Fanau ma Telefoni—Vaega 1: Pe e Tatau Ona Iai se Telefoni a Laʻu Tama?

Ua faatupulaʻia fanau ua iai telefoni,a ma o le toʻatele e faaaogā telefoni e fesootaʻi ai i le Initaneti pe a na o i latou i o latou potu. O ā lamatiaga o le faataga o le lua tama e fai sana telefoni? Ae pe e iai ni aogā? O le ā le tele o le taimi o le aso e faataga ai o ia e faaaogā le telefoni?

• Mea e tatau ona e iloa

• Ia fai se iloiloga

• Ia fesili ifo pe ua talafeagai

Mea e tatau ona e iloa

O Aogā

• Saogalemu o le fanau, filemu o le mafaufau o mātua. Ua faapea mai Bethany, o se tinā e toʻalua lana fanau talavou: “Ua tatou ola i se lalolagi e mataʻutia le leaga. E tāua ai i fanau ona fesootaʻi i mātua.”

  Ua faamatala e se tinā e igoa e Catherine: “E iai nisi polokalame o le telefoni e mafai ona e fesootaʻi saʻo i le telefoni a lau tama, ma iloa ai po o fea o loo iai. Pe afai o loo ia aveina se taavale, e te iloa foʻi le saoasaoa o loo alu ai.”

• Fesoasoani i meaaʻoga. Ua taʻua e se tinā e igoa iā Marie: “E lafo mai meaaʻoga a le fanau i imeli po o feʻau tusitusia, ma e fesootaʻi foʻi ma o latou faiaʻoga i na lava auala.”

O Lamatiaga

• Tele o le taimi e faaaogā ai. Ua faaalu e talavou le tele o le taimi o le aso i a latou telefoni. O le mea moni, e tele foʻi le taimi o loo faaalu e mātua i a latou masini faaonapōnei, nai lo o le faia o ni talanoaga uigā ma le fanau. E pei ona faamatalaina e se faufautua, o nisi aiga ua pei “o ni tagata ese e ui ina nonofo faatasi, ona o le auala e faaaogā ai a latou masini faaonapōnei.”b

• Ata matagā tau feusuaʻiga. E tusa ai o se fua faatatau, e pe ā o le lima sefulu pasene o talavou, e saʻili atu i ata matagā tau feusuaʻiga i masina taʻitasi. E lē faateʻia ai ona o le faigofie ona maua e talavou o na ata i a latou telefoni ma masini faaonapōnei. Ua faapea mai William, o se tamā e toʻalua lana fanau talavou: “O le faataga o se tamaitiiti e fai sana telefoni, e tai pei ua tatala atu e mātua le avanoa, e maua ai e fanau so o se ata matagā taufeusuaʻiga i so o se mea e iai.”

• Pulea e le telefoni. O le toʻatele ua pulea e a latou telefoni. E matuā popole lava ma faanoanoa pe a leiloa le telefoni, pe oo ai foʻi ina maʻi. Ua faamatala mai e isi mātua, e ese le lē faaaloalo o a latou fanau pe a faaaogā a telefoni. Ua faapea mai Carmen: “Pe a ou fia talanoa i laʻu tama i nisi taimi, e faasesepa mai ona mata, faalii ma fai mai se tala lē faaaloalo ona o le faalavelave atu o fai lana telefoni.”

• Isi lamatiaga. O isi lamatiaga o le faaaogāina o le telefoni, e taufaamataʻu ai isi i luga o le initaneti, felafoaʻi ai ata ma faamatalaga matagā taufeusuaʻiga ma aafia ai i faafitauli tau soifua mālōlōina ona o le lē lava o le moe. O nisi talavou e faaaogāina se polokalame e taʻua o le “ghost app,” e foliga mai e lelei e pei o le calculator, e nanā ai mea e lē mananaʻo e iloa e o latou mātua.

  Ua taaofaʻi mai e Daniel o se tamā e iai lona afafine talavou: “O le telefoni ua tatala ai le avanoa e maua ai so o se mea, e lelei pe leaga i luga o le Initaneti.”

Ia fai se iloiloga

• ‘Pe e manaʻomia e laʻu tama se telefoni?’

  Ua faapea mai le Tusi Paia: “O le tagata e iai le utaga mamao, e na te iloilo lelei ona laasaga” (Faataoto 14:15) E tusa ai o lenā manatu, ia fesili ifo:

  ‘Pe e tatau ona fai se telefoni a laʻu tama mo lona saogalemu po o nisi māfuaaga? Po ua uma ona ou iloiloina ma le faaeteete aogā ma lamatiaga? O le ā se isi auala e ma te fesootaʻi ai na i lo o le telefoni?’

  Na fai mai se tamā e igoa iā Todd: “O loo maua lava telefoni e lē faaaogāina ai le initaneti, ae e mafai ona fesootaʻi ai ma le fanau e ala i le vili atu pe lafo i ai se feʻau tusitusia, ma sefe ai foʻi tupe.”

• ‘Po ua nofosauni laʻu tama i lana matafaioi pe a avatu i ai se telefoni?’

  Ua faapea mai le Tusi Paia: “O le loto o le tagata atamai ua i lona lima taumatau.” (Failauga 10:2) E tusa ai o lenā manatu, ia fesili ifo:

  ‘E faapefea ona ma mautinoa e maufaatuatuaina le ma tama? Po o saʻoloto le talanoa mai a le ma tama? Po o faamaoni e faailoa mai mea uma, e aofia ai ma ana uō? O le ā le auala o loo ia pulea ai le faaaogāina o isi masini e pei o le TV, tablet po o se komepiuta?’ Na taʻua e se tinā e igoa iā Serena: “O le telefoni o se meafaigaluega aogā, ae e tele foʻi ona lamatiaga. E tāua le iloa o le matafaioi o le a ou tuu atu i laʻu tama, i le avatu i ai o se telefoni ae e leʻi iai sona poto masani.”

• ‘Po ua ou nofosauni i laʻu matafaioi?’

  Ua faapea mai le Tusi Paia: “Ia aʻoaʻo le tama e tusa ma le ala saʻo.” (Faataoto 22:6) E tusa ai o lenā manatu, ia fesili ifo:

  ‘Po ua ou malamalama lelei i le telefoni, ina ia mafai ai ona ou fesoasoani i laʻu tama e iloa ma ʻalofia lamatiaga e ono tulaʻi mai? Po ua ou iloa aveese nisi o polokalame o le telefoni e lē manaʻomia? E faapefea ona ou fesoasoani i laʻu tama e pulea lelei le auala e faaaogā ai le telefoni?’ Na faapea mai Daniel lea na taʻua muamua: “Ua ou vaai i le toʻatele o mātua e tuulafoaʻi telefoni i a latou fanau.”

O le manatu tāua: E manaʻomia ona toleni fanau e faaaogā ma le atamai le telefoni. O loo taʻua i le tusi Indistractable, “E faaosoosoina fanau e faaalu le tele o le taimi i le telefoni, aemaise lava pe a lē ano ma leai se taʻitaʻiga a matua.”