E Faapefea Ona Aogā iā i Tatou Mataupu Silisili o le Tusi Paia?

1. Aiseā e tatou te manaʻomia ai se taʻitaʻiga?

E sili atu le atamai o Lē na foafoaina i tatou. I le avea ai o se Tamā alofa, e alofa mai o ia iā i tatou. E lē gata i lea, e leʻi finagalo o ia ina ia ola tutoʻatasi le tagata. (Ieremia 10:23) E pei lava ona manaʻomia e se tamaitiiti le taʻitaʻiga a ona mātua, e faapena foʻi ona tatou manaʻomia le taʻitaʻiga a le Atua. (Isaia 48:17, 18) O mataupu silisili o loo i le Tusi Paia, o se meaalofa lea mai i le Atua e taʻitaʻia ai i tatou.​—Faitau le 2 Timoteo 3:16.

O tulafono ma mataupu silisili a Ieova, ua aʻoaʻoina ai i tatou i le auala sili e ola ai i le taimi nei, ma faaalia mai ai le auala e maua ai i le lumanaʻi ni taui e tumau. Talu ai na foafoaina i tatou e le Atua, ua talafeagai ai la ona tatou talisapaia lana taʻitaʻiga.​—Faitau le Salamo 19:7, 11; Faaaliga 4:11.

2. O le ā o loo faasino i ai mataupu silisili o le Tusi Paia?

O mataupu silisili o le Tusi Paia e faasino atu i upu moni faavae. A o tulafono e faaaogāina i ni tulaga patino. (Teuteronome 22:8) E tatau ona tatou faaaogā le tomai e mafaufau ai, ina ia malamalama ai i le auala e faatatau ai se mataupu silisili i se tulaga patino. (Faataoto 2:10-12) O se faaaʻoaʻoga, o loo aʻoaʻoina i le Tusi Paia, o le ola o se meaalofa mai i le Atua. O lenā mataupu silisili faavae, e mafai ona taʻitaʻia ai i tatou a o iai i galuega, i le fale, ma a o fai malaga. E fesoasoani iā i tatou ina ia tausia ai pea le saogalemu.​—Faitau le Galuega 17:28.

3. O ā mataupu silisili e lua e sili ona tāua?

Na taʻua e Iesu ni mataupu silisili se lua e sili ona tāua. Ua faailoa mai i le mataupu silisili muamua le fuafuaga autū na soifua ai le tagata—o le iloa lea o le Atua, alolofa iā te ia, ma auauna iā te ia ma le faamaoni. E tatau ona manatua lenei mataupu silisili pe a faia a tatou filifiliga uma. (Faataoto 3:6) O i latou e usitaʻia lenei mataupu silisili o le a mauaina se faauōga ma le Atua, le fiafia moni, ma le ola e faavavau.​—Faitau le Mataio 22:36-38.

Ua faailoa mai i le mataupu silisili lona lua le auala e tatou te maua ai se faiā filemu ma isi. (1 Korinito 13:4-7) O le faatatauina o lenei mataupu silisili, e aofia ai le faaaʻoaʻo i le auala e feutagaʻi ai le Atua ma tagata.​—Faitau le Mataio 7:12; 22:39, 40.

4. E faapefea ona aogā iā i tatou mataupu silisili o le Tusi Paia?

O mataupu silisili o le Tusi Paia ua aʻoaʻoina ai aiga i le auala e autasi ai i le alofa. (Kolose 3:12-14) Ua puipuia foʻi aiga e le Afioga a le Atua, i le aʻoaʻoina o se isi mataupu silisili e faapea, o le faaipoipoga o se faatulagaga e tumau.​—Faitau le Kenese 2:24.

O le mulimuli i le aʻoaʻoga a le Tusi Paia e puipuia ai i tatou i le itu i le tino ma i faalogona. O se faaaʻoaʻoga, e masani ona mananaʻo pule o galuega e faafaigaluega ni tagata o loo ola e tusa ma mataupu silisili o le Tusi Paia, e pei o le faamaoni ma le toʻaga. (Faataoto 10:4, 26; Eperu 13:18) Ua aʻoaʻoina foʻi i tatou e le Afioga a le Atua ia lotomalilie i mea ua maua, ma faatāua le faauōga ma le Atua e sili atu nai i lo o meafaitino.​—Faitau le Mataio 6:24, 25, 33; 1 Timoteo 6:8-10.

O le faatatauina o mataupu silisili o le Tusi Paia, e puipuia ai lo tatou soifua mālōlōina. (Faataoto 14:30; 22:24, 25) O se faaaʻoaʻoga, o le utagia o fautuaga a le Tusi Paia e uiga i le onā, e puipuia ai i tatou mai faalavelave ma faamaʻi e oti ai. (Faataoto 23:20) E faataga e Ieova le inu i le ʻava malosi, ae i se auala e fuafua lelei. (Salamo 104:15; 1 Korinito 6:10) E aogā mataupu silisili a le Atua, e aʻoaʻoina ai i tatou ina ia puipuia a tatou gaoioiga ma mafaufauga. (Salamo 119:97-100) Peitaʻi, e lē usitaʻi Kerisiano moni i tapulaa a le Atua ona o ni faamanuiaga e maua mai ai, ae e latou te faia faapea ina ia faamamaluina ai Ieova.​—Faitau le Mataio 5:14-16.