Le Manulele o le Tulī (Bar-Tailed Godwit) Auala e Iloa ai le Itulagi e Lele Agaʻi i Ai

E MATAʻINA le auala e faimalaga ai lenei manulele o le tulī (godwit) mai i le tasi atunuu i le isi atunuu. E silia i le valu aso o lele lenei manu i le mamao e 7,000 maila (11,000 km).

Seʻi Iloilo: E talitonu tagata suʻesuʻe, e faaaogā e nisi ituaiga o manulele le malosiaga faamaneta mai i aave o le lalolagi, e tai pei o se tapasā o loo iai i o latou mafaufau. E faaaogā foʻi e le tulī le lā i le ao ma fetu i le pō, e tapasā ai lana faigāmalaga. E foliga mai e iloa e lenei manulele matagi malolosi e fesoasoani i lana lele. Peitaʻi, ua matuā iso tagata atamamai, pe faapefea e na manulele ona faataunuuina a latou faigāmalaga ofoofogia. Ua taʻua e Bob Gill, o se saienitisi e suʻesuʻeina manulele: “Ua 20 tausaga o oʻu suʻesuʻeina faamatalaga e uiga i nei manulele, ae o loo oʻu maofa pea lava.”

O le ā sou manatu? Pe e māfua ona iloa e le tulī (godwit) le itulagi e lele agaʻi i ai ona o le faaevolusione? Pe na teʻi lava ua iai, pe na foafoaina?