SUʻESUʻEGA 4

Saʻo le Auala e Faatomua ai Mau

Mataio 22:41-45

AOTELEGA: Ia sauniunia le mafaufau o lau aofia a o leʻi faitauina se mau.

Mafaufau i le māfuaaga o le a e faitauina ai le mau. Faatomua mau taʻitasi i se auala e tataʻi ai lau aofia i le manatu autū o le mau o loo e taumafai e faamamafa.

Ia malamalama i le siʻomaga o le mau. Afai e te faatomua se mau i le taʻua o lē o loo tautala po o lē foʻi na tusia le tusi, ia faamautinoa e saʻo mea o loo e fai atu ai.
Ia faaaogā le Tusi Paia i taimi uma e aʻoaʻo atu ai. Pe a e talanoa i tagata e talitonu i le Atua, ia faasino atu i le Tusi Paia o le Afioga a le Atua. O le faia faapea e te faailoa atu ai o le Tusi Paia, o le puna sili o le atamai.
Faaosofia le naunau i le mau. Ia fai se fesili o le a taliina e le mau, taʻua se faafitauli e fesoasoani le mau e foʻia, pe taʻua foʻi se mataupu silisili o le a faataʻitaʻia mai i le mau.

Ia manatunatu i mea ua iloa e lau aofia e faatatau i le mataupu ma le mau. E oo lava i se mau ua masani ai, e mafai ona e faatomua i se auala faaoso naunau, ma fesoasoani iā i latou ia toe mafaufau i ai pe malamalama foʻi i se isi vala o le mau e latou te leʻi iloa muamua.