaʻoga na Saunia E Iesu
13 E ono manatu nisi e lē leaga mea uma lava i le lalolagi. E ui lava e saʻo, ae e mafai e le lalolagi ma ana faatosinaga ona tosina ese ai i tatou mai le auauna atu iā Ieova. E leai se mea o ofo mai e le lalolagi e mafai ona tatou vavalalata atu ai i le Atua. Peitaʻi, pe afai tatou te mananaʻo i mea i le lalolagi, e ui lava e lē o ni mea sesē ae ua tatou iai lava i se ala e lamatia ai. (1 Timoteo 6:9, 10) E lē gata i lea, ua tele mea leaga i le lalolagi ma e mafai ona faaleagaina ai i tatou. Pe afai tatou te matamata i polokalame o le televise o loo faamatilatila mai ai faiga sauā, matapeʻapeʻa po o feusuaʻiga lē mamā, e oo ina manatu i ai e lē leaga na mea, ma oo ina faaosoosoina ai. Afai tatou te miomiō ma tagata o lo latou faanaunauga autū o le faaleleia o latou olaga po o le ati ina aʻe o pisinisi, e mafai foʻi ona avea na mea ma mea tāua iā i tatou.—Mataio 6:24; 1 Korinito 15:33.
(1 Ioane 2:17) E mavae atu foʻi le lalolagi faapea ma ona tuʻinanauga, a o lē e faia le finagalo o le Atua e tumau e faavavau.
Ia Iloilo po o Faapeʻī Lau Amio e Tatau Ona Iai
18 O se tasi o vala e fesoasoani iā i tatou e teena ai ʻmea o le lalolagi,’ o le tāmau i mafaufau o upu nei a Ioane: “E mavae atu foʻi le lalolagi faapea ma ona tuʻinanauga, a o lē e faia le finagalo o le Atua e tumau e faavavau.” (1 Ioa. 2:17) E foliga mai e tumau le faiga o mea a Satani. Peitaʻi, ua toe o se aga ona mou atu lea. O le a lē faasesēina i tatou i faaosoosoga a le Tiapolo, pe a tatou manatua e leai se mea o le lalolagi lenei e tumau.
Saʻiliʻiliga Loloto mo ʻOa Faaleagaga
(1 Ioane 2:7, 8) Le ʻaupele e, ua ou tusi atu iā te outou e lē o se poloaʻiga fou, a o le poloaʻiga tuai lea na iā te outou mai i le amataga. O lenei poloaʻiga tuai, o le upu lea na outou faalogo i ai. 8 Ae ou te toe tusi atu se poloaʻiga fou iā te outou, o se poloaʻiga na ia mulimuli i ai e faapena foʻi ma outou, auā o loo mavae atu le pōuliuli, a ua susulu mai le malamalama moni.
E Maufaatuatuaina Faamanatuga a Ieova
14 O loo iai i Tusitusiga Paia Eleni le tele o faamanatuga mo i tatou ina ia fealofani. Na taʻua e Iesu o le poloaʻiga sili lona lua, o le “alofa atu i lou tuaoi e pei o oe lava iā te oe.” (Mata. 22:39) Na taʻua e Iakopo le ʻafa uso o Iesu, o le alofa o le “tulafono silisili.” (Iako. 2:8) Na tusi le aposetolo o Ioane: ʻLe ʻaupele e, ua ou tusi atu iā te outou e lē o se poloaʻiga fou, a o le poloaʻiga tuai lea na iā te outou mai i le amataga. Ae ou te toe tusi atu se poloaʻiga fou iā te outou.’ (1 Ioa. 2:7, 8) O le ā na uiga iai Ioane ina ua ia taʻua le “poloaʻiga tuai”? Na faasino atu i le faatonuga ia faaalia le alofa. Na avea o se “poloaʻiga tuai,” auā na taʻua e Iesu “i le amataga,” po o le tele o tausaga ua mavae. Ae sa avea foʻi o se “poloaʻiga fou,” ona ua manaʻomia ona faaalia e uso le alofa, e ala i le faataulaga o i latou pe a tulaʻi mai tulaga eseese. E tatou te lotofaafetai ona ua tatou maua lapataʻiga e puipuia ai i tatou, mai le uiga manatu faapito o le lalolagi. O lea, ia tatou faaalia le alofa lē manatu faapito.
(1 Ioane 5:16, 17) Afai e vaai atu se tasi i lona uso ua faia se agasala e lē iʻu ai i le oti, ia tatalo mo ia, ona faaolaina ai lea o ia e le Atua, atoa ma i latou e lē o agasala e iʻu ai i le oti. E iai le agasala e iʻu i le oti. Ou te lē fai atu iā te ia ina ia tatalo mo le tagata na faia lenā agasala. 17 O amioga lē tonu uma lava o le agasala lea; ae e iai le agasala e lē iʻu i le oti.
it-1 862 ¶5
Faamagaloga
E talafeagai ona tatou tatalo mo le faamagaloga a le Atua mo isi, po o le faapotopotoga atoa foʻi. Na faia faapea e Mose i le nuu o Isaraelu, i le taʻutino atu o a latou agasala ma saʻili mo le faamagaloga, ma na faafofogaina ma le agalelei e Ieova. (Nu 14:19, 20) Ina ua faapaia le malumalu, na tatalo atu foʻi Solomona iā Ieova e faamagalo ona tagata ina ua agasala, ma toe liliu ese mai i o latou ala sesē. (1Tu 8:30, 33-40, 46-52) Na fai foʻi Esera ma sui e taʻutino atu i le lautele agasala a tagata Iutaia na toe foʻi ane. O lana tatalo mai le loto ma apoapoaʻiga, na gaoioi ai tagata ina ia saʻili le faamagaloga a Ieova. (Esr 9:13–10:4, 10-19, 44) Na faalaeiau e Iakopo se tasi ua maʻi faaleagaga ia aami toeaina o le faapotopotoga ina ia latou tatalo mo ia, ma o le a “faamagaloina foʻi o ia pe afai ua agasala.” (Ia 5:14-16) Peitaʻi, e iai “le agasala e iʻu ai i le oti,” o le agasala faasaga i le agaga paia e faia ma le loto iai e lē mafai ona faamagaloina. E lē tatau i se Kerisiano ona tatalo mo na agasala i lenei auala.—1Io 5:16; Mat 12:31; Epe 10:26, 27.
Faitau Tusi Paia
(1 Ioane 1:1–2:6) Ua matou tusi atu iā te outou e faatatau i lē na iai mai le amataga, o le upu o le ola lea na matou faalogologo i ai, ma vaavaai i ai o matou mata, na matou uaʻi atu i ai ma fetagofi i ai o matou lima, 2 (ioe, ua faaalia mai le ola, na matou vāai ma molimau i ai, ma faamatala atu iā te outou le ola e faavavau mai i le Tamā, ma ua faaalia mai iā i matou,) 3 o loo matou faamatala atu foʻi iā te outou o mea na matou vāai ma faalogo i ai, ina ia outou mafuta faatasi ma i matou. E lē gata i lea, o loo tatou mafuta faatasi ma le Tamā ma lona Alo o Iesu Keriso. 4 O lea foʻi ua matou tusi atu ai nei mea, ina ia atoatoa ai lo tatou olioli. 5 O le feʻau lenei ua matou faalogo ai mai iā te ia ma o loo matou faalauiloa atu iā te outou, o le Atua o le malamalama lea ma e leai lava se pōuliuli i le autasi ma ia. 6 Afai tatou te faapea atu: “Ua tatou mafuta faatasi ma ia,” ae o loo tatou savavali pea i le pōuliuli, ua tatou pepelo ma e tatou te lē o faatinoina le upu moni. 7 Ae afai o loo tatou savavali i le malamalama e pei foʻi ona iai o ia i le malamalama, ona tatou mafuta faatasi ai lea o le tasi ma le isi, e faamamāina foʻi i tatou mai i agasala uma i le toto o lona Alo o Iesu. 8 Afai tatou te faapea atu: “E leai sa tatou agasala,” ua faasesēina ai i tatou lava ma e lē o i totonu iā i tatou le upu moni. 9 Afai e faailoa atu a tatou agasala, e faamaoni ma amiotonu o ia e na te faamagaloina a tatou agasala, ma faamamāina ai i tatou mai i amiolētonu uma lava. 10 Afai tatou te faapea atu: “E tatou te leʻi agasala,” ua tatou faia ai o ia ma pepelo, ma e lē o i totonu iā i tatou lana afioga.
2 Si aʻu fanau e, ua ou tusi atu nei mea iā te outou ina neʻi outou faia se agasala. Ae afai e faia e se tasi se agasala, ua iā i tatou le fesoasoani faatasi ma le Tamā o Iesu Keriso lea, o lē e amiotonu. 2 O ia o le taulaga o le leleiga ma le Atua mo a tatou agasala, e lē na o a tatou agasala, ae atoa foʻi ma le lalolagi uma. 3 O le mea lenei e iloa ai ua tatou iloa o ia, pe afai e faaauau pea ona tatou tausi i ana poloaʻiga. 4 O lē e faapea ane: “Ua ou iloa o ia,” ae e lē tausi i ana poloaʻiga, o le pepelo o ia, ma e lē o iai le upu moni i totonu o lenā tagata. 5 A o sē e tausi i lana afioga, o le mea moni ua faaalia e lenei tagata le alofa lelei atoatoa o le Atua. O le mea lea e tatou te iloa ai, ua tatou autasi ma ia. 6 O lē e faapea mai o loo autasi pea ma ia, e tatau foʻi ona faaauau pea ona savali e faapei ona savali o Iesu.
NOVEMA 11-17
ʻOA TAUTELE MAI I LE AFIOGA A LE ATUA | 2 IOANE 1-IUTA
“E Tatau Ona Tatou Tauivi e Tumau i le Upu Moni”
(Iuta 3) Le ʻaupele e, sa ou naunau tele e tusi atu iā te outou e uiga i lo tatou faaolataga. A o lenei, e tatau ona ou tusi e fautua atu iā te outou ina ia finafinau mo le faatuatua, lea na tuuina atu i le ʻaupaia.
“Ia Outou Loto Tetele i le Alii”
8 E tatou te lē valea i togafiti a Satani talu ai ua faailoa mai e le Tusi Paia ana gaoioiga masani. (2 Korinito 2:11) Sa faaaogā e le Tiapolo faafitauli matuiā tau tamaoaiga, maliliu o ē pele, teteega mai aiga, mafatiaga o le tino ma faitioga pepelo mai uō e tau faasaga ai i le tagata amiotonu o Iopu. Na matuā mafatia Iopu ma manatu ai ua lafoaʻia o ia e Ieova. (Iopu 10:1, 2) E ui atonu e lē faapogaia tuusaʻo e Satani faafitauli i aso nei, ae o loo aafia le toʻatele o Kerisiano i na faigatā ma e mafai ona faaaogā e le Tiapolo nei tulaga faigatā e faavaivaia ai.
9 Ua matuā faateleina lamatiaga faaleagaga i lenei taimi o le iʻuga. Ua tatou ola i se lalolagi ua faamamafa ai le saʻilia o meafaitino na i lo sini faaleagaga. Ua faaalia soo mai e faasalalauga feusuaʻiga lē mamā faapea, o le mea lea e maua ai le fiafia na i lo se mea e māfua ai faanoanoaga. O le toʻatele o tagata ua “tele le manaʻo i mea faafiafia a e leai se manaʻo i le Atua.” (2 Timoteo 3:1-5) O nei ituaiga o mafaufauga e mafai ona afāina ai lo tatou tulaga faaleagaga seʻi vaganā ai ua tatou “faamalolosi ona finau mo le faatuatua.”—Iuta 3.
Saʻiliʻiliga Loloto mo ʻOa Faaleagaga
(Iuta 4) Auā ua ō mai faananā isi tagata faalēmataʻu, o ē na muaʻi valoia i Tusitusiga Paia e oo i ai lenei faasalaga. Ua latou liua le agalelei faifua o lo tatou Atua, ma māfuaaga e faia ai amioga matagā ma ua lē faamaoni ai i lo tatou Matai e toʻatasi ma le Alii, o Iesu Keriso.
(Iuta 12) O i latou o papa ua natia i le vai a o latou aai faatasi i a outou faigaʻai alofa, o i latou o leoleo mamoe ua aai ma le lē matataʻu; o ao ua leai ni vai ua feaveaʻi solo e matagi; o laau i le faaiʻuga o le tau e afu ai mea a ua lē fua mai, ua mamate faalua, ma ua liaʻieseina.
it-2 279
Faigaʻai Alofa
E lē o faamatalaina e le Tusi Paia nei faigaʻai alofa pe taʻu mai foʻi pe na faafia ona fai. (Iuta 12) E leʻi faatonuina e le Alii o Iesu Keriso po o ona aposetolo ina ia faia, ma ua faaalia ai e lē tatau ona manatu i ai o se mea e tatau ona fai pe tumau. Ua faapea mai nisi o ni faatasiga na faia e Kerisiano mauʻoa, lea na valaaulia ai o latou uso lē tagolima. Na aai faatasi ai ē e leai ni tamā, o fafine ua oti a latou tane, o ē mauʻoa, ma ē e lē tagolima i se laoai, i le alofa faaleuso.
it-2 816
Papa
O le upu Eleni o le spi·lasʹ, e faasino atu i se papa po o se ʻamu ua natia i le vai. Na faaaogā e Iuta e faatusa i ai tane o ē na ō mai faananā i totonu o le faapotopotoga ma ni uunaʻiga leaga. E pei ona lamatia vaa ona o nei papa e lē iloa atu, na faapena foʻi ona iai lamatiaga i isi i le faapotopotoga ona o nei tane. Na ia faapea mai e uiga i nei tane: “O i latou o papa ua natia i le vai a o latou aai faatasi i a outou faigaʻai alofa.”—Iuta 12.
(Iuta 14, 15) O lea, na valoia mai e Enoka, o lona toʻafitu lea o augātamā mai iā Atamu, e uiga iā i latou na e faapea: “Faauta! ua afio mai Ieova ma ana ʻaupaia e mano ni mano, 15 e faamasino i tagata uma, ma faasala i ē uma e amio faalēmataʻu e tusa ma a latou galuega leaga uma na faia ma le faalēmataʻu, e tusa foʻi ma upu faifai uma na faia iā te ia e tagata agasala faalēmataʻu.”
ʻNa Ia Faafiafiaina le Atua’
O le ā le valoaga a Enoka? Ua faapea mai le Iuta 14, 15: “Faauta! [na, NW] afio mai Ieova ma ana ʻaupaia e mano ni mano, e faamasino i tagata uma, ma faasala i ē uma e amio faalēmataʻu e tusa ma a latou galuega leaga uma na faia ma le faalēmataʻu, e tusa foʻi ma upu faifai uma na faia iā te ia e tagata agasala faalēmataʻu.” O le mea muamua e te ono mātauina, sa faaaogā e Enoka le taimi ua teʻa e faamatala ai le valoaga, e tai pei o se mea ua uma ona faataunuuina e le Atua. O le auala foʻi lenā na faia ai isi valoaga na sosoo ai. O le manatu autū lenei: O loo faamatalaina e le perofeta se mea e mautinoa lava e tupu, i se auala e pei lava ua uma ona tupu.—Isaia 46:10.
ʻNa Ia Faafiafiaina le Atua’
O le faatuatua o Enoka e ono uunaʻia ai i tatou e iloilo i tatou lava pe tutusa la tatou vaai i le lalolagi ma le silafaga a le Atua. E pei ona aogā i aso o Enoka le feʻau faafaamasinoga na ia faalauiloa atu ma le lototele, o loo aogā foʻi lenā feʻau i o tatou aso. E ōgatusa ma le lapataʻiga a Enoka, na aumaia e Ieova le Lolo tele i tagata faalēmataʻu sa iai i aso o Noa. Ae na faaāta mai e lenā faaumatiaga se isi faaumatiaga e sili atu o le a tupu i le lumanaʻi. (Mataio 24:38, 39; 2 Peteru 2:4-6) E pei o aso o Enoka, o loo nofosauni foʻi i le taimi lenei le Atua ma ana ʻaupaia e mano ni mano e aumai le faamasinoga tonu i se lalolagi e lē matataʻu i le Atua. E tatau iā i tatou taʻitoʻatasi ona faatāua le lapataʻiga a Enoka ma faailoa atu i isi. Atonu e faaesea i tatou e o tatou aiga ma uō. E ono iai taimi e tatou te lagona ai le tuua toʻatasi. Ae e leʻi tuulafoaʻia e Ieova Enoka. E na te lē tuulafoaʻia foʻi ana auauna faamaoni i aso nei.
Faitau Tusi Paia
(2 Ioane 1-13) O aʻu o le toeaina, ua ou tusi atu i le tamaʻitaʻi ua filifilia ma lana fanau o ē ou te alofa faamaoni i ai, e lē na o aʻu, ae atoa foʻi ma i latou uma ua iloa le upu moni, 2 ona o le upu moni o loo tumau pea iā i tatou, ma e tumau e faavavau iā i tatou. 3 O le a iai pea iā i tatou le agalelei faifua, o le alofa mutimutivale, ma le filemu mai i le Atua le Tamā, ma Iesu Keriso le Alo o le Tamā, faatasi ma le upu moni ma le alofa. 4 Ua ou matuā olioli ina ua ou iloa o loo savavali nisi o lau fanau i le upu moni, e pei ona tatou maua le poloaʻiga mai i le Tamā. 5 O lenei, le tamaʻitaʻi e, ua ou talosaga atu iā te oe, ua ou tusi atu iā te oe, e lē o se poloaʻiga fou, a o le poloaʻiga na iā i tatou mai i le amataga, ina ia tatou alolofa o le tasi i le isi. 6 O le alofa lava lenei, ia faaauau ona tatou savavali e tusa ai ma ana poloaʻiga. O le poloaʻiga lenei e pei ona outou faalogo ai mai le amataga, e tatau ona outou savavali ai pea. 7 Auā e toʻatele tagata taufaasesē ua ō atu i le lalolagi, o ē e latou te leʻi taʻutino atu na afio mai Iesu Keriso o se tagata. O le taufaasesē lea ma le anetikeriso. 8 Ia outou faaeteete ina neʻi maʻimau mea na matou tautigā ai, ae ia outou maua le taui atoatoa. 9 O lē e fia pule ma e lē tumau i aʻoaʻoga a le Keriso, e lē autasi o ia ma le Atua. O lē e tumau i lenei aʻoaʻoga, ua autasi o ia ma le Tamā atoa ma le Alo. 10 Afai e sau se tasi iā te outou ae na te lē faailoa maia lenei aʻoaʻoga, aua lava tou te taliaina o ia i o outou fale, pe faatalofa atu foʻi iā te ia. 11 Auā o sē e faatalofa atu iā te ia, ua aufaatasi atu o ia i ana galuega leaga. 12 E ui lava e tele ni mea ou te fia tusi atu ai iā te outou, ae ou te lē manaʻo e tusi atu i se tusi, ae ou te faamoemoe e alu atu iā te outou ma tatou talatalanoa faatasi, ina ia atoatoa ai lo outou olioli. 13 O loo alolofa atu iā te oe le fanau a lou uso, o lē ua filifilia.
NOVEMA 18-24
ʻOA TAUTELE MAI I LE AFIOGA A LE ATUA | FAAALIGA 1-3
“Ua Ou Iloa Au Galuega”
(Faaaliga 1:20) O le uiga lenei o le mea lilo paia o fetu e fitu ua e vaaia i luga o loʻu lima taumatau, ma tuugāmolī auro e fitu: O fetu e fitu o agelu ia o faapotopotoga e fitu, a o tuugāmolī e fitu o faapotopotoga ia e fitu.
O le ā le Agaga o Loo E Faaalia?
8 E mafai ona tatou ʻalofia lenā uiga, pe a manatu o loo i le aao taumatau o Iesu “fetu e fitu.” E faasino atu “fetu” i toeaina faauuina, ae e mafai foʻi ona faasino atu i toeaina i le faapotopotoga. E faatino e Iesu so o se mea e finagalo i ai i “fetu” o loo i lona aao. (Faaa. 1:16, 20) I le avea ai o Iesu ma Ulu o le faapotopotoga, o loo ia silafia mea uma o loo tutupu i le ʻautoeaina. O ona ʻmata ua pei o se afi mumū,’ ma e na te silafia mea uma. Afai ua silafia e Iesu ua manaʻomia e toeaina se faasaʻoga, e na te aumaia i le taimi tatau ma i se auala talafeagai. (Faaa. 1:14) Ae i le taimi nei, e tatau ona tatou faaaloalo i toeaina ua tofiaina e le agaga paia. Na tusi Paulo: “Ia usiusitaʻi i ē o taʻimua iā te outou ma ia gauaʻi iā i latou, auā o loo leoleoina e i latou o outou ola talu ai e tatau ona latou fai atu se tala; ina ia latou faia ma le olioli ae e lē ma le ōi, auā e leaga lea mo outou.”—Epe. 13:17.
(Faaaliga 2:1, 2) “Ia e tusi i le agelu o le faapotopotoga i Efeso: O mea nei ua fai mai ai lē o loo uu i lona lima taumatau fetu e fitu, o lē o loo savali i le ogatotonu o tuugāmolī auro e fitu, 2 ʻua ou iloa au galuega, ma lou tautigā, ma lou tumau, ma e te lē faapalepale i tagata leaga, ma ua e tofotofoina o ē ua faapea mai o ni aposetolo ae e leai lava, ua e iloa foʻi o i latou o ni tagata pepelo.
E Leoleomaluina i Tatou e Ieova mo le Faaolataga
11 I le vaaiga o loo faamauina i le tusi o Faaaliga mataupu e 2 ma le 3, na iloilo ai e Iesu Keriso faapotopotoga e fitu i Asia Itiiti. E pei ona faaalia i le vaaiga, e lē gata na silasila Keriso i le faapotopotoga i lona tulaga aoao tetele, ae na ia taulaʻi atu foʻi i ni tulaga patino. I nisi tulaga, na ia taʻua ai foʻi tagata taʻitoʻatasi, ma avatu le faamalō ma fautuaga talafeagai. O le ā ua taʻu mai iā i tatou i lenei mea? Ua faaāta mai i faapotopotoga e fitu Kerisiano faauuina ina ua mavae le 1914. E ui lava sa tuuina atu e Keriso fautuaga e patino i le vaega faauuina, ae e mafai foʻi ona aogā i faapotopotoga a tagata o le Atua o loo i le lalolagi. E mafai ona faapea atu, o loo faaaogā e Ieova lona Alo ina ia taʻitaʻia Ona tagata. E faapefea ona tatou maua aogā mai i lenā taʻitaʻiga?
Ia Ō Faatasi Pea ma le Faalapotopotoga a Ieova
20 O le ō faatasi pea ma le faalapotopotoga auiluma a Ieova e manaʻomia ai lo tatou amanaʻia o le matafaioi a Iesu Keriso na tofia i ai e le Atua, e avea ma ʻulu o le ekalesia.’ (Efeso 5:22, 23) E lelei foʻi ona mātau le Isaia 55:4, lea o loo taʻu mai ai ia i tatou e faapea: “Faauta, ua ou [Ieova] avatua o ia e fai ma molimau i le nuu, o le taʻimua ma le pule i le nuu.” E silafia lelei lava e Iesu le auala e fai ai lana taʻitaʻiga. E na te silafia foʻi ana mamoe ma a latou galuega. O le mea moni, ina ua ia asiasia faapotopotoga e fitu i Asia Itiiti, e faalima ona ia fetalai mai: “Ua ou iloa au galuega.” (Faaaliga 2:2, 19; 3:1, 8, 15) E silafia foʻi e Iesu o tatou manaʻoga, e pei ona silafia mai e lona Tamā, o Ieova. A o leʻi tuuina mai le Tatalo Faaaʻoaʻo, na fetalai Iesu: “Ua silafia e lo outou Tamā mea ua outou matitiva ai, a o leʻi ole atu outou ia te ia.”—Mataio 6:8-13.
Saʻiliʻiliga Loloto mo ʻOa Faaleagaga
(Faaaliga 1:7) Faauta! O loo afio mai o ia i ao, e iloa atu o ia e mata o tagata uma, ma i latou na tutuʻia o ia; ona taufaitagituʻi ai lea o ituaiga uma o le lalolagi ona o ia. E moni lava, Amene.
Aveesea e le Malo o le Atua Ona Fili
10 Faalauiloaga o le faamasinoga. O le a faamalosia fili o le Atua e molimauina se mea o le a atili ai ona latou fefefe. Na fetalai Iesu: “Ona latou vaaia lea o le Atalii o le tagata o loo sau i ao, ma le mana tele, ma le mamalu.” (Mare. 13:26) O lenei faaaliga o le mana o le Atua, ua faailoa mai ai le afio mai o Iesu e faalauiloa le faamasinoga. I le isi vaega o lenei valoaga a Iesu e faatatau i aso e gata ai, na ia aumaia ai isi faamatalaga e faatatau i lenei faamasinoga. E tatou te maua na faamatalaga i le talafaatusa e faatatau i mamoe ma ʻoti. (Faitau le Mataio 25:31-33, 46.) O tagata faamaoni e lagolagoina le Malo o le a faamasinoina o ni “mamoe,” ma e “ea i luga o [latou] ulu,” auā ua latou iloa ʻua latalata ona laveaʻiina i latou.’ (Luka 21:28) Peitaʻi, o i latou e tetee i le Malo o le a faamasinoina o ni “ʻoti,” ma o le a latou “taufaitagituʻi,” auā ua lata mai lo latou “faaumatiaga e faavavau.”—Mata. 24:30; Faaa. 1:7.
(Faaaliga 2:7) O lē ua iai taliga, inā faalogo mai ia i mea ua fai mai ai le agaga i faapotopotoga: O lē e manumalo ou te faataga o ia e ʻai i fua o le laau o le ola, o loo i le parataiso a le Atua.’
Manatu Tāua Mai le Tusi o Faaaliga—I
2:7—O le ā le “parataiso a le Atua”? Ona na faatatau atu nei upu i Kerisiano faauuina, o le parataiso la i inei o loo faasino atu i le siʻomaga faaparataiso i le lagi, i le mea o afio ai le Atua. O le a tauia le ʻaufaauuina faamaoni e ala i lo latou aai i le “laau o le ola.” O le a latou mauaina le tulaga o le lē mafai ona toe oti.—1 Kori. 15:53.
Faitau Tusi Paia
(Faaaliga 1:1-11) O le faaaliga a Iesu Keriso na tuuina atu e le Atua iā te ia, ina ia faailoa mai i ana pologa o mea ua toeitiiti ona tutupu lea. Ua auina mai foʻi e ia lana agelu e faailoa mai i faailoga e ala iā te ia i lana pologa o Ioane, 2 o lē na molimauina afioga na tuuina mai e le Atua atoa ma le molimau a Iesu Keriso, ma mea uma na ia vaai i ai. 3 E fiafia o lē e faitau leotele, ma i latou e faalogo i upu o lenei valoaga, ma tausi i mea o tusia ai; auā ua lata mai le taimi atofaina. 4 O aʻu o Ioane, o laʻu tusi lenei i faapotopotoga e fitu o loo i le itumalo o Asia: Ia iā te outou le agalelei faifua ma le filemu mai i “Lē o loo soifua, na soifua foʻi, o le a afio mai,” ma e mai i agaga e fitu o loo i luma o lona nofoālii, 5 e mai foʻi iā Iesu Keriso, o “le Molimau Faamaoni,” o “Le ulumatua o ē e toetutū mai i le oti,” ma o “Le Pule o tupu o le lalolagi.” O lē ua alofa mai iā i tatou ma faasaʻoloto i tatou mai i a tatou agasala e ala i lona lava toto, 6 (na ia faia foʻi i tatou o se malo, o ositaulaga i lona Atua ma lona Tamā) ia iā te ia le mamalu ma le malosi e faavavau. Amene. 7 Faauta! O loo afio mai o ia i ao, e iloa atu o ia e mata o tagata uma, ma i latou na tutuʻia o ia; ona taufaitagituʻi ai lea o ituaiga uma o le lalolagi ona o ia. E moni lava, Amene. 8 Ua fetalai mai Ieova le Atua: “O aʻu o le Alefa ma le Omeka, o Lē o loo soifua, na soifua foʻi, o le a afio mai, o Lē e ona le malosi uma lava.” 9 O aʻu o Ioane, o lo outou uso ma o lē ua tofutofusia ma outou i puapuaga, ma le malo, atoa ma le tumau o se soo o Iesu, ua ou iai i le motu e igoa o Patamo ona o le talaʻiga e uiga i le Atua, ma le molimau atu iā Iesu. 10 Ona ua faatumuina aʻu i le agaga, ua ou oo ai i le aso o le Alii, ma ou faalogo ai i se leo malosi mai i oʻu tua e pei o le leo o se pū, 11 ua faapea mai: “Ia e tusi i se tusi tāʻai mea ua e vaai i ai, ma auina atu i faapotopotoga e fitu i Efeso, i Semurana, i Perekamo, i Tuatira, i Sarataisa, i Filatelefaia, ma i Laotikaia.”
NOVEMA 25–TESEMA 1
ʻOA TAUTELE MAI I LE AFIOGA A LE ATUA | FAAALIGA 4-6
“O le Tiʻetiʻega a Tagata Tiʻetiʻe Solofanua e Toʻafā”
(Faaaliga 6:2) Ona ou vaai ai lea, faauta foʻi! o le solofanua paʻepaʻe ma lē o loo tiʻetiʻe ai ua iai lana ʻaufana ma ua tuuina atu iā te ia le pale, ua alu atu o ia ina ia manumalo, ma e oo ina manumalo aʻiaʻi.
Tagata Tiʻetiʻe Solofanua e Toʻafā—O Ai i Latou?
O ai lē o loo tiʻetiʻe i le solofanua paʻepaʻe? O loo maua le tali i le tusi lava lea o Faaaliga, lea na mulimuli ane taʻua lenei tagata tiʻetiʻe mai i le lagi o “Le Upu a le Atua.” (Faaaliga 19:11-13) O lenā taʻu, Le Upu, e faasino atu iā Iesu Keriso, talu ai o ia o le fofoga fetalai a le Atua. (Ioane 1:1, 14) Ua taʻua foʻi o ia o le “Tupu o tupu ma le Alii o alii” ma e “Faamaoni ma Moni.” (Faaaliga 19:11, 16) E manino mai la, ua iā te ia le pule e gaoioi ai o se tupu toa, ma e na te lē faaaogāsesēina lona mana. Peitaʻi, ua tulaʻi mai ai nisi fesili.
wp17.3 4 ¶5
Tagata Tiʻetiʻe Solofanua e Toʻafā—O Ai i Latou?
O anafea na amata ai le tiʻetiʻega a nei tagata tiʻetiʻe solofanua? Ia mātau, o le tagata tiʻetiʻe muamua o Iesu, na amata lana tiʻetiʻega ina ua ia maua se palealii. (Faaaliga 6:2) O anafea na faapaleina ai Iesu o se Tupu i le lagi? E lē o le taimi na toe afio ai i le lagi ina ua mavae lona maliu. Ua faaalia i le Tusi Paia sa iai se vaitaimi na faatalitali ai o ia. (Eperu 10:12, 13) Na tuuina atu e Iesu i ona soo se faailoga e iloa ai le taimi e māeʻa ai lenā vaitaimi na faatalitali ai, ma le taimi e amata ai lana pulega i le lagi. Na ia fetalai pe a amata lana pulega, o le a matuā suia le tulaga o mea i le lalolagi i le leaga. O le a iai faigātaua, oge, ma faamaʻi. (Mataio 24:3, 7; Luka 21:10, 11) E leʻi umi talu ona gāpā le Taua Muamua a le Lalolagi i le 1914, ae manino mai loa ua ola tagata i lenā vaitaimi faigatā lea ua taʻua i le Tusi Paia, “o aso e gata ai.”—2 Timoteo 3:1-5.
(Faaaliga 6:4-6) Ona alu atu loa lea o le solofanua mūmū; ma lē o loo tiʻetiʻe ai ua ia maua le faatagaga e aveesea ai le filemu mai i le lalolagi, ina ia latou fefasiotiaʻi ai; ma ua tuuina atu foʻi iā te ia le pelu telē. 5 Ina ua ia tatalaina le faamaufaailoga lona tolu, ona ou faalogo lea ua faapea atu le foafoaga agaga lona tolu: “Sau ia!” Ona ou vaai ai lea, faauta foʻi! o le solofanua uliuli; ma o lē o loo tiʻetiʻe ai ua i lona lima se fua faatautau. 6 Ona ou faalogo lea i se leo e pei e sau mai i le ogatotonu o foafoaga agaga e toʻafā, ua faapea atu: “O le tau o le kilokalama o saito, o le tenari lea, ma o le tau o kilokalama e tolu o karite, o le tenari lea; ae aua e te faaleagaina le suāuu olive ma le uaina.”
Tagata Tiʻetiʻe Solofanua e Toʻafā—O Ai i Latou?
Ua faaāta mai e lenei tagata tiʻetiʻe faigātaua. Ia mātau e na te aveesea le filemu mai i le lalolagi atoa, ae e lē na o ni nai atunuu. I le 1914, na gāpā ai se taua na aafia ai le lalolagi atoa, ma o se mea e leʻi tupu muamua i le talafaasolopito. Na sosoo ai ma se taua lona lua a le lalolagi, lea na tele atu ona aafiaga. O loo taʻua i nisi o suʻesuʻega, talu mai le 1914 e silia ma le 100 miliona tagata ua maliliu, ona o faigātaua ma feteenaʻiga e faaaogā ai auupega. E lē gata i lea, na aafia le toʻatele o isi tagata i ni manuʻaga e iai aafiaga tumau.
wp17.3 5 ¶4-5
Tagata Tiʻetiʻe Solofanua e Toʻafā—O Ai i Latou?
“Ona ou vaai ai lea, faauta foʻi! o le solofanua uliuli; ma o lē o loo tiʻetiʻe ai ua i lona lima se fua faatautau. Ona ou faalogo lea i se leo e pei e sau mai i le ogatotonu o foafoaga agaga e toʻafā, ua faapea atu: ʻO le tau o le kilokalama [po o le ʻkuata,’ Tusi Paia Samoa-Lomiga 1969] o saito, o le tenari lea, ma o le tau o kilokalama e tolu o karite, o le tenari lea; ae aua e te faaleagaina le suāuu olive ma le uaina.’”—Faaaliga 6:5, 6.
Ua faaāta mai e lenei tagata tiʻetiʻe le oge. Ua faailoa mai i inei le matuā utiuti o meataumafa i le tau o le kuata (0.7 kilo) o saito, e tasi le tenari, o le totogi lea mo se aso faigaluega e tasi i le uluaʻi senituri. (Mataio 20:2) O le tenari lava lenā e tasi e mafai ona faatauina ai ni kuata e tolu (2.1 kilo) o karite, o se fatu e faatauvaa nai lo o le saito. O le ā le umi e mafai ona fafagaina ai se aiga toʻatele i na meaʻai? Ua fautuaina tagata ina ia faasoasoa lelei meataumafa e oo lava i meaʻai masani o aso taʻitasi, e pei lava ona faasoasoaina lelei le suāuu olive ma le uaina o ni mea e tāua i lenā taimi ma le aganuu.
(Faaaliga 6:8) Ona ou vaai ai lea, faauta foʻi! o le solofanua samasama vaivai; ma lē o loo tiʻetiʻe ai ua igoa ia o le Oti. Ua mulimuli atu i ona tua le Tuugamau. Ua tuuina atu i ai le pule i le tasi vaefā o le lalolagi, ina ia fasiotia i le pelu umī, ma le oge, ma le faamaʻi oti, ma e ala i manufeʻai o le lalolagi.
wp17.3 5 ¶8-10
Tagata Tiʻetiʻe Solofanua e Toʻafā—O Ai i Latou?
Ua faaāta mai e le tagata tiʻetiʻe lona fā le oti ona o faamaʻi ma isi māfuaaga. E leʻi umi talu ona mavae atu le 1914, ae maliliu le faitau 10 miliona o tagata i le fulū Sepania. Atonu e pe ā ma le 500 miliona tagata na aafia, e tusa lenā ma le tasi mai i le tolu tagata na soifua i lenā taimi.
Peitaʻi, e lē na o le fulū Sepania le faamaʻi oti sa iai. Na taʻua e tagata atamamai, i se fua faatatau e silia i le 300 miliona na maliliu i le smallpox a o faagasolo le senituri lona 20. E oo mai i aso nei, ua vave ona maliliu le faitau miliona o tagata ona o le AIDS, fatafata vaivai, ma le malalia, e ui i taumafaiga uma e saʻili se vaifofō.
E tusa lava po o faigātaua, oge, po o faamaʻi, ae e iʻu uma lava i le oti. O loo faaauau pea ona aoina e le Tuugamau tagata ua maliliu, ma e leai se faamoemoe o maua ai.
Saʻiliʻiliga Loloto mo ʻOa Faaleagaga
(Faaaliga 4:4) O loo siʻosiʻomia foʻi le nofoālii e nofoālii e lua sefulu fā, ma i luga o nei nofoālii ua ou iloa atu ai toeaina e toʻalua sefulu fā, ua oofu i ofu tele papaʻe ma ua i o latou ulu o pale auro.
(Faaaliga 4:6) O loo i luma o le nofoālii se sami tioata e pei o se maa tioata. Ua iai i le ogatotonu o le nofoālii ma ua siʻosiʻomia foʻi le nofoālii e foafoaga agaga e toʻafā, ua tumu i mata luma atoa ma tua.
Le Matagofie o le Nofoālii o Ieova i le Lagi
8 Sa iloa e Ioane na tofia faitaulaga e auauna i le fale fetafaʻi anamua. Atonu la na faateʻia o ia i le vaai atu i le mea lea ua sosoo mai nei lona faamatalaina: “Ua siʻosiʻoina foʻi le nofoālii e nofoālii e luafulu ma le fā; na ou iloa foʻi o toeaina e toʻaluafulu ma le toʻafā o tiʻetiʻe i ia nofoālii, ua oofu i ofu sisina; ua i o latou ulu foʻi o pale auro.” (Faaaliga 4:4) Ioe, na i lo faitaulaga, ua iai toeaina e 24, ua nofoia nofoālii ma faapaleina e pei o ni tupu. O ai nei toeaina? O le ʻaufaauuina o le faapotopotoga Kerisiano, ua toe faatutūina ma maua le tofiga faalelagi na folafola atu e Ieova iā i latou. E faapefea ona tatou iloa lenā mea?
Le Matagofie o le Nofoālii o Ieova i le Lagi
19 O le ā ua faaata mai e nei meaola? Tatou te ono maua le tali, i se vaaiga na lipotia mai e le perofeta o Esekielu. Sa vaaia e Esekielu Ieova o loo afio i se kariota faalelagi, lea o loo iai faatasi ma meaola o lo latou tino mai e tutusa ma foliga ia na faamatalaina e Ioane. (Esekielu 1:5-11, 22-28) Mulimuli ane, na toe vaaia e Esekielu lenā nofoālii kariota o loo iai faatasi ma meaola. Peitaʻi i lea taimi, o meaola ia o loo ia taʻua, o kerupi. (Esekielu 10:9-15) O meaola e fā na vaaia e Ioane e ao ona faaata mai ai kerupi e toʻatele a le Atua—o meaola e maualuluga tulaga i totonu o Lana faalapotopotoga agaga. E leʻi manatu Ioane o se mea e lē masani ai le vaaia o kerupi o tutū latalata tele iā Ieova, talu ai i le faatulagaga o le fale fetafaʻi anamua, sa iai kerupi auro e lua i luga o le ufi o le atolaau o le feagaiga, lea sa fai ma sui o le nofoālii o Ieova. Mai le va o nei kerupi, sa fofoga mai ai e le siʻufofoga o Ieova poloaʻiga i le nuu.—Esoto 25:22; Salamo 80:1.
(Faaaliga 5:5) A ua faapea mai se tasi o toeaina iā te aʻu: “Soia e te tagi. Faauta! Ua manumalo le Leona mai i le ituaiga o Iuta, o le aa o Tavita, ma ua mafai ona ia tatalaina le tusi tāʻai ma ona faamaufaailoga e fitu.”
cf 36 ¶5-6
ʻFaauta! O le Leona Mai i le Ituaiga o Iuta’
5 E masani ona fesootaʻi le leona i le lototele. Pe na iai se taimi na e faasaga lelei ai i se leona poʻa? Pe afai na iai, e mautinoa na iai se mea na puipuia ai oe mai lenei manufeʻai, atonu o loo i totonu o se pa i le nofoaga e tuu ai manu. E ese le faigatā o lenā tulaga. Pe a e tilotilo atu i foliga o lenā foafoaga malosi ma lapoʻa a o gū mai iā te oe, e te iloa ai e lē taitai fefe le leona i se mea. O loo taʻua i le Tusi Paia “le leona e sili lona malosi i manu uma ma e lē liliuese mai i luma o se tasi.” (Faataoto 30:30) E faapena le lototele o Keriso.
6 Seʻi tatou talanoa i ni auala se tolu na faaalia ai e Iesu le lototele e pei o le leona: i le tū atu e puipuia le upu moni, le lagolagoina o le faamasinotonu, ma i le feagai ma teteega. O le a tatou iloa ai, tusa pe tatou te lototetele pe leai, ae e mafai lava ona tatou faaaʻoaʻo iā Iesu i le faaalia o lenā uiga.
Faitau Tusi Paia
(Faaaliga 4:1-11) Ua mavae nei mea, ona ou iloa ai lea, ma faauta! o se faitotoʻa ua matala mai i le lagi, ma o le leo muamua ua ou faalogo i ai, o le leo o se pū, ua tautala mai iā te aʻu ma faapea mai: “Sau ia i luga nei, ou te faailoa atu iā te oe mea e tatau ona tutupu.” 2 Ua mavae nei mea, ona faafuaseʻi lea ona ou iai i le mana o le agaga: faauta foʻi! ua tū mai le nofoālii i le lagi, ma o loo iai se tasi o afio ai i le nofoālii. 3 O lē o loo afio i le nofoālii, ua pei ona foliga o se maa iasepi, ma se maa tāua lanu mūmū, ma e iai se nuanua e pei o le maa samaraki ua faataamilo i le nofoālii. 4 O loo siʻosiʻomia foʻi le nofoālii e nofoālii e lua sefulu fā, ma i luga o nei nofoālii ua ou iloa atu ai toeaina e toʻalua sefulu fā, ua oofu i ofu tele papaʻe ma ua i o latou ulu o pale auro. 5 Ua sau mai i le nofoālii o uila, ma leo, ma faititili; ma ua iai foʻi molī e fitu o loo mumū i luma o le nofoālii, ua fai ma faatusa o agaga e fitu o le Atua. 6 O loo i luma o le nofoālii se sami tioata e pei o se maa tioata. Ua iai i le ogatotonu o le nofoālii ma ua siʻosiʻomia foʻi le nofoālii e foafoaga agaga e toʻafā, ua tumu i mata luma atoa ma tua. 7 O le foafoaga agaga muamua e pei o se leona, o le foafoaga agaga lona lua e pei o se tamaʻi povi poʻa, o le foafoaga agaga lona tolu e iai mata e pei o se tagata, ma o le foafoaga agaga lona fā e pei o se aeto o loo lele. 8 O nei foafoaga agaga e toʻafā, e taʻitasi i latou ma apaʻau e ono; e tumu i mata luga atoa ma lalo. Ua lē mālōlō i latou i le ao ma le pō i le faapea atu: “E paia, e paia, e paia Ieova le Atua o Lē e ona le malosi uma lava, o lē o loo soifua, na soifua foʻi, o le a afio mai.” 9 O so o se taimi lava e avatu ai e foafoaga agaga le viiga, le faaneeneega, ma le faafetai i Lē o loo afio i le nofoālii, o Lē e soifua pea e faavavau, faavavau lava, 10 ona faapaʻuʻū lea o toeaina e toʻalua sefulu fā i luma o Lē o loo afio i le nofoālii, ma tapuaʻi atu i Lē e soifua pea e faavavau, faavavau lava, ma lafo atu o latou palealii i luma o le nofoālii ma faapea atu: 11 “Ieova e, lo matou Atua, ua tatau lava oe ona e mauaina le viiga, ma le mamalu, ma le mana, auā na e foafoaina mea uma lava, ma o lou finagalo foʻi ua iai nei mea ma na foafoaina ai.”