FESILI MAI LE ʻAUFAITAU

O le ā le “faamaoniga” ma le “faamaufaailoga” mai i le Atua, lea e maua e Kerisiano faauuina taʻitoʻatasi?—2 Kori. 1:21, 22.

Faamaoniga: Ua taʻua i se tasi o tusi, o le upu Eleni lea e faaliliu mai ai le upu “faamaoniga” o loo i le 2 Korinito 1:22 o se “upu aloaʻia faaletulafono ma faapisinisi,” e uiga atu i le ʻuluaʻi totogi, po o se mea e faamau ai, lea e totogi muamua ai se vaega o le tau, ma faamausalī ai le aiā faaletulafono i se mea, pe ina ia aloaʻia ai se maliega.’ Pe a faauuina Kerisiano i le agaga paia, ua latou mauaina se faamaoniga, peitaʻi o lo latou totogi atoa po o lo latou taui, o loo faamatalaina i le 2 Korinito 5:1-5, e aofia ai le mauaina o lo latou tino faalelagi e lē pala. E aofia ai foʻi i lo latou taui le mauaina o le meaalofa o le ola e lē mafai ona oti.—1 Kori. 15:48-54.

I le gagana Eleni faaonapōnei, o le upu “faamaoniga” e talitutusa ma le faaupuga mama faamau. E talafeagai lelei lenā faataʻitaʻiga iā i latou o le a avea ma vaega o le faletua faafaatusa o Keriso.—2 Kori. 11:2; Faaa. 21:2, 9.

Faamaufaailoga: I le taimi ua teʻa, sa faaaogā se faamaufaailoga e avea o se saini e faamaonia ai le moni o se mea, o lē e ana, pe e faamaonia ai se maliega. E tusa ai o le tulaga o le ʻaufaauuina, ua “faamaufaailoga” po ua faailogaina i latou i se auala faafaatusa e le agaga paia, e faamaonia ai o le Atua e ana i latou. (Efe. 1:13, 14) Peitaʻi, e lē o le faamaufaailogaina faaiʻu lenei, auā o le faamaufaailogaina faaiʻu e faatoʻā maua i se taimi a o leʻi maliu ma le faamaoni se tasi, pe a o leʻi gāpā foʻi le puapuaga tele.—Efe. 4:30; Faaa. 7:2-4.