O le Malosi o i se Upu Alofa

“E faavaivaia le loto i le popole, ae maeu le faafiafiaina e se upu alofa!”—Faataoto 12:25, Knox.

UA LĒ sao aʻiaʻi Kerisiano mai faigata. E iai ni taimi e oo ai i a i latou le popole ona o loo iai nei i “aso faigata.”—2 Timoteo 3:1.

Pe a puapuagatia ona o nei faigata, maeu le lelei o le faalogo atu i se upu alofa mai se uo faamaoni! “E alofa le uo i aso uma lava; a e fanau [“ma o le,” NW] uso mo le aso vale,” o le upu lea a le Tusi Paia. (Faataoto 17:17) Sa taʻua le tagata faatuatua o Iopu o se uo faapena. E oo lava i a Elifasa sa faapea mai e faatatau i a te ia: “A tautevateva se tasi, ua vaivai ma lē lavatia, o au upu sa faamalosia ai o ia e tu.”—Iopu 4:4, Today’s English Version.

E ui i lea, ina ua manaomia e Iopu se faalaeiauga, sa leʻi gaganaina e Elifasa ma ana uo ni upu alofa. Na latou tuuaia Iopu mo ona puapuaga, i lo latou faauiga e faapea atonu na iai sana agasala lilo. (Iopu 4:8) Ua faapea mai le Interpreter’s Bible: “O le mea na manaomia e Iopu, o le faaalia atu o le tiga alofa mai le loto o se tagata. Pau le mea na ia maua o ni faamatalaga o aʻoaʻoga faalotu logolelei na manatu i ai tagata e saʻo aʻiaʻi, faapea ma tulaga tau amio ae faamaonia le lē aogā.” Ona o le mafatia tele o Iopu i le faalogo atu i tautalaga a Elifasa ma ana aumea na mafua ai ona faamalosia o ia e alaga faapea: “Tou te faatigaina ea loʻu loto, ma outou tuʻimomomoina aʻu i upu seia afea?”—Iopu 19:2.

Ia aua lava neʻi tatou faapogaia so tatou uso a auauna i le Atua e alaga aʻe i le mafatia ona o ni ā tatou upu lē magafagafa ma lē alofa. (Faatusatusa i le Teuteronome 24:15.) Ua lapatai mai faapea se faataoto mai le Tusi Paia: “O au upu e faaola ai pe faaumatia ai; o lea, ia e talia āuga e tutupu mulimuli ane ona o au upu.”—Faataoto 18:21, TEV.

I lo tatou iloaina la o le malosi o i faamatalaga, ia tatou mulimuli i le faataitaiga a le aposetolo o Pauro. A o iai o ia i Maketonia, sa ia “apoapoai [“faalaeiau,” NW] atu ia te i latou i upu e tele.”—Galuega 20:2.