Le Siʻusiʻu o le Pili o le Agama

E faigofie i le pili o le agama ona oso mai i se fola agaʻi i se puipui. E tusa lava foʻi pe e maseesee le fola, ae e mafai lava ona oso atu ma mau lelei lana tu i le puipui. E faapefea? E ala i lona siʻusiʻu.

Ia mātau: Pe afai e talatala le fola, e faigofie la i lenei pili ona faasagatonu lona tino, faasaʻo i lalo lona siʻusiʻu, ma saʻo ai lana oso atu i le puipui. Ae pe a maseesee le fola, o le a see la ona vae ma sesē ai lana oso. Peitaʻi, a o iai i le ʻea, e mafai ona toe faasaʻo lona tino e ala i le faatū saʻo i luga o lona siʻusiʻu. E iloa lelei e le pili le auala e fetuunaʻi ai lona siʻusiʻu ina ia mau ai lana tu i le puipui. Na taʻua i se lipoti a le University of California, Berkeley: “E tatau i le pili ona vave fetuunaʻi lona siʻusiʻu a o iai i le ʻea ina ia saʻo ai pea lona tino.” Afai la e matuā maseesee le fola, e tatau foʻi la i le pili ona matuā faasaʻo i luga lona siʻusiʻu, ina ia mautinoa e mau lelei lana tu i le puipui.

O tulaga ofoofogia i le siʻusiʻu o le agama, e ono fesoasoani ai i inisinia ina ia fausia ni tamaʻi masini e vave le gaoioi (robot), ia e saʻilia ai ni tagata o loo feola pe a uma se mafuiʻe tele, po o se isi mala mataʻutia. Ua faapea mai se tagata suʻesuʻe e igoa iā Thomas Libby: “E ui e lē taitai ona vave le gaoioi a masini (robot) e pei o meaola, ae e mafai i mea ua iloa mai i nei suʻesuʻega ona fausia ai se masini (robot) e sili atu ona lelei ma aogā.”

O le ā sou manatu? Pe na teʻi lava ua iai le siʻusiʻu o le agama? Pe na foafoaina?