Le Manatu o le Tusi Paia

Aiseā ua Lē Faaumatia ai e le Atua le Tiapolo?

PE E te aveesea le mafatiaga o se tagata, pe afai e te mafaia? Pe a aafia se nofoaga i se mala faalenatura, e vave ona ō atu le ʻau laveaʻi e faasao ola o tagata e latou te lē masani. Atonu e fesili se tasi, ʻAiseā e lē aveese ai loa e le Atua le Tiapolo, o lē ua māfua ai le tele o puapuaga o tagata?’

Ina ia taliina le fesili, seʻi faaata i lou mafaufau se faamasinoga tāua. I lana taumafaiga e taofi le faamasinoga, ua tuuaʻia ai e lē ua molia i le fasioti tagata le faamasino e faapea e lē faamaoni, ma ua ia togi tupe le ʻau faatonu. O lea, ua tuu atu le avanoa i le tele o molimau e avatu se faamaoniga.

E iloa e le faamasino o le a tele faalētonu e tutupu pe a faaumiumi le faamasinoga, ma ua manaʻo ia vave faamāeʻa. Peitaʻi, e iloa lelei e ia, e tatau ona lava le taimi e tuu atu i itu uma e lua e aumai ai faamaoniga, ina ia maua se faaiʻuga e faavae ai isi faamasinoga i le lumanaʻi.

E faapefea ona fesootaʻi lenei talafaatusa i le luʻi a le Tiapolo, o lē ua igoa o le “tarako,” “gata,” ma “Satani” iā Ieova, “o Lē e Silisili Ese i le lalolagi uma”? (Faaaliga 12:9; Salamo 83:18) O ai moni lava le Tiapolo? O ā tuuaʻiga ua ia faia faasaga iā Ieova le Atua? O afea e faaumatia ai o ia e le Atua?

Faavae se Faatulagaga Tau Amio

O lē ua avea ma Tiapolo, sa muamua avea o se foafoaga agaga lelei atoatoa, o se agelu a le Atua. (Iopu 1:6, 7) Ona o lona manatu faamaualuga ina ia tapuaʻi atu tagata iā te ia, na ia faia ai o ia lava ma Tiapolo. O lea sa ia luʻia ai le pule a le Atua, ma ia faia ai faamatalaga taufaaleaga faapea e lē tatau ona usitaʻia le Atua. Sa faapea mai Satani, e ala ona tapuaʻi tagata i le Atua ona o faamanuiaga e maua mai i ai. Ae a oo loa puapuaga i tagata ona latou “faifai” lea i Lē na faia i latou.—Iopu 1:8-11; 2:4, 5.

E lē mafai ona taliina nei moliaga a Satani pe a vave ona faaumatia o ia. O le mea moni, pe ana faaumatia le Tiapolo i Etena, atonu o le a manatu ai isi e saʻo o ia. Ona o le Atua e ana le pule atoatoa, sa ia faatulaga loa gaoioiga faaletulafono ina ia foʻia le finauga na lāgā e Satani i le amataga.

Ina ia ōgatusa ma ana taʻiala ma lana faamasinogatonu, sa faailoa mai e Ieova o le a iai ni molimau mo itu uma e lua o lenei finauga. O lea, ua maua ai e le fanau a Atamu le avanoa e lagolagoina ai le Atua, ma filifili e tumau ma le faamaoni iā te ia ona o lo latou alofa, e ui i faigatā.

Pe Umi se Taimi o Totoe?

Ua silafia lelei e Ieova, e faaauau pea ona mafatia tagata a o faagasolo lenā faamasinoga. Peitaʻi, ua maumauaʻi o Ia ia faaiʻuina lea faamasinoga i se taimi vave. Ua taʻua o ia i le Tusi Paia, o “le Tamā o le alofa mutimutivale, ma le Atua o faamāfanafanaga uma.” (2 Korinito 1:3) O lea la, e lē faatagaina e “le Atua o faamāfanafanaga uma” le Tiapolo ia iai mo se taimi umi, pe faaauau pea ana taaʻiga leaga. I le isi itu, e lē faaumatiaina e le Atua le Tiapolo, seʻi vaganā ua maua se iʻuga o le faamasinoga.

E faamaonia le tonu o le pule a Ieova pe a foʻia le finauga lea na lāgā e Satani. O lenei faamasinoga faasaga iā Satani, o le a tumau e faavavau o se faatulagaga faaletulafono. Afai ae toe tulaʻi mai se luʻi faapea, e mafai ona avea le faamasinoga o Satani ma faavae e faia ai se faaiʻuga.

O le a oo mai le taimi e faatonu ai e Ieova le Atua lona Alo ua toe faatūina mai, e faaumatia le Tiapolo ma faaleleia mea uma ua ia faaleagaina. O loo taʻua i le Tusi Paia le taimi ʻe tuuina atu ai e Keriso le malo i le Atua lona Tamā, pe a uma ona ia faaumatia malo uma, ma pule, ma ē malolosi uma. Auā e tatau ona pule o ia o se tupu seʻia tuuina e le Atua fili uma i lalo o ona vae. Ona faaumatia lea o le fili mulimuli, o le oti lea.’—1 Korinito 15:24-26.

Ua folafola mai i le Tusi Paia o le a avea le lalolagi atoa ma parataiso. E pei ona uluaʻi fuafuaina e le Atua, o le a soifua tagata i se parataiso filemu. “O ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.” Ioe, “e fai lava le lalolagi mo ē e amiotonu, e nonofo ai pea i latou e oo i le faavavau.”​—Salamo 37:11, 29.

Ioe, maʻeu se lumanaʻi ina a matagofie o loo taʻua i le Tusi Paia mo auauna a le Atua: “Faauta! Ua iai i tagata le faleʻie o le Atua, e mau o ia ma i latou, e fai foʻi i latou ma ona tagata. E faatasi foʻi le Atua ma i latou. E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”​—Faaaliga 21:3, 4.

PO O E TAUMĀNATU EA I NISI TAIMI?

● O le ā le tuuaʻiga na faia e le Tiapolo i le Atua ma tagata?​—Iopu 1:8-11.

● O ā uiga o le Atua e tatou te mautinoa ai o le a ia faaumatia le Tiapolo?​—2 Korinito 1:3.

● O le ā le faamoemoe o loo taʻua i le Tusi Paia?​—Faaaliga 21:3, 4.

[Ata i le itulau 20]

E tatau ona lava le taimi e tuu atu i itu uma e lua e aumai ai faamaoniga, ina ia maua se faaiʻuga e avea ma faavae mo le lumanaʻi