LESONA 01
E Faapefea Ona Fesoasoani le Tusi Paia iā te Oe?
E toetoe o i tatou uma e iai fesili tāua e faatatau i le olaga, mafatiaga, oti ma le lumanaʻi. E tatou te popole foʻi i mea fai i aso uma e pei o le tausia o o tatou manaʻoga, ma le auala e maua ai le fiafia i le aiga. E toʻatele tagata ua iloa, e lē gata e maua i le Tusi Paia tali o fesili tāua i le olaga, ae e maua mai ai foʻi fautuaga aogā mo le olaga i aso taʻitasi. Pe e te manatu e mafai ona fesoasoani le Tusi Paia i so o se tasi e te masani ai?
1. O ā nisi o fesili e maua tali i le Tusi Paia?
O nisi nei o fesili tāua e maua tali i le Tusi Paia: Na faapefea ona iai le ola? O le ā le fuafuaga o le olaga? Aiseā ua mafatia ai tagata? O le ā e tupu pe a tatou feoti? Afai e manaʻomia e tagata uma le filemu, aiseā ua faateteleina ai taua? O le ā o le a tupu i le lalolagi i le lumanaʻi? E faalaeiauina i tatou e le Tusi Paia e saʻili tali o na fesili, ma e faitau miliona ua latou maua tali faamalieloto.
2. E faapefea ona fesoasoani le Tusi Paia iā i tatou ia maua le fiafia i aso taʻitasi?
E maua i le Tusi Paia fautuaga lelei. Mo se faataʻitaʻiga, e aʻoaʻo ai aiga i le auala e maua ai le fiafia moni. E maua mai ai fautuaga i le auala e feagai ai ma popolega, ma le auala e maua ai le olioli i a tatou galuega. A o e suʻesuʻeina lenei tusi, o le a e iloa ai aʻoaʻoga a le Tusi Paia e faatatau i nei mataupu, ma le tele o isi mataupu. O le a e talitonu ai, “o Tusitusiga Paia uma [po o mea uma i le Tusi Paia] . . . e aogā.”—2 Timoteo 3:16.
E lē suia e lenei tusi le Tusi Paia. Ae e uunaʻia ai oe e suʻesuʻe le Tusi Paia. O lea, e matou te faalaeiau oe e faitau mau o loo i nei lesona, ma faatusatusa i mea o loo e suʻesuʻeina.
SAʻILIʻILI ATILI
Iloilo pe faapefea ona fesoasoani le Tusi Paia i tagata, faapefea ona e maua le fiafia pe a faitau i ai, ma pe aiseā e lelei ai le saʻili i se isi mo se fesoasoani ina ia e malamalama ai.
3. E mafai e le Tusi Paia ona taʻitaʻia i tatou
E tai pei le Tusi Paia o se molī uila e mumū malosi. E mafai ona fesoasoani iā i tatou i le faia o filifiliga lelei, ma faailoa mai mea o le a tutupu i le lumanaʻi.
Faitau le Salamo 119:105, ona talanoa lea i fesili nei:
O le ā le manatu o le faisalamo e faatatau i le Tusi Paia?
O le ā sou manatu e faatatau i le Tusi Paia?
4. E mafai ona tali e le Tusi Paia a tatou fesili
Na faatoʻā iloa ane e se fafine, o loo i le Tusi Paia tali o fesili ua leva ona mafaufau i ai mo le tele o tausaga. Faaali le VITIŌ, ona talanoa lea i fesili nei:
I le vitiō, o ā ni fesili na fia iloa e lenei fafine tali?
Na faapefea ona fesoasoani le suʻesuʻeina o le Tusi Paia iā te ia?
E faalaeiauina i tatou e le Tusi Paia ina ia fai ni fesili. Faitau le Mataio 7:7, ona talanoa lea i le fesili lenei:
O ā ni au fesili e mafai ona tali e le Tusi Paia?
5. Ia e fiafia e faitau le Tusi Paia
E toʻatele tagata e fiafia e faitau le Tusi Paia ma maua ai aogā. Faaali le VITIŌ, ona talanoa lea i fesili nei:
I le vitiō, o ā manatu o talavou e faatatau i le faitau tusi?
E ui latou te lē fiafia e faitau, ae aiseā ua fiafia ai e faitau le Tusi Paia?
E tatou te maua i le Tusi Paia faatonuga e faalaeiauina ai i tatou, ma aumaia ai se faamoemoe. Faitau le Roma 15:4, ona talanoa lea i le fesili lenei:
Pe e te fia iloa atili folafolaga a le Tusi Paia e faatatau i faamāfanafanaga ma le faamoemoe?
6. E mafai ona fesoasoani mai isi ina ia tatou malamalama ai i le Tusi Paia
E lē gata i le faitauina o le Tusi Paia, ae e toʻatele ua latou iloa le aogā o le suʻesuʻe faatasi ma isi. Faitau le Galuega 8:26-31, ona talanoa lea i le fesili lenei:
E faapefea ona tatou malamalama i le Tusi Paia?—Tagaʻi i fuaiupu e 30 ma le 31.
Na manaʻomia e le tamāloa Aitiope le fesoasoani ina ia malamalama ai i Tusitusiga Paia. E toʻatele tagata i aso nei ua latou iloa le aogā o le suʻesuʻe o le Tusi Paia faatasi ma isi
UA FAAPEA MAI NISI: “O le suʻesuʻeina o le Tusi Paia, e maʻimau ai le taimi.”
Ae o le ā sou manatu? Aiseā?
AOTELEGA
E maua i le Tusi Paia fautuaga mo le olaga i aso taʻitasi, tali ai fesili tāua, ma aumaia ai faamāfanafanaga ma le faamoemoe mo tagata.
Fesili Autalu
O ā ituaiga fautuaga e tatou te maua mai le Tusi Paia?
O ā nisi o fesili e maua tali i le Tusi Paia?
O ā ni mea e te manaʻo e aʻoaʻo mai i le Tusi Paia?
MANATU FAAOPOOPO
Iloilo le auala e aogā ai fautuaga a le Tusi Paia i aso nei.
“Aʻoaʻoga a le Atua—Atamai e Aogā Pea” (Le Olomatamata Nu. 1 2018)
Iloilo le auala na fesoasoani ai le Tusi Paia, i se tamāloa na tauivi ma ona faalogona mai lava i lona laʻitiiti.
Iloilo fautuaga aogā a le Tusi Paia mo le olaga i le aiga.
E toʻatele tagata e lē iloa po o ai o loo pulea le lalolagi. Ae mātau le manatu o le Tusi Paia e faatatau i le pule o le lalolagi.