Ua Fesili Mai Talavou

E Faapefea Ona Ou Onosaia le Faanoanoa pe a Maliu se Tasi o Oʻu Mātua?

“Ina ua maliu loʻu tinā, e peiseaʻī ua gaogao oʻu lagona ma na ou misia o ia. O ia sa maopoopo ai lo matou aiga.”—Karyn.a

E ITIITI mea i le olaga e sili ona aafia ai oe i lo o le maliu o se matua. E lē gata o loo e mafatia ona o le maliu o se matua a ua tuua foʻi oe e fesagaʻi ma se lumanaʻi lea e ese lava mai le mea na e faatalitalia.

Atonu na e faamoemoe o le a auai ou mātua pele i le aso e maua ai lou laisene avetaavale, pe faauu mai i le aʻoga, po o le aso e te faaipoipo ai. A o lenei ua lē taulau ou faamoemoega, ma ua tuua ai oe ma le faanoanoa ma le ita. E faapefea ona e onosaia le anoanoaʻi o faalogona lē mautonu e oo mai ona ua maliu sē tasi o ou mātua?

‘Po o le Tulaga Lea e Masani Ai?’

Pe a oo ina e lagona o lea ua leai moni lava lou matua, atonu o le a e lagona ai loa faalogona e leʻi oo muamua iā te oe. Ua taʻua e Brian lea e 13 tausaga ae maliu si ona tamā ona o le maʻi fatu, e faapea, “I le pō na matou iloa ai, pau le mea na fai o le fetagisi ma opo e le tasi le isi.” Na taʻua foʻi e Natalī ina ua maliu lona tamā i le sefulu o ona tausaga ona o le kanesa, e faapea: “Ou te lē iloa po o ā oʻu lagona na iai. Na matuā mou uma atu lagona. E aunoa ma se faalogona na iā te aʻu.”  

E eseese aafiaga o le oti i tagata taʻitoʻatasi. O le mea moni ua faapea mai le Tusi Paia, ua tofu le tagata ma “lona lava malaia ma lona tigā.” (2 Nofoaiga a Tupu 6:29) O lea la, seʻi toe mafaufau i le auala na aafia ai oe ina ua maliu se tasi o ou mātua. Ia faamatala i lalo (1) ou lagona ina ua e iloa ua maliu lou matua ma (2) ou lagona i le taimi nei.b

(1) ․․․․․

(2) ․․․․․

Atonu ua faaalia i lau tali ua faasolosolo ina toʻa ou faalogona. O se tulaga masani lenā. Ae e lē faapea ai ua galo iā te oe lou matua. I le isi itu, atonu e lē o suia ou faalogona pe ua atili ai foʻi ona e faanoanoa. Pe atonu foʻi e pei o galu fafati ou lagona faavauvau, e fai mai ma mou atu, ma e fafati faafuaseʻi mai i nisi taimi. O faalogona foʻi na e masani ai—e tusa lava pe ua leva ona maliu lou matua. O le fesili la, E faapefea ona e onosaia lou faanoanoa?

Auala e Onosaia Ai

Aua le taofia ou loimata! E faaitiitia lou faanoanoa pe a e tagi. Peitaʻi, atonu e oo iā te oe lagona na oo iā Alisa o lē na maliu lona tinā i le 19 o ona tausaga. Ua fai mai o ia: “Na ou lagona afai e faaalia loʻu faanoanoa tele, ona manatu lea o isi e leai soʻu faatuatua.” Ae ia e manatua, o Iesu Keriso o se tagata lelei atoatoa na malosi lona faatuatua i le Atua, ae ‘na tagi o ia’ ona ua maliu lana uō pele o Lasalo. (Ioane 11:35) O lea la, a e fia tagi, tagi. E lē faapea ai ua leai sou faatuatua! Ua faapea mai Alisa: “Mulimuli ane, sa ou tagi i aso uma lava.”c

Talanoa i faalogona tigā. Ua faapea mai Karyn lea e 13 tausaga ae maliu loa lona tinā: “I pō uma lava ou te alu ai i le potu i luga ma sogi faatofā iā te ia. Ae e na o le tasi le taimi ou te leʻi faia ai faapea. Ma i le taeao na sosoo ai, na maliu ai loʻu tinā. Ou te iloa e sesē loʻu manatu, ae na ou lagona lava e pei ua ou agaleaga ona ou te leʻi alu e vaai o ia i lenā pō, aemaise o mea na tutupu i le taeao na sosoo ai. Sa malaga loʻu tamā i luga o lana galuega ae na fai mai iā i maʻua ma loʻu uso e vaai loʻu tinā. Na tuai ona ma feala i lenā taeao. Ae ina ua ou alu atu i lona potu na ou iloa ai ua lē mānava loʻu tinā. Na leaga lava oʻu faalogona, auā e alu loʻu tamā o malosi lava si oʻu tinā!”

Atonu o loo e faanoanoa e pei o Karyn, ona o mea sa tatau ona e faia, ae ua galo. Atonu o loo fasia oe i ou mafaufauga sesē ma faapea ane, “ana ou iloa lava e fai le mea lea.” ‘Ana ou iloa lava o oʻu fai i loʻu tamā e alu e vaai se fomaʻi.’ ‘Ana o oʻu iloa lava ou te alu muamua e siaki loʻu tinā.’ Afai o e mafatia i na faalogona, ia manatua le mea lenei: O se tulaga masani le faanoanoa ona o ni mea na e moomoo e maʻimau pe ana e faia. O le mea moni, e mautinoa lava o lau mea lenā e fai pe ana e iloa le mea o le a tupu. Ae e te leʻi iloa. O lea la e lē tatau ona e faanoanoa. E lē tuuaʻia oe ona ua maliu lou matua!d

Faamatala atu ou lagona. Ua taʻua i le Faataoto 12:25: “O tala lelei e olioli ai le loto.” O le taofiofi o ou faalogona e faafaigatā ai ona e onosaia lou faanoanoa. I le isi itu o lou talanoa i se isi e te faatuatuaina e uiga i ou faalogona faanoanoa, o le a e maua ai “upu lelei” e faalaeiauina ai. O lea la, e manaia pe a faataʻitaʻi fautuaga o loo sosoo mai.

Talanoa atu i lou matua o loo soifua pea. E ui o se taimi faigatā lea mo lou tinā po o lou tamā o loo soifua pea, ae e mautinoa lava o loo fia fesoasoani atu iā te oe. O lea, ia faailoa atu ou faalogona i lou matua o loo soifua. E mautinoa lava o a lua talanoaga faapena o le a faaitiitia ai lou faanoanoa ma māfana ai le lua mafutaga.

Ia faataʻitaʻi mea nei ina ia amata ai le lua talanoaga: Tusi i lalo ni mea se lua pe tolu o e fia malamalama ai e uiga i lou tamā po o lou tinā ua maliu, ona e fai lea i lou matua o loo soifua, e te fia talanoa i na mea.e

․․․․․

Talanoa i ni uō lelei. Ua faapea mai le Tusi Paia, o le uō moni e “fanau mo taimi o puapuaga.” (Faataoto 17:17) Ua fai mai Alisa: “Atonu o le a e maua se fesoasoani mai se tagata e te leʻi faatalitalia, o lea aua le matamuli e faamatala atu ou faalogona.” O le mea moni e lē faigofie ona lua talanoa ma lau uō, a o taumafai e maua ni upu talafeagai e fai atu. Ae o le a sili ona aogā pe afai e te talanoa atu i isi e uiga i lou faanoanoa. E manatua e Tavita lea e na o le iva ona tausaga ina ua maliu lona tamā i le maʻi fatu, e faapea: “Sa taofiofi oʻu faalogona e faigatā ona faamatala atu i isi. Ae atonu sa sili ona lelei pe ana ou talanoa e uiga i oʻu faalogona. Semanū e aogā e onosaia ai loʻu faanoanoa.”

Talanoa atu i le Atua. O le a faaleleia atili ou faalogona pe a ‘sasaa atu lou loto’ iā Ieova le Atua e ala i le tatalo. (Salamo 62:8) O le tatalo, e lē na o se auala e ‘faaleleia ai ou faalogona.’ Ae o loo e ole atu i “le Atua o faamāfanafanaga uma, o lē na te faamāfanafanaina i tatou i o tatou puapuaga uma.”—2 Korinito 1:3, 4.

O se tasi o auala e saunia ai e le Atua le faamāfanafanaga, e ala mai lea i lona agaga paia. O le a e maua ai ‘le mana e sili atu i le malosi,’ lea e mafai ai ona e onosaia le faanoanoa. (2 Korinito 4:7) Ua saunia foʻi e le Atua ‘faamāfanafanaga mai i Tusitusiga Paia.’ (Roma 15:4) O lea ia talosaga atu i le Atua mo lona agaga, ma ia sema le taimi e faitau ai faalaeiauga mai i lana Afioga, le Tusi Paia. (2 Tesalonia 2:16, 17) E manaia ae fai se lisi o mau e sili ona faamāfanafanaina ai oe e fai ma e tilotilo i ai.f

Po o le a Faaiʻuina ea Tigā?

E umi se taimi o faavauvau. Ua faapea mai Brianne o lē e 16 ona tausaga ae maliu loa lona tinā: “E lē o se mea e te filifili e faamuta. Na iai lava aso e na o le tagi laʻu mea e fai. O nisi taimi ou te taumafai e tepa taulaʻi i folafolaga a Ieova i le lumanaʻi pe a ma faatasi ma loʻu tinā i le Parataiso, ae lē o lona maliu.”

Ua faamautinoa mai e le Tusi Paia e faapea, i le Parataiso lea e taʻua e Brianne, “e lē toe iai se oti, po o se faanoanoa, po o se tagiauē, e lē toe iai foʻi se tigā.” (Faaaliga 21:3, 4) O le a e iloa ai foʻi, o le manatunatu loloto i na folafolaga e aogā iā te oe e feagai ai ma le maliu o lou matua.

[Faaopoopoga i lalo]

MEA E MAFAUFAU I AI

◼ O ā fautuaga i lenei mataupu o le a e faaaogāina?

◼ Ia tusi i lalo ni mau e faamāfanafanaina ai oe pe afai ua lofitūina oe i le faanoanoa.

[Pusa/Ata i le itulau 27]

E LĒ AFAINA LE TAGI . . . NA FETĀGISI FOʻI I LATOU NEI!

Aperaamo—Kenese 23:2.

Iosefa—Kenese 50:1.

Tavita—2 Samuelu 1:11, 12; 18:33.

Maria, le tuafafine o Lasalo—Ioane 11:32, 33.

Iesu—Ioane 11:35.

Maria le Makatala—Ioane 20:11.

[Pusa/Ata i le itulau 28]

TUSI I LALO OU LAGONA

O le tusi i lalo o ou manatu e uiga i lou matua ua maliu e aogā tele iā te oe e onosaia ai lou faavauvau. E tele mea e mafai ona e tusia. O loo taʻua i lalo nisi manatu.

◼ Tusi i lalo ni mea lelei o e manatua e uiga i lou matua ua maliu.

◼ Tusi i lalo ni mea o loo e moomoo e fai atu i lou matua pe ana faapea o loo soifua o ia.

◼ A faapea e iai sou tei laʻitiiti, tusi i lalo upu atonu e te fai atu iā te ia ona o loo mafatia o ia i faalogona e pei ua agaleaga, ona ua maliu se tasi o o oulua mātua. O le a aogā foʻi lea iā te oe e faasaʻo ai lau vaaiga ona o loo e lagona foʻi lou agaleaga i lou matua lea ua maliu.

[Pusa i le itulau 29]

O SE FAUTUAGA I LE MATUA O LOO SOIFUA

E mautinoa lava lou mafatia ona ua maliu lou toʻalua. Ae o le taimi tonu lea o loo manaʻomia ai oe e lau tama. E faapefea ona e fesoasoani iā te ia e onosaia lona faanoanoa, a o tau onosaia foʻi lou faanoanoa?g

Aua le nanāina ou lagona faanoanoa. Ua iloa e lau tama le tele o lesona tāua ona o le vaavaai atu i lau faaaʻoaʻoga. O le a ia aʻoaʻoina foʻi mai iā te oe le auala e onosaia ai lona faanoanoa. O lea la aua e te manatu e tatau ona nanā lou faanoanoa mai lau tama. Auā o le mea foʻi lenā o le a faia e ia. Peitaʻi, pe a faaalia lou faanoanoa, o le a ia iloa ai foʻi, e sili le faaali o faalogona ae aua le nanāina, ma o se mea e masani ai le faaali o lona faanoanoa, lona lē fiafia, po o le ita.

Faalaeiau lau tama e talanoa ma faaali atu ona lagona. Aua e te faamalosia lona talanoa atu, ae ia talanoa atu i mea o i lona loto. Afai e lē fia talanoa, e lelei pe a lua faitau faatasi ma talanoa i lenei mataupu. E lelei foʻi le talanoa i mea mananaia o lua manatua e uiga i lē ua maliu. Ia taʻu i ai le faigatā o le tulaga lea ua e oo i ai. O le a aogā lona faalogologo atu o faamatala ou faalogona e na te faia ai foʻi faapea.

Ia iloa le mea e gata ai lou malosi. E mautinoa lava, o loo e manaʻo e fesoasoani pea i lau tama i lea taimi faigatā. Ae ia e manatua, o lenā foʻi o loo aafia oe ona o le motusia o le mafutaga ma si au pele. Ma atonu e iai le mea e gata ai lou mafai i ou faalogona, lou mafaufau, ma lou malosi. (Faataoto 24:10) O lea la, e manaʻomia ona e fai i isi tagata matutua o lou aiga po o se uō e faamoemoeina e fesoasoani atu. O lou faia faapea e faaalia ai lou mafaufau lelei. Ua faapea mai le Faataoto 11:2: “E iai le atamai i ē e faamaulalo.”

O le lagolagosua sili mo oe, e mai iā Ieova le Atua, o lē na folafola mai i ona tagata tapuaʻi: “O aʻu o Ieova lou Atua, o loo uuina lou lima taumatau, o Lē e fai atu iā te oe, ‘Aua e te fefe. Ou te fesoasoani iā te oe.’”—Isaia 41:13.

[Faaopoopoga i lalo]

[Ata i le itulau 27]

O le faavauvau e pei o galu e fafati faafuaseʻi mai i le matafaga