E te Silafia?

O ai “i latou o le aiga o Kaisara” na auina atu o latou alofaaga faa-Kerisiano i uso i Filipi e ala iā Paulo?

▪ E tusa o le 60 i le 61 T.A., na tusi atu ai le aposetolo o Paulo mai i Roma i le faapotopotoga i Filipi, ma ia taʻua ai le Kaisara po o le Emeperoa o Nero. Ae o ai o le aiga o Nero e auina atu o latou alofaaga i Kerisiano i Filipi?—Filipi 4:22.

E sesē le manatu e faapea, e faasino le faaupuga o le “aiga o Kaisara,” i aiga vavalalata o le emeperoa. Ae o loo faatatau i tagata uma e auauna i le emeperoa, o pologa ma tagata saʻoloto i Roma ma isi itumalo. O lea la, o “le aiga o Kaisara” e aofia ai le faitau afe o auauna. E latou te faatinoina matafaioi eseese o ni pule, o ē auauna i le maota o le emeperoa, i ona fanua ma ana meatotino. E iai foʻi nisi e galulue i le puleaina o le malo.

E foliga mai, o nisi o auauna a le emeperoa i Roma na avea ma Kerisiano, ae e lē o iloa pe na liulotu ona o le talaʻiga a Paulo i Roma. Ae po o le ā lava lo latou tulaga, ae e foliga mai sa latou naunau faapitoa i le faapotopotoga i Filipi. Sa avea Filipi ma kolone o Roma, o lea, e toʻatele fitafita ma tagata faigaluega a le malo ua litaea o loo aumau ai i inā. Atonu la o ni Kerisiano i Filipi e uō ma nisi i Roma, ia o loo faaoo atu e Paulo o latou alofaaga.

E tusa ma le Tulafono a Mose, o le ā le uiga o le faaipoipo i le avā a le uso ua oti?

▪ I Isaraelu anamua, afai e maliu se tamāloa ae e leai sona atalii, sa tatau ona faaipoipo lona uso ma lana avā, ia maua ai se fanau e faaauau ai le gafa o lē ua oti. (Kenese 38:8) O lenei fuafuaga na mulimuli ane faaaofia i le Tulafono a Mose. (Teuteronome 25:5, 6) Ua faaalia i gaoioiga a Poasa i le tusi o Ruta, e faalautele atu lenei tulafono i isi tane o le ʻauaiga pe afai e leai se uso o lē ua oti.—Ruta 1:3, 4; 2:19, 20; 4:1-6.

Sa faia foʻi i aso o Iesu lenā fuafuaga, e pei ona faaalia i faamatalaga a le ʻau Satukaio o loo faamauina i le Mareko 12:20-22. Na faapea mai se tusitala o le uluaʻi senituri o Flavius Josephus, o lenei faiga e lē gata e faaauau ai le gafa o le aiga, ae e tumau ai foʻi le tofi o le aiga, ma tausia ai foʻi le fafine lea ua oti lana tane. I na taimi, e lē maua e le avā se tofi i meatotino a lana tane. Ae peitaʻi, e maua e le tamaitiiti e tupuga mai i se faaipoipoga faapena le tofi o lē ua oti.

E leʻi faamalosia e le tulafono se tane pe a musu e faaipoipo ma le avā a lona uso ua oti. Ae sa manatu i ai o se luma pe afai e lē manaʻo se tane e “faaauau le gafa . . . o lona uso.”—Teuteronome 25:7-10; Ruta 4:7, 8.