Ina ia Faaaʻoaʻo iā Iesu, e Tatau Ona .. . .

E TIGĀ ALOFA

A o soifua Iesu o se tagata lelei atoatoa i le lalolagi, e na te leʻi fesagaʻia le tele o mafatiaga ma popolega o loo feagai ma tagata. Peitaʻi, sa ia faaalia pea le alofa loloto i tagata. Na lotomalie Iesu e faia le mea e sili atu mo i latou. O le mea moni, o lona tigā alofa na uunaʻia ai o ia e fesoasoani i isi. Seʻi manatunatu i faaaʻoaʻoga o loo i Mataupu e 32, 37, 57, 99.

FAIGOFIE ONA FAALATALATA ATU ISI IĀ TE OE

Sa faigofie i so o se tagata ona faalatalata atu iā Iesu, talu ai e leʻi iai ni ona uiga e lē ano i tagata, pe manatu e sili atu o ia iā i latou ma e leai sona taimi mo i latou. Sa lagona e tagata le toʻafilemu a o faatasi ma Iesu, ona sa latou iloa e naunau moni o ia iā i latou. Ina ia iloa lenei vala, tagaʻi i Mataupu e 25, 27, 95.

E FINAFINAU I LE TATALO

E masani ona tatalo faatauanau atu Iesu i lona Tamā, pe a na o ia ma pe a faatasi foʻi ma tagata tapuaʻi moni. E tele taimi na tatalo ai o ia, ae e lē na o taimi e aai ai. Na tatalo Iesu e faafetai i lona Tamā, viia o ia, ma saʻili lana taʻitaʻiga a o leʻi faia ni filifiliga tāua. Seʻi iloilo faaaʻoaʻoga o loo i Mataupu e 24, 34, 91, 122, 123.

E LĒ MANATU FAAPITO

E iai taimi na manaʻomia ai e Iesu ona faia sina mālōlōga. Peitaʻi na ia faamuamua pea manaʻoga o isi. E leʻi iai iā te ia se uiga o le fiamatamuamua. Ua ia faataatia ai foʻi i inei se faaaʻoaʻoga e tatou te mulimuli i ai. Ia iloilo pe faapefea ona atagia mai lenā faaaʻoaʻoga i Mataupu e 19, 41, 52.

E LOTOFAAMAGALO

E lē gata sa aʻoaʻo atu Iesu e faatatau i le manaʻomia ona lotofaamagalo, ae sa ia faaalia atu foʻi lenā uiga i le auala na ia feutagaʻi ai ma ona soo ma isi. Ia manatunatu i faaaʻoaʻoga o loo i Mataupu e 26, 40, 64, 85, 131.

E MAELEGA

Na valoia e toetoe o tagata Iutaia uma o le a teena le Mesia, ma o le a fasiotia foʻi o ia e ona fili. O lea, sa faigofie la iā Iesu ona ʻalofia le faia o le tele o mea lelei mo tagata. Nai lo o lea, sa ia maelega i le faaauilumaina o le tapuaʻiga moni. Na ia faataatia se faaaʻoaʻoga o le maelega mo ona soo uma, o ē o loo fesagaʻia le lē ano ma le tetee mai o tagata. Tagaʻi i Mataupu e 16, 72, 103.

E LOTOMAULALO

E lē mafaitaulia vala e sili atu ai Iesu i lo o tagata e lē lelei atoatoa, e pei o lona silafia o mea ma lona atamai. O lona tulaga lelei atoatoa, na ia maua ai tomai faalemafaufau e sili atu ma faia mea e sili atu nai lo o mea e mafai ona faia e tagata. Peitaʻi, na auauna atu pea o ia ma le lotomaulalo i isi. O le a e maua ni lesona e faatatau i lenei vala i Mataupu e 10, 62, 66, 94, 116.

E ONOSAʻI

Na faaalia pea e Iesu le onosaʻi i ona aposetolo ma isi, ina ua latou lē taulau e faaaʻoaʻo i lana faaaʻoaʻoga, pe faatatauina foʻi mea sa ia aʻoaʻoina atu. Sa ia onosaʻi pea ma toe taʻua lesona sa latou manaʻomia, ina ia latou mafuta vavalalata atu ai iā Ieova. Ia mafaufau loloto i faaaʻoaʻoga o le onosaʻi o Iesu i Mataupu e 74, 98, 118, 135.