LESONA 52
Māfuaaga e Tāua ai o Tatou Laʻei ma Foliga Vaaia
E eseese uma laʻei ma teuga e tatou te fiafia i ai. Pe a tatou mulimuli i mataupu silisili o le Tusi Paia, o le a tatou filifilia ai laʻei e tatou te fiafia ai ma faamamaluina ai Ieova. Seʻi o tatou iloiloina nisi o na mataupu silisili.
1. O ā mataupu silisili e fesoasoani i a tatou filifiliga i laʻei ma teuga?
E tatau ona tatou filifili “ofu e talafeagai, ia onomea ma ia mafaufau lelei,” ma ia mamā o tatou foliga vaaia ina ia atagia atu ai lo tatou “matataʻu i le Atua.” (1 Timoteo 2:9, 10) Iloilo mataupu silisili nei e fā: (1) E tatau ona “talafeagai” o tatou laʻei. E pei ona e mātauina i sauniga, e eseese uma laʻei ma teuga e fiafia i ai tagata o Ieova. Ae o le auala e laʻei ma teu ai o tatou lauulu, e faailoa atu ai le faaaloalo i le Atua lea tatou te tapuaʻi i ai. (2) O le laʻei “ia onomea,” e uiga atu i lo tatou lē faia o ni ofu faatosina po o laʻei e faauaʻi mai ai isi iā i tatou. (3) O le faaalia o le “mafaufau lelei,” e tatou te lē faataʻitaʻi ai i aʻega o laʻei ma teuga. (4) E tatau ona atagia atu i o tatou foliga vaaia i taimi uma lo tatou “matataʻu i le Atua,” ma faailoa atu ai i isi, o loo tatou tapuaʻi i le Atua moni.—1 Korinito 10:31.
2. E faapefea ona aafia o tatou uso ma tuafāfine i o tatou foliga vaaia?
E ui e iai lo tatou saʻolotoga e filifili ai o tatou laʻei, ae e tatau ona tatou mafaufau i aafiaga o o tatou foliga vaaia i isi. E tatou te taumafai malosi e ʻalofia le faia o se gaoioiga e aafia ai faalogona o isi, ae ia “faafiafia [o tatou] tuaoi i le mea lelei, ina ia atiaʻe ai o ia.”—Faitau le Roma 15:1, 2.
3. E faapefea ona tosina mai isi i le upu moni ona o o tatou foliga vaaia?
E tatou te taumafai e fai laʻei talafeagai i so o se faatasiga, aemaise lava taimi o a tatou sauniga ma talaʻiga. E tatou te lē mananaʻo e tosina ese tagata mai le feʻau o loo tatou talaʻia ona o o tatou foliga vaaia. Nai lo o lea, e tatau ona tosina mai ai isi iā Ieova, ma ʻfaamamaluina ai aʻoaʻoga a le Atua lo tatou Faaola.’—Tito 2:10.
SAʻILIʻILI ATILI
Iloilo pe faapefea ona faamautinoa o loo talafeagai o tatou laʻei ma foliga vaaia, ma o tatou tulaga o ni Kerisiano.
O o tatou foliga vaaia e faailoa atu ai lo tatou faaaloalo iā i latou o iai le pule. E ui e silafia e Ieova o tatou loto, ae e tatau ona atagia atu i o tatou foliga vaaia lo tatou faaaloalo iā te ia
4. O le lelei o foliga vaaia e faailoa atu ai lo tatou faaaloalo iā Ieova
O le ā le māfuaaga e sili ona tāua tatou te faaalia ai le manatu mamafa i o tatou foliga vaaia? Faitau le Salamo 47:2, ona talanoa lea i fesili nei:
O ā filifiliga i laʻei o le a tatou faia, pe a tatou manatuaina e aafia ai le vaaiga a isi e faatatau iā Ieova?
Pe e tatau ona tatou manatu mamafa i o tatou foliga vaaia pe a auai i sauniga ma le talaʻiga? Aiseā?
5. Le auala e faia ai filifiliga lelei i laʻei ma teuga
E tusa pe taugatā o tatou lavalava pe leai, ae e tatau ona mamā ma talafeagai i so o se taimi. Faitau le 1 Korinito 10:24 ma le 1 Timoteo 2:9, 10, ona talanoa lea pe aiseā tatou te ʻalofia ai laʻei e . . .
lē mamā ma lē onomea.
fufusi, valavala ma faatosina.
E ui e lē o toe ola Kerisiano i le Tulafono a Mose, ae e tele mea e latou te aʻoaʻoina mai ai e faatatau i le silafaga a Ieova. Faitau le Teuteronome 22:5, ona talanoa lea i le fesili lenei:
Aiseā e tatau ai ona tatou ʻalofia laʻei ma teuga e foliga mai ai tamāloloa o ni fafine, pe foliga foʻi fafine o ni tamāloloa?
Faitau le 1 Korinito 10:32, 33 ma le 1 Ioane 2:15, 16, ona talanoa lea i fesili nei:
Aiseā e tatau ai ona tatou manatu mamafa i aafiaga o o tatou foliga vaaia i isi i o tatou vaipanoa, po o le faapotopotoga?
O ā ituaiga o laʻei ma teuga o loo taatele i lou vaipanoa?
Pe e iai nisi o na laʻei ma teuga e lē talafeagai ma se Kerisiano? Aiseā?
E eseese auala e fai ai o tatou laʻei ma teuga, ae e mafai lava ona faamamaluina ai Ieova
UA FAAPEA MAI NISI: “E pule lava aʻu i oʻu lavalava e fai.”
Pe e te ioe i lenā manatu? Aiseā?
AOTELEGA
Pe a tatou faia filifiliga lelei i o tatou foliga vaaia, e faailoa atu ai lo tatou faaaloalo iā Ieova ma isi.
Fesili Autalu
Aiseā e tāua ai iā Ieova o tatou laʻei ma teuga?
O ā nisi o mataupu silisili e tatau ona fua i ai a tatou filifiliga i o tatou foliga vaaia?
E faapefea i o tatou foliga vaaia ona aafia ai le vaaiga a isi e faatatau i le tapuaʻiga moni?
MANATU FAAOPOOPO
O le ā se mea e ono taʻu atu e ou laʻei e faatatau iā te oe?
Aiseā e atamai ai le mafaufau muamua a o leʻi tāina sau peʻa?
“O le ā le Manatu o le Tusi Paia i le Tāina o Peʻa i le Tino?” (Mataupu i le jw.org)
Mātau nisi o mataupu silisili e fua i ai a tatou filifiliga.
“Po o Faamamaluina le Atua i Ou Laʻei?” (Le Olomatamata, Setema 2016)
Na faapefea ona atiaʻe e se fafine se vaaiga paleni i filifiliga a isi i laʻei ma teuga?