9 Le Faatasi Mai o Keriso (Parousia)

O le uiga o le nauna Eleni pa·rou·siʹa o le “iai i tafatafa,” lea e maua mai i le upu faasino o le pa·raʹ (tafatafa) ma le ou·siʹa (o le “iai i”). E 24 mau o loo iai le upu pa·rou·siʹa i Tusitusiga Eleni, ma o mau nei: Mataio 24:3, 27, 37, 39; 1 Korinito 15:23; 16:17; 2 Korinito 7:6, 7; 10:10; Filipi 1:26; 2:12; 1 Tesalonia 2:19; 3:13; 4:15; 5:23; 2 Tesalonia 2:1, 8, 9; Iakopo 5:7, 8; 2 Peteru 1:16; 3:4, 12 (fpl); 1 Ioane 2:28. Ua faaliliuina e le Faaliliuga a le Lalolagi Fou i mau na e 24, le upu pa·rou·siʹa i le “faatasi” ma le “faatasi mai.”

O le uiga o le veape e fesootaʻi atu i le pa·rou·siʹa o le paʹrei·mi o le “ia iai i tafatafa ane.” E 24 mau o loo iai lenei veape i Tusitusiga Eleni, ma o mau nei: Mataio 26:50; Luka 13:1; Ioane 7:6; 11:28; Galuega 10:21, 33; 12:20; 17:6; 24:19; 1 Korinito 5:3, 3; 2 Korinito 10:2, 11; 11:9; 13:2, 10; Kalatia 4:18, 20; Kolose 1:6; Eperu 12:11 (fpl); Eperu 13:5; 2 Peteru 1:9, 12; Faaaliga 17:8. Ua faaliliuina e le Faaliliuga a le Lalolagi Fou le veape paʹrei·mi i upu eseese nei: “sau,” “ō mai,” “faatasi,” “oo mai,” ma le “iai.”

O le upu pa·rou·siʹa, o le “faatasi mai,” e ese mai i le upu Eleni eʹleu·sis, “afio mai,” lea e na o le faatasi lava ona taʻua i tusitusiga Eleni i le Galuega 7:52, o le e·leuʹse·os (Latina, ad·venʹtu). E lē o faatatau atu le pa·rou·siʹa ma le eʹleu·sis i le mea e tasi. Ua faapea mai le lomifefiloi Theological Dictionary of the New Testament, Tusi V, itu. 865, “o upu nei [paʹrei·mi ma le pa·rou·siʹa] e lē o faasino atu i le afio mai o Keriso i le tino, ma e lē o faasino atu foʻi le παρουσία i le toe foʻi mai. O le manatu lea e lē na o le tasi le parousia na maua i le Lotu mulimuli [ae e leʻi maua a o lumanaʻi le taimi o Justin, i le senituri lona lua T.A.] . . . Ina ia tatou malamalama i manatu o uluaʻi Kerisiano, e tatau la ona tatou faamamao ese mai lenei talitonuga [e sili atu i le tasi le parousia].”

E tusa ai ma le uiga o lenei upu, na tusia e Israel P. Warren, D.D., i lana tusi The Parousia, i Portland, Maine (1879), itu. 12-15: “E masani lava ona tatou talanoa i le ʻafio mai faalua,’ po o le ʻtoe afio mai,’ po o isi faaupuga faapena. Peitaʻi, e lē o taʻua lava i le Tusi Paia le ʻfaalua ona tupu o le Parousia.’ Po o le ā lava le tulaga e tupu ai, ae o se mea maʻoti e leʻi faapea ona tupu muamua, ma e lē toe tupu lava i se isi taimi. E ese le faatasi mai lenei, e sili atu foʻi i taimi na faaali mai ai o ia i tagata. E lē tatau la ona taʻua o le afio mai faalua po o se isi faaupuga, ae e na o le FAATASI MAI.”

Ua faapea mai foʻi le tusi A Greek-English Lexicon of the New Testament and Other Early Christian Literature, na tusia e W. Bauer, o le tusi Peretania lona lua na faia e F. W. Gingrich ma F. W. Danker, Chicago ma Lonetona (1979), itu. 630, o le upu pa·rou·siʹa “na avea ma upu aloaʻia e faailoga ai se asiasiga a se tagata maualuga, aemaise lava o tupu ma emeperoa o asiasi ane i se itumalo.” O le upu pa·rou·siʹa e pei ona taʻua i le Mataio 24:3, ma isi mau e pei o le 1 Tesalonia 3:13 ma le 2 Tesalonia 2:1, o loo faasino atu i le faatasi mai o Iesu Keriso i lona mamalu o se tupu, talu mai le taimi na fai ai o ia ma Tupu i le iʻuga o faiga o mea a lenei lalolagi.