Ua Faaalia e se Tagata Lepela le Lotofaafetai

Ua faalēaogā e Iesu taumafaiga a le Saniterini e fasioti o ia, e ala i le malaga atu i le aai o Efaraima, lea o loo i le itu i mātū i sasaʻe o Ierusalema. Ua nofo ai o ia i inā faatasi ma ona soo, e mamao ese mai i ona fili. (Ioane 11:54) Ua latalata nei i le Paseka i le 33 T.A., ma ua toe faaauau le faigāmalaga a Iesu. Ua ui atu o ia i le itu i mātū i Samaria ma agaʻi atu ai i Kalilaia. O lana malaga mulimuli foʻi lea i lenei vaipanoa a o leʻi oo i lona maliu.

I le amataga o lana malaga a o femaliuaʻi o ia mai i lea nuu i lea nuu, ua fetaui ai Iesu ma ni tamāloloa lepela e toʻasefulu. E mataʻutia nisi o aafiaga o lenei maʻi. O nisi o tagata e faasolosolo ona pala ma paʻuʻū ese vaega o o latou tino, e pei o tamatamaʻilima, tamatamaʻivae, ma taliga. (Numera 12:10-12) E tusa ai ma le Tulafono a le Atua, e tatau i se tagata lepela ona valaau atu “E lē mamā, e lē mamā!,” ma e tatau foʻi ona nofo ese o ia.—Levitiko 13:45, 46.

O lea, ua tutū mamao ese tagata lepela e toʻasefulu mai iā Iesu ma alalaga atu: “Iesu e, le Faiaʻoga, ia e alofa mai iā i matou!” Ua silasila atu Iesu iā i latou, ona ia fetalai atu lea: “Ia outou ō ma faaali atu outou i ositaulaga.” (Luka 17:13, 14) Ua faaalia mai i inei le faatāua e Iesu o faatulagaga i le Tulafono a le Atua, lea e faatagaina ai ositaulaga e faailoa atu ua mamā tagata lepela mai i o latou maʻi. O lea auala, e mafai ai ona latou toe nonofo faatasi ma tagata o loo mālōlōina.—Levitiko 13:9-17.

E talitonu nei tagata lepela e toʻasefulu i le mana o Iesu e faia ai vavega, ma ua latou ō loa e faaali i latou i ositaulaga. Ua tauia lo latou faatuatua a o ō atu i latou i ositaulaga. Ua amata ona latou faalogoina ua toe faafoʻisia lo latou soifua mālōlōina.

Ua mamā nei lepela e toʻasefulu mai o latou maʻi. Ua faaauau pea ona ō le isi toʻaiva e vaai le ʻauositaulaga, ae ua toe foʻi ane le toʻatasi, o ia o se tamāloa Samaria. Ua toe foʻi ane o ia e faafetai iā Iesu mo le vavega ua ia faia. Ua ia “vivii leotele atu i le Atua,” auā ua ia iloa o le Atua lea ua māfua ai ona mamā lona lepela. (Luka 17:15) Ina ua maua e lenei tamāloa Iesu, ona ia faapaʻū lea i ona vae ma faafetai atu iā te ia.

Ua fetalai atu Iesu iā i latou o loo iai i inā: “Na faamamāina le toʻasefulu, a ea? A o fea la o iai le isi toʻaiva? Pe e leai ea se isi o i latou ua toe foʻi mai e vivii i le Atua, ae ua na o lenei tagata mai nuu ese?” Ona faapea atu lea o Iesu i le tamāloa Samaria: “Inā tulaʻi ia ma e alu, auā ua e malosi ona o lou faatuatua.”—Luka 17:17-19.

O le faamālōlōina e Iesu o nei tagata lepela e toʻasefulu, ua faailoa atu ai o loo lagolagoina o ia e Ieova le Atua. O lea, e lē gata ua faamālōlōina le toʻatasi o i latou e ala iā Iesu, ae atonu o le a ia uia foʻi le ala i le ola. E lē o toe faaaogā e le Atua Iesu e faia nei faamālōlōga i aso nei. Peitaʻi, o le faaalia o lo tatou faatuatua iā Iesu, e mafai ai ona tatou uia le ala i le ola, o lona uiga o le ola e faavavau. Pe e tatou te faaalia le lotofaafetai mo le avanoa e tatou te maua ai le ola e faavavau, e pei ona sa faia e le tamāloa Samaria?