Ua Fesili Mai Talavou . . .

O le ā le Mea Ou te Faia Ina ia Ou Aulelei Atili Ai?

“Sa lē faigofie pe lelei oʻu faalogona i le taumafai e faaauau se talanoaga ma ni teine. Sa matuā ou lē iloa lava po o le ā le mea o loo latou mafaufau i ai, o o latou faalogona, po o le auala foʻi o latou vāai ai i mea.”—Tyler.

O Ā UIGA o tama e sili ona fiafia i ai teine? Ua faapea mai se teine talavou e igoa iā Emi, o le “maufaatuatuaina.” Ua faapea mai se isi talavou e igoa iā Ropini, o se tasi o uiga e sili ona tāua e vaai i ai i tama, o le iai o ni uiga faafiafia tagata. Ae o ā uiga e sili ona faatāua e tama i teine? E lē o se mea e faateʻia ai, le faaalia e se tasi o suʻesuʻega faapea o foliga aulelei lava sa aupito i maualuga i la latou lisi. O mea e taufai naunau i ai ma mea e faatāuaina i le olaga na faatulaga ono.

O mataupu ma suʻesuʻega ia e faamatalaina ai faiā a tama ma teine, e tele ina maua i mekasini a talavou. E manino mai, o le toʻatele o talavou e mafaufau tele faatatau i le auala o loo vāai ai tagata o le isi ituaiga iā i latou. Atonu o loo e popole foʻi faapena iā te oe i nisi o taimi. E lē o le uiga faapea o lea o le a e sauni e faaipoipo. Ae ona e mananaʻo uma lava tagata ia aulelei ma ia iai le lagona o loo manaʻomia i latou! Na mātauina e Tyler faapea: “Afai o oe o se talavou, e te manaʻo e aulelei i le vaaiga a tagata uma. E te manaʻo e taliaina oe e au aumea, o tama ma teine.” E lē gata i lea atonu e te lagona faapea e iai se taimi e te manaʻo ai foʻi e mauaina se paaga faaipoipo lelei. Pe a oo mai lenā taimi, o le tulaga masani lava o le a e manaʻo ia tosina mai lenā tagata iā te oe.

Peitaʻi, i le avea ai o se talavou Kerisiano, atonu e lē o telē se malamalama o loo iā te oe e feutagaʻi ai ma le tagata o le isi ituaiga. E lē gata i lea, atonu o loo e lagonaina le uunaʻiga mai au aumea ia e aulelei. I le tele o faatosinaga a tagata e faataʻitaʻia maia laʻei ma tama fai tifaga o loo e vaai i ai i le televise ma mekasini, e lē o se mea la e faateʻia ai lou lagonaina o le lē mautinoa ma le lē ausia o tulaga e tatau ona iai! O le ā la e tatau ona fai ina ia tosina mai ai isi, e aofia ai ma i latou o le isi ituaiga i se auala mamā ma lelei?

Le Sesē o le Faamoemoe Atu mo se Tino e “Lelei Atoatoa”

Na mātauina e William S. Pollack o se tagata suʻesuʻe o le mafaufau ma togafitiga o faafitauli tau i le mafaufau ma amioga e faapea, o aafiaga i faiga faapisinisi, ua toʻatele ai talavou “o loo faaaluina le tele o itula e aai ai i meaʻai e faapaeee ai, siisii o mea mamafa, ma le faia o faamalositino, o nei gaoioiga uma o se taumafaiga e suia ai le lapopoʻa ma le foliga mai o latou fuaitino.” O nisi ua oo atu lava i le mamao e lamatia ai, e pei o le toetoe lava a matelāina, ina ia mafai ai ona ausia lenā tino “lelei atoatoa.” Peitaʻi, ua faapea mai le Social Issues Research Centre: “O faatulagaga mo le lalelei i le taimi lenei o loo faaalia e le ʻautusitala e na o le 5% o le faitau aofaʻi o fafine e mafai ona ausia—ma o lenā pasene e na o le mamafa ma le lapoʻa o loo aofia ai. Pe a e manaʻo i se fuaitino e sili ona lelei, o foliga ma isi mea, atonu e na o le 1% o fafine e mafai ona ausia.”

O loo aogā pea le fautuaga a le Tusi Paia i le Roma 12:2 e faapea: “Aua le faatagaina le lalolagi o loo siʻomiaina oe e oomia oe i totonu o ana lava faufauga.” (Phillips) E lē o le uiga o lenei mea faapea, e te faatamala ai i ou foliga. E talafeagai le tausia o lou tino e ala i le faia o ni faamalositino talafeagai ma taumafa paleni. (Roma 12:1; 1 Timoteo 4:8) O le mauaina o se mālōlōga ma se moe lelei e mafai ai foʻi ona fesoasoani iā te oe e te foliga lelei ai ma lagonaina lou malosi. I le taimi lava e tasi, ia amanaʻia lou tumamā ma au teuga. Na mātauina e se talavou Peretania e igoa iā Tavita e faapea: “E iai se teine e ese le aulelei, ae e faalēmanuia lona manogi. E ʻalofia o ia e tagata ona o lenā tulaga.” O lea ia tāʻele e lē aunoa. O lima mamā, le ulu, ma atigilima e mafai ona faaleleia atili ai ou foliga.

E ui lava e lē o fautuaina e le Tusi Paia le soona faamamafa o ou laʻei, ae o loo fautuaina Kerisiano “ia latou teuteu iā i latou i ofu e onomea, ma ia lē teuanoaʻi.” (1 Timoteo 2:9) Ia laʻei i ofu e faamanaia atili ai ou foliga ae lē o laʻei e faateʻia ai tagata po o le lē onomea foʻi.a O le uaʻi lelei atu i ou foliga vaaia e mafai ona e maua ai lou mautinoa iā te oe lava. Ua faaupu e se talavou e igoa iā Paulo faapea: “Atonu e lē o oe o se tasi e sili ona lalelei, ae e mafai ona faaleleia atili ou foliga o loo iai.”

Uiga i Totonu

Atonu e tosina atu le vaai i ni foliga ma se tino aulelei, ae o le mea moni o le “mea faatauvaa le lalelei.” (Faataoto 31:30) O foliga lalelei e puupuu lava le taimi e iai, ma e mautinoa e lē suitulaga i uiga lelei faaletagata. (Faataoto 11:22) Ia manatua, “e vāai tagata i le tino, a e vaai Ieova i le loto.” (1 Samuelu 16:7) O lea, na i lo le taulaʻi uma atu o lou mafaufau i lou fuaitino po o le tele o ou maso, ia galue e faaleleia “le tagata lilo o le loto, ia teua lea i le mea e lē pala, o le loto agamalu ma le filemu, o le mea tau tele lava lea i luma o le Atua.” (1 Peteru 3:3, 4; Efeso 4:24) O le mea moni, i le lalolagi i aso nei o le toʻatele o talavou ua lē amanaʻiaina uiga lelei faaletagata, ma ua sili ona lē amanaʻiaina uiga faaleagaga.b Ae peitaʻi, o i latou o loo iai uiga faale-Atua e latou te faatāuaina na uiga ma e latou te fiafia i ai!

O le auala la e sili ona lelei e tosina atu ai i tama ma teine Kerisiano e mafaufau faaleagaga, o le avea lea o oe ma se tasi e mafaufau faaleagaga. Ia atiina aʻe lou itu faaleagaga e ala i le tatalo, au lava suʻesuʻega faale-Tusi Paia, ma le auai i sauniga faa-Kerisiano. (Salamo 1:1-3) E ui i lea, o loo iai isi tomai aogā atoa ai ma uiga e mafai ona e atiina aʻe. E te lē tau manaʻomia ona faia ni lua tuugātala e lē aunoa ma se tasi po o le iai o se alofa fetosinaaʻi ma le tagata o le isi ituaiga ina ia atiina aʻe ai nei uiga. Na i lo lenā, e mafai ona e faataʻitaʻia na uiga i au feutagaʻiga ma isi i aso uma.

Mo se faaaʻoaʻoga, pe e te matamuli pe mā pe a tou iai faatasi ma isi o le isi ituaiga? Na taʻutino mai e se talavou e igoa iā Paulo e faapea: “O nisi o taimi ou te lagonaina le matamuli, ona o i latou o teine, ma ou te lē malamalama i teine e pei ona ou malamalama ai i tama. Ma ou te lē manaʻo e māsiasi i luma o isi.” E mafai faapefea ona e atiina aʻe le mautinoa ma le toʻa lea e faatoʻafilemuina ai foʻi isi? O se tasi o auala o le taumafai lea e mauaina ni aogā mai le tele o aumea o loo iai i le faapotopotoga Kerisiano. I sauniga ia faaali atu lou fiafia i isi, ia lē na o tagata o le isi ituaiga o lau lava tupulaga a ia faapea foʻi i tamaiti, talavou, ma i latou e matutua. (Filipi 2:4) O le iloa ona taulimaina o tagata eseese o le a fesoasoani iā te oe e atiina aʻe ai le mautinoa iā te oe lava.

Peitaʻi, ia faaeteete. Ua fetalai Iesu e faapea: “Ia e alofa atu i lē lua te tuaoi, ia pei o oe lava iā te oe.” (Mataio 19:19) Afai e iā te oe uiga mautinoa, o le a leai ai la se lagona faapea e te valea e fai se mea po o le matamuli foʻi, pe a faatasitasi ma isi.c Peitaʻi, a o talafeagai ona iai sina faaaloalogia o oe lava, ia aua neʻi soona faamamafaina. Ua faapea mai le aposetolo o Paulo: “Aua le faasili le manatu o se tasi i le mea ua tatau ona manatu ai.”—Roma 12:3.

Ia vaai totoʻa foʻi i ou uiga ma tomai e feutagaʻi ai ma isi. Na mātauina e se tamaʻitaʻi Peretania e igoa iā Litia e faapea: “O loo iai se alii i laʻu aʻoga e ese le fiafia i ai o le tele o teine. Ae ina ua latou iloa lelei o ia, sa leʻi fiafia i ai ona e ese le lē mafaufau ma lē fetuutuunaʻi.” Ua tosina atu tagata i se tasi e iai le faautaga poto i le faaaogāina o upu ma o lē e faaalia le magafagafa i isi. (Efeso 4:29, 32; 5:3, 4) Ua mātauina e Dr. T. Berry Brazelton: “Ua pei uiga lelei o se tusifolau, lea e maua ai e tagata le saʻolotoga ma se faatagaga e ulufale atu ai.” O lea, o uiga lelei “e tāua tele i le taliaina o oe e isi.”

O aganuu ma tulafono e faatatau i uiga, e eseese lava i le lalolagi atoa. O lea atonu e te manaʻo e mātauina le auala o loo amioaʻi ai tane ma fafine Kerisiano o le tasi i le isi. Mo se faaaʻoaʻoga, po o se tū e masani ai i lou atunuu le tatala e se tamāloa o le faitotoʻa i se fafine? O lea o le aʻoaʻo e faaalia nei uiga lelei o le a taʻuleleia ai lou igoa o se tagata e pulea lelei o ia.

I le iʻuga, atonu o le a e iloaina le aogā tele o le faatupuina o ni uiga agamālie talafeagai. Ua faapea mai le Tusi Paia e iai “ona pō e ʻataʻata ai,” ma o le tagata e iai ona uiga agamālie e masani lava ona faigofie ona mauaina ni uō.—Failauga 3:1, 4.

Eseesega o Uiga Faaleuō ma le Faamanaia

Na faapea mai se tasi tagata o le “taʻiala e taulau manuia ai i le faia o se tuugātala” o le faamanaia, o le mealilo lea e faatosina mai ai le tagata o le isi ituaiga. Na taʻu atu i le ʻaufaitau ia taumafai e ʻataʻata ma pupula saʻo atu i mata o le tagata ma ia lelei ona ‘amata faamatalaga.’ O na fautuaga e feteenaʻi ma le agaga o fautuaga a Paulo iā Timoteo e faapea, ia feagai ma tagata o le isi ituaiga “ma le amio mamā lava.”—1 Timoteo 5:2, LF.

E ui lava o le faamanaia atonu e faatāuaina ai e le tagata ia lava, ae e lē moni ma e lē faamaoni. E te lē tau faamanaia pe e te matamuli ina ia faaauau ai se talanoaga manaia. E te lē faia foʻi ni fesili e oo ai le matamuli i se tagata po o ni fesili lē talafeagai ina ia iloa ai po o ā lagona ma mafaufauga o le tagata o le isi ituaiga. Tumau ona talanoa e faatatau i mea e ‘tonu, mamā, ma matagofie,’ ma o le a e faaalia ai faapea o oe o se tama po o se teine ua i le tulaga o le oo atu i le matua faaleagaga i le mafaufau. (Filipi 4:8) O lou usiusitai i mataupu silisili a le Atua o le a e aulelei ai e lē gata i le tagata o le isi ituaiga ae faapena foʻi i le Atua.d—Faataoto 1:7-9.

[Faaopoopoga i lalo]

[Ata i le itulau 19]

Na i lo le taulaʻi atu i ou foliga vaaia, galue e atiina aʻe uiga faaleagaga

[Ata i le itulau 19]

Aʻoaʻo ia mauaina le toʻa pe a faatasi ma tagata eseese