Ata Matagā Taufeusuaʻiga​—E Faaleagaina ai Lau Faaipoipoga

Ua iloa e le avā le masaniga a lana tane o le matamata faalilolilo i ata matagā. Ua matuā faatoese atu le tane e na te lē toe faia, ma o le mea lenā na tupu mo sina taimi. Peitaʻi, a o faagasolo taimi, na amata ona toe matamata le tane i ata matagā.

Po o tupu lenā mea iā te oe? Pe afai o lea, e manaʻomia ona e iloa le aafiaga o lau masaniga leaga i lau paaga, ma le auala e mafai ona e tuua ai lenā masaniga ma lē toe faia.a

I lenei mataupu

• Mea e tatau ona e iloa

• Mea e mafai ona e faia

• Pe a matamata lau tane i ata matagā taufeusuaʻiga

Mea e tatau ona e iloa

E mafai e ata matagā taufeusuaʻiga ona faaleagaina ai se faaipoipoga. E mafai ona faatupuina ai le ita, ma lē toe maufaatuatuaina ai e le paaga o loo faamaoni le paaga o loo matamata i ata matagā.b

O faalogona nei e oo i se avā e matamata lana tane i ata matagā taufeusuaʻiga:

• Lagona ua ʻolegia o ia. Ua faapea mai Sarah, “Na ou lagona e pei ua fai ma masani a laʻu tane le mulilua.”

• Lagona o le leai o se aogā. Ua faapea mai se tasi avā, o le masaniga leaga a lana tane na ia lagona ai le “māsiasi ma manatu o ia e auleaga.”

• Lē maufaatuatuaina. Ua faapea mai se avā e igoa iā Helen, “O so o se tamaʻi gaoioiga lava e faia laʻu tane, ou te masalosalo ai lava.”

• Popole naʻuā. Ua taʻutino mai se avā e igoa iā Catherine, “Na alu uma loʻu taimi ma loʻu malosi e popole ai i le masaniga leaga a laʻu tane.”

Mea e mafaufau i ai: O loo fautuaina e le Tusi Paia tane ina ia alolofa i a latou avā. (Efeso 5:25) Po o se alofa moni la le aafia o le avā i faalogona o loo taʻua i luga ona o gaoioiga a le tane?

Mea e mafai ona e faia

E lē faigofie ona tuu le masaniga o le matamata i ata matagā taufeusuaʻiga. Ua faapea mai se avā e igoa iā Stacey, “Na mafai ona tuu e laʻu tane le ulaula tapaa, tagofia o le mariuana ma le ʻava malosi, ae na faigatā ona ia tuua le masaniga o le matamata i ata matagā.”

Pe afai o lou tulaga lenā, o le a fesoasoani iā te oe fautuaga nei e tuua ai lenā masaniga leaga.

• Ia malamalama i le māfuaaga e leaga ai ata matagā taufeusuaʻiga. O le matamata i ata matagā e uunaʻia ai le uiga manatu faapito ina ia faamalie ai e se tasi ona lava tuʻinanauga, ma faalēaogāina ai le alofa, maufaatuatuaina, ma le faamaoni, o ni uiga tāua ina ia taulau manuia ai se faaipoipoga. E faaalia ai foʻi le lē faaaloalo i Lē na faavaeina faaipoipoga, o Ieova le Atua.

  Mataupu silisili o le Tusi Paia: ʻIa faamamaluina le faaipoipoga.’—Eperu 13:4.

• Aua le tuuaʻia lau paaga. Aua e te mafaufau, ʻPe ana matuā māfana mai laʻu avā iā te aʻu, semanū ou te lē matamata i ata matagā.’ E lē o se mea talafeagai le tuuaʻia o lau avā, ma o le a avea o se faamolemolega le toe faia o lenā masaniga pe a faia e lau avā se mea e te lē fiafia ai.

  Mataupu silisili o le Tusi Paia: “Ua faaosoosoina tagata taʻitoʻatasi ona ua tosina ma maileia i ona lava tuʻinanau.”—Iakopo 1:14.

• Ia tautala saʻo ma ia faamaoni i lau paaga. Ua faapea mai se tane e igoa iā Kevin: “E tusa pe ou te matamata i ata matagā pe leai, ae ou te taʻuina mea uma i laʻu avā. O le faia faapea, e na te lē manatu ai o oʻu nanāina se mea mai iā te ia.”

  Mataupu silisili o le Tusi Paia: “E matou te mananaʻo ina ia faia mea uma ma le faamaoni.”—Eperu 13:18.

• Ia mataala pea. E tusa pe e tele tausaga e te lē o toe matamata i ata matagā, ma ua e manatu ua e manumalo mai i lenā vaivaiga, ae e mafai lava ona e toe lolo atu i ai. Ua faapea mai Kevin lea na taʻua muamua: “Ou te leʻi toe matamata i ata matagā mo le sefulu tausaga, ma na ou manatu ai ua ou manumalo mai i loʻu vaivaiga. Peitaʻi, na iai pea iā te aʻu lenā masaniga leaga, lea e pei o se manufeʻai o loo faapuga e osofaʻi aʻu i le taimi talafeagai.”

  Mataupu silisili o le Tusi Paia: “O lē ua manatu o loo tū o ia, ia faaeteete neʻi paʻū.”—1 Korinito 10:12.

• Pe a faaosoosoina oe, ia mafaufau muamua. E ui lava atonu e lē mafai ona e taofia le iai o ni ou faanaunauga sesē, ae e mafai ona e filifili pe e faia pe leai. O le mea moni, e ono vave mou ese na faanaunauga sesē pe a taumafai e uaʻi atu i nisi mea aogā.

  Mataupu silisili o le Tusi Paia: “Ia taʻitasi outou ona iloa pulea o lona lava tino ina ia paia ma mamalu, ae e lē o le tuʻinanau i le manaʻo tele i feusuaʻiga.”—1 Tesalonia 4:4, 5.

• ʻAlofia tulaga e ono toe faaosoosoina ai oe e toe matamata i ata matagā. Ua taʻua i le tusi Willpower’s Not Enough: “Pe afai e te tuua oe i se tulaga e faigofie ona faaosoosoina ai oe, e pei lenā ua e tutuina se afitusi. E na o sina mumū lava e manaʻomia . . . e ola ai se afi.”

  Mataupu silisili o le Tusi Paia: “Tau ina ia aua neʻi iai se mea leaga e pule mai iā te aʻu.”—Salamo 119:133.

• Aua le fiugofie. E umi se taimi faatoʻā mafai ona toe maufaatuatuaina oe e lau paaga. Peitaʻi ua faamaonia i mea na tutupu, ua tele ulugalii ua mafai ona latou toe faia faapea.

  Mataupu silisili o le Tusi Paia: ʻE onosaʻi le alofa.’—1 Korinito 13:4.