O le Taufaasesē o Faasalalauga
TUSIA E LE TUSITALA O LE ALA MAI! I POLANI
Ua pulatoʻa Toma i le televise, ua alu i ai lona mafaufau e pei e sioa. Ua ave uma ona taliga i le faasalalauga o loo sau o oloa e faapea: “A ofu lou alo i le ofu lea, e malosi o ia ma poto e taalo, e faaamuia ana uō iā te ia. Faatau nei loa!” Ua pese Toma i le musika mālie o le faasalalauga ma tamoʻe atu i lona tamā ma fai i ai. “Ae ā pe a faatau soʻu ofu faapelā?”
◼ Aiseā ua naunau ai fanau i oloa o loo faasalalau mai? Ua fai mai se faiaʻoga i se mekasini Polani e faapea: “E mananaʻo ai ona o la e maua e isi tamaiti. E tāua iā i latou le fiafia atu o a latou uō.” Ma ua iʻu ai lava ina faatau e nisi matuā mea e mananaʻo ai a latou fanau talu ai le faatauanau ane o fanau, pe fetagisi foʻi ma faaʻūʻū ina ia maua lava mea o loo mananaʻo ai.
O faapefea ona seetia fanau i faasalalauga? Ua fai mai Jolanta Wąs, o se tagata e suʻesuʻe i le mafaufau e faapea, o faamatalaga i faasalalauga, “e lē o autū i le tau o le oloa, po o sona lelei ma sona aogā.” Ae ua fuafua “ia aafia ai faalogona.” Ua ia mātauina e faapea: “E lē iloiloina e fanau iti tala o iai i le faasalalauga. . . . E lē mafai foʻi ona latou fua tala ua taʻua ai, i mea moni ua latou iloa.” Ae afai foʻi e mafai, e lē taitai ona lava so latou iloa e fuafua ai po o saʻo tala o fai mai i faasalalauga o le oloa.
O le ā le auala e puipui ai lou alo iā lē seetia i faasalalauga? Muamua lava, e tusa o le tala a le mekasini, “e ao ona faaalu se taimi ma lou alo ma faamatala pea i ai, e lē fuaina le lelei o le tagata i mea e na te maua, e pei o seevae po o laʻei.” Ma ia ona iloa, e lē faalagolago lona fiafia i meataalo fou. Lona lua, ia malamalama lelei mātua, e aafia tele fanau i faasalalauga. Ua fautua mai Wąs, o le auala e foʻia ai lea tulaga, ia aua “le tuu e pule mai faasalalauga i le mea e lelei mo a tatou fanau.”
O le manatu mulimuli, e aogā i mātua uma fautuaga mai le Tusi Paia. Na tusi le aposetolo o Ioane: “O mea uma o i le lalolagi, o tuʻinanauga o le tino, ma tuʻinanauga o mata, ma le faalialiavale o meafaitino a se tasi, e lē mai i le Tamā ae e mai i le lalolagi.”—1 Ioane 2:15, 16.
Pe e te lē ioe ea o loo uunaʻia e le tele o faasalalauga le “tuʻinanauga o mata” ma ua tupu ai le ‘faalialiavale i meafaitino,’ o ē iti faapea ma ē matutua? Ae e lelei ona mātau mai, na fautua atili mai le aposetolo o Ioane e faapea: “E mavae atu foʻi le lalolagi faapea ma ona tuʻinanauga, a o lē e faia le finagalo o le Atua e tumau e faavavau.”—1 Ioane 2:17.
O mātua e masani ona talanoa ma a latou fanau i mataupu aogā, e latou te tāmau iā i latou taʻiala ma tapulaa aogā a le Atua. (Teuteronome 6:5-7) Ona lē seetia gofie ai lea o fanau i faatosinaga mai faasalalauga, o loo ua fuafua ia tauanau ai e fanau mātua, e faatau mea e mananaʻo ai.