Pe e Mafai ona E Talitonu i le Tusi Paia?

AFAI e te tago i se Tusi Paia, pe e te faatalitalia ea e maua ai se tupe? Ae faapefea lenei tupe siliva ua leva?

E toatele tagata ua latou mafaufau faapea o le Tusi Paia o se tusi o loo aumaia ai tala e lē masani ai ma amioga mamā e ofo ai. Peitai, latou te lē talitonu faapea o tala i le Tusi Paia o ni talafaasolopito moni, o lea ua latou teena ai le faapea o le Afioga a le Atua. E ui i lea, o loo i ai ni faamaoniga e lava ma totoe o le moni aʻiaʻi o le Tusi Paia. O lenei tupe siliva (ua faatelēina) e fai ma faaaʻoaʻoga lelei. O le ā ua fai mai ai le tusitusiga e uiga i lenei tupe?

Sa faia lenei tupe siliva i Taso, o se taulaga e i le itu i saute i sasae o le oganuu ua taʻua nei o Take. Sa gaosia lenei tupe siliva i le taimi o le pulega a le kovana Peresia o Maalaelu i lona fā o senituri T.L.M. O loo faailoa ai o ia o le kovana o le itumalo ua taʻua i “Tala Mai o le Vaitafe,” lea e taʻua o le Vaitafe o Eufirate.

Ae aiseā e naunau ai i lenei faaupuga? Auā o le ā mauaina lena lava faamatalaga i lau Tusi Paia. I le Esera 5:6-6:13 o loo aumaia ai ni fesootaiga tusitusia a le tupu Peresia o Tariu ma le kovana o Tatenai. O lena mea na tupu, sa faatatau i le toe fausia o le malumalu o tagata Iutaia i Ierusalema. Sa avea Esera o se tusiupu poto o le Tulafono a le Atua, ma o le a e faatalitalia ai le saʻo lelei, ma le moni o mea na ia tusia. O le a e tagai ai foi i le Esera 5:6 ma le 6:13 o loo ia taʻua ai Tatenai “o le alii e pule i ona tala mai o le vaitafe.”

Na tusia e Esera lena mea e tusa o le 460 T.L.M., e tusa ma le 100 tausaga a o leʻi faia lenei tupe siliva. Atonu e manatu nisi tagata faapea e lē tāua tele faailoga anamua e aloaia ai lea alii. Peitai afai e te faalagolago atoatoa i le au tusitala o le Tusi Paia e tusa lava pe itiiti a latou faamatalaga, pe e lē faateleina ai ea lou mautinoa i nisi mea na latou tusia?

I mataupu muamua e lua o lenei mekasini, o le ā e mauaina ai nisi mafuaaga faaopoopo mo lena mautinoa.

[Ē Ana le Ata i le itulau 32]

Collection of Israel Dept. of Antiquities Exhibited & photographed Israel Museum