“Na Ou Ola i se Olaga Soonafai”

OLAGA SA IAI

O nisi tagata e umi se taimi faatoʻā latou aʻoaʻoina ni lesona mai i mea mataʻutia o le olaga na tutupu iā i latou. O le mea lenā na tupu iā te aʻu. Na ou fanau ma ola aʻe i Barcelona, o le aai e lona lua le telē i Sepania. Na nonofo lo matou aiga i se nofoaga e taʻua o Somorrostro. O lenei nofoaga e telē se vaega o le matafaga o le aai o Barcelona e aofia ai. Na lauiloa Somorrostro i soligatulafono ma le faatauina o fualaau faasāina.

E toʻaiva la matou fanauga ma o aʻu le ulumatua. Talu ai e matitiva lo matou aiga, na ave ai aʻu e loʻu tamā e faafaigaluega i se kalapu tenisi i lo matou vaipanoa. E na o le sefulu oʻu tausaga i le taimi lenā, ma e sefulu itula o le aso ou te galue ai. O lea, e leʻi mafai ai ona ou alu i le aʻoga e pei o isi tamaiti e matou te tupulaga. Ina ua 14 oʻu tausaga, na ou galue ai i le faaaogāina o se masini i se fale e gaosi ai uʻamea.

I le 1975, na faatonuina ai aʻu ina ia auai i le vaegaʻau ma e lē faia i ai sau filifiliga. Na ou manaʻo e faia ni mea mataʻina i loʻu olaga. O lea, na ou auai ai i se ʻAutau Faapitoa a Sepania na faamautū i Melilla i Aferika i Mātū, o se nofoaga e pulea e Sepania. Na matuā leaga le olaga na ou ola ai i lenā taimi, ona sa ou faaaogāina fualaau faasāina ma faaaogāsesē le ʻava malosi.

Ina ua ou tuua le ʻAutau Faapitoa na ou toe foʻi ai i Barcelona ma fai ai laʻu kegi leaga. Na matou gaoia so o se mea e matou te tau i ai, ona matou faatauina lea ina ia maua ai ni tupe e faatau ai le ʻava malosi ma fualaau faasāina. Na amata foʻi ona ou faaaogāina isi ituaiga fualaau faasāina malolosi e taʻua o le LSD ma le amphetamine, ma na ou fiafia foʻi e faia feusuaʻiga lē mamā, faaaogāsesē le ʻava malosi, ma taalo i taaloga faitupe. O lenā ituaiga olaga leaga na faateteleina ai loʻu sauā. Ou te tauave i taimi uma se tamaʻi naifi, o se toʻi po o se sapelu, ma ou te leʻi fefe lava e faaaogā pe a manaʻomia.

E iai se aso na matou gaoia ai ma laʻu kegi se taavale ma na matou tuli ai ma leoleo. Na pei o se vaaiga i se ata tifaga. Pe ā ma le 20 maila (30 kilomita) le mamao talu ona matou tuli ma leoleo, ae tafana loa i matou. Na lavea le matou taavale ma na matou sosola ese. Ina ua iloa e loʻu tamā le mea na tupu, na ia tuliesea ai aʻu mai i lo matou aiga.

I le lima tausaga na sosoo ai, na ou ola ai i se olaga soonafai. Ou te moe i poletito o faleoloa, totonu o loli, o nofoa i paka, ma fanuatanu. Na iai foʻi le taimi na ou nofo ai i totonu o se ana. Na matuā leai se fuafuaga o loʻu olaga, ma na ou lagona ai e lē afāina pe ou te ola pe ou te oti foʻi. Ou te manatuaina na ou seleia oʻu tapulima ma oʻu ogālima, i taimi na ou faaaogāina ai fualaau faasāina. E oo mai i le taimi lenei o loo iai pea na maʻilaʻila.

SUIA E LE TUSI PAIA LOʻU OLAGA

Ina ua 28 oʻu tausaga, na suʻe ai aʻu e loʻu tinā. Ina ua ia maua aʻu, na manaʻo ai ou te toe foʻi atu i lo matou aiga. Na ou ioe i ai ma ou taʻutino i ai o le a ou taumafai e sui loʻu olaga, ae na umi se taimi faatoʻā mafai ona ou faataunuuina lenā folafolaga.

I se tasi aoauli, na ō mai ai ni Molimau a Ieova se toʻalua i lo matou fale. A o oʻu faalogologo atu iā i laʻua, na eʻē mai loʻu tamā i totonu o le fale ma fai mai e tutuli ese ae tapuni le faitotoʻa. Talu ai e lē masani loʻu olaga i le faatonu mai e se isi, na ou lē ano ai i lana faatonuga. Na la ofoina mai iā te aʻu ni tamaʻitusi se tolu ma na ou taliaina ma le fiafia. Na ou fesili i ai po o fea e fai ai a latou sauniga, ma i ni nai aso mulimuli ane ai, na ou alu ai i le Maota mo Sauniga.

O le mea muamua lava na ou mātauina o le mamā o laʻei o tagata. Ae e ese mai ai lava aʻu, e uumi loʻu lauulu, e lē selea laʻu ʻava, ma e maanuminumi oʻu ofu. Na ou iloa ai e lē talafeagai ona ou alu i totonu, o lea na ou tūtū ai i fafo o le maota. Ae na faateʻia aʻu ina ou vaai atu iā Juan, o se tasi o la matou kegi o loo ia ofuina se peleue. Mulimuli ane na ou iloa ai ua pe ā ma le tausaga talu ona avea o ia ma Molimau a Ieova. O lea na uunaʻia ai aʻu ou te alu i totonu o le maota e auai i le sauniga. O loʻu auai i le sauniga i lenā aso, na amata ai ona ou faia suiga i loʻu olaga.

Na ou talia se suʻesuʻega faale-Tusi Paia, ma na vave ona ou iloa pe afai ou te manaʻo e maua le finagalo malie o le Atua, e manaʻomia ona suia oʻu uiga sauā ma le olaga lē mamā na ou ola ai. E leʻi faigofie ona ou faia na suiga. Na ou aʻoaʻoina, ina ia faafiafia le finagalo o Ieova e tatau ona “suia [loʻu] mafaufau.” (Roma 12:2) Na matuā pāʻia loʻu loto i le alofa mutimutivale o le Atua. E ui i mea sesē na ou faia, ae na ou lagona o loo tuuina mai e le Atua se avanoa e suia ai loʻu olaga. O mea na ou aʻoaʻoina e faatatau iā Ieova le Atua, na matuā pāʻia ai loʻu loto. Na matuā manino mai i loʻu mafaufau, e iai Lē na foafoaina mea e manatu mamafa mai iā te aʻu.—1 Peteru 5:6, 7.

O lea na uunaʻia ai aʻu e amata ona faia suiga. O se faataʻitaʻiga, ina ua talanoaina le mataupu e faatatau i le tapaa i laʻu suʻesuʻega faale-Tusi Paia, na ou faapea ifo ai, ʻPe afai e finagalo Ieova ia faaauau ona ou mamā ma ia lē ponā i so o se mea, e tatau la ona tuu laʻu ulaula!’ (2 Korinito 7:1) O lea na tiaʻi ai aʻu tapaa i le lapisi.

Na tatau foʻi ona taofi loʻu faaaogāina ma le faatauina atu o fualaau faasāina. O lenā mea, na manaʻomia ai le tele o le taimi ma taumafaiga. Ina ia ausia lenā sini, e lē tatau ona ou toe faifaimea faatasi ma aʻu uō sa iai. E leʻi fesoasoani a latou taaʻiga ou te agaʻigaʻi ai i luma faaleagaga. Peitaʻi, na ou matuā faalagolago i le Atua ma le fesoasoani a aʻu uō fou i le faapotopotoga. O lo latou faaalia o le alofa ma le naunau totino iā te aʻu, o se mea ou te leʻi tofo muamua i ai. A o faagasolo ni masina, na ou saʻoloto atoatoa mai ai i le faaaogāina o fualaau faasāina ma mafai ai ona ou ʻofu i le tagata fou.’ O le iʻuga, na fesoasoani ai iā te aʻu e maua le finagalo malie o le Atua. (Efeso 4:​24) Iā Aokuso 1985, na ou papatiso ai o se tasi o Molimau a Ieova.

AOGĀ IĀ TE AʻU

Ua faaleleia e le Tusi Paia loʻu olaga. Ua ou saʻoloto ai mai i aafiaga mataʻutia o le olaga leaga na ou ola ai, lea na faaleagaina ai loʻu tino ma na oo ai iā te aʻu lagona o le lē aogā. O le mea moni, e silia ma le 30 ē na avea ma aʻu uō ua feoti a o talavou i le AIDS po o isi maʻi, e māfua mai i le faaaogāina o fualaau faasāina. Maʻeu loʻu lotofaafetai ona o le faatatauina o mataupu silisili o le Tusi Paia, lea ua mafai ai ona ou ʻalofia na āuga faanoanoa!

Ua ou lē toe tauaveina ni naifi ma ni toʻi, ae ua ou tauaveina nei le Tusi Paia e fesoasoani ai i tagata, o se mea ou te leʻi mafaufauina ou te faia. O loo ma auauna faatasi nei ma laʻu avā o ni faifeʻau faataimi atoa a Molimau a Ieova.

E leʻi avea oʻu mātua o ni Molimau a Ieova, ae na la talisapaia aogā na ou maua mai ona na ou suʻesuʻeina le Tusi Paia. O le mea moni, na tū loʻu tamā e puipuia Molimau a Ieova mai i taufaifaiga a ē na latou faigaluega faatasi. Na ia iloaina lelei suiga mataʻina i loʻu olaga ona o laʻu tapuaʻiga. E masani ona fai mai loʻu tinā, ua leva na tatau ona ou suʻesuʻeina le Tusi Paia. Ou te matuā ioe i lona manatu!

O mea na tutupu i loʻu olaga, na ou iloa ai e leai se aogā o le saʻili o se olaga faamalieina i le faaaogāina o fualaau faasāina ma isi masaniga leaga. Ua ou maua nei se olaga faamalieina o le aʻoaʻoina o isi i le Tusi Paia, ma o na aʻoaʻoga na laveaʻiina ai loʻu ola.