Pe a Faigatā Ona Taulau

I le 20 ma ona tupu o ona tausaga, na lauiloa ai o ia i le pese, ma e mauʻoa foʻi. E seāseā iai se isi e pei o ia le lauiloa pe maumea a o talavou. Ae na oo ina faalētonu lona olaga. Ina ua lē taulau ana faaipoipoga e lua, na iʻu ina tuu o ia i fale e taofia ai tagata ua pulea i le ʻava malosi ma fuālaau faasāina. Ua faalētonu mea uma i lona olaga.

O LE mea e faanoanoa ai ona e masani ona vaaia i tala fou le tele o tagata lauiloa ua maua i lea tulaga. E faapena foʻi le ʻau faipisinisi, e iai tagata e peiseaʻī o loo taulau manuia, ae ua matuā faalētonu lava o latou olaga. Na taʻua i se nusipepa e faatatau i le ʻau faipisinisi popoto i Niu Ioka e faapea: “Ua tele lo latou naunau i tupe faasili ma ua faalētonu ai galuega ma aiga o isi, ma ua tele ai i latou ua liliu atu i fualaau faasāina . . . O le tele o tupe a nisi e pule i fale tupe ua latou manatu ai, ua sao mai faafitauli, ae ua afāina nisi o i latou ona o omiga mai galuega, faapea foʻi ma isi ua matuā faalētonu ai lava.”

Faamata ua tutupu nei faafitauli ona ua sesē le auala e saʻilia ai e tagata le fiafia ma le manuia? Ioe, e tatou te manaʻomia tupe e ola ai. Ae faamata e faalagolago lo tatou manuia i le tele o tupe? E tusa ma saʻiliʻiliga na faia, e leai. O se faataʻitaʻiga, na faapea mai se suʻesuʻega na faia lata mai nei i Saina, e ui e 250 pasene le faatelega o tupe maua a tagata, ae na faaitiitia ai lo latou fiafia i le olaga.

O lona uiga la, e iai se isi mea tāua e fua i ai le taulau manuia o le tagata, ae lē o galuega, po o fale, po o taavale, ma uati taulima taugatā. Pe e lē tatau ea ona fua i le tagata atoa, e aofia ai ma taʻiala ua ola ai o ia, ma le fuafuaga o lona olaga? Atonu e foliga mai e poto ma tele le paoa o se tagata, ae atonu e lē amio lelei ma e lē o se tagata e alofa, pe e iai ni ana uō moni. Atonu e taʻutaʻua ma tele ʻoa a se tagata, ae ua toe vaavaai totoʻa i lona olaga ma faapea ifo, ‘O le ā ea le aogā o ia mea? O le ā se fuafuaga o loʻu olaga?’

Ua talafeagai ai la le manatu e faapea, o ē ua taulau moni, e iai moni mea e tāua i o latou olaga, e aofia ai le ola e tusa o taʻiala aogā. Ua latou maua ai le filemu o le mafaufau, le fiafia iā i latou lava, ma e faaaloalogia e isi. Ua latou maua se fuafuaga e sili atu ona tāua o le olaga, ma ua maua ai le faamalieina ma le fiafia. Atonu o le a fesili nisi e faapea, ‘O ā na mea o taʻiala?’ ‘Ma o ā foʻi na mea e taʻu o fuafuaga?’ Pe maua tali o na fesili iā i tatou, pe e tatau ona saʻili atu i se isi mea? O le a talanoaina ia mea i le mataupu o loo sosoo mai.

[Pusa i le itulau 21]

VAAIGA SESĒ O LE AUALA E TAULAU AI

E tusa ma saʻiliʻiliga a fomaʻi, ua faateleina tagata taaalo talavou e faaaogā fualaau faasāina e faaleleia ai le taalo. Ua faapea mai le lipoti mai se tusi i le Initaneti: “Ina ua fesiligia talavou i aʻoga maualuluga: ‘Pe faamata e latou te faaaogāina fualaau faasāina ina ia mālō ai i taaloga ma maua ai se avanoa i se ʻau taalo, e tusa lava pe maʻi ai i le lima tausaga o i luma?,’ na toetoe lava o i latou uma na tali mai i le ioe. Ina ua toe fesili e faapea, ‘ae ā pe afai e te oti ai i le lima tausaga o i luma,’ e 65 pasene na tali mai lava i le ioe.”