O le a Manatua Faapēfea Oe e Ieova?
“LOʻU Atua e, ia e manatu mai ia te au.” E tele taimi na augani atu ai Neemia i le Atua i na upu. (Neemia 5:19; 13:14, 31) O se mea e masani tele ai le faaaogā e tagata o faaupuga augani faapena e ōle atu ai i le Atua, pe a oo ina matuā mafatia.
E ui i lea, o le ā e mafaufau i ai tagata pe afai latou te ōle atu i le Atua ina ia manatua mai i latou? E manino lava, o loo latou faamoemoe i le Atua na te faia ni mea e sili atu na i lo le tau ina manatua o o latou igoa. E lē masalomia lo latou faamoemoe i le auala lava e tasi lea na faamoemoe i ai se tasi o pagota na faasalaina i le isi itu o Iesu. I le lē pei o le isi pagota, na ʻaiʻoi atu ai o ia lenei ia Iesu e faapea: “Ia e manatua mai aʻu, pe a e afio mai i lou malo.” Na manaʻo o ia e lē gata ia manatua o ia e Iesu ae ia faia foʻi se mea mo ia—ia toe faatūina o ia.—Luka 23:42.
Ua faailoa soo mai e le Tusi Paia e faapea o le “manatua” e le Atua e faauiga atu lea i le faia o se gaoioiga mautinoa. Mo se faaaʻoaʻoga, ina ua mavae le lofitūina o le lalolagi i le lolo mo le 150 aso, “ua manatua e le Atua Noa . . . . Ua faaagi atu e le Atua le matagi i le lalolagi; ona maui ai lea o le vai.” (Kenese 8:1) I senituri mulimuli ane, na tatalo atu ai Samasoni ina ua faatauasoina ma saisaia e tagata Filisitia: “Ieova e, ia e manatu mai, ma e faamalosi mai tau lava i lenei toe mea.” Na manatua e Ieova Samasoni e ala i le tuuina atu ia te ia o le malosi e silisili atu na i lo le malosi faaletagata ina ia mafai e ia lava ona taui ma sui atu i fili o le Atua. (Faamasino 16:28-30) E tusa ai o Neemia, na faamanuia e Ieova ana taumafaiga, ma sa faafoʻisia ai le tapuaʻiga moni i Ierusalema.
Na tusi le aposetolo o Paulo e faapea: “O mea uma foi na tusia anamua, na tusia ia e aʻoaʻo mai ai ia te i tatou; ina ia tatou maua le faamoemoe e tupu mai i le onosai, ma le faamafanafana mai o Tusi.” (Roma 15:4) Pe afai tatou te manatuaina Ieova e ala i le saili e faia lona finagalo, e pei ona sa faia e ana auauna faamaoni i taimi ua mavae, e mafai ai ona tatou mautinoa e faapea o le a manatuaina e Ieova i tatou e ala i le fesoasoani mai ia i tatou ina ia maua mea o tatou manaʻomia i aso taʻitasi, e ala i le faamalosia o i tatou i lalo o tofotofoga, ma e ala i le laveaʻia o i tatou pe a ia aumaia le faamasinoga i ē lē amioatua.—Mataio 6:33; 2 Peteru 2:9.