O le ā E te Aʻoaʻoina Mai i Kerisiano ua Iai le Poto Masani?

E iai uso ma tuafāfine i a tatou faapotopotoga ua loa tausaga o auauna iā Ieova. E mafai ona tatou aʻoaʻoina ni lesona mai i lo latou faalagolago atoatoa iā Ieova. E mafai ona tatou fesili atu iā i latou e faatatau i le talaaga o le faalapotopotoga a Ieova, ma luʻi na latou manumalo ai ona o le fesoasoani a Ieova. E ono mafai foʻi ona tatou valaaulia se tasi o i latou e faamatala mai mea na tutupu iā i latou, i a tatou Tapuaʻiga a le Aiga.

Pe afai o oe o se Kerisiano ua iai le poto masani, ia lotomalie e faamatala atu lou faatuatua i talavou. Na faamatala atu e Iakopo ma Iosefa i o la aiga mea na tutupu iā i laʻua. (Ke 48:21, 22; 50:24, 25) Na mulimuli ane faatonu e Ieova ulu o aiga ina ia aʻoaʻo a latou fanau e faatatau i ana galuega mamana. (Te 4:9, 10; Sl 78:4-7) I aso nei, e mafai foʻi e mātua ma isi i le faapotopotoga ona faamatala atu i tupulaga o loo fāi mai, mea matagofie ua latou vaaia ua faataunuuina e ala mai i le faalapotopotoga a Ieova.

MAIMOA I LE VITIŌ FAATUMAUINA LE AUTASI E UI I FAASĀSĀGA, ONA TALI LEA O FESILI NEI:

• Na faapefea ona fesoasoani le lālā i Oseteria i o tatou uso i nisi o atunuu na faasā ai la tatou tapuaʻiga?

• Na faapefea ona faamalosia le faatuatua o uso i nei atunuu?

• Aiseā na tuua ai e le toʻatele o tagata talaʻi i Romania le faalapotopotoga a Ieova, ma na faapefea ona latou toe foʻi mai?

• E faapefea i nei mea na tutupu ona faamalosia ai lou faatuatua?