Vala Tāua Lona 4: Faaaloalo

‘Ia tuu . . . le soona ʻeʻē, ma upu masoā uma.’—Efeso 4:31.

Le Uiga. E iai faafitauli o aiga e taulau manuia, faapea ma aiga e lē sologa lelei. Peitaʻi, o aiga e taulau, e talanoa i o latou faafitauli e aunoa ma le tautuuaʻi, faitio, pe fai faaupuga faatigā. E faia e lē tasi i le isi e pei ona manaʻo e fai mai iā te ia.—Mataio 7:12.

Le Tāua. E mafai ona avea upu e pei o ni auupega e ono faamanuʻalia ai. Ua faapea mai se faataoto i le Tusi Paia: “E lelei ona nofo i le vao ae leaga ona nofo ma le fafine faamisa ma le faaitaitagofie.” (Faataoto 21:19, O le Tusi Paia Samoa—Lomiga o le 1884) O le mea moni, e faapena foʻi se tane e faia upu faatigā. Ua faapea mai le Tusi Paia i le auala e tausia ai fanau: “Aua le faaonoono i a outou fanau, ina neʻi lotovaivai i latou.” (Kolose 3:21) Pe a faitio soo i fanau, e latou te lagona ai e lē mafai ona latou faamalieina o latou mātua, ma oo ai ina fiu.

Faataʻitaʻi mea nei. Tali fesili nei e iloa ai le tulaga faaaloalo o lou aiga.

◼ Po o avea lo ma feeseeseaʻi ma māfuaaga e teva ese ai?

◼ Pe a ou tautala i loʻu toʻalua ma laʻu fanau, po ou te faapea atu “e ese lou valea,” po o nisi upu faapena?

◼ Pe na ou ola aʻe i se aiga e masani ona tautatala i upu mamafa?

Fai sau faaiʻuga mautū. Mafaufau e fai ni sini e faaalia ai lou tautala faaaloalo. (O se manatu: Taʻu atu le auala o e aafia ai i ana mea e fai, ae aua le faitio. O se faataʻitaʻiga, e lelei pe a fai atu, “Ou te lagona le tigā pe a e . . . ,” ae lē o le fai atu, “E ese lou . . . ”)

E manaia ae taʻu i lou toʻalua ou sini. Pe a uma le tolu masina, ona fesili lea ai po o lelei lau taumafaiga.

Mafaufau i ni auala e taofia ai lou tautala i upu mamafa pe a e tautala i lau fanau.

E lelei ona e faatoese i lau fanau pe a e soona lafo atu se tala pe fai ni upu e māsiasi ai.

[Ata i le itulau 6]

E pei ona ʻaīa o se papa e galu o le sami, e faapena foʻi ona faavaivaia se aiga ona o upu faatigā