Pe E te Maufaatuatuaina le Auala e Faia ai e Ieova Mea?

1-2. (a) Aiseā e faigatā ai i le toʻatele i aso nei ona maufaatuatuaina pule o malo? (e) O le ā o le a tatou talanoaina i lenei suʻesuʻega?

E TOʻATELE tagata i aso nei e latou te lē maufaatuatuaina pule o malo. E latou te mātauina le faaʻauʻau o faamasinoga ma faiga faapolotiki i ē mauʻoa ma ē e iai le pule, ae lē faia le faamasinogatonu mo ē e matitiva. Ua moni ai le Tusi Paia: ʻUa pule le tagata i le isi tagata ma ua matuā afāina ai o ia.’ (Fai. 8:9) Ua faia foʻi e nisi taʻitaʻi lotu amioga leaga, ua māfua ai ona lē maufaatuatuaina e nisi le Atua. O lea, pe a ioe se tasi e suʻesuʻe le Tusi Paia ma i tatou, o le luʻi o le fesoasoani lea i lenā tagata e maufaatuatuaina Ieova ma le vaega faalelalolagi o lana faalapotopotoga.

² E lē na o tagata aʻoga e manaʻomia ona maufaatuatuaina Ieova ma lana faalapotopotoga. E oo foʻi iā i latou ua loa tausaga o iai i le upu moni, e tatau ona latou maufaatuatuaina pea e sili ona lelei le auala e fai ai e Ieova mea. E iai taimi e tutupu ai mea atonu e tofotofoina ai lo tatou maufaatuatuaina o Ieova ma lana faalapotopotoga. O le a tatou talanoaina i lenei suʻesuʻega vala e tolu, e ono tofotofoina ai lo tatou faatuatua: (1) pe a tatou faitauina nisi o tala o le Tusi Paia, (2) pe a tatou mauaina faatonuga mai i le faalapotopotoga a Ieova, ma le (3) pe a tatou fesagaʻia luʻi i le lumanaʻi.

IA MAUFAATUATUAINA IEOVA A O FAITAUINA LE TUSI PAIA

3. E faapefea i nisi o tala o le Tusi Paia ona tofotofoina ai lo tatou maufaatuatuaina o Ieova?

³ A o tatou faitauina le Afioga a le Atua, atonu o le a tatou fesiligia le auala na feutagaʻi ai Ieova ma nisi tagata, ma le auala na fai ai nisi o ana faaiʻuga. O se faataʻitaʻiga, ua tatou aʻoaʻoina mai i le tusi o Numera, na faasala e Ieova i le oti se tane Isaraelu i le aoina o fafie i le aso Sapati. Ae ua tatou aʻoaʻoina mai i le tusi e lua a Samuelu, na faamagalo e Ieova le tupu o Tavita i lona faia o le mulilua ma le fasioti tagata. (Nu. 15:32, 35; 2 Samu. 12:9, 13) Atonu e tatou te mafaufau, ʻAiseā na faamagalo ai e Ieova le tupu o Tavita ae matuiā lana agasala, ae faasala i le oti se tamāloa e foliga e lē matuiā lana agasala?’ Ina ia tali lenā fesili, seʻi o tatou iloiloina ni vala tāua se tolu e tatau ona tatou manatua a o faitauina le Tusi Paia.

4. E faapefea i le Kenese 18:20, 21 ma le Teuteronome 10:17, ona faamalosia ai lo tatou maufaatuatuaina o faamasinoga a Ieova?

⁴ E lē o auʻiliʻili mai i le Tusi Paia mea uma na tutupu i se tala. O se faataʻitaʻiga, ua tatou iloa na faaalia e Tavita le salamō moni mai ana agasala. (Sala. 51:2-4) Ae o le ā le ituaiga tagata na iai le tamāloa na solia le tulafono o le Sapati? Pe na salamō o ia mai i le mea na ia faia? Pe na ia solia isi tulafono a Ieova i le taimi ua teʻa? Pe e na te leʻi amanaʻia ma teena lapataʻiga na avatu muamua i ai? E lē o taʻua i le Tusi Paia. Peitaʻi, e tatou te mautinoa i le mea lenei ʻe lē o iā Ieova se faiga lē tonu.’ (Teu. 32:4) O ana faaiʻuga e faavae i mea moni uma na tutupu, ae lē o mea e taʻu atu e isi, le faailoga tagata po o so o se mea e masani ona faapiʻopiʻo ai faamasinoga a tagata. (Faitau le Kenese 18:20, 21; Teuteronome 10:17.) O le tele e tatou te aʻoaʻoina ai e faatatau iā Ieova ma ana tapulaa, o le tele foʻi lenā o lo tatou maufaatuatuaina o ana faamasinoga. E tusa lava pe e iai ni a tatou fesili i se tala o le Tusi Paia e lē mafai ona taliina i lenā taimi, ae e tele mea ua tatou iloa e faatatau i lo tatou Atua e tatou te mautinoa ai “e tonu ona ala uma.”​—Sala. 145:17.

5. E faapefea ona aafia la tatou vaaiga i le faamasinogatonu ona o lo tatou lē lelei atoatoa? (Tagaʻi i le pusa “O lo Tatou lē Lelei Atoatoa e Aafia ai la Tatou Vaaiga i le Faamasinogatonu.”)

⁵ E lē o taimi uma e saʻo ai la tatou faamasinoga ona e tatou te lē lelei atoatoa. Na faia i tatou e le Atua i lona faatusa o lea e tatou te naunau ai ina ia maua e tagata uma le faamasinogatonu. (Kene. 1:26) Peitaʻi, e tatou te lē lelei atoatoa ma e mafai ona sesē le tatou faamasinoga, e tusa lava pe tatou te manatu ua tatou iloa mea moni uma. O se faataʻitaʻiga, seʻi manatu i le lē fiafia o Iona i le faaiʻuga a Ieova e faaalia le alofa mutimutivale i tagata Nineva. (Iona 3:10–4:1) Ae seʻi mātau le mea na oo i ai. E silia ma le 120,000 tagata Nineva na faasaoina ona na latou faaalia le salamō! O le iʻuga, na manaʻomia ona faasaʻo le vaai a Iona ae lē o Ieova.

6. Aiseā e lē manaʻomia ai ona faamatala mai e Ieova māfuaaga o ana faaiʻuga iā i tatou?

⁶ E lē manaʻomia ona faamatala e Ieova i tagata māfuaaga o ana faaiʻuga. O le mea moni, na faataga e Ieova ana auauna i taimi ua mavae e faamatala atu o latou faalogona e faatatau i faaiʻuga na ia faia, po o faaiʻuga o le a ia faia. (Kene. 18:25; Iona 4:2, 3) E iai foʻi taimi na faamatala atu ai e Ieova le māfuaaga na ia faia ai ni faaiʻuga. (Iona 4:10, 11) Peitaʻi, e lē manaʻomia ona faamatala mai e Ieova māfuaaga e na te faia ai ni faaiʻuga. Talu ai o Ieova o Lē na foafoaina i tatou uma, e na te lē manaʻomia la se faamaoniga mai iā i tatou a o leʻi gaoioi pe ua uma foʻi ona gaoioi.​—Isa. 40:13, 14; 55:9.

IA MAUFAATUATUAINA IEOVA PE A MAUA FAATONUGA

7. O le ā le luʻi e tatou te ono fesagaʻia, ma aiseā?

⁷ E mautinoa e tatou te ioe ma le lotoatoa e faia e Ieova i taimi uma le mea saʻo. Ae atonu o se luʻi mo i tatou le maufaatuatuaina o le vaega faalelalolagi o lana faalapotopotoga. E tatou te ono masalosalo po o mulimuli moni ē o loo taʻimua i le faalapotopotoga a Ieova i lana taʻitaʻiga, po o latou faia mea i a latou lava auala. Atonu o le manatu lenā o nisi na ola aʻe i taimi o le Tusi Paia. Seʻi manatu i le faaaʻoaʻoga o loo taʻua i le palakalafa e 3. Atonu na iai se tauaiga o le tamāloa na solia le tulafono o le Sapati na masalosalo, pe na saʻili moni lava e Mose le taʻitaʻiga a Ieova a o leʻi faasalaina lenā tamāloa i le oti. Atonu foʻi na iai se uō a Uria le sa Hetī na manatu ua faaaogā e Tavita lona tulaga o se tupu, e ʻalofia ai le faasalaga oti ina ua la faia le mulilua ma le avā a Uria. O le mea moni e lē mafai ona tatou faapea atu e tatou te maufaatuatuaina Ieova, pe a tatou lē maufaatuatuaina le vaega faalelalolagi o lana faalapotopotoga. O i latou na e maufaatuatuaina e Ieova.

8. O le ā e talitutusa ai mea o loo taʻua i le Galuega 16:4, 5, ma le auala o loo faagaoioi ai le faapotopotoga Kerisiano i aso nei?

⁸ I aso nei, o loo taʻitaʻia e Ieova le vaega faalelalolagi o lana faalapotopotoga, e ala i “le pologa faamaoni ma le faautauta.” (Mata. 24:45) O loo vaavaaia e lenei pologa tagata o le Atua i le lalolagi aoao ma avatu taʻiala i toeaina i faapotopotoga e pei ona sa faia e le vaega pule o le uluaʻi senituri. (Faitau le Galuega 16:4, 5.) E faamautinoa e toeaina o faapotopotoga e latou te usitaʻia taʻiala mai le pologa. E tatou te faailoa atu lo tatou maufaatuatuaina o le auala e fai ai e Ieova mea, e ala i le usiusitaʻi i faatonuga mai i le faalapotopotoga ma toeaina.

9. O le ā le taimi atonu e faigatā ai iā i tatou ona lagolagosua i faaiʻuga e faia e toeaina, ma aiseā?

⁹ O nisi taimi atonu e faigatā ai iā i tatou ona lagolagosua i faaiʻuga e faia e le ʻau toeaina. O se faataʻitaʻiga i tausaga talu ai nei, na toe faatulaga ai le tele o faapotopotoga ma matagaluega. I nisi faapotopotoga, na talosagaina e toeaina le ʻau talaʻi ina ia auai i se isi faapotopotoga e toʻaitiiti tagata e auai i a latou sauniga, ina ia faaaogā lelei ai nofoa o loo avanoa i Maota mo Sauniga. Pe a talosagaina i tatou e auai i se faapotopotoga fou, atonu e faigatā ona tuua uō ma aiga. Pe e taʻu atu e Ieova i toeaina po o fea e tofia i ai tagata talaʻi taʻitoʻatasi? E leai. Atonu o le māfuaaga lenā e faigatā ai iā i tatou ona mulimuli i le latou taʻitaʻiga. Peitaʻi, e maufaatuatuaina e Ieova toeaina e faia na faaiʻuga, ma e tatau foʻi ona tatou maufaatuatuaina i latou.b

10. I le Eperu 13:17, aiseā e tatau ai ona tatou galulue faatasi ma toeaina?

¹⁰ Aiseā e tatau ai ona tatou galulue faatasi ma toeaina, ma lagolagosua i a latou faaiʻuga e tusa lava pe lē o faaiʻuga na e tatou te mananaʻo ai? Talu ai o le faia faapea, o le a tatou fesoasoani ai e tausia le autasi i tagata o le Atua. (Efe. 4:2, 3) E sologa lelei mea i le faapotopotoga pe a lotomaulalo tagata uma e usiusitaʻi i faatonuga e faia e le ʻautoeaina. (Faitau le Eperu 13:17.) Ae o le mea e sili ona tāua, e faaali atu ai iā Ieova e tatou te maufaatuatuaina o ia, e ala i le lagolagosua iā i latou ua ia maufaatuatuaina e tausia i tatou.​—Galu. 20:28.

11. E faapefea ona faamalosia lo tatou maufaatuatuaina o faatonuga e tatou te maua mai i toeaina?

¹¹ E faamalosia lo tatou maufaatuatuaina o taʻiala mai i toeaina i le iloaina, e tatalo toeaina mo le taʻitaʻiga a le agaga paia pe a latou faia faaiʻuga e aafia ai le faapotopotoga. E latou te iloilo foʻi ma le faaeteete mataupu silisili talafeagai o le Tusi Paia, ma taʻiala e saunia mai e le faalapotopotoga a Ieova. E mananaʻo foʻi toeaina e faafiafia Ieova, ma fai le mea sili e latou te mafaia e tausia lelei ai ona tagata. E iloa e nei tane faamaoni e latou te tali atu i le Atua, i le auala e faatino ai a latou tiute tauave. (1 Pete. 5:2, 3) Seʻi mātau le mea moni lenei: O loo autasi tagata o Ieova i le tapuaʻiga i le Atua moni e toʻatasi i se lalolagi o loo fevaevaeaʻi i lotu, faiga faapolotiki ma le faailoga lanu. Ua mafai ona ausia lenā tulaga, ona o le faamanuia a Ieova i lana faalapotopotoga.

12. O ā mea moni e tatau ona iloilo lelei e toeaina ina ia iloa ai le salamō o se tasi?

¹² Ua tuuina atu e Ieova i toeaina se matafaioi tāua, o le tausia o le mamā o lana faapotopotoga. Pe a faia e se Kerisiano se agasala matuiā, e finagalo Ieova ina ia iloilo e toeaina pe tatau ona tumau pea lenā tagata i le faapotopotoga. O se tasi o mea e tatau ona latou faamautinoa, pe ua salamō moni le tagata mai i lana agasala na fai. Atonu e faapea mai ua salamō, ae po o ʻinoʻino moni i le mea na ia faia? Po o maumauaʻi e lē toe faia lenā agasala? Pe afai na ia faia le agasala ona o aumea leaga, po o lotomalie e tuua na aumea? E tatalo toeaina iā Ieova ma e latou te iloiloina mea moni na tutupu ma mataupu silisili o le Tusi Paia, ona latou iloiloina lea o uiga o le tagata faimea sesē e faatatau i lana agasala. Pe a uma ona latou filifili lea pe e tatau i le tagata faimea sesē ona tumau pea i le faapotopotoga, i nisi tulaga e tatau ona faateʻaina lenā tagata.​—1 Kori. 5:11-13.

13. O ā ni masalosaloga e ono oo iā i tatou pe a faateʻaina se uō po o se tauaiga?

¹³ E ono faapefea ona tofotofoina lo tatou maufaatuatuaina o toeaina? Atonu e vave ona tatou talia ni faaiʻuga a toeaina pe afai o le tagata ua faateʻaina e lē o sa tatou uō vavalalata, po o se tauaiga. Ae faapefea pe afai o sau uō vavalalata po o se tauaiga lea ua faateʻaina? Atonu e tatou te masalosalo pe na iloilo e toeaina mea moni uma na tutupu, pe na latou faia foʻi le faamasinoga i le auala a Ieova. O le ā e fesoasoani iā i tatou e faatumauina ai se vaaiga saʻo e faatatau i faaiʻuga e faia e le ʻau toeaina?

14. O le ā e fesoasoani iā i tatou pe a tatou aafia i se faaiʻuga e faia e toeaina e faatatau i se tagata faimea sesē?

¹⁴ E tatau ona tatou manatua lelei o le faateʻaina o le faatulagaga mai iā Ieova, e aogā i le faapotopotoga ma atonu foʻi e aogā i le tagata faimea sesē. Pe a lē faateʻaina ma le faapotopotoga le tagata faimea sesē ae lē salamō, o le a avea o ia ma taaʻiga leaga i isi. (Kala. 5:9) E lē gata i lenā atonu e na te lē taliaina le matuiā o lana agasala na fai, ma lē toe fia suia ona manatu ma ana gaoioiga ina ia maua ai le finagalo malie o Ieova. (Fai. 8:11) E tatou te mautinoa la, pe a filifili toeaina e faateʻaina lenā tagata, e latou te iloiloina lelei le auala e faia ai lenā faaiʻuga. E iloa e toeaina e ʻlē o faamasino mo se tagata a o Ieova,’ e pei ona faia e faamasino Isaraelu anamua.​—2 No. 19:6, 7.

O LE MAUFAATUATUAINA O IEOVA I LE TAIMI LENEI E TOLENI AI I TATOU MO LE LUMANAʻI

15. Aiseā e tatau ai ona tatou matuā maufaatuatuaina faatonuga mai iā Ieova i le taimi lenei?

¹⁵ A o lata mai le iʻuga o lenei faiga o mea, e tatau ona tatou matuā maufaatuatuaina le auala e faia ai e Ieova mea i le taimi lenei. Aiseā? I le taimi o le puapuaga tele, atonu e faateʻia i tatou pe a maua ni faatonuga e foliga mai e lē aogā ma e lē talafeagai. O le mea moni, e lē fetalai tuusaʻo mai Ieova iā i tatou. E na te saunia mai faatonuga e ala i le vaega faalelalolagi o lana faalapotopotoga. E lē o se taimi lenā e tatou te masalosalo ai i faatonuga pe faapea ifo, ʻPo o nei faatonuga e aumai moni lava mai iā Ieova, po o faatonuga lava ia a uso taʻimua?’ Po o le a e maufaatuatuaina Ieova ma lana faalapotopotoga i lenā taimi e sili ona tāua? E mafai ona atagia atu le tali i le auala e te vaai ai i le taimi lenei i taʻiala mai i le faalapotopotoga a le Atua. Pe a maufaatuatuaina taʻiala e tatou te maua i aso nei ma vave usitaʻi i ai, e mautinoa e tatou te faia faapea i le taimi o le puapuaga tele.​—Luka 16:10.

16. E ono faapefea ona tofotofoina lo tatou maufaatuatuaina o faamasinoga a Ieova i le lumanaʻi?

¹⁶ O se isi vala e ao ona tatou manatunatu i ai, o faamasinoga a Ieova i le faaiʻuga o lenei faiga o mea. I le taimi lenei, e tatou te faamoemoe e fai e le toʻatele e lē auauna iā Ieova se filifiliga saʻo e aofia ai o tatou tauaiga lē talitonu, a o leʻi oo mai le iʻuga. Peitaʻi, iā Amaketo e fai e Ieova e ala iā Iesu le faaiʻuga mulimuli e faatatau i lo latou lumanaʻi. (Mata. 25:31-33; 2 Tesa. 1:7-9) E tatou te lē filifilia po o ai e tatau i ai pe lē tatau i ai le alofa mutimutivale o Ieova. (Mata. 25:34, 41, 46) Po o le a tatou maufaatuatuaina faamasinoga a Ieova? Po o le a tatou lē toe auauna iā te ia ona e tatou te lē ioe i ana faaiʻuga? E manino mai e manaʻomia ona faamalosia lo tatou maufaatuatuaina o Ieova i le taimi lenei, ina ia tatou maufaatuatuaina atoatoa ai o ia i le lumanaʻi.

17. E faapefea ona tatou maua aogā mai i faamasinoga a Ieova i le iʻuga o lenei faiga o mea?

¹⁷ Seʻi faaata o tatou faalogona i le lalolagi fou a le Atua, pe a tatou vaai i le iʻuga o faamasinoga a Ieova. O le a lē toe iai lotu sesē ma o le a faaumatia foʻi faiga faapisinisi manatu faapito, faatasi ai ma malo faapolotiki ua faaleagaina ma pagatia ai tagata i le faitau afe o tausaga. O le a tatou lē toe mafatia foʻi i maʻi, tagata matua ma le maliu o se tasi e pele iā i tatou. O le a lokaina foʻi Satani ma ana temoni mo le afe tausaga. O le a lē toe oo foʻi iā i tatou ni āuga leaga o lo latou fouvale. (Faaa. 20:2, 3) Maʻeu lo tatou lotofaafetai i lenā taimi, ona ua tatou maufaatuatuaina le auala e faia ai e Ieova mea!

18. O ā lesona e tatou te aʻoaʻoina mai i tagata Isaraelu i le Numera 11:4-6 ma le 21:5?

¹⁸ Pe faamata o le a tofotofoina lo tatou maufaatuatuaina o le auala e faia ai e Ieova mea i le lalolagi fou? Seʻi o tatou iloiloina le mea na tupu, ina ua faatoʻā faasaʻoloto tagata Isaraelu mai Aikupito. Na amata ona faitio nisi ona na latou misia meaʻai mananaia na aai ai i Aikupito, ma na latou ʻinoʻino foʻi i le manai na saunia e Ieova. (Faitau le Numera 11:4-6; 21:5.) Pe faamata e oo iā i tatou nei manatu pe a uma le puapuaga tele? E tatou te lē iloa po o le ā le tele o galuega o le a tatou faia e aveesea ai mea o le a faaleagaina, ma le umi e tatou te galueaʻiina ai le lalolagi ina ia avea ma parataiso. E lē taumatea e tele galuega o le a tatou faia, ma o le a iai ni luʻi i le amataga. Po o le a tatou faitio i mea o le a saunia e Ieova i lenā taimi? E tasi le mea ua tatou mautinoa i ai, o le tele e tatou te talisapaia ai sauniuniga a Ieova i le taimi lenei, o le tele foʻi lenā o lo tatou faia faapea i lenā taimi.

19. E faapefea ona e aoteleina manatu tāua o lenei suʻesuʻega?

¹⁹ E saʻo i taimi uma le auala e faia ai e Ieova mea, ma e tatau ona tatou mautinoa i lenā mea. E manaʻomia foʻi ona tatou maufaatuatuaina i latou e maufaatuatuaina e Ieova e aumaia ana faatonuga. Ia manatua pea fetalaiga a Ieova i le perofeta o Isaia: “O le a malolosi outou pe a outou nonofo fifilemu pea ma le faatuatua.”​—Isa. 30:15.